Read Nzema Yiz 24 Bible Online

Yiz 24 - Nzema bible

Yiz 24

¹Bɛ nee yɛ hɔle nlɔnu la, ye ɛvolɛ ngɔnla ne anu, siane bulu ne kenle bulu ne azo, Ɛdɛnkɛma dendɛle hilele me.

² Ɔse, “Sonla ra, kɛlɛ ɛnɛ kenle ye duma. Ɛnɛ kenle ye Babelonia belemgbunli ɛva ɛlɔnema ɛbɛnra ɛyia Gyɛlusalɛm.

³Bu atuadelɛma ɛhye mɔ ɛrɛlɛ na ka kile bɛ kɛ, medame Awulae Nyamenle, mese: Bɛva danesɛne ne bɛzie senle zo, bɛva nzule bɛgua nu.

⁴Bɛva nane azinli ne mɔ bɛgua nu, ye ɛleka biala mɔɔ le kpalɛ, ye ɛzɔlɛ nee ye abɛsa ne mɔ; bɛva mbowule kpalɛ ne mɔ noko bɛgua nu.

⁵Bɛnlea nu bɛye nyɛmoa ne mɔ anu kpalɛ ne, bɛhua senle ɔ bo; bɛdo nane ahunguma ahunguma ne mɔ; bɛdo ye mbowule ne mɔ noko.”

⁶Awulae Nyamenle ne se, “Munzule ɛha ahɔdiawu suakpole ne, munzule ɛha zolɛ danesɛne ne mɔɔ ɛlɔ nrɛnlana na nuhua nrɛnlana ne ɛtɛtule la. Bɛyeye nuhua nane azinli ne mɔ ngoko, bɛmmakpa nu.

⁷Mogya ne mɔɔ yeha yegua la tɛbɔ zolɛ. Yeandwi yeangua anwea nu na anwea aheda zolɛ; ɔhwinle ɔguale bolɛ tandane zo.

⁸Memaa mogya ne mɔɔ yeha yegua la ɛla bolɛ ne azo, amaa yeaha me ɛya na meali nzenralɛ.”

⁹Awulae Nyamenle ne se, “Munzule ɛha ahɔdiawu suakpole ne. Medame noko mebahua ɛyɛne meamaa ɔ nwo zo ahɔ anwuma kpalɛ.

¹⁰Bɛhuohua ɛyɛzinli ne mɔ anloa, bɛva senle bɛgua nu, bɛmaa nane ne ɛbe kpalɛ, na akee bɛwola subue ne mɔɔ wɔ nwolɛ la, na bɛhakyi mbowule ne mɔ bɛgua senle ne anu bɛyela bɛ.

¹¹Akee bɛva danesɛne mgbane ne bɛzie senle ne azo, bɛmaa ɔlɔ kpalɛ, ɔdɔlɔ woonwu na kɔbele ne ɛholo ɛheda evinli nee nrɛnlana biala azo.

¹²Medame, mevɛ mgbane. Senle ne angola kɔbele ne kolo yeammaa yeangeda nrɛnlana ne azo.

¹³Wɔ adwɔmane ɛbɛla mgbane mgbane ne a le nrɛnlana ne mɔɔ andu la. Kɛmɔ anrɛɛ ɔwɔ kɛ metu ɛ nwo evinli ne amuala, noko ɛ nwo anvie, na ɛ nwo evinli ne bie tɛbɔ ɛkɛ ne la, ɛ nwo ɛnrɛvie ɛlɛ, kyesɛ mewola me ɛya kpole ne megua ɛ nwo zo na me kunlu adwo.

¹⁴Medame Ɛdɛnkɛma a mese a, mebayɛ mɔɔ meha la. Menrɛzia me nzi, menrɛze anwunvɔne yɛɛ menrɛvu me nwo. Mebadea bɛ, kɛmɔ bɛ nyɛleɛ nee bɛ ndenle ne mɔ si de la. Medame, Awulae Nyamenle a mese a.”

¹⁵Ɛdɛnkɛma zele me kɛ,

¹⁶“Sonla ra, nea, mefa kɛlɛ kokye meaye ɛ ye ne mɔɔ ɛkulo ye kɛ debie la meavi ɛ nye zo, noko ɔnle kɛ ɛsu ye anzɛɛ ɛdi nyane, yɛɛ ɔnle kɛ ɛsuosua wɔ adɛladeɛ nu.

¹⁷Ɛbagu ɛnwomenle, noko ɔnle kɛ awie te, yɛɛ mmakile kɛ ɛlɛdi nyane. Fa wɔ abɔtile ne bɔ ɛ ti na fa wɔ mgbɔlaboa ne wula, mmakeda ɛ nyunlu yɛɛ mmadi aleɛ mɔɔ kile kɛ ɛlɛdi nyane la.”

¹⁸Yemɔti nwonlomɔ ne menganle mengilele menli ne, na ye nɔsolɛ nu me ye wule. Aleɛ hyenle bieko na ye nwonlomɔ ne menyɛle mɔɔ Ɛdɛnkɛma zele me la.

¹⁹Na menli ne bizale me kɛ, “Ɛnrɛhile ninyɛne ɛhye mɔ mɔɔ ɛlɛyɛ la abo ɛnrɛhile yɛ ɔ?”

²⁰Na menganle mengilele bɛ kɛ, “Ɛdɛnkɛma ɛze me kɛ, menga mengile Yizilayɛma kɛ,

²¹Awulae Nyamenle ne se: Bɛnlea, mebagua me Ɛzonlenlɛ Sua ne anwo evinli. Ɔle debie mɔɔ bɛfa bɛtu bɛ nwo a, bɛ nye ɛralɛ mɔɔ bɛ nye kuku nwolɛ a. Bɛ mra mrenya nee bɛ mra mraalɛ mɔɔ bɛgyakyile bɛ bɛ nzi la badɔ dadeɛ nloa.

²²Na bɛbayɛ mɔɔ meyɛ la bie: bɛnrɛheda bɛ nyunlu yɛɛ bɛnrɛli aleɛ mɔɔ kile kɛ bɛlɛdi nyane la.

²³Bɛbabɔ bɛ abɔtile ne mɔ, bɛawula mgbɔlaboa; bɛnrɛzu yɛɛ bɛnrɛli nyane. Bɛ ninyɛndane ne mɔ bamaa bɛanwa na bɛazu bɛ kunlu bɛakponle bɛahile bɛ nwo ngoko.

²⁴Yizikeɛle bayɛ sɛkɛlɛneɛ amaa bɛ, na mɔɔ yeyɛ la, bie yɛɛ bɛdabɛ noko bɛbayɛ a. Na saa ɛhye mɔ sisi a, yɛɛ bɛbanwu kɛ medame a mele Awulae Nyamenle ne a.”

²⁵Ɛdɛnkɛma zele kɛ, “Na wɔmɔ, Sonla ra, kenle ne mɔɔ mebaza bɛ mealie bɛ aranemgbole ne, bɛ anyelielɛ nee bɛ anyunlunyia, bɛ nye ɛralɛ ne, nee mɔɔ bɛ nye kuku nwolɛ, bɛ mra mrenya nee mraalɛ la,

²⁶kenle ko zɔhane mɔɔ mebayɛ ɛhye la, awie mɔɔ vile ɛsalɛ la yɛɛ baraha ahile wɔ a.

²⁷Kenle ko ne ɛ nloa bade na wɔadendɛ wɔahile ahenle ne mɔɔ vile ɛsalɛ la. Ɛbadendɛ, ɛnrɛdɔ mumule bieko. Yemɔti ɛbayɛ sɛkɛlɛneɛ wɔamaa bɛ, na bɛanwu kɛ medame a mele Ɛdɛnkɛma a.”