Read Nzema Yiz 26 Bible Online

Yiz 26 - Nzema bible

Yiz 26

¹Bɛhyele yɛ bɛhɔle nlɔnu la, ye ɛvolɛ bulu nee ko ne anu, siane ko ne kenle ne mɔɔ lumua la azo, Ɛdɛnkɛma dendɛle hilele me.

²Ɔse, “Sonla ra, Taya ɛha Gyɛlusalɛm anwo edwɛkɛ kɛ, ‘Ɛhɛe, bɛbubu menli ne anlenkɛ kpole ne; akee yela nwolɛ wanaanwo yemaa me. Kɛkala mɔɔ yedɔ mgbane la, me sa baha mɔɔ meminlinle ye la amuala.’

³“Yemɔti medame Awulae Nyamenle mese, ɛdawɔ Taya, meyɛ wɔ kpɔvolɛ, na mebamaa maanle maanle dɔɔnwo ara ɛ nwo zo, kɛmɔ nyevile azɛlɛkye bu la.

⁴Bɛbazɛkye Taya bane ne mɔ, na bɛabubu ye tawa ne mɔ bɛagua aze. Mebadu ye ɛnwea ne kɔsɔɔti meagua, meamaa yeaha ye bolɛ tandane ne mɔɔ la azɛlɛ ne abo la.

⁵Ɔbayɛ ɛleka mɔɔ fɛlɛhyelɛma rɛlɛ bɛ avonle a, wɔ nyevile ne avinli. Medame Awulae Nyamenle a mese a. Ɔbayɛ afedeɛ[7] yeamaa maanle maanle dɔɔnwo.

⁶Bɛbahu menli mɔɔ wɔ azuamgbole ne mɔ azo la, na bɛbanwu kɛ medame a mele Ɛdɛnkɛma a.”

⁷Awulae Nyamenle ne se, “Mebava belemgbunli kpole mɔɔ bo bɛ kɔsɔɔti bɛ nwo zo, Babelonia belemgbunli Nɛbukadenɛza meavi sɔlɔ nehane, meamaa yeava mgbɔnwɔ, konle ehwili, ɛlɔnema mɔɔ tɛnla mgbɔnwɔ zo nee ɛlɔnema dɔɔnwo kpalɛ yeara Taya anwo zo.

⁸Ɔbahu bɛ mra mraalɛ wɔ bɛ azɛlɛ ne azo; ɔbamaa ye ɛlɔnema abɛnra ayia bɛ, bɛbavunvu ahuma, bɛahuohua ɛnwea edukue edukue, na bɛava enyinlike bɛalie bɛ nwo bane bɛaho bɛatia bɛ.

⁹Ɔbamaa bɛava mbaka mgbole bɛasisi bɛ azuamgbole bane ne mɔ kɛ bɛbubu bɛ bɛagua, na yeamaa bɛava akuma bɛagologolo bɛ tawa ne mɔ bɛagua.

¹⁰Ye mgbɔnwɔ ne mɔ bazo dɔɔnwo kpalɛ mɔɔ bɛ nzi munlutu bɔbɔ baheda bɛ nwo zo a. Ye ɛlɔnema mɔɔ ka mgbɔnwɔ nee konle ehwili ne mɔ la agyakɛ abo nee bɛ ne bakpusu bɛ azuamgbole bane ne mɔ, wɔ mekɛ mɔɔ ɔkɛze kɛ akee ɔfo azua ne mɔ azo kɛ sonla mɔɔ ɛli konim la.

¹¹Ye ɛlɔnema mɔɔ ka mgbɔnwɔ la barava bɛ azuamgbole gua ne mɔ, bɛbahu bɛ menli ne mɔ, na bɛ mpila mgbole ne mɔ babubu agua.

¹²Ɛlɔnema ne bave bɛ nwo ninyɛne kɔsɔɔti, bɛ anwonyia nee bɛ ninyɛne adɔne, bɛbabubu bɛ azuamgbole bane ne mɔ nee bɛ azua ngɛnlɛma ne mɔ bɛagua. Bɛbavuandi bɛ awolɛ, dubinli nee ɛnwea bɛagua azule ne mɔ anu.

¹³ Mebamaa bɛagyakyi bɛ edwɛne mɔɔ bɛto la, na awie ɛnrɛde bɛ getaa ne mɔ ane bieko.

¹⁴Mebayɛ bɛ kɛ bodane mɔɔ ɛhwee ɛnle zolɛ la, na bɛayɛ kɛ ɛleka mɔɔ bɛrɛlɛ avonle la. Bɛnrɛkyekye bɛ azua ne mɔ bieko, ɔluakɛ medame Ɛdɛnkɛma yɛɛ meha a.”

¹⁵Awulae Nyamenle hanle ɛhye hilele Taya amra. Ɔse, “Saa bɛba kɛ bɛbahu bɛ a, bɛ menli mɔɔ ɛbodɛboda la ɛkponlenlɛ nee bɛdabɛ mɔɔ bɛho bɛgua la azedɔlɛ bakpusu bɛ ɛnweanloa azua ne mɔ kɔsɔɔti.

¹⁶ Akee arelemgbunli mɔɔ wɔ ɛnweanloa maanle maanle ne mɔ anu la vi bɛ ebia ne mɔ anu badwazo; bɛbayeye bɛ arelemgbunli adɛladeɛ ne mɔ, na bɛayeye bɛ adɛladeɛ ne mɔ nee bɛ adɛladeɛ mɔɔ bɛnwo bɛ nloa la. Bɛ nwo bawozo bɛ; bɛbakpofokpofo aze na bɛ nwo awozo mekɛ biala, na bɛ rɛle abɔ bɛmɛ bɛ nwo.

¹⁷Na bɛbado edwɛne bɛaye awolɛ wɔ bɛmɛ bɛ ti, na bɛaha kɛ: O suakpole mɔɔ lɛ duma, ɛ bo zo ɛbɔ bɔkɔɔ. Ɛnee ɛle suakpole mɔɔ yɛ se, mɔɔ sie nyevile a, ɛdawɔ nee menli mɔɔ wɔ zo la, anwo ka ɛzulolɛ maa bɛdabɛ mɔɔ bɛde azɛlɛ ne azo la.

¹⁸Kenle mɔɔ bɛhonle bɛdɔle la, mbɔra ne mɔ wozole. Ɛhɛe, mbɔra mɔɔ wɔ nyevile nu la arɛle bɔle wɔ bɛ ɛzɛkyelɛ nwo.”

¹⁹Awulae Nyamenle ne se, “Saa meyɛ bɛ suakpole ne suadu kɛ azuamgbole mɔɔ awie ɛnde zolɛ la, memaa nyevile ne bu fa bɛ nwo zo, na azɛlɛkye ne mɔ keda bɛ nwo zo a,

²⁰akee meavuandi bɛ meamaa bɛahɔboka bɛdabɛ mɔɔ bɛkɔ ewule kuma nu la anwo, mebaye bɛ meamaa bɛahɔboka mɔmoane amra anwo, meamaa bɛahɔboka bɛdabɛ mɔɔ bɛwɔ ɛbolɔ maanle nu na bɛde alɔbɔlɛ nu la anwo, amaa bɛannyia ɛleka bɛandɛnla anzɛɛ bɛannyia ɛleka wɔ teasema azɛlɛ zo.

²¹ Mebamaa bɛ awieleɛ ayɛ ɛzulolɛ na bɛ bo zo aminli bɔkɔɔ. Bɛbakpondɛ bɛ bo zo, na bɛnrɛnwu bɛ.” Awulae Nyamenle ne a se a.