Read Nzema Yiz 28 Bible Online

Yiz 28 - Nzema bible

Yiz 28

¹Ɛdɛnkɛma dendɛle hilele me.

²Ɔse, “Sonla ra, ka kile Taya belemgbunli ne kɛ, medame Awulae Nyamenle mese: Kɛmɔ ɛtu ɛ nwo la ati, wɔha mgbole kɛ, ‘Medame, mele nyamenle, mede nyamenle ne mɔ kɔsɔɔti ebia nu, wɔ nyevile kunlu nehane,’ noko ɛle sonla, ɛnle nyamenle. Ɛyɛ ɛ nwo kɛ ɛze nrɛlɛbɛ kɛ nyamenle bie,

³na ɛze nrɛlɛbɛ bɔbɔ ɛtɛla Daneɛle, yemɔti debie biala ɛnvea wɔ.

⁴Wɔ nrɛlɛbɛ nee wɔ ndelebɛbo ti wɔnyia ɛ nwo, na wɔboɔboa ezukoa nvutuke nee dwɛtɛ fufule dɔɔnwo anloa wɔ wɔ gya ne mɔ anu.

⁵Wɔ gualilɛ nu nrɛlɛbɛ kpole ne mɔɔ ɛlɛ la ati, wɔ anwonyia ɛzo dɔɔnwo, na ɔmaa ɛmemaa ɛ nwo zo.

⁶“Yemɔti kɛ medame, Awulae Nyamenle mese la ɛne: Kɛmɔ wɔyɛ ɛ nwo kɛ ɛze nrɛlɛbɛ kɛ nyamenle bie la ati,

⁷nea, mebamaa nyɛvolɛ maanle anwo ɛzulolɛ bie ara ɛ nwo zo. Bɛbahwe dadeɛ bɛazɛkye wɔ nrɛlɛbɛ ninyɛne ngɛnlɛma ne mɔ, bɛamaa ɛ nyunlu adɔ aze abɔ.

⁸Bɛbavuandi wɔ bɛado ewule kuma ne anu, na wɔawu dadeɛ nloa wɔ nyevile kunlu nehane.

⁹Asoo ɛbaha kɛ, ‘Mele nyamenle,’ wɔ menli mɔɔ ɛlɛku wɔ la anyunlu? Ɛle sonla, ɛnle nyamenle wɔ menli mɔɔ ɛlɛbodɛboda wɔ la asa anu.

¹⁰Ɛbawu anyiemgba ewule wɔ nyɛvolɛ asa anu; ɔluakɛ medame Awulae Nyamenle yɛɛ mese a.”

¹¹Ɛdɛnkɛma dendɛle hilele me bieko.

¹²Ɔse, “Sonla ra, ye awolɛ gua Taya belemgbunli ne ati zo, na se ye kɛ, medame, Awulae Nyamenle, mese: Ɛnee ɛle sɛkɛlɛneɛ mɔɔ di munli, ɛze nrɛlɛbɛ na wɔ anwofɛlɛko di munli.

¹³Ɛnee ɛwɔ Yidɛn, Nyamenle tola ne anu; ezukoa bolɛ biala mɔɔ anwo hyia la, menvale mengedale wɔ. Ezukoa awolɛ, kanɛlia, topaze, gyasepa, kelesɔlaete, bɛlele, ɔnekese, safaya, kɛbɛnkele, yɛɛ ɛmelade yɛɛ bɛvale bɛduoduale wɔ adɛladeɛ nu a. Kenle ko ne ala mɔɔ bɛbɔle wɔ la yɛɛ bɛboɔboale bɛ nloa bɛmanle wɔ a.

¹⁴Wɔmɔ, menyɛle wɔ tease abɔdeɛ mɔɔ mekpokpa wɔ nwole la menziele wɔ Nyamenle boka nwuanzanwuanza ne azo, na ɛluoluale awolɛ guaanye zo.

¹⁵Ɔvi kenle ko ne mɔɔ bɛbɔle wɔ la, ɛ nwo annyia nvonleɛ biala, hɔdwule kɛ ɛtane rale wɔ nu la.

