Read Nzema Yiz 29 Bible Online

Yiz 29 - Nzema bible

Yiz 29

¹Bɛ nee yɛ hɔle nlɔnu la, ye ɛvolɛ bulu, siane bulu ne, kenle bulu nee nwiɔ ne azo, Ɛdɛnkɛma dendɛle hilele me.

²Ɔse, “Sonla ra, kakyi ɛ nye wɔ Yigyibiti belemgbunli ne anwo, na ka Nyamenle nrɛlaleɛ ne mɔɔ tia ye nee Yigyibitima amuala la kile ye. Tendɛ se ye kɛ,

³Awulae Nyamenle ne se: Bɛnlea, mekpo Yigyibitima belemgbunli ne. Yeyɛ ɔ nwo nane kpole anwo ɛzulolɛ bie mɔɔ le kɛ ɛlɛnrɛne la yela azule Naele ne anu, na ɔka kɛ, ‘Medame a melɛ azule Naele ne a; medame a menyɛle a.’

⁴Mebabɔ koba wɔ wɔ awudwɔlɛ nu, na meamaa fɛlɛ mɔɔ wɔ wɔ azule ne mɔ anu la abetɛbeta ɛ nwo abonle ne mɔ anu. Mebaye wɔ nee fɛlɛ ne mɔ mɔɔ betɛbeta wɔ abonle ne mɔ anu la meavi azule ne mɔ anu,

⁵na meavuandi bɛ meagua ɛsɛlɛ ne azo lɔ, na ɛdawɔ nee fɛlɛ mɔɔ wɔ wɔ azule ne mɔ anu la baha ɛsɛlɛ ne azo, na awie ɛnrɛsesa bɛ ɛnrɛzie bɛ. Mebava bɛ meamaa azɛlɛ ye azo nanemgbole nee nloma mɔɔ wɔ anwomanyunlu la kɛ bɛli.

⁶ Na Yigyibitima kɔsɔɔti banwu kɛ medame a mele Ɛdɛnkɛma a!” Ɛdɛnkɛma se, “Yigyibitima yɛle bɛ nwo ndɔ baka wulera.”

⁷Yemɔti mekɛ mɔɔ Yizilayɛma zɔle nu dudule hisale bɛ la, bɛbubule, bɛbodɛbodale bɛ bati, bɛmanle bɛ nzi kpolokpolole na bɛ adwongu wozole.

⁸Yemɔti Awulae Nyamenle ne se, “Mebava konle meara bɛ nwo zo, na bɛahu menli nee nane kɔsɔɔti,

⁹Yigyibiti maanle ne badɔ mgbane; awie biala ɛnrɛdɛnla nuhua. Na akee bɛbanwu kɛ medame a mele Ɛdɛnkɛma a. “Kɛmɔ ɛdawɔ Yigyibiti belemgbunli ɛhanle kɛ Azule Naele ne le wɔ ɛdeɛ, na ɛdawɔ yɛɛ ɛyɛle la ti,

¹⁰nea, mehakyi me nzi mezi wɔ nee wɔ azule ne mɔ amuala. Mebamaa Yigyibiti azɛlɛ ne adɔ mgbane, ɔvi suakpole Megedɔlo mɔɔ wɔ maanle ne sɔlɔ lɔ la, yearadwu Asewan, toonwo yearadwu Sudanema ɛweɛne zo, wɔ maanle ne nyiakɛ.

¹¹Sonla anzɛɛ nane biala agyakɛ ba ɛnrɛtia zolɛ. Awie ɛnrɛdɛnla zolɛ toonwo ɛvolɛ abulanla.

¹²Mebayɛ Yigyibiti azɛlɛ ne mgbane meado maanle maanle mɔɔ ɛdɔ mgbane la avinli. Awie ɛnrɛdɛnla ye azuamgbole ne mɔ mɔɔ ɛdɔ mgbane anzɛɛ ɛyɛ azuadu la azo toonwo ɛvolɛ abulanla wɔ azuamgbole mɔɔ ɛyɛ azuadu la avinli. Mebabɔ Yigyibitima asande meahɔgua maanle maanle zo, na meazande bɛ wɔ aneɛ ngakyile avinli.”

¹³Awulae Nyamenle ne se, “Saa ɛvolɛ abulanla ne dwu a, mebaboɔboa Yigyibitima anloa meavi maanle maanle mɔɔ memkpondenle bɛ nu la anu.

¹⁴Mebamaa bɛazia bɛanyia bɛ anwonyia ne mɔ bieko, na meava bɛ meara bɛdabɛ bɛ maanle nu, wɔ Patolɔso azɛlɛ zo, na akee bɛayɛ maanle bɛlɛvo.

¹⁵Ɔbayɛ maanle bɛlɛvo kpalɛ kpalɛ, na ɔnrɛdu ɔ nwo bieko wɔ maanle maanle avinli. Mebaha bɛ aze fɛɛnye mɔɔ bɛnrɛzie maanle biala ɛlɛ a.

¹⁶Yizilayɛma ɛnrɛva bɛ rɛle ɛnrɛwula bɛ nu bieko. Bɛbahakye amumuyɛ mɔɔ bɛvale bɛyɛle bɛ wɔ mekɛ mɔɔ bɛhɔbizale bɛ moalɛ la. Na akee Yigyibitima banwu kɛ medame a mele Awulae Nyamenle ne a.”

¹⁷Bɛ nee yɛ hɔle nlɔnu la, ye ɛvolɛ abulanwiɔ nee nsuu ne, siane ne mɔɔ lumua la, kenle ne mɔɔ lumua la azo, Ɛdɛnkɛma dendɛle hilele me.

¹⁸Ɔse, “Sonla ra, Babelonia Belemgbunli Nɛbukadenɛza manle ye ɛlɔnema yɛle ketekete kpalɛ tiale Taya. Ɔmanle bɛzoale awolɛ toonwo bɛ ti zo dule, bɛ bati kpolokpolole, noko ɔdaye o, ye ɛlɔnema o, biala annyia ɛhwee anvi Taya wɔ ɛvɛlɛ totohyia ne mɔɔ bɛvɛle la anwo.

¹⁹Zɔhane ati kɛ medame, Awulae Nyamenle ne mese la ɛne: Bɛnlea, mebava Yigyibiti azɛlɛ ne meamaa Babelonia belemgbunli Nɛbukadenɛza. Ɔbazoa zolɛ anwonyia muala yeahɔ, na ye ɛlɔnema ave zolɛ ninyɛne kɔsɔɔti bɛava bɛadua bɛ nwo kakɛ.

²⁰Meva azɛlɛ ne memaa ye kɛ ye ɛvɛlɛ nwo ahatualɛ ɔ, ɔboalekɛ ɔyɛle gyima ne ɔmanle me. Kɛ medame Awulae Nyamenle mese la ɛne.

²¹“Mekɛ ne anu, mebamaa katakyiema adwazo Yizilayɛma avinli, na mebade ɛ nloa wɔ bɛ avinli. Na akee bɛbanwu kɛ medame a mele Ɛdɛnkɛma a.”