Read Nzema Yiz 16 Bible Online

Yiz 16 - Nzema bible

Yiz 16

²Ɔse, “Sonla ra, maa Gyɛlusalɛmma ɛnwu bɛ ninyɛndane mɔɔ bɛyɛ la, na ka kile bɛ kɛ,

³medame Awulae Nyamenle, meka meahile Gyɛlusalɛmma kɛ: “Bɛwole bɛ yɛɛ bɛ bo vi Keena azɛlɛ zo. Bɛ nlenya mɔ a le Amɔlema, yɛɛ bɛ nla mɔ a le Hɛtema.

⁴Kenle ko ne mɔɔ bɛwole bɛ la, bɛampɛ bɛ kotoa nyɛma, bɛanva ngyenle bɛangua nzule nu bɛambia bɛ, yɛɛ bɛankyekye bɛ wɔ ɛdanlɛ nu.

⁵Awie annwu bɛ anwunvɔne, na ahunlunyele nu yeayɛ ɛhye mɔ bie yeamaa bɛ. Bɛwole bɛ ala la, bɛhyile bɛ, yemɔti bɛvuandinle bɛ bɛguale ɛbɔ nu.

⁶“Membanzenle bɛ nwo ɛkɛ, na menwunle kɛ bɛgua bɛ mogya ne anu, na menzele bɛ kɛ,

⁷‘Bɛnyia ngoane, na bɛnyi kɛ ɛbɔ nu baka.’ Na bɛnyinle bɛyɛle ndendenle na bɛgyinlanle zolɛ. Bɛle kɛ mraalɛ a, bɛzuozuale nyɛfonlɛ, bɛ ti enrinli yɛle ndendenle, noko ɛnee bɛlɛ bɛ nwo zɔhane.

⁸“Mɔɔ mese bɛ nwo ɛkɛ ne bieko na meneanle bɛ la, ɛnee yedwu mɔɔ bɛkulo bɛ a. Mengedale bɛ ndanlɛ na memkpale bɛ nyiane. Menyiale bɛ na me nee bɛ yɛle agyalɛ ngyekyeleɛ, na bɛyɛle medame Awulae Nyamenle, me ɛdeɛ.

⁹“Akee menvale nzule membiale bɛ, menrinzinle bɛ nwo mogya ne na memkpokpale bɛ nwole.

¹⁰Menvale ndanlɛ mɔɔ bɛnwo bɛ nloa la mengedale bɛ na menvale nwoma mgbɔlaboa menwulale bɛ. Mengedale bɛ lenen ndanlɛ kpalɛ na menvale selekye menguale bɛ nwo zo.

¹¹Menvale anwoneɛ menzieziele bɛ, membɔle bɛ sa avikpa na menvale ndweabane menguale bɛ kɔme.

¹²Menvale ngɛba menwulowulale bɛ bonyi nu; menvale asomadeɛ menwulowulale bɛ nzo nu, na menzoale bɛ ahyɛlɛ ngɛnlɛma.

¹³Menvale ezukoa nvutuke nee dwɛtɛ fufule menzieziele bɛ; bɛhedale lenen ɛdakpa, selekye nee ɛdanlɛ mɔɔ bɛnwo ɔ nloa la, bɛlile kpanwo mɔɔ bɛva esamo kpalɛ bɛdo la, bɛnlonle wolɛ nee nwole. Bɛ anwofɛlɛko ne lale zo na bɛgyinlanle dehelɛ gyinlabelɛ.

¹⁴Bɛ anwofɛlɛko ti, bɛ nganeɛ dendenle hɔle maanle maanle zo, ɔluakɛ anwofɛlɛko mɔɔ menvale memanle bɛ la yɛle kpole. Medame Awulae Nyamenle a mese a.

¹⁵“Na bɛlile bɛ duma kpole nee bɛ anwofɛlɛko nzi bɛlile tuutuu, na bɛ nee awie biala mɔɔ ɛlɛpɛ nu aze la lale.

¹⁶Bɛvale bɛ adɛladeɛ ngɛnlɛma ne mɔ bie bɛzieziele bɛ mmonle azua nu, bɛbɔle tuutuu ɛbɛla bie mɔɔ bie ɛtɛsile, yɛɛ bie ɛnrɛzi ɛlɛ la wɔ ɛkɛ.

¹⁷Eza bɛholole bɛ ezukoa nvutuke nee dwɛtɛ fufule anwoneɛ mɔɔ medame meva memaa bɛ la bɛguale ananze mrenya, bɛvale bɛbɔle tuutuu ɛbɛla.

