Read Nzema Yiz 27 Bible Online

Yiz 27 - Nzema bible

Yiz 27

¹Ɛdɛnkɛma zele me kɛ,

²“Akee wɔmɔ, sonla ra, ye Taya awolɛ, na ka kile ye kɛ,

³Wɔmɔ mɔɔ bɛkyekye wɔ nyevile nloa, menli mɔɔ wɔ ɛnwea ɛnwea gualilɛ ɛleka, kɛ Awulae Nyamenle se la ɛne: O Taya, wɔmɔ wɔha kɛ, wɔ anwofɛlɛko di munli.

⁴Wɔ ɛweɛne ne mɔ wɔ nyevile kunlu lɔ; menli mɔɔ kyekyele wɔ la kyekyele wɔ kɛnlɛma.

⁵Bɛvale Hɛmɔn Boka mbaka ɛsesebɛ bɛyɛle mgbunla, bɛvale Lɛbanɔn sida mbaka bɛyɛle wɔ meli avela mbaka.

⁶Beehyan mbaka ɛsesebɛ a bɛvale bɛzele bɛ ndahoma a; bɛvale Saepelɛse ɛnweanloa mbaka bɛzɛle wɔ meli ne mɔ anu, na bɛvale ɛzɛlɛ bɛduoduale nu.

⁷Bɛvale Yigyibiti lenen ɛdanlɛ kɛnlɛma mɔɔ bɛnwo ɔ nloa la bɛyɛle bɛ meli ne mɔ avela, bɛhilele kɛ ɔle bɛ sɛkɛlɛneɛ. Bɛvale Saepelɛse ndanlɛ kɔkɔlɛ nee buluwu bɛbole kpɔda bɛdɛnlanle ɔ bo; bɛbole belandane bɛ meli ne mɔ anu.

⁸Saedɛnema nee Avadema a hanle meli ne mɔ a; ɛdawɔ wɔ menli mɔɔ ze nyevile nye zo la lile bɛ ɛlɛne bo hanle meli ne mɔ.

⁹Bebolɔsoma mɔɔ ze adwinli kpalɛ, duoduale bɛ meli ayiazo ne mɔ, Nyevile nye meli nee nuhua menli kɔsɔɔti nee bɛ ralile gua.

¹⁰“Sogyama vi Pɛhyea, Ledea, yɛɛ Lebeya rayɛle gyima wɔ wɔ ɛlɔnema anu. Bɛ nee bɛ dɛnlanle, bɛvale bɛ ahyɛlɛ nee bɛ enyinlike bɛhendɛhendanle bɛ azua nu; bɛlile konim bɛmanle bɛ, bɛmanle bɛ nyunlu rale anyia.

¹¹Ɛlɔnema mɔɔ vi Avade nee Hilɛke la zinzale bɛ bane ne mɔ, yɛɛ ɛlɔnema mɔɔ vi Gamade la zinzale bɛ tawa ne mɔ. Bɛhendɛhendanle bɛ enyinlike ne mɔ wɔ bɛ bane ne mɔ anwo na bɛmanle bɛ anwofɛlɛko ne lile munli.

¹²“Wɔ ninyɛne ngɛnlɛma dɔɔnwo ne ati, Sepeenema nee wɔ lile gua na bɛvale bɛ dwɛtɛ fufule, bulalɛ, kyɛnze, yɛɛ sumi bɛmanle wɔ bɛliele ninyɛne.

¹³Gilikima, Tubalema, yɛɛ Mihyɛkema nee wɔ lile gua na bɛdɔnenle menli nee kɔbele ninyɛne bɛmanle wɔ bɛliele ninyɛne bɛvile wɔ ɛkɛ.

¹⁴Bɛte Togama amra dɔnenle bɛ mgbɔnwɔ, konle mgbɔnwɔ, yɛɛ mgbɔnwɔndua manle wɔ liele ninyɛne.

¹⁵Menli mɔɔ wɔ Didan la nee wɔ lile gua; menli mɔɔ de ɛnweanloa la rɛlɛle wɔ ɛzɛlɛ nee mbaka ɛsesebɛ bie mɔɔ bɛfɛlɛ ye ɛbɔni la liele ninyɛne.

¹⁶Wɔ ninyɛne ngakyile dɔɔnwo ne mɔ ati, Yidɔmma nee wɔ lile gua na bɛdɔnenle ezukoa bolɛ anye asuomenle, ndanlɛ kɔkɔlɛ, ndanlɛ mɔɔ bɛnwo ɔ nloa nee nuhua, lenen ndanlɛ ngɛnlɛma, yɛɛ ezukoa awolɛ dɔɔnwo bɛmanle wɔ bɛliele ninyɛne.

¹⁷Dwudama nee Yizilayɛma nee wɔ lile gua. Bɛrɛlɛle wɔ hwiiti, ɔlivi, feege, wolɛ, nwole, yɛɛ ɛnlomedazia na bɛliele wɔ ninyɛne ne mɔ bie.

