Read Nzema Yiz 21 Bible Online

Yiz 21 - Nzema bible

Yiz 21

¹Ɛdɛnkɛma dendɛle hilele me.

²Ɔse, “Sonla ra, kakyi ɛ nye wɔ Gyɛlusalɛm na ka Nyamenle edwɛkɛ tia ɛleka nwuanzanwuanza ne mɔ. Ka Nyamenle nrɛlaleɛ ne mɔɔ tia Yizilayɛ azɛlɛ ne la

³na ka kɛ, Ɛdɛnkɛma se: Bɛnlea, mele bɛ kpɔvolɛ, mebahwe me dadeɛ ne wɔ ye boa ne anu, na meahu amumuyɛma nee tenlenema amuala.

⁴Mebahu awie biala, kpalɛ o, amumuyɛnli o, ɔvi nyiakɛ yeahɔdwu sɔlɔ.

⁵Na menli kɔsɔɔti banwu kɛ medame, Ɛdɛnkɛma a mehwe bɛ nwo dadeɛ a, menrɛva menrɛwula ye boa ne anu bieko.

⁶“Sonla ra, gu ɛnwomenle, kponle ɛ bo kɛ ɛlɛdi nyane kpole bie la wɔ bɛ nye zo ɛkɛ ne.

⁷Na saa bɛbiza wɔ kɛ, ‘Duzu ati a wɔgu ɛnwomenle kpole ɛhye’ a, ka kile bɛ kɛ nrɛlaleɛ ne mɔɔ ɛlɛba la ati ɔ. Saa nrɛlaleɛ ne ba a, awie biala ahonle badu. Bɛ sa nu batuto, bɛ nwo bagolo bɛ, na bɛ gyakɛ agbɔkɛ abili kɛ atɛ. Bɛdie, kɛ ɔlɛba ɛ, na ɔbayɛ zɔhane noko. Medame Awulae Nyamenle a mese a.”

⁸Ɛdɛnkɛma dendɛle hilele me.

⁹Ɔse, “Sonla ra, ka Nyamenle nrɛlaleɛ ne kɛ, ‘Kɛ Awulae se la ɛne: Dadeɛ, bɛzi dadeɛ na bɛhwi nwolɛ.

¹⁰Bɛzi kɛ bɛfa bɛahu menli, bɛhwi nwolɛ, amaa yeapɛ kɛ ɛsɛnlɛmanye. Anyelielɛ biala ɛnle ɛkɛ ne ko, ɔluakɛ me ra nrenya ne ɛkpo me kɔkɔbɔlɛ, nee nwolɛ ndeanlɛ ne.

¹¹Yemɔti bɛva dadeɛ ne bɛmaa kɛ bɛhwi nwolɛ, amaa bɛava bɛali gyima. Bɛzi na bɛhwi nwolɛ, amaa bɛava bɛamaa mɔɔ ku sonla la.

¹²Sonla ra, su ye awolɛ, ɔluakɛ dadeɛ ne ɛlɛkɔ me menli ne nee Yizilayɛ arelemgbunli anwo zo. Bɛye Yizilayɛ arelemgbunli nee menli ne amuala bɛmaa kɛ bɛhu bɛ wɔ dadeɛ nloa. Fa nyane bɔ ɛ sa ati.

¹³“ ‘Ɛhye ɛnle sɔnea edwɛkɛ, saa bɛkpo me kɔkɔbɔlɛ ne a, ɛnee duzu a li ɔ nzi a?’ Medame Awulae Nyamenle a mebiza bɛ a.

¹⁴“Zɔhane ati sonla ra, ka Nyamenle nrɛlaleɛ ne. Bɔ ɛ sa nu maa dadeɛ ne mɔɔ ku menli ne la ɛrɛla na eza ɔrɛla bieko, fane nsa bɔbɔ. Ɔle dadeɛ mɔɔ bahu menli dɔɔnwo yeaha bɛ ɛzulolɛ a,

¹⁵amaa bɛ ahonle adu na dɔɔnwo adɔ anlenkɛ kpole ne anloa. Meva dadeɛ ne mɔɔ anwo ɛlɛta la memaa; ɔfede kɛ ezule. Bɛhwi nwolɛ kɛ bɛva bɛhu menli.

¹⁶To wɔ dadeɛ ne fema zo nee bɛne zo, to ye ɛleka biala mɔɔ ɔ nye kɛli la.

¹⁷Medame noko mebabɔ me sa nu na akee me ɛya ne adwo. Medame a mese a.”

¹⁸Ɛdɛnkɛma dendɛle hilele me.

¹⁹Ɔse, “Sonla ra, kile ndenle nwiɔ mɔɔ Babelonia belemgbunli ne bava ye dadeɛ ne alua nuhua ara la. Ɔwɔ kɛ ndenle nwiɔ ne fi maanle ko ne ala anu a ba a. Akee yɛ sɛkɛlɛneɛ baka maa ɔhile adenle mɔɔ bɛfa nu bɛkɔ suakpole ne azo la.

