Read Nzema Yiz 3 Bible Online

Yiz 3 - Nzema bible

Yiz 3

¹ Nyamenle zele me kɛ, “Sonla ra, di mɔɔ meva memaa wɔ la. Di nwoma ne na kɔ, kɔdendɛ kile Yizilayɛma amuala.”

²Yemɔti membukele me nloa, na ɔvale nwoma ne ɔmanle me kɛ menli.

³Na ɔzele me kɛ, “Sonla ra, di nwoma ɛhye mɔɔ melɛfa meamaa wɔ la maa ɛ ko ɛyi.” Menlile, na ɔyɛle me nloa anu menlemenle kɛ wolɛ.

⁴Na ɔzele me kɛ, “Sonla ra, kɔ Yizilayɛma ɛkɛ na ka me nloa edwɛkɛ ne kile bɛ.

⁵Menzoa wɔ wɔ menli mɔɔ ka ɛdendɛlɛ gyɛne na bɛ aneɛ ne yɛ se la anu. Melɛsoa wɔ wɔ Yizilayɛma ɛkɛ. Menzoa wɔ wɔ menli ngakyile mɔɔ asolo bɛ ɛdendɛlɛ na bɛ aneɛ ne yɛ se, mɔɔ ɛnrɛde ɔ bo la ɛkɛ.

⁶Saa mesoa wɔ wɔ menli zɛhae bie mɔ ɛkɛ ne a, bɛbadie wɔ.

⁷Noko Yizilayɛma ɛdeɛ, bɛnrɛdie wɔ, ɔluakɛ bɛngulo kɛ bɛtie me ne, ɔboalekɛ Yizilayɛma kɔsɔɔti ati anu le bile, yɛɛ bɛ ahonle ɛsolo.

⁸Kɛkala, mebamaa ɛdawɔ noko wɔayɛ se na meamaa wɔasolo kɛ bɛdabɛ la.

⁹Memaa ɛ ti ayɛ se kpole kpalɛ adɛla ɛtwɛlɛboɔ. Yemɔti mmasulo bɛ, yɛɛ mmamaa bɛ anyehoanlɛ ne mɔ tu ɛ kunlu, ɔluakɛ bɛle menli mɔɔ ɛde atua a.”

¹⁰Nyamenle zɔle zolɛ hanle kɛ, “Sonla ra, tie mɔɔ melɛka meahile wɔ la boɛ na kakye debie biala mɔɔ mebaha meahile wɔ la.

¹¹Kɔ wɔ menli ne mɔɔ wɔ nlɔnu la ɛkɛ ne, na saa bɛtie wɔ o, bɛandie wɔ o, ka kile bɛ kɛ, ‘Kɛ medame, Awulae Nyamenle, mese la ɛne.’ ”

¹²Akee Nyamenle Sunsum ne manle me zo, na mɔɔ Ɛdɛnkɛma anyunlunyia ne ɛlɛkpogya ɔ nwo zo avi ɔ bo zo ne la, mendele azɛlɛkpusulɛ ɛnelɛ kpole bie wɔ me nzi nehane.

¹³Tease abɔdeɛ ne mɔ andɛba ne mɔ mɔɔ keha bɛ nwo, yɛɛ ehwili ne mɔ anwo alɛra ne a le kɛ azɛlɛkpusulɛ la.

¹⁴Nyamenle Sunsum ne wolole me na ɔmanle me zo ɔhɔle. Ɛnee ɛya ɛhu me kpole. Na ɛnee Ɛdɛnkɛma Sunsum ne tumi ne wɔ me nwo zo kpole.

¹⁵Membale bɛdabɛ mɔɔ bɛwɔ nlɔnu la ɛkɛ wɔ Tɛle Abebe, wɔ Azule Kibaa ne anloa, ɛleka mɔɔ bɛdabɛ mɔɔ bɛwɔ nlɔnu la wɔ la. Me nee bɛ dɛnlanle kenle nsuu, na mɔɔ mendele nee mɔɔ menwunle ye la zinle me nwo.

¹⁶Kenle nsuu ne anzi, Ɛdɛnkɛma dendɛle hilele me.

¹⁷Ɔse, “Sonla ra, meyɛ wɔ Yizilayɛma sinzavolɛ. Kenle biala mɔɔ ɛkɛde edwɛkɛ ɛkɛvi me nloa anu la, ɛbaha wɔahile bɛ wɔabɔ bɛ kɔkɔ wɔamaa me.

¹⁸Saa mese amumuyɛnli bie kɛ ɔbawu, na wɔanga wɔangile ye wɔamaa yeangakyi ye subane, yeanlie ye ɛkɛla ngoane a, ɔbawu kɛ ɔle ɛtanenli, na mebabiza wɔ ye ewule nwo edwɛkɛ.

¹⁹Na saa ɛbɔ amumuyɛnli ne kɔkɔ, na yeangakyi ye subane a, ɔbawu, na wɔmɔ, ɛlɛ wɔ ngoane, ɛnli ɛzonle.

²⁰“Saa tenlenenli bɔ ɔ bo kɛ ɔdi ɛtane, ɔyɛ amumuyɛ a, mebamaa yeadu koti. Kɛmɔ ɛtɛbɔle ye kɔkɔ la ati, ɔbawu wɔ ye ɛtane ti, yɛɛ ye debie kpalɛ biala mɔɔ ɔyɛle la, menrɛhakye ye bieko; na ye ewule ne ɛdeɛ, mebabiza wɔ nwolɛ edwɛkɛ.

²¹Noko akee, saa ɛbɔ tenlenenli zɔhane kɔkɔ kɛ ɔmmayɛ ɛtane ne na ɔgyakyi, yeannyia yeanyɛ ɛtane ne a, ɔbanyia ngoane kɛ ɔdiele wɔ kɔkɔbɔlɛ ne a, yɛɛ ɛdawɔ noko wɔlie wɔ ngoane.”

²²Na Ɛdɛnkɛma tumi ne dwule me nwo zo kpole kpalɛ, na ɔzele me kɛ, “Dwazo kɔ azɛlɛ sɛsɛ wienyi ne azo lɔ. Ɛkɛ ne a mebadendɛ meahile wɔ a.”

²³Yemɔti mendwazole mengɔle azɛlɛ sɛsɛ wienyi ne azo lɔ, na menwunle Ɛdɛnkɛma anyunlunyia ne wɔ ɛkɛ, ɔle kɛ anyunlunyia ne mɔɔ menwunle ye wɔ Azule Kibaa ne anloa la, na membutule mutule nu.

²⁴Na Nyamenle Sunsum ne wolole me na mendwazole mengyinlanle me gyakɛ anu, na ɔdendɛle ɔzele me kɛ, “Kɔ kɔdo ɛ nwo anlenkɛ nu wɔ ɛdawɔ wɔ sua nu ɛkɛ.

²⁵Na wɔmɔ, sonla ra, bɛbava nyɛma bɛakyekye wɔ mɔɔ ɛnrɛhola menli nu finde a.

²⁶Mebamaa ɛ tafinlima abutu na wɔadɔ mumule mɔɔ ɛnrɛhola tendɛ na wɔabɔ bɛ kɔkɔ a, ɔboalekɛ bɛle atuadelɛma.

²⁷Na saa me nee wɔ tendɛ a, mebazianyi ɛ tafinlima na wɔaze bɛ kɛ, ‘Kɛ Awulae Nyamenle ne se la ɛne.’ Mɔɔ kɛdie la, maa ɔdie, mɔɔ kɛkpo noko kɛ ɔnrɛdie la, gyakyi ye, ɔluakɛ bɛle atuadelɛma.”