Read Nzema Yiz 20 Bible Online

Yiz 20 - Nzema bible

Yiz 20

¹Bɛ nee yɛ hɔle nlɔnu la, ye ɛvolɛ nsuu ne, siane nnu ne na ye kenle bulu ne azo, Yizilayɛ mgbanyima bie rale me ɛkɛ radɛnlanle aze kɛ bɛbabiza Ɛdɛnkɛma edwɛkɛ.

²Na Ɛdɛnkɛma dendɛle hilele me.

³Ɔse, “Sonla ra, ka kile Yizilayɛ mgbanyima ne mɔ kɛ, kɛ medame Awulae Nyamenle mese la ɛne: Bɛbabiza me edwɛkɛ la, yemɔti a bɛra a. Suzuamgba ala mɔɔ medame a mele tease Nyamenle ne la, bɛmbiza me edwɛkɛ biala. Medame Awulae Nyamenle a mese a.

⁴“Sonla ra, bua bɛ ndɛne na maa bɛnwu bɛ ze mɔ ninyɛndane mɔɔ bɛyɛle la.

⁵ Ka kile bɛ kɛ, medame Awulae Nyamenle mese: Kenle mɔɔ memkpale nu menyele Yizilayɛma la, menganle ndane mengilele Gyekɔbo abo zo amra ne, na mengilele bɛ kɛ mesi mede la wɔ Yigyibiti azɛlɛ zo. Menganle ndane na menganle kɛ mame a mele Ɛdɛnkɛma bɛ Nyamenle ne a.

⁶Kenle ko zɔhane menganle ndane kɛ meye bɛ meavi Yigyibiti azɛlɛ zo na meava bɛ meahɔ azɛlɛ kpalɛ mɔɔ kye aleɛ, na ɔle azɛlɛ kpalɛ ɔtɛla azɛlɛ kɔsɔɔti, mɔɔ mekpondɛ mezie ɛkɛ memaa bɛ la azo.

⁷Na menganle mengilele bɛ kɛ, bɛvuandi ninyɛne ɛtane ɛtane ne mɔ mɔɔ mekyi na bɛva bɛ nye bɛzie nwolɛ la bɛgua, bɛmmasonle Yigyibiti awozonle ne mɔ bie bɛgua bɛ nwo evinli, ɔboalekɛ medame a mele Ɛdɛnkɛma bɛ Nyamenle ne a.

⁸Noko bɛandie me edwɛkɛ ne na bɛdele me nwo atua. Bɛ nuhua ko bɔbɔ anvuandi ye bɛkyi ninyɛne ne mɔ angua, yɛɛ bɛ rɛle anvi Yigyibiti awozonle ne mɔ ɛzonlenlɛ. Menyɛle kɛ mewola me ɛya ne meagua bɛ nwo zo, na mealua me ɛya ne azo meadea bɛ wɔ Yigyibiti azɛlɛ zo.

⁹Noko amaa meanzɛkye me duma wɔ maanle maanle ne mɔ mɔɔ bɛde bɛ avinli la anyunlu la, mengilele bɛ kɛ mesi mede la na menyele bɛ menvile Yigyibiti.

¹⁰“Yemɔti menyele bɛ menvile Yigyibiti azɛlɛ zo na me nee bɛ rale fienemgbole ne anu.

¹¹ Menvale me mɛla ne memanle bɛ na mengilehilele bɛ me ngyehyɛlɛ ne mɔ mɔɔ sonla di zolɛ a ɔnyia ngoane la.

¹² Eza menvale me Ɛnwomenlelielɛ Kenle ne mɔ memanle bɛ, kɛ ɔle sɛkɛlɛneɛ mɔɔ la me nee bɛ avinli a, amaa bɛanwu kɛ medame Ɛdɛnkɛma a mete bɛ nwo a.