¹⁸Bɛvale bɛ ndanlɛ ngɛnlɛma ne mɔ bie bɛhedale bɛ na bɛvale me nwole nee ɛyɛlɛ evuanlɛ ne bie bɛzieziele bɛ nyunlu.

¹⁹Memanle bɛ aleɛ mɔɔ bɛvale esamo kpalɛ, nwole nee wolɛ a bɛyɛle la, noko bɛmɛ bɛvale bɛmanle bɛ mmonle ne mɔ. Medame Awulae Nyamenle a mese a.

²⁰“Akee bɛvale bɛ mra mrenya nee mraalɛ mɔɔ bɛwo bɛ bɛmaa me la bɛbɔle azu bɛmanle bɛ mmonle. Asoo bɛnnwu kɛ bɛ tuutuu ɛbɔlɛ ɛhye bo zolɛ?

²¹Duzu ati yɛɛ bɛkɛhu me mra bɛkɛyela bɛ bɛkɛbɔ azu bɛkɛmaa bɛ mmonle ɛ?

²²Mekɛ mɔɔ bɛbɔ bɛ munzule ɛbɛla ne, na bɛbɔ bɛ tuutuu ɛbɛla ne la, bɛangakye bɛ ngakula nu, mɔɔ ɛnee bɛlɛ bɛ nwo zɔ, bɛla mogya nu la.”

²³Awulae Nyamenle ne zele kɛ, “Bɛwie! Bɛdabɛ, bɛwie bɔkɔɔ! Bɛ amumuyɛ bebelebe ne amuala anzi,

²⁴bɛsisi azua ekpumgbunli ekpumgbunli bɛdede nu wɔ mgbata ne mɔ azo,

²⁵wɔ gua biala ati, bɛbɔ tuutuu ɛbɛla wɔ ɛkɛ, bɛtwenle bɛ anwofɛlɛko ne aze, bɛbu bɛ nwo bɛmaa awie biala mɔɔ ɛlɛpɛ nu aze la na bɛ nee ye bɔ tuutuu ɛbɛla.

²⁶Eza bɛ nee bɛ gɔnwo mɔ Yigyibitima, mɔɔ adwɔmanebɔlɛ ɛgya bɛ la bɔ tuutuu ɛbɛla ka me ɛya.

²⁷“Yemɔti bɛnlea, mendeanle bɛ, menliele bɛ debie biala na menyele bɛ memanle bɛ kpɔvolɛma, Filisitiama. Bɛ nwo nee bɛ nyɛleɛ bɔbɔ yɛle Filisitiama nyiane.

²⁸“Eza bɛ nee Aseleama bɔle adwɔmane. Kɛmɔ bɛ nye bolo debie na bɛdi a bɛ ko ɛnyi la ati, bɛ nee bɛ bɔle tuutuu ɛbɛla, noko yeande bɛ.

²⁹Eza bɛ nee Babelonia gualilɛma bɔle tuutuu ɛbɛla, na ɛhye noko bɔbɔ ande bɛ fee.”

³⁰Awulae Nyamenle ne se, “Tuutuu ɛbɔlɛ ɛgya bɛ, yɛɛ bɛnze nwolɛ nyiane fee.

³¹Bɛsisi azua ekpumgbunli ekpumgbunli wɔ bɛ gua ne mɔ ati; bɛziezie ɛleka wɔ mgbata ne mɔ azo; noko bɛmbɔ bɛ ɛbɛla kɛ tuutuunli mɔɔ ɛlɛdi tuutuu akpondɛ ezukoa la.

³²Bɛyɛ bɛ nwo kɛ awuvolɛ raalɛ mɔɔ wulowula ɔ sa aze la; ɔdie nyɛvolɛ na ɔgyakyi ɔ hu.

³³Mrenya yɛɛ maa tuutuuma ahyɛlɛ ninyɛne a, na bɛmɛ, bɛmaa bɛ kulovolɛma ndoloboa amaa bɛanyia bɛ dɔɔnwo bɛ nee bɛ abɔ tuutuu ɛbɛla.

³⁴Yemɔti bɛmɛ, bɛnle kɛ mraalɛ mɔɔ di tuutuu la. Bɛmɛ a bɛbɔ mrenya ɛkpa a, na nrenya biala ɛmbɔ bɛ ɛkpa kɛ bɛmaa bɛbɔ tuutuu ɛbɛla; yemɔti bɛle menli ngakyile bɔkɔɔ.”

³⁵Zɔhane ati Gyɛlusalɛmma tuutuuma! Bɛdie Ɛdɛnkɛma.