²⁰Kile adenle mɔɔ dadeɛ ne balua nuhua ara Amɔnoma sua ne mɔɔ bɛfɛlɛ ye Relaba la azo, maa ɔlua ɛkɛ ɔrɛla Dwuda na ɔhɔ suakpole Gyɛlusalɛm mɔɔ bɛhye nwolɛ ɛhane la azo.

²¹Babelonia belemgbunli ne bagyinla nwɔnda ne azo, wɔ ndenle nwiɔ ne ati, na yeabiza nwolɛ, ɔbabili ye ɛda mbaka ne mɔ, yeado yeabiza ye amonle ne, na yeanlea nane ne mɔɔ bɛhu ye la ɛvovoa.

²²Ɛbizalɛ ne babɔ Gyɛlusalɛm, na ɔkile kɛ ɔhɔ na ɔhɔva konle ɔdoa Gyɛlusalɛm, ɔbɛnra ɔyia sua ne, ɔva mbaka mgbole ɔsisi Gyɛlusalɛm nlenkɛ mgbole ne mɔ na ɔvu kuma wɔ suakpole ne anwo ɔbɛnra ɔyia.

²³Noko Gyɛlusalɛm amra ɛdeɛ, bɛbadwenle kɛ, kɛmɔ bɛli amonle la ati, ɛhye ɛnrɛyɛ zɔhane. Nyamenle bamaa bɛ ɛtane ne mɔ ala ali na nyɛvolɛ ɛlɔnema ali bɛ nwo zo konim.

²⁴Yemɔti medame Awulae Nyamenle, mese: Kɛmɔ bɛmaa bɛ ɛtane ne mɔ ɛla ali, na bɛ mɛladonlɛ ne mɔ ɛza ɛgua zolɛ, na bɛ nyɛleɛ ɛtane ne mɔ kɔsɔɔti ɛla ali wienyi la, bɛbadea bɛ na bɛaye bɛ bɛamaa bɛ kpɔvolɛma.

²⁵“Wɔmɔ Yizilayɛ belemgbunli, amumuyɛnli mɔɔ anwo ɛnde a, wɔ kɔpo ne ɛyi, na yedwu mɔɔ akee ɔwɔ kɛ bɛsɛkye wɔ bɔkɔɔ a.

²⁶Medame Awulae Nyamenle mese: Bɛdu ɔ ti abɔtile ne, na bɛdu zolɛ kpɔba kpoonwu ne. Debie biala ɛnrɛyɛ kɛ ye dɛba ne la bieko. Debie biala bahakyi. Maa mɔɔ le bɛlɛvo la zo, na bɛlɛ mɔɔ memaa ɔ nwo zo la aze.

²⁷Munzule o, munzule! Mebamaa munzule ado suakpole ne na meayɛ ye suadu. Noko ɛhye ɛnrɛzi, kyesɛ ahenle mɔɔ ɔle ye ɛdeɛ la ba, na yemɔ yɛɛ mebava meamaa ye a.

²⁸ “Na wɔmɔ, sonla ra, ka Nyamenle nrɛlaleɛ ne na ka mɔɔ medame Awulae Nyamenle, melɛka meahile wɔ, mɔɔ fane Amɔnoma nee bɛ ɛralɛ mɔɔ bɛlɛba Yizilayɛma anwo zo la anwo edwɛkɛ kile bɛ. Ka kile bɛ kɛ, ‘Dadeɛ, bɛhwe dadeɛ kɛ bɛku menli; bɛhwi nwolɛ, amaa yeapɛ kɛ ɛsɛnlɛmanye.

²⁹Ɛnyelɛzodeɛnwunlɛ biala mɔɔ bɛnwu la ɛnle nɔhalɛ, yɛɛ bɛ abisadeɛ edwɛkɛ biala mɔɔ bɛka la le adalɛ, na ɔbakpomgbolo amumuyɛma mɔɔ anwo ɛnde na bɛ mekɛ ɛdwu kɛ ɔwɔ kɛ bɛsɛkye bɛ la akɔme.

³⁰“ ‘Bɛva bɛ dadeɛ ne bɛwula ye boa ne anu. Mebabua bɛ ndɛne wɔ ɛleka mɔɔ bɛbɔle bɛ, wɔ azɛlɛ ne mɔɔ bɛwole bɛ bɛguale zolɛ la azo.

³¹Mebawola me ɛya ne meagua bɛ nwo zo, na meava ɛya mɔɔ le kɛ senle la meazɛkye bɛ. Mebaye bɛ meawula menli mɔɔ ati yɛ se na bɛze menli ɛhunlɛ nye zo kpalɛ la asa anu.

³²Bɛbayɛ kɛ ɛyɛne, bɛayela bɛ senle nu. Bɛbaha bɛ mogya bɛagua maanle ne anu, yɛɛ awie ɛnrɛhakye bɛ bieko, ɔluakɛ medame Ɛdɛnkɛma a mese a.’ ”