¹³Noko Yizilayɛma dele me nwo atua wɔ fienemgbole ne anu. Bɛanli me mɛla ne mɔ azo, bɛkpole me ngyehyɛlɛ ne mɔ mɔɔ bɛdi zolɛ a bɛkɛnyia ngoane la, yɛɛ bɛambu me Ɛnwomenlelielɛ Kenle ne mɔ bie. Menyɛle me adwenle kɛ mewola me ɛya ne meagua bɛ nwo zo wɔ fienemgbole ne anu, na meabɔ bɛ bo zo bɔkɔɔ.

¹⁴Noko me duma ne ati, mengakyile me adwenle, amaa me duma anzɛkye wɔ maanle maanle ne mɔ mɔɔ menyele bɛ menvile bɛ avinli me nee bɛ rale la anyunlu.

¹⁵ Yemɔti menganle ndane mengilele bɛ wɔ fienemgbole ne anu kɛ me nee bɛ ɛnrɛra azɛlɛ kpalɛ ne mɔɔ kye aleɛ, na ɔle azɛlɛ kpalɛ ɔtɛla azɛlɛ kɔsɔɔti, mɔɔ meva memaa bɛ la azo.

¹⁶Menganle ndane ne, ɔboalekɛ bɛkpole me ndenle ne mɔ, bɛanli me mɛla ne mɔ azo, yɛɛ bɛambu me Ɛnwomenlelielɛ Kenle ne mɔ bie, ɔluakɛ bɛlile bɛ awozonle nzi.

¹⁷“Noko akee menwunle bɛ anwunvɔne. Meanzɛkye bɛ yɛɛ meambɔ bɛ bo zo wɔ fienemgbole ne anu.

¹⁸Na menganle mengilele bɛ mra wɔ fienemgbole ne anu kɛ, ‘Bɛmmafa bɛ ze mɔ agyakɛ, bɛmmadua bɛ ndenle ne mɔ anu, yɛɛ bɛmmasonle bɛ awozonle ne mɔ na bɛgua bɛ nwo evinli.

¹⁹Medame Ɛdɛnkɛma, mame a mele bɛ Nyamenle ne a. Bɛli me mɛla ne mɔ azo, na bɛnlea boɛ bɛli me ngyehyɛlɛ ne mɔ azo,

²⁰bɛde me Ɛnwomenlelielɛ Kenle ne mɔ anwo, amaa yeayɛ sɛkɛlɛneɛ yeala me nee bɛ avinli, na bɛanwu kɛ medame Ɛdɛnkɛma a mele bɛ Nyamenle a.’

²¹“Noko bɛ awolɛndoazo zɔhane dele me nwo atua. Bɛanli me mɛla ne mɔ azo, yɛɛ bɛanli me ngyehyɛlɛ ne mɔ mɔɔ bɛdi zolɛ a bɛkɛnyia ngoane la azo. Eza bɛambu me Ɛnwomenlelielɛ Kenle ne mɔ bie. Menyɛle me adwenle kɛ mewola me ɛya ne meagua bɛ nwo zo, na meazɛkye bɛ wɔ fienemgbole ne anu.

²²Noko mendwenlenle nwolɛ bieko wɔ me duma ne ati, amaa me duma anzɛkye maanle maanle mɔɔ me nee bɛ ɛra bɛ avinli la anyunlu.

²³ Yemɔti eza menganle ndane wɔ fienemgbole ne anu kɛ mebɔ bɛ asande na meakponde bɛ wɔ maanle maanle ne mɔ anu,

²⁴ɔboalekɛ bɛanli me ngyehyɛlɛ ne mɔ azo, na bɛkpo me mɛla ne mɔ yɛɛ bɛambu me Ɛnwomenlelielɛ Kenle ne mɔ bie. Bɛvale bɛ ti bɛzɔle bɛ ze mɔ mmonle ne mɔ.

²⁵“Yemɔti memanle bɛ mɛla mɔɔ ɛnle kpalɛ nee ngyehyɛlɛ mɔɔ bɛdi zolɛ a, bɛnrɛnyia ngoane la.

²⁶Memanle bɛvale bɛ belamunli mralɛ bɛyelale bɛ bɛbɔle azu, na bɛluale bɛ ahyɛlɛ ninyɛne zo bɛzɛkyele bɛ nwo. Menyɛle ɛhye menganle bɛ ɛzulolɛ, amaa bɛanwu kɛ medame a mele Ɛdɛnkɛma a.

