Read Nzema Yiz 33 Bible Online

Yiz 33 - Nzema bible

Yiz 33

¹Ɛdɛnkɛma dendɛle hilele me:

²Ɔse, “Sonla ra, ka kile wɔ menli ne na se bɛ kɛ: Saa mefa konle meto maanle anzɛɛ azɛlɛ bie azo, na menli mɔɔ wɔ maanle ne anu la ye bɛ sonla ko kɛ bɛ sinzavolɛ,

³na ɔnwu kɛ konle asɛɛ ɛva maanle ne aze, na ɔwu aweɛne tendenle ne anu ɔkakye bɛ

⁴na saa awie te aweɛne ne ane na yeanla ɔ nwo zo, na ɛlɔne ne fa ye aze a, ye mogya gua ɔdaye ɔ ngome ɔ ti zo.

⁵Ɔdele aweɛne tendenle ne ane yɛɛ yeanla ɔ nwo zo a; ye mogya gua ɔ ti zo. Saa ɔlale ɔ nwo zo a, anrɛɛ ɔvile ɛsalɛ.

⁶Na saa sinzavolɛ ne nwu kɛ ɛlɔne ɛlɛba arava bɛ aze na yeanwu aweɛne tendenle ne anu, yeammaa menli ne anla bɛ nwo zo, na ɛlɔne ne ba na bɛku bɛ nuhua bie a, ɛnee sonla zɔhane, ye ɛtane ti yɛɛ bɛhu ye a, na mebalie ye mogya ne meavi sinzavolɛ ne ɛkɛ.

⁷“Yemɔti wɔmɔ, sonla ra, meyɛ wɔ Yizilayɛma sinzavolɛ. Mekɛ biala mɔɔ ɛkɛde me nloa anu edwɛkɛ la, kakye bɛ wɔ nwolɛ.

⁸Saa meka mekile amumuyɛnli ne kɛ ɔbawu na wɔambɔ amumuyɛnli ne kɔkɔ wɔammaa yeanvi ye ninyɛndane nwo a, amumuyɛnli zɔhane bawu ala ye ɛtane nu, noko mebalie ye mogya ne meavi wɔ ɛkɛ.

⁹Na saa ɛbɔ amumuyɛnli ne kɔkɔ kɛ ɔvi ye ninyɛndane nwo, na yeangyakyi ɔ sa anloa a, ɔbawu yeala ye ɛtane ne anu, na wɔmɔ, ɛ nwo kɔlɔnwo.”

¹⁰Ɛdɛnkɛma zele me kɛ, “Na wɔmɔ, sonla ra, ka kile Yizilayɛma kɛ, mɔɔ wɔha la ɛne: ‘Yɛ mɛladonlɛ nee yɛ ɛtane ne mɔ ɛbu ɛzia yɛ; na ɛhye ati a yɛmkpazi a. Na kɛ ɔkɛyɛ na yɛanyia ngoane ɛ?’

¹¹Ka kile bɛ kɛ, suzuamgba ala mɔɔ medame Awulae Nyamenle a mele tease Nyamenle ne la, menlɛ anyelielɛ biala wɔ amumuyɛnli ewule nu, kyesɛ amumuyɛnli ne kakyi fi ye ndenle ne mɔ anu na ɔnyia ngoane. Bɛzia bɛ nzi, bɛzia bɛ nzi bɛvi bɛ munzule ndenle ne mɔ anu; Yizilayɛma, duzu ati a bɛkulo kɛ bɛwu a?

¹²“Na wɔmɔ, sonla ra, ka kile menli ne kɛ, saa tenlenenli yɛ ɛtane a, ye tenleneyɛlɛ ɛnrɛhola ɛnrɛlie ye, yɛɛ saa amumuyɛnli sia fi ye ninyɛndane nwo a, ɔnrɛwu. Saa tenlenenli yɛ ɛtane a, ye tenleneyɛlɛ ne ɛnrɛmaa ɔnrɛnyia ngoane.

¹³Saa meka mekile tenlenenli kɛ ɔbanyia ngoane, na ɔmaa ɔ ti anu yɛ ye fɛ na ɔyɛ ɛtane a, ye tenlene nyɛleɛ biala mɔɔ yeyɛ la abo zo baminli mɔɔ bɛnrɛhakye ye bieko a, na ɛtane ne mɔɔ yeyɛ la yɛɛ ɔbawu yeala nu a.

¹⁴Bieko, saa meka mekile amumuyɛnli kɛ, ‘ɛbawu’, na saa ɔsia ɔfi ye ninyɛndane nwo, ɔyɛ mɔɔ fa mɛla adenle nu na ɔle kpalɛ,

¹⁵na amumuyɛnli ne siane mɔɔ bɛvale bɛwulale ye ɛkɛ ne awoba la, ɔfa mɔɔ ɔwuale la ɔmaa ɔ menle mɔ, na ɔdi ngoane mɛla ne mɔ azo, mɔɔ ɔnyɛ ɛtane bieko la a, ɔbanyia ngoane, ɔnrɛwu.

¹⁶Bɛnrɛhakye ye ɛtane ne mɔ mɔɔ yeyɛ la biala. Yeyɛ mɔɔ fa mɛla adenle nu na ɔle kpalɛ la, ɔbanyia ngoane.

¹⁷“Noko akee wɔ menli ne se, ‘Awulae adenle ne ɛnle pɛpɛ,’ wɔ mekɛ mɔɔ bɛmɛ yɛɛ bɛ adenle ne ɛnle pɛpɛ la.

