Read Nzema Yiz 32 Bible Online

Yiz 32 - Nzema bible

Yiz 32

¹Bɛhyele yɛ bɛhɔle nlɔnu la, ye ɛvolɛ bulu nee nwiɔ, siane bulu nee nwiɔ ne, kenle ne mɔɔ lumua la, Ɛdɛnkɛma dendɛle hilele me.

²Ɔse, “Sonla ra, ye awolɛ gua Yigyibiti belemgbunli ne ati zo na se ye kɛ: Ɛdwenle kɛ ɛle awenade wɔ maanle maanle avinli, noko ɛle kɛ nane bie mɔɔ le kɛ ɛlɛnrɛne mɔɔ la azukpole nu la. Ɛkpakye azule ne waa waa, ɛfa ɛ gyakɛ ɛbɔ azule ne anu na ɛkpoto ye.”

³Awulae Nyamenle ne se, “Mebava maanle maanle meahakyi avonle meado wɔ, na meahwe wɔ meara file zo.

⁴Mebavuandi wɔ meade ɛnweakpanye ne azo wɔ wienyi ne anu, na meamaa anwomanyunlu nloma nee ewiade nane kɔsɔɔti arali wɔ nane.

⁵Mebapepɛ wɔ nwonane ne azinli azinli meakponde awoka ne mɔ azo na meamaa mbɔnza ne mɔ anu ayɛ wɔ nwonane azinli kpɔlɔlera ngome.

⁶Mebahwi wɔ mogya meagua azɛlɛ ne azo toonwo yeahɔdwu awoka ne mɔ azo lɔ, nee azule ne mɔ anu.

⁷ Saa meminli ɛ bo zo a, mebaheda anwomanyunlu, na meamaa nwɔlɔra anlu. Mebava amungu meaheda sɛnzɛne ne anyunlu, yɛɛ siane ɛnrɛda.

⁸Mebamaa anwomanyunlu ngɛnlaneɛ ne mɔ kɔsɔɔti anlu, na meava awozinli meaheda azɛlɛ ne mɔɔ ɛwɔ zolɛ la azo. Medame Awulae Nyamenle a mese a.

⁹“Mebamaa maanle maanle dɔɔnwo mɔɔ kɛde kɛ mehye wɔ nuokɛ mehɔ maanle bie mɔɔ ɛtɛtele ye nganeɛ ɛlɛ la azo la ahonle adu.

¹⁰Wɔmɔ ati, mebamaa maanle maanle dɔɔnwo adwenle azɛkye, na saa menwɔha me konle dadeɛ ne bɛ nyunlu a, debie badɔ bɛ arelemgbunli ne mɔ anwo zo. Kenle ne mɔɔ ɛbadɔ aze la, awie biala anwo bawozo ye na yeazu ɔdaye ɔ ngome ye ngoane.”

¹¹Awulae Nyamenle ne se, “Babelonia belemgbunli ne dadeɛ ne bara ɛ nwo zo.

¹²Wɔ menli ne dɔɔnwo badɔ katakyiema mɔɔ anwo yɛ ɛzulolɛ wɔ maanle maanle ne mɔ avinli la dadeɛ nloa. Bɛbazɛkye Yigyibiti debie biala mɔɔ hyia na ɔsonle bolɛ la, na bɛahu ye menli ne amuala.

¹³Mebazɛkye bɛ nane mɔɔ wɔ bɛ azule ne mɔ anloa la amuala. Awie biala ɛnrɛhola ɛnrɛgyegye bɛ bieko, yɛɛ nane biala ɛnrɛhola ye mɛne fa gyegye bɛ bieko.

¹⁴Akee mebade bɛ azule ne mɔ anye na meamaa bɛ azule ne mɔ aze bɛtɛɛ kɛ nwole la. Medame Awulae Nyamenle a mese a.

¹⁵Saa memaa Yigyibiti azɛlɛ ne tɔ mgbane na mesɛkye debie biala mɔɔ wɔ zolɛ la, na meku menli mɔɔ de zolɛ la amuala a, akee bɛbanwu kɛ medame a mele Ɛdɛnkɛma a.

¹⁶Ɛhye le awolɛyelɛ mɔɔ bɛbaye a; mraalɛ mɔɔ wɔ maanle maanle ne mɔ anu la baye zɛhae awolɛ ne agua Yigyibiti nee menli mɔɔ wɔ maanle ne anu la ati zo, medame, Awulae Nyamenle yɛɛ mese a.”

¹⁷Bɛhyele yɛ bɛhɔle nlɔnu la, ye ɛvolɛ bulu nee nwiɔ ne, siane ne mɔɔ lumua la, ye kenle bulu nee nnu ne azo, Ɛdɛnkɛma dendɛle hilele me.

¹⁸Ɔse, “Sonla ra, su gua Yigyibitima amuala ati zo, na pia bɛ kɔsɔɔti, ɔdaye nee menli mɔɔ lɛ tumi wɔ maanle maanle ne mɔ anu la amuala kɔgua mɔwuamra ewiade ne anu, maa bɛhɔboka bɛdabɛ mɔɔ bɛhɔ ɛbolɔ la anwo.

