Read Nzema Yiz 2 Bible Online

Yiz 2 - Nzema bible

Yiz 2

¹Ɔzele me kɛ, “Sonla ra, dwazo gyinla ɛ gyakɛ anu, na me nee wɔ tendɛ.”

²Mɔɔ ɔdendɛle ɔhilele me la, Nyamenle Sunsum ne wolole me na ɔmanle mendwazole mengyinlanle, na mendele kɛ ɔlɛtendɛ yeahile me.

³Ɔse, “Sonla ra, mesoa wɔ wɔ Yizilayɛma anwo ɛkɛ. Bɛle maanle mɔɔ te atua a, na bɛde me nwo atua. Bɛ nee bɛ ze mɔ bɛtietia me mɛla zo toonwo a yeradwu ɛnɛ a.

⁴Eza bɛle menli mɔɔ ɛzua anyetele, yɛɛ bɛmbu me. Mesoa wɔ wɔ bɛ nwo ɛkɛ na wɔahɔze bɛ kɛ, ‘Kɛ medame Awulae Nyamenle mese la ɛne.’

⁵Na saa bɛtie wɔ anzɛɛ bɛkpo kɛ bɛnrɛdie wɔ a, bɛbanwu kɛ amuanrɛɛ bɛlɛ Nyamenle kpɔmanvolɛ wɔ bɛ avinli, ɔluakɛ bɛdabɛ mumua ne bɛle atuadelɛma.

⁶“Na wɔmɔ, sonla ra, mmasulo bɛ, yɛɛ mmasulo mɔɔ bɛkeha la. Ɔbayɛ kɛ ɛla mbowule nu anzɛɛ ɛde nyamenleakɛlɛ avinli. Noko mmasulo bɛ ngehanleɛ yɛɛ mmamaa bɛ anyehoanlɛ ne mɔ tu wɔ ahonle, ɔluakɛ bɛle menli mɔɔ ɛde atua a.

⁷Saa bɛtie wɔ anzɛɛ bɛkpo kɛ bɛnrɛdie wɔ bɔbɔ a, ka me edwɛkɛ ne kile bɛ, ɔluakɛ bɛle menli mɔɔ ɛde atua a.

⁸“Sonla ra, tie mɔɔ melɛka meahile wɔ la. Mmate atua kɛ menli ɛhendeɛ ne mɔ la. Buke ɛ nloa na di mɔɔ melɛfa meamaa wɔ la.”

⁹ Na menwunle kɛ bɛdende ɛsalɛ bie me nwo na ɔlɛ nwoma mɔɔ bɛhɛlɛ nu la.

¹⁰Ɔdɛlɛle nwoma ne anu wɔ me nyunlu ɛkɛ, na ɛnee bɛhɛlɛ ɔ kunlu nee ɔ nzi amuala. Mɔɔ bɛhɛlɛle la le awolɛyelɛ, nyanelilɛ nee munzule edwɛkɛ ngome.