Read Nzema Yiz 31 Bible Online

Yiz 31 - Nzema bible

Yiz 31

¹Bɛhyele yɛ bɛhɔle nlɔnu la, ye ɛvolɛ bulu nee ko, siane nsa ne, kenle ne mɔɔ lumua la, Ɛdɛnkɛma dendɛle hilele me.

²Ɔse, “Sonla ra, ka kile Yigyibiti belemgbunli nee ye menli ne amuala kɛ: Nwane a ɛzɔho ye wɔ wɔ kpoleyɛlɛ nu a?

³Nea, mefa wɔ meado Lɛbanɔn sida baka nwo, ɔlɛ ngane ngɛnlɛma mɔɔ maa alubo, yɛɛ ɔwale, ɔ ti dwu amungu ne mɔ anu.

⁴Ɔnyia nzule ɔnyi ɔyɛ kpole; azɛlɛ bo nzule maa ɔnyi tendenle. Azule se dua ɛleka mɔɔ bɛlua bɛ la, na ɔdoɔloa kpɔkɛ ne anu mbaka bo.

⁵Yemɔti ɔwa ɔyɛ tendenle ɔtɛla kpɔkɛ nu mbaka kɔsɔɔti. Ye ngane kye yɛ mgbole, na ɔtoto ɔ sa ndendenle. Ɔluakɛ ye ndinli nyia nzule dɔɔnwo.

⁶Anwomanyunlu nloma kɔsɔɔti yɛ bɛ sane wɔ ye ngane ne mɔ anu; kpɔkɛ nu nane kɔsɔɔti wo bɛ mra wɔ ye ngane ne mɔ abo; maanle maanle tɛnla bɛ alubo nu.

⁷Baka ne kpole le kɛnlɛma, ɔwale, ye ngane le ndendenle; ye ndinli dwu kɔ aze kpalɛ, ɔto azɛlɛ bo nzule.

⁸ Sida mbaka mɔɔ wɔ Nyamenle tola ne anu la nee ye ɛnzu kɛnlɛma, yɛɛ bolonyia baka nee ye ngane mgbole ɛnzɛ. Baka biala ngane nee ye ɛdeɛ ne ɛnzɛ, yɛɛ baka biala ɛnle Nyamenle tola ne anu mɔɔ nee ye sɛ kɛnlɛma a.

⁹Menyɛle ye kɛnlɛma memanle ɔdɛlɛdɛlɛle ye ngane, mbaka mɔɔ wɔ Nyamenle Yidɛn tola ne anu la anye bolole ye.

¹⁰“Yemɔti, medame Awulae Nyamenle, mese: Kɛmɔ ɔnyinle ɔyɛle tendenle na ɔ ti dwule amungu ne mɔ anu, na ɔmemanle ɔ nwo zo wɔ ye tendenle ne ati la,

¹¹mebava ye meawula maanle ne mɔ anu katakyie ne asa anu, ɔ nee ye ali, kɛmɔ ye amumuyɛ ne mɔ fɛta la. Mevuandi ye medo ala ɛne.

¹²Nyɛvolɛ maanle maanle mɔɔ anwo yɛ ɛzulolɛ la bapɛ ye ado na bɛagyakyi ye ɛkɛ. Ye ngane ne mɔ babubu agua mbɔnza nu nee awoka ne mɔ azo, na ye baka mumua ne abubu agua azɛlɛ ne azo azudenle ne mɔ anu. Menli mɔɔ wɔ ewiade la amuala banriandi avi ye alubo ne anu.

¹³Anwomanyunlu nloma baradɛnlɛdɛnla baka wulera ne azo na ɛbɔ nu nanemgbole araluolua ye ngoloka ne mɔ anu.

¹⁴Meyɛ ɛhye mɔ amuala, amaa baka biala mɔɔ gyi azule nloa la annyi angɔ anwuma somaa, anzɛɛ ɔ ti annyi andwu amungu ne mɔ anu, na mbaka mɔɔ no nzule la annyi ndendenle zɔhane, ɔluakɛ bɛye bɛ muala bɛmaa ewule, kɛmɔ menli wu la, bɛboka bɛdabɛ mɔɔ bɛkɔ ewule kuma nu la anwo.”

¹⁵Awulae Nyamenle ne se, “Saa baka ne wu kɔ ɛbolɔ a, mebamaa azɛlɛ bo nzule azu ye, na yeasisi ye azule ne mɔ, yeamaa azule dɔɔnwo azi. Mebamaa awozinli ava Lɛbanɔn, na ɔdaye ti kpɔkɛ nu mbaka kɔsɔɔti agyengye.

¹⁶Saa mefuandi ye meto ɛbolɔ meboka bɛdabɛ mɔɔ bɛkɔ ewule kuma nu la anwo a, ye azedɔlɛ ne bamaa maanle maanle ne mɔ anwo awozo bɛ. Mbaka kɔsɔɔti mɔɔ wɔ Yidɛn tola nu, Lɛbanɔn mbaka kpalɛ ne mɔ, mɔɔ nyia nzule la, arɛle bakyekye wɔ ɛbolɔ lɔ.

¹⁷Bɛ nee ye bɛ muala bɛbahɔ ɛbolɔ sua zo, ɛleka mɔɔ bɛdabɛ mɔɔ bɛdɔ dadeɛ nloa la wɔ la; ɛhɛe, bɛdabɛ mɔɔ bɛdɛnlanle ye alubo nu wɔ maanle maanle ne mɔ anu la abo zo baminli.

¹⁸“Ɛnee akee mbaka mɔɔ wɔ Yidɛn tola nu la, boni yɛɛ wɔ anyunlunyia nee ye sɛ a? Bɛbapɛ wɔ bɛado bɛaboka Yidɛn tola nu mbaka ne mɔ anwo bɛagua bɛ ɛbolɔ lɔ wɔahɔboka menli mɔɔ ɛnze Nyamenle, mɔɔ ɛdɔ dadeɛ nloa la anwo. “Ɛhye fane Yigyibiti belemgbunli ne nee ye menli ne amuala anwo.” Kɛ Awulae Nyamenle ne se la ɛne.