Read Nzema Yiz 22 Bible Online

Yiz 22 - Nzema bible

Yiz 22

¹Eza Ɛdɛnkɛma dendɛle hilele me.

²Ɔse, “Na wɔmɔ, sonla ra, asoo ɛbabua suakpole ne mɔɔ ahɔdiawu ɛyi ye tɛkɛɛ la ndɛne? Ɛnee fa ye bɛkyi nyɛleɛ ne mɔ si ɔ nyunlu.

³Ka kile ye kɛ medame Awulae Nyamenle, mese: Ɔle suakpole mɔɔ bɛka mogya bɛgua ye awɔdenle zo, na bɛva awozonle ɛzonlenlɛ bɛzɛkye bɛ nwo a, bɛ kɔpo ne bayi!

⁴Bɛdi fɔlɛ wɔ mogya mɔɔ bɛha bɛgua, nee bɛ awozonle mɔɔ bɛdabɛ bɛyɛ la ɛzonlenlɛ nwo. Bɛmaa bɛ mekɛ ne ɛbikye, bɛ mekɛ mɔɔ bɛhilele la ɛdwu. Yemɔti meyɛ bɛ mɔɔ maanle maanle kɔsɔɔti bakpɔ bɛ na bɛagolo bɛ nwo.

⁵Maanle maanle mɔɔ bikye bɛ nee maanle maanle mɔɔ wɔ moa moa la amuala bazi bɛ amgbu. Bɛnle kpalɛ bɛdabɛ, bɛle amaanleto kpalɛ kpalɛ.

⁶Bɛnlea, bɛdabɛ Yizilayɛ arelemgbunli mɔɔ wɔ bɛ avinli la, nuhua ko biala ɛyɛ ye adwenle kɛ ɔfa ye tumi ne yeaha mogya yeagua.

⁷ Bɛmbu selɛ na yeayɛ ninli, bɛbɔ nyɛvolɛ apo bɛdie bɛ ninyɛne, yɛɛ bɛsisi mɔɔ ɛnlɛ ɔ ze nee ahunlanvolɛ mraalɛ.

⁸ Bɛkpo me ninyɛne nwuanzanwuanza ne mɔ, yɛɛ bɛnzie me Ɛnwomenlelielɛ Kenle ne.

⁹Menli wɔ bɛ avinli mɔɔ pɛ nwondomgbɔ na bɛka mogya bɛgua a; menli wɔ bɛ avinli mɔɔ bɔ azu maa awozonle na bɛdidi awoka ne mɔ azo lɔ a, yɛɛ menli wɔ bɛ avinli mɔɔ ɛnze nyiane wɔ adwɔmane ɛbɛla mgbane mgbane ɛbɔlɛ nwo a.

¹⁰ Mrenya wɔ bɛ avinli mɔɔ fa bɛ ze mɔ mraalɛ, yɛɛ bie mɔ fa mraalɛ mɔɔ ɛhɔ amozi la.

¹¹Bie mɔ fa bɛ gɔnwo mɔ mraalɛ; bie mɔ ɛnze bɛ mra mrenya mraalɛ nyiane na bɛfa bɛ; bie fa ɔ diema raalɛ mɔɔ ɔ nee ye bɛ ze ko la.

¹² Menli wɔ bɛ avinli mɔɔ die ndoloboa ku awie mɔ, bɛdie nzinwo, bɛdie bie bɛboka nwo na bɛsisi awie mɔ bɛfa bɛnyia bɛ nwo. Bɛ rɛle ɛvi me bɔkɔɔ, medame Awulae Nyamenle a mese a.

¹³“Yemɔti bɛnlea, meva me sa mebɔ bɛ awule nvasoɛ ne mɔ mɔɔ bɛnyia la anu medua bɛ ahɔdiawu ɛbɛla ne mɔ.

¹⁴Asoo mekɛ dwu na mese kɛ me nee bɛ di a, bɛ sa nu kɛyɛ se, bɛkɛhola gyinla? Medame Ɛdɛnkɛma a mese a, yɛɛ mebayɛ noko.

¹⁵Mebakponde bɛ maanle maanle zo, na meazande bɛ wɔ maanle maanle ne mɔ anu, meamaa bɛagyakyi bɛ ninyɛne ɛtane ɛtane ne mɔ ɛyɛlɛ.

¹⁶Maanle maanle ne mɔ banwu kɛ bɛwie mgbane yɛ, na akee bɛanwu kɛ medame a mele Ɛdɛnkɛma a.”