³⁶Kɛ Awulae Nyamenle ne se la ɛne: “Kɛmɔ bɛkpale bɛ nwo, bɛbɔle bɛ nwo anyiemgba bɛ nee bɛ kulovolɛma bɔle tuutuu ɛbɛla la ati, bɛ mmonle ne mɔ ati, yɛɛ bɛ mra ne mɔ mɔɔ bɛhunle bɛ bɛmanle bɛ mmonle ne mɔ la mogya ne ati,

³⁷bɛnlea, mebaboɔboa bɛ kulovolɛma ne mɔ mɔɔ bɛ nee bɛ yɛle debie mɔɔ bɛ nye liele bɛ nwo nee mɔɔ bɛ nye anlie bɛ nwo la anloa, meamaa bɛabɔ bɛayia bɛ, na meakpa bɛ nwo ɛdanlɛ, amaa bɛanwu kɛ bɛlɛ bɛ nwo zɔ.

³⁸Mebabua bɛ ewule fɔlɛ, meadea bɛ kɛ bɛle mraalɛ mɔɔ bɛdo awuvolɛvalɛ mɛla ne na bɛha mogya bɛgua a, na meava me nungule ɛhwenlɛ nee ɛya kpole ne meahu bɛ.

³⁹Mebaye bɛ meamaa bɛ kulovolɛma ne, na bɛabubu bɛ azua nee bɛ ekpumgbunli ne mɔ. Bɛbaza bɛ bɛalie bɛ ndanlɛ nee bɛ anwoneɛ ngɛnlɛma ne mɔ, na bɛamaa bɛalɛ bɛ nwo zɔ.

⁴⁰“Bɛbava menli dɔɔnwo bɛara bɛ nwo zo, bɛbazi bɛ awolɛ na bɛava bɛ dadeɛ bɛapepɛ bɛ nu nzokanzoka.

⁴¹Bɛbayela bɛ azua ne mɔ na bɛadea bɛ wɔ mraalɛ dɔɔnwo anyunlu. Mebamaa bɛagyakyi bɛ tuutuulilɛ ne, na bɛagyakyi ahyɛlɛ ninyɛne ne mɔ mɔɔ bɛfa bɛbɔ mrenya ɛkpa la.

⁴²Ɛhye yɛɛ bamaa me ɛya kpole ne mɔɔ meva bɛ nwo la adwo, na meagyakyi bɛ nwo nungule ɛhwenlɛ ne a. Me kunlu badwo na menrɛva ɛya bieko.

⁴³Kɛmɔ bɛngakye bɛ ngakula nu, na bɛva ninyɛne ɛhye mɔ bɛha me ɛya la, bɛnlea, mebamaa bɛ nyɛleɛ abɔ bɛ ti. Medame Awulae Nyamenle a mese a. Duzu ati a bɛvale adwɔmanebɔlɛ bɛbokale bɛ munzule ninyɛne ne mɔ mɔɔ bɛyɛle la anwo a?”

⁴⁴Ɛdɛnkɛma zele kɛ, “Nea, Gyɛlusalɛm, awie biala mɔɔ bu ɛrɛlɛ la babu ɛ nwo ɛrɛlɛ ɛhye: ‘Kɛ ninli ne si de la, yɛɛ ralɛ raalɛ ne de a.’

⁴⁵Ɛle ɛ nli ara raalɛ. Ɛ nli kyi ɔ hu nee ɔ kunlu mralɛ. Eza ɛle ɛ mediema mraalɛ adiema raalɛ. Ɛ mediema mraalɛ ne mɔ kyi bɛ hu mɔ nee bɛ mra. Ɛ nli le Hɛtenli yɛɛ ɛ ze le Amɔlenli.

⁴⁶“Ɛ diema raalɛ kpanyinli a le Samɛlea, nee ye namunamu ne mɔ, mɔɔ gua sɔlɔ la, yɛɛ ɛ diema raalɛ kakula a le Sodɔm, nee ye namunamu ne mɔ, mɔɔ gua nyiakɛ la.

⁴⁷Noko ɛ kunlu andwo bɛ nyɛleɛ ɛdeɛ ne mɔ anwo la ati, wɔanva bɛ gyakɛ, wɔanyɛ bɛ ninyɛndane ne mɔ bie. Noko mekɛ ekyi ɛhye anu ala wɔbɔ bɛ wɔdɛla ninyɛndane ɛyɛlɛ nu.”

⁴⁸Ɛdɛnkɛma se, “Meka, meka kɛ, ɛ diema raalɛ Sodɔm nee ye namunamu ne mɔ ambɔ ɛbɛla mɔɔ ɛ nee wɔ namunamu ne mɔ ɛbɔ la bie.