¹⁸Saa tenlenenli sia fi ye tenleneyɛlɛ nwo na ɔyɛ ɛtane a, ye ɛtane ne ati, ɔbawu.

¹⁹Na saa amumuyɛnli sia fi ye amumuyɛ mɔɔ yeyɛ la anwo, na ɔyɛ mɔɔ fa mɛla adenle nu la na ɔdi boɛ a, ye boɛlilɛ ne ati, ɔbanyia ngoane.

²⁰Na bɛmɛ Yizilayɛma, bɛse ‘Awulae adenle ne ɛnle pɛpɛ.’ Mebabua sonla ko biala ndɛne, kɛmɔ ye ndenle ne mɔ si de la.”

²¹ Bɛhyele yɛ bɛhɔle nlɔnu la, ye ɛvolɛ bulu nee nwiɔ ne, ye siane bulu ne, ye kenle nnu ne azo, nrenya bie mɔɔ ɛnriandi ɛvi Gyɛlusalɛm la rale me nwo ɛkɛ razele me kɛ, “Suakpole ne ɛbɔ.”

²²Ɛdɛnkɛma tumi ne dɔle me nwo zo, ɔvi kenle mɔɔ ye alehyenlɛ nu a ahenle ne mɔɔ vile ɛsalɛ la nriandile rale la nɔsolɛ nu. Kenle ko ne mɔɔ nrenya ne rale la nwonlomɔ ne, ɛnee Ɛdɛnkɛma ɛde me nloa. Yemɔti mendendɛle, meanyɛ mumule bieko.

²³Ɛdɛnkɛma dendɛle hilele me.

²⁴Ɔse, “Sonla ra, menli mɔɔ wɔ Yizilayɛ azɛlɛ ne mɔ mɔɔ ɛdɔ mgbane la azo la tɛka kɛ, ‘Ebileham ɛnee le sonla kokye, noko ɔholale ɔnyianle azɛlɛ ne, na akee yɛmɛ mɔɔ yɛ nwo zonle la; bɛva azɛlɛ ne bɛmaa yɛ kɛ ɔle yɛ ɛdeɛ bɔkɔɔ.’

²⁵“Yemɔti ka kile bɛ kɛ, kɛ Awulae Nyamenle ne se la ɛne: Mɔɔ bɛdi nane mɔɔ ye mogya ne wɔ nu, bɛsonle bɛ mmonle ne mɔ, na bɛka mogya bɛgua la, asoo bɛkɛhola azɛlɛ ne fa yɛ bɛ ɛdeɛ bɔkɔɔ?

²⁶Ɔngyɛ ɛnee bɛhwe dadeɛ, bɛbɔ bɛkyi ɛbɛla na bɛfa bɛ gɔnwo mɔ mraalɛ la, ɛnee kɛ bɛsi bɛfa azɛlɛ ne bɛyɛ bɛ ɛdeɛ bɔkɔɔ ɛ?

²⁷“Ka kile bɛ kɛ, Awulae Nyamenle ne se, ‘Suzuamgba ala mɔɔ medame a mele tease Nyamenle ne la, bɛdabɛ mɔɔ bɛde azɛlɛ mgbane ne azo la badɔ dadeɛ nloa wɔ konle nu. Mɔɔ ɛhɔ ɛbɔ nu la, mebaye ye meamaa nanemgbole ahye ye ali; yɛɛ ewulenzane bahu bɛdabɛ mɔɔ bɛkɛhɔvea aranemgbole nee awolɛ mbɔne nu la.

²⁸Mebamaa azɛlɛ ne adɔ mgbane, yeahwe, na ye anwosesebɛ ne mɔɔ bɛfa bɛtu bɛ nloa anu la awie. Yizilayɛ awoka ne mɔ azo badɔ mgbane mɔɔ awie ɛnrɛze zolɛ bieko a.

²⁹Na saa meto azɛlɛ ne mgbane, mɔɔ awie ɛnle zolɛ wɔ bɛ amumuyɛ nee bɛ ninyɛndane ti a, akee bɛbanwu kɛ medame a mele Ɛdɛnkɛma a.’ ”

³⁰Ɛdɛnkɛma zele kɛ, “Na wɔmɔ sonla ra, wɔ menli ne mɔɔ kuohua bɛ nloa wɔ bane bo bane bo nee bɛ nlenkɛ nzi ka ɛ nwo edwɛkɛ la ka kile bɛ nwo ngoko kɛ, ‘Bɛrɛla bɛradie edwɛkɛ mɔɔ Ɛdɛnkɛma nee ye ɛra la.’

³¹Bɛba ɛ nwo ɛkɛ, kɛmɔ awie biala ba la, bɛbatɛnla ɛ nwo ɛkɛ kɛ asɛɛ me menli la, na bɛtie mɔɔ ɛka la, noko bɛnrɛyɛ ye ɛlɛ, ɔluakɛ bɛfa bɛ nloa a bɛkile bɛ ɛhulolɛ a, na bɛ ahonle ɛdeɛ, yemɔ ɔgyi bɛdabɛ bɛ ngome bɛ kpalɛyɛlɛ zo.

³²Na nea, ɛle bɛ nye zo kɛ sonla bie mɔɔ fa ɛnelɛ fɛlɛko to ɛhulolɛ edwɛne na ɔbɔ agole la, ɔluakɛ bɛte mɔɔ ɛka la, noko bɛnrɛyɛ ye ɛlɛ.

³³Saa ