Read Nzema Yiz 17 Bible Online

Yiz 17 - Nzema bible

Yiz 17

¹Ɛdɛnkɛma dendɛle hilele me.

²Ɔse, “Sonla ra, dwenle agyebɛ bie anwo na bu Yizilayɛma ɛrɛlɛ.

³Ka kile bɛ kɛ, Ɛdɛnkɛma se: Kɔleɛ kpole bie mɔɔ lɛ ndɛbalɛ mgbole ndendenle, na ye ndɛkɛ le ngakyile ngakyile ngɛnlɛma la rale Lɛbanɔn radɛnlanle sida baka bie azo.

⁴Ɔbule baka ne ati dɛkɛdɛkɛ ne na ɔvale ɔhɔle maanle bie mɔɔ bɛdi gua nu la anu, na ɔdole ye wɔ suakpole bie mɔɔ gualilɛma wɔ zolɛ la azo.

⁵Akee ɔvale azɛlɛ ne azo ma ne mɔ bie na ɔluale ye wɔ azɛlɛ mɔɔ nzule dɔɔnwo wɔ nu, na ɔkye aleɛ la azo.

⁶Ɔfifile na ɔyɛle vanye baka ɔdɛlɛdɛlɛle. Ye ndinli hɔle aze kpalɛ na ye ngane ne mɔ hyibale bɛ nwo doale kɔleɛ ne. Yemɔti ɔyɛle vanye baka, ɔkpakyele ngane dɔɔnwo na ɔyele nya dɔɔnwo.

⁷“Kɔleɛ kpole ko noko mɔɔ lɛ ndɛbalɛ mgbole na ɔ nwo ndɛkɛ zonle la ɔdaye ɔrale. Vanye baka ɛhye denrɛdenrɛle ye ngane nee ye ndinli ne mɔ wɔ kɔleɛ ɛhye anwo, amaa yeanyia nzule dɔɔnwo kpalɛ.

⁸Noko ɛnee bɛlua ye wɔ azɛlɛ kpalɛ mɔɔ nzule wɔ zolɛ la azo, amaa yeabua, yeakpakye ngane, yeazo, na yeayɛ vanye baka mɔɔ anwo yɛ fɛ a.

⁹“Na medame, Awulae Nyamenle, mebiza kɛ: Asoo vanye baka ɛhye bayɛ kpalɛ? Asoo alumua kɔleɛ ne ɛnrɛdu vanye baka ne ɔ bo, ɔnrɛkpolo ye ma ne mɔ amuala ɔnrɛgua, na ɔnrɛpepɛ ye ngane ne mɔ anu ɔnrɛmaa bɛnrɛgyengye? Ɔnrɛhyia anwosesebɛ kpole biala anzɛɛ maanlema dɔɔnwo na bɛadu ye bɛado.

¹⁰Eza nea, asoo saa bɛtu bɛdua bɔbɔ a, ɔbayɛ kpalɛ? Asoo aduduleɛ anwoma ne bɔ ye a ɔnrɛnwoso ɔnrɛwu wɔ ɛleka mɔɔ bɛkɛlua ye la?”

¹¹Akee Ɛdɛnkɛma zele me kɛ,

¹² “Biza atuadelɛma ɛhye mɔ kɛ, asoo bɛte ɛrɛlɛ ne abo? Ka kile bɛ kɛ, bɛnlea, Babelonia belemgbunli rale Gyɛlusalɛm na ɔravale Dwuda belemgbunli nee ye mgbanyima ne mɔ amuala ɔhɔle Babelonia.

¹³Ɔvale suakunlu ɛkɛ ne alehelɛ ne mɔ ko na ɔ nee ye yɛle ngyehyɛlɛ, na ɔmanle ɔhanle ndane ɔhyele ɔ bo. Ɔhyele menli titile mɔɔ wɔ maanle ne anu la nuokɛ ɔhɔle,

¹⁴amaa maanle ne angola ɔ nwo zo kpogya bieko; na saa bɛdi ye ngyehyɛlɛ ne azo a, maanle ne agyinla.

