Read Nzema Yiz 18 Bible Online

Yiz 18 - Nzema bible

Yiz 18

¹Ɛdɛnkɛma zele me kɛ,

²“Ɛrɛlɛ ɛhye mɔɔ Yizilayɛma ta bu la abo a le duzu? ‘Nenya mɔ ɛli vanye ma nyinyianlera ɛmaa nlɔnra gye ɛnyia.’ ”

³Awulae Nyamenle se, “Suzuamgba ala mɔɔ medame a mele tease Nyamenle ne la, bɛnrɛbu ɛrɛlɛ ɛhye bieko wɔ Yizilayɛ.

⁴Bɛnwu ye kɛ awie biala ngoane le me ɛdeɛ. Bɛ nlenya mɔ ngoane ne le me ɛdeɛ, yɛɛ ngakula ne mɔ ngoane le me ɛdeɛ. Awie biala mɔɔ kɛyɛ ɛtane la, bawu.

⁵“Saa sonla tenlene bie wɔ ɛkɛ, ɔyɛ mɔɔ tenrɛ na ɔkɔ mɛla nu,

⁶na ɔnzonle Yizilayɛma awozonle ne mɔ bie, yɛɛ ɔnli bɛ azu ne mɔɔ bɛbɔ ye awoka ne mɔ azo la bie, ɔnva awie aye, yɛɛ ɔnva raalɛ mɔɔ ɛhɔ amozi la,

⁷ɔnsisi awie, awie fa debie wula ye awoba a ɔye ɔmaa ye, ɔnwua, ɔmaa mɔɔ ɛhɔne ɛlɛku ye la aleɛ na ɔmaa mɔɔ ɛngeda bie la ɛdanlɛ,

⁸ɔbɔ awie bosea a ɔnlie nzinwo, yɛɛ ɔnlie bie ɔmboka nwolɛ, ɔnle amumuyɛ, ɔfa pɛlepɛlelilɛ ɔdi awie mɔ avinli edwɛkɛ,

⁹ ɔdi me mɛla zo na ɔnea ɔdi me ngyehyɛlɛ ne mɔ kɔsɔɔti azo a, sonla zɛhae, ɔle tenlenenli, ɔbadɛnla ngoane nu, medame Awulae Nyamenle a mese a.

¹⁰“Saa sonla zɛhae wo ralɛ nrenya, na kakula ne yɛ awule, ɔyɛ kɔdiawu,

¹¹na ɔyɛ ninyɛne zezɛhae mɔ bie, ɔdi azu mɔɔ bɛbɔ bɛmaa awozonle la aleɛ ne bie, ɔfa ɔ gɔnwo mɔ mraalɛ,

¹²ɔsisi ehyianvolɛma nee menli mɔɔ yɛ anwunvɔne la, ɔsonle awozonle, ɔbɔ bɛkyi ɛbɛla,

¹³ɔbɔ bosea ɔdie nzinwo, anzɛɛ ɔfa bie ɔgua zolɛ a, ɛnee ɛnea a ɔwɔ kɛ sonla zɛhae nyia ngoane ɔ? Ɔwɔ kɛ bɛku ye. Yebɔ munzule ɛbɛla; ɔwɔ kɛ ɔwu, yɛɛ ye mogya gua ɔdaye ɔ ti zo.

¹⁴“Saa sonla ɛhye wo ralɛ nrenya, mɔɔ nwu ɔ ze ɛtane mɔɔ yeyɛ la, na ɔsulo, na yeanyɛ ɔ ze ninyɛndane ne mɔ bie,

¹⁵ɔnli aleɛ mɔɔ bɛdo bɛmaa bozonle la yɛɛ ɔnzonle Yizilayɛ awozonle ne mɔ bie, ɔnva ɔ gɔnwo mɔ mraalɛ,

¹⁶ɔnyɛ awie ɛtane, awie fa debie wula ye lɔ awoba a ɔye ɔmaa ye, ɔnwua, ɔmaa mɔɔ ɛhɔne ɛlɛku ye la aleɛ, ɔmaa mɔɔ ɛngeda bie la ɛdanlɛ,

¹⁷ɔnle amumuyɛ, ɔmbɔ bosea ɔnlie nzinwo, yɛɛ ɔnlie bie ɔmboka nwolɛ, na ɔdi me mɛla nee me ngyehyɛlɛ ne mɔ azo a, ɔnle kɛ ɔ ze ɛtane ne mɔ mɔɔ ɔyɛle la ati ɔwu. Ɔwɔ kɛ ɔnyia ngoane.