²⁷“Zɔhane ati, sonla ra, tendɛ kile Yizilayɛma na se bɛ kɛ Awulae Nyamenle ne se: Adenle mɔɔ bɛ ze mɔ luale nu hanle me ɛya la a le kɛ bɛanli nɔhalɛ bɛammaa me.

²⁸Ɔluakɛ mɔɔ me nee bɛ radwule azɛlɛ ne mɔɔ menganle ndane kɛ mefa meamaa bɛ la azo la, ɛnee akee ɛleka biala mɔɔ bɛkɛnwu boka tendenle biala anzɛɛ baka buzuu biala la, ɛkɛ ne a bɛbɔ azu ne mɔ, na bɛye bɛ ahyɛlɛdeɛ ne mɔ, bɛyela bɛ azubɔlɛ ninyɛne ne mɔ na bɛgua bɛ nza ne mɔ a.

²⁹Membizale bɛ kɛ, ‘Na ɛleka ɛhye mɔ mɔɔ bɛkɔsonle la noko ɛ?’ Yemɔti ɛnɛ nee ɛnɛ ala, bɛtɛfɛlɛ ɛkɛ ne Beema.[2]

³⁰Yemɔti ka kile Yizilayɛma kɛ, medame Awulae Nyamenle, melɛbiza bɛ kɛ: Bɛfa bɛ ze mɔ agyakɛ, bɛaminli adenle bɛayɛ bɛkyi ninyɛne ne mɔ bɛagua bɛ nwo evinli ɔ?

³¹Bɛhu bɛ mra mrenya bɛyela bɛ bɛbɔ azu bɛmaa awozonle bɛgua bɛ nwo evinli toonwo a yeradwu ɛnɛ a. Yizilayɛma, na akee mame yɛɛ bɛbabiza me bɛanwu mɔɔ ɔwɔ kɛ bɛyɛ la ɔ? Suzuamgba ala mɔɔ medame a mele Awulae Nyamenle ne la, mese, menrɛmaa adenle menrɛmaa bɛnrɛbiza me edwɛkɛ biala.

³²Mɔɔ wɔ bɛ adwenle nu la ɛnrɛyɛ zɔhane ɛlɛ. Bɛ adwenle a le kɛ, bɛkulo kɛ bɛyɛ kɛ maanle maanle ne mɔ, nee mbusua ekpunli ekpunli mɔɔ wɔ maanle ne mɔ anu la na bɛsonle mbaka nee awolɛ. Na ɔnrɛyɛ zɔhane ɛlɛ.

³³“Suzuamgba ala mɔɔ medame a mele Awulae Nyamenle ne la, medame a mele tease Nyamenle ne a. Mebava ɛya nee tumi kpole meazie bɛ na meali bɛ belemgbunli.

³⁴Mebaye bɛ meavi menli ngakyile kɔsɔɔti anu, na meaboɔboa bɛ nloa meavi maanle maanle mɔɔ membɔle bɛ asande menguale nu la anu. Mebava ɛya nee tumi kpole a meayɛ ɛhye a.

³⁵Mebava bɛ meara ‘Maanle Maanle Ɛsɛlɛzo,’[3] na ɛkɛ ne yɛɛ mebaye me nyunlu meadea bɛ a.

³⁶Kɛ menzile mendeanle bɛ ze mɔ wɔ Saenae Fienemgbole nu la, zɔhane ala yɛɛ mebadea bɛdabɛ noko a. Medame Awulae Nyamenle a mese a.

³⁷“Mebanlea bɛ boɛ na meaholo bɛ nwo zo meamaa bɛali me ngyekyeleɛ ne azo.

³⁸Mebakpa bɛ nuhua meaye atuadelɛma nee bɛdabɛ mɔɔ bɛto me mɛla ne la wɔ bɛ avinli. Mebaye bɛ meavi azɛlɛ ne mɔɔ bɛde zolɛ kɛkala la azo, noko bɛ gyakɛ ba ɛnrɛtia Yizilayɛ azɛlɛ zo. Na akee bɛbanwu kɛ medame a mele Ɛdɛnkɛma a.”