¹⁵Noko Dwuda belemgbunli ne dele atua na ɔzoanle ɛbɔfoɔma wɔ Yigyibiti, amaa Yigyibitima amaa bɛ mgbɔnwɔ nee ɛlɔnema dɔɔnwo. Na ɛnee ɛnea a, asoo belemgbunli ɛhye bayɛ kpalɛ? Asoo sonla mɔɔ yɛ ninyɛne ɛhye mɔ la fi ɛsalɛ? Asoo ɔbahola yeatulu ngyekyeleɛ ne na yeava ɔ nwo dwɔɔ?

¹⁶“Suzuamgba ala mɔɔ medame a mele tease Awulae Nyamenle ne la, mese, ɛleka holɛ ko ne mɔɔ belemgbunli ne mɔɔ ɔdonle ye ndane ne, na ɔtulule ye ngyehyɛlɛ ne la de, wɔ Babelonia suakpole ne azo la, ɛkɛ ne yɛɛ ɔbawu a.

¹⁷Yigyibiti belemgbunli nee ye ɛlɔnema pemgbenleamgbe ne bɔbɔ ɛnrɛhola ɛnrɛboa ye wɔ konle nu, wɔ mekɛ mɔɔ Babeloniama kɛrateta ye, kɛbɛnra suakpole ne kɛyia, bɛkɛpɛ ahuma bɛkɛdeda nuhua kɛ bɛku menli dɔɔnwo la.

¹⁸Kɛmɔ ɔdonle ndane ne na ɔtulule ngyehyɛlɛ ne la ati, kɛmɔ ɔkponlenle ngyehyɛlɛ ne azo na akee ɔziale ɔyɛle ninyɛne ɛhye mɔ la ati, ɔ nwo ɛnrɛvi nu.”

¹⁹Zɔhane ati Awulae Nyamenle ne se, “Suzuamgba ala mɔɔ medame a mele tease Nyamenle ne la, me ndane ne mɔɔ yedo, na yetulu me ngyekyeleɛ ne la, mebakpokpo meagua ɔ ti zo.

²⁰Mebagua ye asawu, na meahye ye me ɛhane nu. Mebava ye meahɔ Babelonia na me nee ye ali ye pɛsɛɛ, wɔ ɛkɛ ne, wɔ ye maamɔvo ɛbɛla ne mɔɔ yebɔ yetia me la anwo.

²¹Bɛbahu ye ɛlɔnema kpalɛ ne mɔ amuala, na bɛdabɛ mɔɔ bɛkɛvi ɛsalɛ la babɔ asande ahɔ ɛleka ɛleka, na bɛanwu kɛ medame Ɛdɛnkɛma a meha a.”

²²Awulae Nyamenle ne se: “Medame mumua ne mebahɔ sida baka bie azo, na meahɔbu ɔ ti dɛkɛdɛkɛ ne. Mebahɔlua ye wɔ boka tendenle bie azo,

²³wɔ Yizilayɛ awoka ndendenle ne mɔ anu. Ɔbakpakye ngane na yeazo ma, na yeayɛ sida baka kɛnlɛma kpalɛ. Nane ngakyile kɔsɔɔti baradɛnla ɔ bo; nloma ngakyile kɔsɔɔti baradɛnla ye ngane ne mɔ anu, na bɛayɛ bɛ sane wɔ ɛkɛ.

²⁴Mbaka mɔɔ wɔ azɛlɛ ne azo la amuala banwu kɛ medame a mele Ɛdɛnkɛma a. Meka mbaka ndendenle aze, na memaa mbaka nzinrenzinra nyi ndendenle. Memaa mbaka amolɛ kyengye, na memaa mbaka wulera yɛ amolɛ. Medame Ɛdɛnkɛma a mese a; mebayɛ mɔɔ meha kɛ meyɛ la.”