Read Nzema Yiz 15 Bible Online

Yiz 15 - Nzema bible

Yiz 15

¹Ɛdɛnkɛma dendɛle hilele me.

²Ɔse, “Sonla ra, vanye baka fa ye nienwu a tɛla baka biala a? Kɛ vanye baka ngane si tɛla mbaka mɔɔ wɔ ɛbɔ nu la ɛ?

³Asoo bɛfa ye baka bɛyɛ debie? Asoo menli kola kenda debie wɔ ye takola nu?

⁴Debie ala mɔɔ bɛkola bɛfa bɛyɛ la a le kɛ bɛfa bɛyɛ ɛyɛne. Ɛnyia ɔ ti nee ɔ ti yela ala a, ɛnee ye avinli ne ɛhakyi emunlike. Baka ɛhye, duzu nvasoɛ a wɔ ɔ nwo zo a?

⁵Ye amolɛ ne bɔbɔ bɛfa bɛyɛ ɛhwee a ɔnyɛ boɛ, na akee senle ka ye na ɔyɛ emunlike a yɛɛ bɛfa bɛayɛ duzu a?

⁶“Yemɔti medame Awulae Nyamenle, mese, mebayɛ Gyɛlusalɛm kɛ kpɔkɛ nu vanye mbaka la, mebapɛ bɛ meagua senle nu kɛ bɛyela bɛ.

⁷Mebava me nye meawula bɛ nyunlu kpalɛ, mɔɔ saa bɛ bie mɔ nriandi fi senle ne anu bɔbɔ a, senle ala a bayela bɛ a, na bɛanwu kɛ medame a mele Ɛdɛnkɛma a, na mefa me nye mewula ɛ nyunlu a ɛnee meva me nye mewula ɛ nyunlu.

⁸Mebamaa azɛlɛ ne adɔ mgbane, ɔboalekɛ bɛanli nɔhalɛ bɛammaa me. Medame Awulae Nyamenle a mese a.”