¹⁶Wɔ gualilɛ ne yɛle kpole la ati, ɛbɔle kɔdiawu ɛbɛla na ɛyɛle ɛtane. Yemɔti ɛyɛle bɛkyi debie wɔ me sa nu, na menvuandinle wɔ wɔ Nyamenle boka nwuanzanwuanza ne azo mendele aze, na tease abɔdeɛ ne mɔɔ sinza wɔ la voanle wɔ vile awolɛ guaanye ne mɔ avinli.

¹⁷Ɛlile wɔ kɛnlɛma nzi ɛdule ɛ nwo, ɛlile wɔ kpoleyɛlɛ nzi ɛzɛkyele wɔ nrɛlɛbɛ. Menvuandinle wɔ mendole aze, menyele ɛ nwo zo ɛdanlɛ mengilele arelemgbunli kɛ bɛnlea wɔ.

¹⁸Wɔ ɛtane dɔɔnwo ne mɔ ati, ɛlile gua ɛtane ɛvale ɛzɛkyele wɔ ɛleka nwuanzanwuanza ne mɔ. Yemɔti memanle senle zɔle bɛ avinli na ɔyelale wɔ ɔhunle wɔ. Awie biala mɔɔ anye babɔ ɛ nwo zo la banwu kɛ wɔdɔ nzonle wɔ azɛlɛ ye azo.

¹⁹Bɛdabɛ kɔsɔɔti mɔɔ bɛze wɔ wɔ maanle maanle avinli la arɛle babɔ ɛ nwo, kɛ wɔ awieleɛ ɛwie ɛzulolɛ zɛhae, na ɛnrɛkpazi bieko ɛlɛ na aloa abɔ a.”

²⁰ Ɛdɛnkɛma zele me kɛ,

²¹“Sonla ra, kakyi ɛ nye Saedɛn na ka Nyamenle nrɛlaleɛ ne tia ye kɛ,

²²Awulae Nyamenle ne se, ‘Saedɛn, meyɛ wɔ kpɔvolɛ, na mebamaa menli aye me ayɛlɛ wɔ wɔmɔ ɛ ti. Bɛbanwu kɛ medame a mele Ɛdɛnkɛma a, wɔ mekɛ mɔɔ me nee wɔ kɛli, kɛmɔ ɔfɛta na menwɔlua ɛ nwo zo menwɔye me nwuanzanwuanzayɛlɛ ne menwɔhile la.

²³Ɔluakɛ mebaye ewulenzane ɛzulolɛ bie meado ɛ nwo na mogya ava wɔ guabile ne mɔ azo. Bɛbava konle bɛadoa wɔ wɔ adenle biala azo, na bɛahu wɔ menli ne mɔ. Na bɛbanwu kɛ medame a mele Ɛdɛnkɛma a!’ ”

²⁴Ɛdɛnkɛma zele kɛ, “Na Yizilayɛma ɛdeɛ, agbɔvolɛ maanle maanle mɔɔ ɛbɔ ɛyia bɛ la anu biala ɛnrɛhakyi ɔ nwo mbowunzaka anzɛɛ mbowule ɛnrɛwowɔ anzɛɛ ɛnrɛbodɛboda bɛ. Na bɛbanwu kɛ medame a mele Awulae Nyamenle ne a.”

²⁵Awulae Nyamenle ne se, “Saa meboɔboa Yizilayɛma anloa mefi maanle maanle mɔɔ mebɔ bɛ asande mehɔgua nuhua la anu, na meye me nwuanzanwuanzayɛlɛ ne mekile, wɔ maanle maanle kɔsɔɔti anye zo a, bɛbadɛnla bɛdabɛ bɛ maanle ne mɔɔ menvale memanle me sonvolɛ Gyekɔbo la anu.

²⁶Bɛ nwo badɔ bɛ na bɛasisi azua, bɛayɛ bɛ vanye egyinli. Saa me nee maanle maanle mɔɔ zuozua bɛ, mɔɔ ɛmbu bɛ la di, kɛmɔ ɔfɛta la a, bɛbadɛnla, bɛ nwo adɔ bɛ. Na akee bɛbanwu kɛ medame a mele Ɛdɛnkɛma bɛ Nyamenle ne a.”