⁴⁹Nea, ɛ diema raalɛ Sodɔm fɔlɛ mɔɔ lile la a le kɛ, ɔ nee ye namunamu ne mɔ dule bɛ nwo kɛ bɛlɛ mɔɔ sa bɛ di la, bɛkpazi na bɛde anzonudwolɛ nu, noko bɛamboa anwunvɔnema nee ehyianvolɛma.

⁵⁰Bɛmemanle bɛ nwo zo na bɛyɛle bɛkyi ninyɛne bɛhilele me, yemɔti menwunle ye la menzɛkyele bɛ.

⁵¹“Samɛlea ambɔ munzule ɛbɛla ne mɔɔ wɔmɔ wɔbɔ la foa ko. Wɔmɔ, wɔbɔ munzule ɛbɛla kpole kpalɛ wɔdɛla Samɛlea, na wɔmaa ɛ mediema mraalɛ ɛhendeɛ ne mɔ ɛlua wɔ munzule ɛbɛla zo ɛzɔ ɛnyelɛ.

⁵²Ɛdawɔ noko wɔ anyiemgba doa wɔ, ɔluakɛ wɔmaa ɛ mediema mraalɛ ɛhendeɛ ne mɔ ɛli benle. Kɛmɔ wɔ munzule mɔɔ wɔbɔ la tɛla bɛ ɛdeɛ ne la ati, wɔmaa bɛzɔ ɛnyelɛ bɛdɛla wɔ. Ɛdawɔ noko wɔbɔ anyiemgba, na wɔ anyiemgba ne doa wɔ, ɔluakɛ wɔmaa ɛ mediema mraalɛ ne mɔ ɛzɔ ɛnyelɛ.”

⁵³Ɛdɛnkɛma zele kɛ, “Mebamaa Sodɔm nee ye namunamu nee Samɛlea nee ye namunamu ne mɔ akpazi, na meamaa ɛdawɔ noko wɔakpazi wɔ bɛ avinli,

⁵⁴amaa nyiane ahu wɔ na wɔabɔ mɔɔ wɔyɛ la anwo anyiemgba, na wɔanlea bɛ wɔava bɛ wɔakyekye ɛ rɛle.

⁵⁵Ɛ mediema Sodɔm nee ye namunamu ne mɔ bazia akpazi. Samɛlea nee ye namunamu ne mɔ bazia akpazi, yɛɛ ɛdawɔ noko ɛ nee ɛ mra mraalɛ bazia akpazi.

⁵⁶Asoo tɛ ɛ diema Sodɔm a ɛvale ɛpɛle ɛfenle wɔ mekɛ mɔɔ ɛnee ɛgyi boɛ, mɔɔ ɛnee ɛtɛbɔle ɛ nwo anyiemgba la?

⁵⁷Kɛkala, wɔyɛ kɛ ɔdaye la. Wɔyɛ agolobɛnwo debie wɔmaa Yidɔmma nee namunamu mɔɔ zuozua bɛ la, yɛɛ Filisitiama nee maanle maanle mɔɔ ɛbɔ ɛyia bɛ na bɛkpɔ bɛ la.

⁵⁸Wɔ anyiemgba nee munzule ɛbɛla mɔɔ wɔbɔ la doa wɔ. Medame Ɛdɛnkɛma a mese a.”

⁵⁹Awulae Nyamenle ne se, “Ɛhɛe, mɔɔ wɔyɛ la mebadua wɔ nwolɛ kakɛ kɛ wɔdo ndane na wɔtulu ngyekyeleɛ ne.

⁶⁰Noko akee mebahakye ngyekyeleɛ ne mɔɔ wɔ ngakula nu me nee wɔ kyekyele la, na me nee wɔ ayɛ ngyekyeleɛ mɔɔ ɛntulu ɛlɛ a.

⁶¹Ɛbahakye wɔ ndenle mɔɔ ɛluale nuhua la, na saa mefa ɛ mediema mraalɛ, ngakula nee mgbanyinli memaa wɔ kɛ bɛle ɛ mediema mraalɛ a anyiemgba aha wɔ. Mebamaa bɛayɛ ɛ mra mraalɛ, noko tɛ ngyekyeleɛ ne mɔɔ me nee wɔ kyekyele la ati ɔ.

⁶²Me nee wɔ bayɛ ngyekyeleɛ, na wɔanwu kɛ medame a mele Ɛdɛnkɛma a.

⁶³Ɛbahakye mɔɔ wɔyɛ la na ɔbayɛ wɔ nyiane, amaa saa mefa wɔ ninyɛndane mɔɔ wɔyɛ la mekyɛ wɔ a, wɔambuke ɛ nloa, ɔboalekɛ nyiane ɛbia wɔ. Medame, Awulae Nyamenle a mese a.”