Read Nzema Yiz 19 Bible Online

Yiz 19 - Nzema bible

Yiz 19

¹Akee Nyamenle zele me kɛ mendo alɔbɔlɛ edwɛne ɛhye memaa arelemgbunli mɔɔ wɔ Yizilayɛ la:

²Bɛ nli le awenade belɛ wɔ awenade avinli! Ɔlile ɔ mra adane wɔ awenade nyinli anwo ɛzulolɛ avinli.

³Ɔlile ɔ ra ko adane, ɔhilele ye kɛ bɛsi bɛdi ɛbɔlɛ la, na ɔhyele menli ɔlile.

⁴Maanle maanle bɔle ɔ nwo twoobue, na bɛzuale ye kuma nu ɛhane bɛhyele ye. Bɛvale koba bɛzɔle ye na bɛ nee ye hɔle Yigyibiti.

⁵Mɔɔ ɔ nli hendɛle toonwo na ye anyelazo wiele la, ɔvale ɔ mra ne mɔ ko ɔtetele ye, na ɔyɛle awenade anwo ɛzulolɛ kpole kpalɛ.

⁶Ɔwiele nyi la, ɔ nee awenade ne mɔ dule, ɔdaye noko ɔzukoale ɛbɔlɛlilɛ na ɔlile menli.

⁷Ɔlile menli aranemgbole nu, ɔmanle bɛ azuamgbole ne mɔ dɔle mgbane. Menli mɔɔ wɔ azɛlɛ ne azo la ahonle dule, mekɛ biala mɔɔ awenade ne deanle nu la.

⁸Maanle maanle boɔboale bɛ nloa zuale ye ɛhane; bɛguale ye asawu, na bɛhyele ye wɔ bɛ ɛhane nu.

⁹Bɛvale koba bɛsosɔle ye bɛdole ye tunli nu, bɛvale ye bɛhɔmanle Babelonia belemgbunli; bɛhyele ye nuokɛ bɛziele, amaa bɛande ɔ ne bieko wɔ Yizilayɛ awoka ne mɔ azo.

¹⁰Ɛnee bɛ nli le kɛ vanye baka mɔɔ bɛlua ye wɔ azule nloa. Ɔnyia nzule dɔɔnwo la ati, ɔwula nya dɔɔnwo, ɔso ma dɔɔnwo.

¹¹Ye baka ɛsesebɛ ne, rayɛle belemgbunli ɛhɔtɔlɔ. Vanye baka ne nyinle hɔle anwuma kpalɛ; awie biala nwunle ye tendenle nee ye buzuu.

¹²Noko bɛdule vanye baka ne ɛya nu. Aduduleɛ anwoma ne manle ɔgyengyenle, ye ma ne mɔ kpolole guale. Ye baka ɛsesebɛ ne wule, na bɛdole ye senle nu bɛyelale ye.

¹³Kɛkala akee bɛhɔlua ye ɛsɛlɛ zo, wɔ azɛlɛ mɔɔ nzule ɛnle nu na yehwe la azo.

¹⁴Senle ɛdɔ ye baka ne anu; yeyela ye ngane nee ye ma ne mɔ amuala. Baka ne anwo ɛnyɛ se ko, bɛfa bɛyɛ belemgbunli ɛhɔtɔlɔ a ɔnyɛ boɛ. Ɛhye le nyanelilɛ edwɛne, yɛɛ bɛdo toonwo a yeradwu ɛnɛ a.