³⁹Na Awulae Nyamenle ne zele kɛ, “Bɛmɛ Yizilayɛma, bɛhɔ zolɛ. Saa bɛnrɛdie me a, ɛnee awie biala ɛbɔ ɔ bo ɛnɛ nee dahuu ɔzonle ye mmonle ne mɔ. Noko bɛmmafa bɛ ahyɛlɛ ninyɛne nee bɛ mmonle ne mɔ bɛsɛkye me duma.

⁴⁰Ɔluakɛ medame Awulae Nyamenle ne, mese, wɔ me boka nwuanzanwuanza[4] ne azo, wɔ Yizilayɛ azɛlɛ zo awoka ne mɔ anu, ɛkɛ ne yɛɛ Yizilayɛma kɔsɔɔti bazonle me a. Ɛkɛ ne yɛɛ mebalie bɛ meado nu a, yɛɛ ɛkɛ ne a mebalie bɛ ahyɛlɛ ninyɛne kpalɛ ne nee bɛ azubɔlɛ ninyɛne nwuanzanwuanza ne mɔ a.

⁴¹Saa me nee bɛ vi menli ngakyile nee maanle maanle mɔɔ mendole bɛ memkpondenle nu la anu sia ba a, mebalie bɛ kɛ azubɔlɛ evuanlɛ, na meahile me nwuanzanwuanzayɛlɛ ne wɔ bɛ avinli meamaa maanle maanle kɔsɔɔti anwu ye.

⁴²Saa mefa bɛ meba Yizilayɛ azɛlɛ zo maanle ne mɔɔ menvale membɔle bɛ ze mɔ ɛwɔkɛ la anu a, bɛbanwu kɛ medame a mele Ɛdɛnkɛma a.

⁴³Bɛbahakye bɛ ndenle mɔɔ bɛluale nu nee nyɛleɛ ɛtane ɛtane mɔɔ bɛyɛle bɛvale bɛzɛkyele bɛ nwo la, na bɛavu bɛ nwo wɔ bɛ ninyɛndane mɔɔ bɛyɛle la amuala anwo.

⁴⁴O Yizilayɛma, me nee bɛ ɛnrɛli kɛmɔ bɛ ninyɛndane anzɛɛ bɛ munzule ɛbɛla ne mɔ si de la, amaa bɛanwu kɛ medame a mele Ɛdɛnkɛma a. Medame, Awulae Nyamenle ne a mese a.”

⁴⁵[5] Ɛdɛnkɛma dendɛle hilele me.

⁴⁶Ɔse, “Sonla ra, kakyi ɛ nye wɔ nyiakɛ. Bɔ Nyamenle edwɛkɛ ne nolo kile bɛdabɛ mɔɔ bɛwɔ nyiakɛ la, na ka Nyamenle nrɛlaleɛ ne mɔɔ tia nyiakɛ kpɔkɛ ne la.

⁴⁷Ka kile nyiakɛ kpɔkɛ ne kɛ bɛdie Ɛdɛnkɛma edwɛkɛ ne: Awulae Nyamenle ne se, ‘Mebado senle wɔ bɛ avinli meamaa yeayela baka amolɛ nee baka wulera biala mɔɔ wɔ bɛ avinli la. Awie ɛnrɛhola senle ne mɔɔ ɛlɛsɔ la nua; ɔbayelɛyela awie biala anyunlu, ɔvi nyiakɛ yeahɔdwu sɔlɔ.

⁴⁸Menli kɔsɔɔti banwu kɛ medame Ɛdɛnkɛma a mendole senle ne a. Awie biala ɛnrɛhola ye nua.’ ”

⁴⁹Na menganle kɛ, “Aa, O Awulae Nyamenle! Bɛlɛkeha ye wɔ me nwo kɛ, ‘Asoo tɛ nwɔra a ɔlɛto yeahile yɛ la?’ ”