¹⁷Ɛdɛnkɛma zele me kɛ,

¹⁸“Sonla ra, Yizilayɛma ɛyɛ ewula wɔ me nye zo. Bɛ kɔsɔɔti bɛyɛ kɛ dwɛtɛ fufule nee kɔbele, kyɛnze nee bulalɛ nee sumi mɔɔ bɛholo bɛ fonlomo nu toonwo bɛhakyi ewula la.

¹⁹Yemɔti medame Awulae Nyamenle, mese: Kɛmɔ bɛ muala bɛyɛ ewula la, mebahuohua bɛ kɔsɔɔti bɛ nloa wɔ Gyɛlusalɛm.

²⁰Kɛ sonla si kuohua dwɛtɛ fufule, kɔbele, bulalɛ, sumi, yɛɛ kyɛnze nloa wula bɛ fonlomo nu, na ɔwuda nu ɔmaa bɛkolo la, zɔhane ala yɛɛ mebava ɛya meahuohua bɛ nloa, meawula bɛ senle nu meaholo bɛ a.

²¹Mebahuohua bɛ nloa na meawuda me ɛya senle ne bɛ bo meaholo bɛ.

²²Kɛ bɛsi bɛkolo dwɛtɛ fufule wɔ fonlomo nu la, zɔhane ala yɛɛ mebaholo bɛdabɛ a, na akee bɛanwu kɛ medame Ɛdɛnkɛma yɛɛ mewola me ɛya ne megua bɛ nwo zo a.”

²³Eza Ɛdɛnkɛma dendɛle hilele me.

²⁴Ɔse, “Sonla ra, ka kile Yizilayɛ kɛ ɔle azɛlɛ mɔɔ zolɛ ɛnde a, anzɛɛ sumunli kɛ bɛvale ɛya bɛdeanle ye la zolɛ ɛtɛtele.

²⁵Arelemgbunli mɔɔ wɔ maanle ne anu la le kɛ awenade mɔɔ ɛnyia nane na ɔlɛkpo yeatete ye la. Bɛli menli nwonane, bɛve anwoneɛ nee ninyɛne mɔɔ sonle bolɛ, yɛɛ bɛmaa ahunlanvolɛ mraalɛ ɛzo dɔɔnwo wɔ bɛ avinli.

²⁶ Bɛ sɛlɛvolɛma ɛvuandi me mɛla ne ɛdo na bɛgua me ninyɛne nwuanzanwuanza ne mɔ anwo evinli. Bɛammaa ngakyile anla ninyɛne mɔɔ le nwuanzanwuanza nee mɔɔ ɛnle nwuanzanwuanza la avinli, yɛɛ bɛangile ngakyile mɔɔ la ninyɛne mɔɔ anwo te nee mɔɔ anwo ɛnde la avinli. Bɛambu me Ɛnwomenlelielɛ Kenle ne mɔ, yemɔti bɛgua me nwo evinli wɔ bɛ avinli.

²⁷Arelemgbunli mɔɔ wɔ maanle ne anu la le kɛ bɛdi mɔɔ ɛlɛtete nane la. Bɛka mogya bɛgua, bɛsɛkye ngoane na bɛfa bɛnyia awule nvasoɛ.

²⁸Bɛ Nyamenle kpɔmanvolɛma ɛnyelɛzodeɛnwunlɛ ɛnle nɔhalɛ, bɛka adalɛ abisadeɛ edwɛkɛ na bɛava kisane bɛagua zolɛ bɛaze kɛ, ‘Kɛ Awulae Nyamenle ne se la ɛne’, wɔ mekɛ mɔɔ Ɛdɛnkɛma ɛtɛbukele ɔ nloa la.

²⁹Menli mɔɔ wɔ maanle ne anu la ɛzukoa apobɔlɛ, yɛɛ bɛyɛ bɛ nwo nwule. Bɛsisi ehyianvolɛ nee mɔɔ ɛhyia la; bɛsisi nyɛvolɛ bɛwua bɛ, yɛɛ bɛngakyi bɛ ɛbɛla ne.

³⁰Memkpondɛle sonla wɔ bɛ avinli mɔɔ to bane ne na yeagyinla me gyakɛ anu wɔ maanle ne anu, amaa meanzɛkye azɛlɛ ne, noko meannyia bie.

³¹Yemɔti mewola me ɛya ne megua bɛ nwo zo. Meva me ɛya senle ne meyela bɛ; memaa bɛ ɛbɛla ne ɛbu ɛzia bɛ, medame, Awulae Nyamenle a mese a.”