Read Nzema Yiz 25 Bible Online

Yiz 25 - Nzema bible

Yiz 25

¹ Ɛdɛnkɛma zele me kɛ,

²“Sonla ra, kakyi ɛ nye wɔ Amɔnoma anwo zo, na ka Nyamenle nrɛlaleɛ ne mɔɔ tia bɛ la.

³Ka kile Amɔnoma kɛ bɛdie Awulae Nyamenle edwɛkɛ ne. Awulae Nyamenle ne se, ‘Kɛmɔ bɛdeanle nu “Mɔɔ kɛza bɛ la ɛne!” wɔ mekɛ mɔɔ bɛvale evinli bɛhanle me ɛleka nwuanzanwuanza ne na bɛzɛkyele Yizilayɛ azɛlɛ ne bɛdole ye mgbane, bɛzɛkyele Dwuda maanle ne wɔ mekɛ mɔɔ bɛhyele bɛ bɛhɔle nlɔnu la,

⁴melɛye bɛ meamaa menli ne mɔɔ wɔ Aduduleɛ la meamaa bɛava bɛ bɛayɛ bɛ ɛdeɛ bɔkɔɔ. Bɛbadɛnla bɛ avinli na bɛasisi bɛ azua wɔ bɛ avinli. Bɛbali bɛ mbaka ma ne mɔ na bɛanlo bɛ nlankɛ nyɛfonzule.

⁵Mebamaa Relaba ayɛ adidileka amaa afunlumu, na Amɔnoma sua ne ayɛ nyɛmoa tunli, na bɛanwu kɛ medame a mele Ɛdɛnkɛma a.’

⁶“Kɛ medame Awulae Nyamenle ne mese la ɛne: Kɛmɔ bɛbɔle bɛ sa nu, bɛzile agole na bɛ ngunzi ti bɛ nye liele bɛ nwo dɔɔnwo bɛtiale Yizilayɛma la ati,

⁷bɛnlea, meva bɛ nwo ɛya kpole, na mebaye bɛ meamaa maanle maanle ne mɔ, na bɛava bɛ kɛ konle nu afedeɛ.[6] Mebaye bɛ meavi menli avinli na meaminli bɛ bo zo wɔ maanle maanle avinli. Mebazɛkye bɛ bɔkɔɔ, na bɛanwu kɛ medame a mele Ɛdɛnkɛma a.”

⁸ Awulae Nyamenle ne se, “Kɛmɔ Mowabe hanle kɛ, Dwudama ɛyɛ kɛ maanle maanle gyɛne ne mɔ la ati,

⁹mebamaa bɛaho bɛava azuamgbole mɔɔ wɔ Mowabe maanle ne ɛweɛne zo, mɔɔ bɔ maanle ne anwo bane la amuala, Bɛte Gyɛhyemo, Beeyale Mɛyɔn, yɛɛ Keleateeyem boka nwolɛ.

¹⁰Mebaye Mowabe maanle ne meaboka Amɔnoma maanle ne meamaa maanle maanle mɔɔ wɔ aduduleɛ la ayɛ bɛ ɛdeɛ, amaa bɛangakye ye bieko wɔ maanle maanle ne mɔ avinli.

¹¹Mebadea Mowabema, na bɛanwu kɛ medame a mele Ɛdɛnkɛma a.”

¹² Awulae Nyamenle ne se, “Kɛmɔ Yidɔm vale atisesebɛ lile Dwudama nzenralɛ, na bɛvonle wɔ nzenralɛlilɛ ne anu la ati, Mal 1.2-5

¹³kɛ medame Awulae Nyamenle ne mese la ɛne: Mebadea Yidɔmma, na meahu menli nee nyɛmoa mɔɔ wɔ maanle ne anu la amuala, na meamaa maanle ne adɔ mgbane. Menli mɔɔ wɔ maanle ne anu la amuala, ɔvi Timan mɔɔ kɔdwu Didan la badɔ dadeɛ nloa.

¹⁴Mebamaa Yizilayɛma aha Yidɔm senle meava meali nzenralɛ. Bɛbayɛ Yidɔmma, kɛmɔ me ɛya ne kpole si de la, na bɛanwu me nzenralɛlilɛ ne deɛ holɛ, medame, Awulae Nyamenle a mese a.”

¹⁵ Awulae Nyamenle ne se, “Filisitiama le abolɛ yɛɛ bɛvale ɛkpɔlɛ mɔɔ ɛnlɛ awieleɛ la a bɛlile bɛ nzenralɛ ne a.

¹⁶Yemɔti medame Awulae Nyamenle mese, mebadea Filisitiama nee Kɛlɛtema, meabɔ bɛ bo zo bɔkɔɔ, na meazɛkye bɛ menli mɔɔ ɛha mɔɔ wɔ ɛnweanloa la.

¹⁷Mebava ɛya ndeanlɛ kpole kpalɛ a meali nzenralɛ ne a, na bɛanwu kɛ medame a mele Ɛdɛnkɛma a.”