Read Nzema Yiz 30 Bible Online

Yiz 30 - Nzema bible

Yiz 30

¹Ɛdɛnkɛma dendɛle hilele me.

²Ɔse, “Sonla ra, ka Nyamenle nrɛlaleɛ ne, ka kɛ, Awulae Nyamenle ne kɛ se la ɛne: Bɛzu kenle ne!

³Ɔluakɛ kenle ne ɛbikye, Ɛdɛnkɛma kenle ne ɛbikye. Amungu ngome bava kenle ne, ɔle munzule mekɛ ɔmaa maanle maanle ne mɔ.

⁴Konle bava Yigyibiti aze, na abodelɛ kpole ado Sudanema, mekɛ mɔɔ Yigyibitima kɛho kɛdɔ, bɛkɛzoa ye anwonyia muala bɛkɛhɔ na bɛkɛgyakyi ye bɛkɛdo ye ɛkɛ ne kpoholokpo la.

⁵“Sudanema, Lebeyama, Ledeama, Arelebiama amuala, yɛɛ Kɛɛbema mɔɔ bɛbɔle bɛ ɛkpa wɔ konle ne anu la amuala baho adɔ. Me menli ne bie mɔ noko baho adɔ.”

⁶Ɛdɛnkɛma se, “Bɛdabɛ mɔɔ bɛboa Yigyibiti la amuala baho adɔ, yɛɛ ye anwosesebɛ kpole ne baha aze, ɔvi Megedɔlo yeahɔdwu Asewan mɔɔ wɔ nyiakɛ la, bɛ muala bɛbawu dadeɛ nloa, medame Awulae Nyamenle a mese a.

⁷Azɛlɛ ne badɔ mgbane adɛla azɛlɛ biala, yɛɛ ye azuamgbole bayɛ azuadu wɔ azuadu avinli.

⁸Na akee bɛbanwu kɛ medame a mele Ɛdɛnkɛma a, wɔ mekɛ mɔɔ menwɔdo senle wɔ Yigyibiti, na ye boavolɛma amuala kɛwie wu la.

⁹Mekɛ zɔhane anu, mebazoa menli meamaa bɛava meli bɛahɔnwunlonwunla Sudanema wɔ mekɛ mɔɔ bɛ nye ɛnla la, na nyane mɔɔ bɛbade nee abodelɛ mɔɔ bɛbanwu ye la bayɛ kɛ mekɛ mɔɔ Yigyibiti bɔle la, ɔluakɛ nea, mekɛ ne asɛɛ ɛdwu!”

¹⁰Awulae Nyamenle ne se, “Mebamaa Babelonia belemgbunli Nɛbukadenɛza adua Yigyibiti anwonyia adenle.

¹¹Bɛbava yemɔ yɛɛ ye menli mɔɔ li ɔ nzi, mɔɔ le maanle anwo ɛzulolɛ tɛla maanle kɔsɔɔti la bɛara, bɛamaa bɛazɛkye azɛlɛ ne, na bɛ nee Yigyibitima aho, bɛahu menli ne bɛagua azɛlɛ ne azo.

¹²Mebamaa azule Naele ne asesa, na meadɔne azɛlɛ ne meamaa amumuyɛma. Mebamaa nyɛvolɛ azɛkye azɛlɛ ne nee debie biala mɔɔ wɔ zolɛ la. Medame Ɛdɛnkɛma a mese a.”

¹³Awulae Nyamenle ne se, “Mebazɛkye mmonle ne mɔ nee ananze ne mɔ mɔɔ wɔ Mɛmefese la. Belemgbunli ɛnrɛdwazo Yigyibiti azɛlɛ zo bieko, yemɔti mebava sulosulo meado Yigyibitima anwo.

¹⁴Mebamaa Yigyibiti nyiakɛ (Patolɔso) adɔ mgbane, na meado senle wɔ Zowan. Mebadea suakpole Tibɛse.

¹⁵Mebadea Yigyibiti aranemgbole Pɛluseyɔm, na meahu menli mɔɔ wɔ Tibɛse la amuala.

¹⁶Mebado senle wɔ Yigyibiti; Pɛluseyɔmma banwu nyane nee abodelɛ kpole. Bane mɔɔ bɛhye ye wɔ suakpole Tɛɛbe anwo la bagologolo agua, na nyane ayɛ kɛ azuyilɛ ava suakpole ne.

¹⁷Mgbavolɛ mɔɔ wɔ azuamgbole Hɛleɔpɔlese nee Bubatese azo la badɔ dadeɛ nloa, yɛɛ bɛbahye mraalɛ ne mɔ nuokɛ.

¹⁸Awozinli bava Tapanehizi wɔ mekɛ mɔɔ menwɔzɛkye Yigyibiti nee ye anwosesebɛ ne mɔɔ ɔfa ɔtu ɔ nloa anu la. Amungu bava ye na bɛahye ye mralɛ mraalɛ ne mɔ nuokɛ.

¹⁹Kɛ mebazi meadea Yigyibiti la ɛne. Na akee bɛbanwu kɛ medame a mele Ɛdɛnkɛma a.”

²⁰Bɛhyele yɛ bɛhɔle nlɔnu la, ye ɛvolɛ bulu nee ko ne, siane ne mɔɔ lumua la, kenle ne mɔɔ tɔ zolɛ nsuu la azo, Ɛdɛnkɛma dendɛle hilele me.

²¹Ɔse, “Sonla ra, mebu Yigyibiti belemgbunli ne asa. Bɛtɛbɔle ye bɔlɛ kɛ bɛyɛ ye ayile na nuhua ayɛ se, na yeahola yeava konle dadeɛ yeaho.

²²Yemɔti medame, Awulae Nyamenle, mese: Mekpo Yigyibiti belemgbunli ne. Mebabubu ɔ sa, ɔ sa kpalɛ ne nee mɔɔ ɛbu dɛba la amuala, na meamaa konle dadeɛ ne avi ɔ sa nu adɔ aze.

²³Mebabɔ Yigyibitima asande meagua maanle maanle ne mɔ avinli na meakponde bɛ wɔ azɛlɛ ne azo amuala.

²⁴Mebamaa Babelonia belemgbunli ne asa anu ayɛ se na meava me konle dadeɛ ne meawula ɔ sa nu. Mebakpanekpane Yigyibiti belemgbunli ne asa, na yeakponle Babelonia belemgbunli ne anyunlu ɛkɛ ne kɛ sonla mɔɔ ɛboda kpole bie la.

²⁵Mebamaa Babelonia belemgbunli ne asa anu ayɛ se, na Yigyibiti belemgbunli ne asa anu ado, na bɛbanwu kɛ medame a mele Ɛdɛnkɛma a. Saa mefa me konle dadeɛ ne mewula Babelonia belemgbunli ne asa anu a, ɔbava yeahɔ Yigyibitima anwo zo,

²⁶na mebazande Yigyibitima wɔ maanle maanle avinli, na meakponde bɛ wɔ maanle zɔhane mɔ anu. Na akee bɛbanwu kɛ medame a mele Ɛdɛnkɛma a.”