¹⁸Ɔ ze ɛdeɛ, kɛmɔ ɔlile amile, ɔwuale ɔ mediema, na ɔbɔle ɛbɛla ɛtane wɔ ye menli ne avinli la, ye ɛtane ne ati, ɔbawu.

¹⁹“Noko bɛmɛ bɛbiza kɛ, ‘Duzu ati a ɔnle kɛ ralɛ nrenya nwu amaneɛ wɔ ɔ ze ɛtane ne mɔ mɔɔ ɔkɛyɛ la anwo ɛ?’ Suzuamgba ala mɔɔ ralɛ nrenya ne ɛyɛ mɔɔ le kpalɛ na ɔkɔ mɛla nu, na yenlea boɛ yeli me mɛla ne mɔ azo la, ɔwɔ kɛ ɔnyia ngoane.

²⁰Sonla biala mɔɔ kɛyɛ ɛtane la, bawu. Ralɛ nrenya ɛnrɛnwu amaneɛ wɔ ɔ ze ɛtane ne mɔ ati, yɛɛ selɛ ɛnrɛnwu amaneɛ wɔ ralɛ nrenya ɛtane ne mɔ ati. Sonlakpalɛ biala banyia ye kpalɛyɛlɛ nwo ahatualɛ, yɛɛ amumuyɛnli biala banyia ye amumuyɛ nwo ahatualɛ.

²¹“Na saa amumuyɛnli twe ɔ nwo fi ye amumuyɛ ne mɔ mɔɔ yeyɛ la anwo, ɔdi boɛ, ɔsie me mɛla ne mɔ na ɔdi zolɛ a, ɔbanyia ngoane; ɔnrɛwu.

²²Bɛnrɛhakye ye mɛla ne mɔ mɔɔ yedo la biala. Ye kpalɛ mɔɔ yeyɛ la ati, ɔbanyia ngoane.

²³Medame Awulae Nyamenle, me nye ɛnlie amumuyɛnli ewule nwo. Mɔɔ mekulo la a le kɛ ɔkɛvi ye ɛtane ne mɔ anwo na ɔkɛnyia ngoane.

²⁴“Na saa tenlenenli twe ɔ nwo fi ye kpalɛ mɔɔ yeyɛ la anwo, ɔyɛ ɛtane na ɔyɛ bɛkyi ninyɛne ne mɔ mɔɔ amumuyɛnli ne yɛ la bie a, ɔbawu. Bɛnrɛhakye ye kpalɛ biala mɔɔ yeyɛ la. Munzule ne mɔɔ yebɔ la anwo fɔlɛlilɛ nee ye ɛtane ne mɔ mɔɔ yeyɛ la ati, ɔbawu.

²⁵“Noko bɛmɛ bɛse, ‘Awulae ɛnli pɛlepɛle.’ Yizilayɛma, bɛdie! Menli pɛlepɛle ɔ? Asoo tɛ bɛmɛ yɛɛ bɛnli pɛlepɛle a?

²⁶Saa sonlakpalɛ twe ɔ nwo fi ye kpalɛyɛlɛ nwo na ɔyɛ ɛtane a, ye ɛtane ne ati, ɔbawu.

²⁷Bieko, saa amumuyɛnli twe ɔ nwo fi ye amumuyɛ mɔɔ yeyɛ la anwo na ɔyɛ mɔɔ le kpalɛ na ɔkɔ mɛla nu la a, ɔbalie ɔ nwo ngoane.

²⁸Kɛmɔ ɔdwenlenle nwolɛ na ɔhwenle ɔ nwo ɔvile ye mɛladonlɛ ne mɔ anwo la ati, ɔbanyia ngoane, ɔnrɛwu.

²⁹Noko bɛmɛ Yizilayɛma bɛse, ‘Awulae ɛnli pɛlepɛle!’ O Yizilayɛma, menli pɛlepɛle ɔ? Bɛmɛ yɛɛ bɛnli pɛlepɛle a.

³⁰“Zɔhane ati Yizilayɛma, medame Awulae Nyamenle mese: Mebabua bɛ ndɛne, kɛmɔ sonla ko biala nyɛleɛ si de la. Bɛnlu bɛ nwo na bɛhwe bɛ nwo bɛvi bɛ mɛladonlɛ kɔsɔɔti anwo na yeanyɛ munzule wɔ bɛ adenle nu.

³¹Bɛgyakyi bɛ mɛladonlɛ ne mɔ na bɛnyia ahonle fofolɛ nee subane fofolɛ. Duzu ati a bɛkulo kɛ bɛwu ɛ, Yizilayɛma?

³²Me nye ɛnlie awie biala ewule nwo. Yemɔti medame Awulae Nyamenle, mese, bɛhakyi na bɛnyia ngoane.”