¹⁸Wɔ ninyɛne ngakyile dɔɔnwo ne mɔ ati, Dɛmasekɛsema nee wɔ lile gua na bɛdɔnenle Hɛlebɔn nwanye, mboane enrinli fufule,

¹⁹yɛɛ Sahɛɛ nwanye bɛmanle wɔ bɛliele wɔ ninyɛne ne mɔ bie. Bɛdɔnenle mbulalɛ mɔɔ bɛva bɛli adwinli yɛɛ aleɛdonlɛ ninyɛne evuanlɛ bɛmanle wɔ.

²⁰Didan nee wɔ lile gua dɔnenle ɛkpɔnwɔ zo ndanlɛ manle wɔ.

²¹Arelebiama nee Kida arelemgbunli a le menli mɔɔ ɛ nye liele bɛ nwo kpalɛ wɔ mboane mralɛ, mboane nyinli, yɛɛ mbɔnkye gualilɛ nu a. Ninyɛne mɔɔ bɛvale bɛ nee wɔ lile gua la ɛne.

²²Hyibama nee Releemama nee wɔ lile gua; bɛdɔnenle bɛ aleɛdonlɛ ninyɛne evuanlɛ kpalɛ, ezukoa awolɛ kpalɛ kpalɛ, yɛɛ ezukoa nvutuke bɛmanle wɔ bɛliele wɔ ninyɛne kpalɛ kpalɛ ne mɔ bie.

²³Hɛlan, Kani, Yidɛn, Ahyɔɔ, yɛɛ Kelemade nee wɔ lile gua.

²⁴Bɛ nee wɔ lile ndakpa gua, yɛɛ akee ndanlɛ buluwu, ninyɛne mɔɔ bɛnwo, kapɛte futufutu mɔɔ bɛva nyɛma bɛkyekye bɛmia nu la amuala.

²⁵ Meli vi Tahyehye yɛɛ batwe wɔ ninyɛne kɔ a. “Yemɔti ɛnee ɛle kɛ meli mɔɔ la nyevile nye, mɔɔ ninyɛne ɛyi ye tɛkɛɛ la.

²⁶Menli mɔɔ ka wɔ la ɛva wɔ ɛdo nyevile nye. Aduduleɛ anwoma ɛnloma wɔ nyevile buma nu.

²⁷Wɔ anwonyia, wɔ ninyɛne adɔne, wɔ menli mɔɔ ka meli nee zolɛ neavolɛma, wɔ kapentama nee adenduvoma, ɛlɔnema mɔɔ ɛlɛ bɛ la amuala nee menli mɔɔ ɛlɛ bɛ la amuala banloma gbodogbodo wɔ nyevile kunlu lɔ, wɔ kenle ne mɔɔ ɛbanwu ɛ nyunlu la.

²⁸Wɔ menli mɔɔ nea wɔ meli ne mɔ azo la ɛzunlɛ dielie maanle ne anu amuala.

²⁹“Menli mɔɔ ka meli ne la fo gua ndahoma zo weɛ azule ba ɛnweazo. Bɛ muala bɛbagyinla ɛnwea ne anloa,

³⁰bɛsu alɔbɔlɛ ɛzunlɛ, bɛye awolɛ. Bɛfula anwea bɛgua bɛ ti zo, bɛweweɛ bɛ nwo nzonle nu.

³¹Wɔmɔ ati, bɛkpa bɛ ti, bɛkeda ɛrele, na bɛfa nyane bɛsu alɔbɔlɛ ɛzunlɛ.

³²Bɛye awolɛ wɔ bɛ ɛzunlɛ nu, na bɛye awolɛ kɛ: ‘Suakpole boni a wɔ nyevile avinli mɔɔ bɛzɛkye ye bɛdɛla Taya a?

³³Mekɛ mɔɔ wɔ ninyɛne adɔne vi nyevile nzi ba la, ɛmanle menli dɔɔnwo anye liele; wɔ anwonyia nee wɔ ninyɛne adɔne manle azɛlɛ ye azo arelemgbunli nyianle bɛ nwo.

³⁴Wɔmɔ a nyevile ne ɛbɔ ɛ bo zo wɔ azule buma ne anu lɔ la; wɔ ninyɛne adɔne nee menli mɔɔ ka meli ne la, nee wɔ ɛnloma gbodogbodo.’

³⁵“Wɔ anwubɛnyunlu ne ɛmaa awie biala mɔɔ de ɛnweanloa la ahonle ɛdu; na ɛzulolɛ ɛmaa bɛ arelemgbunli nyunlu ɛdo.

³⁶Gualilɛma mɔɔ wɔ menli ne anu la ahonle dule kɛ wɔ awieleɛ ɛwie ɛzulolɛ zɛhae, na ɛnrɛkpazi bieko ɛlɛ na aloa abɔ a.”