¹⁹Se bɛ kɛ, ‘Nwane a bɛnea a bɛtɛla ye kɛnlɛma a? Bɛdwu bɛhɔ mɔwuamra anu, na bɛzie bɛ bɛboka menli mɔɔ ɛnze Nyamenle la anwo.’

²⁰“Bɛbawu bɛagua menli mɔɔ ɛdɔ dadeɛ nloa la avinli, na menli mɔɔ wɔ Yigyibiti la amuala bahɔ ewule kuma nu.

²¹Arelemgbunli katakyiema baha bɛ nwo edwɛkɛ. Bɛ nee bɛ boavolɛma mɔɔ bɛ muala bɛwɔ ɛbolɔ la baha kɛ, ‘Menli ne mɔɔ ɛnze Nyamenle, mɔɔ bɛhunle bɛ konle ne anu la ɛra, na bɛmɛ a bɛgua ɛkɛ ne la?’

²²“Aselea wɔ ɛkɛ, ye ɛlɔnema nla ne mɔ gua ɛkɛ. Bɛ muala bɛdɔle dadeɛ nloa wɔ konle nu.

²³Bɛ nla ne mɔ wɔ azie ne abo lɔ, yɛɛ ye ɛlɔnema nla ɛdeɛ ne mɔ ɛbɔ ɛyia ye ɛdeɛ ne. Bɛhunle bɛ muala, bɛ muala bɛdɔle dadeɛ nloa. Bɛde aze la ɛnee bɛ nwo ka ɛzulolɛ kpalɛ.

²⁴“Yilam wɔ ɛkɛ, ye ɛlɔnema ɛwolaa ne nla ne mɔ ɛbɔ ɛyia ye nla ɛdeɛ ne. Bɛ muala bɛdɔle dadeɛ nloa wɔ konle nu, na bɛ nee menli mɔɔ ɛnze Nyamenle la hɔle mɔwuamra anu. Bɛde aze la ɛnee bɛ nwo ka ɛzulolɛ; bɛva bɛ anyiemgba ne bɛhɔ ɛbolɔ.

²⁵Yilam boka bɛdabɛ mɔɔ bɛhunle bɛ la anwo, ye ɛlɔnema ne sɛka ɛbɔ ɛyia ye. Bɛ muala bɛnze Nyamenle, yɛɛ bɛhunle bɛ muala wɔ konle nu. Bɛde aze la ɛnee bɛ nwo ka ɛzulolɛ, na kɛkala, bɛva anyiemgba bɛwu bɛhɔ ɛbolɔ bɛhɔboka bɛdabɛ mɔɔ bɛhunle bɛ konle nu la anwo.

²⁶“Mihyɛke nee Tubale wɔ ɛkɛ, bɛ ɛlɔnema ɛwolaa ne nla ne mɔ ɛbɔ ɛyia bɛ. Bɛ muala bɛle menli mɔɔ ɛnze Nyamenle a, yɛɛ bɛhunle bɛ wɔ konle nu, ɔluakɛ bɛde aze la bɛ nwo hanle ɛzulolɛ.

²⁷Bɛanzie bɛ kɛ bɛziele mɔmoane katakyiema mɔɔ vale bɛ konle ninyɛne hɔle ɛbolɔ la. Bɛvale bɛ konle dadeɛ ne mɔ nee bɛ sa nu enyinlike ne mɔ a bɛziele bɛ a, ɔluakɛ bɛ nwo ɛzulolɛ ne tɛbɔ anyewɔzoamra anu.

²⁸“Zɔhane ala yɛɛ bɛbahu bɛmɛ Yigyibitima na bɛ nee menli mɔɔ ɛnze Nyamenle na bɛhu bɛ wɔ konle nu la ahɔla a.

²⁹“Yidɔm wɔ ɛkɛ, ye arelemgbunli nee ye maanle mgbanyima, bɛ anwosesebɛ kpole ne anzi, bɛ nee menli mɔɔ ɛnze Nyamenle na bɛhunle bɛ konle nu la a wɔ ɛbolɔ maanle nu a.

³⁰“Arelemgbunli mɔɔ wɔ Sɔlɔ la wɔ ɛkɛ; bɛmɛ yɛɛ Saedɛnema amuala, bɛhunle bɛ anyiemgba nu wɔ konle nu. Bɛ nwo ɛzulolɛ ne mɔɔ bɛvale bɛ anwosesebɛ kpole ne bɛhanle la anzi, bɛwu kɛ bɛdabɛ mɔɔ bɛnze Nyamenle la bɛboka bɛdabɛ mɔɔ bɛhu bɛ konle nu la anwo; bɛ anyiemgba doa bɛ kɛ bɛdabɛ mɔɔ bɛwɔ ɛbolɔ la.

³¹“Saa Yigyibiti belemgbunli ne nwu bɛ a, ɔdaye nee ye ɛlɔnema ɛwolaa ne mɔɔ ɛwu konle nu la arɛle bakyekye,” Medame Awulae Nyamenle a mese a.

³² “Ɔluakɛ, kɛmɔ Yigyibiti hanle anyewɔzoamra ɛzulolɛ la, zɔhane ala yɛɛ bɛbahu ye belemgbunli ne nee ye ɛlɔnema amuala konle nu bɛaboka menli mɔɔ ɛnze Nyamenle la anwo a.” Awulae Nyamenle a se a.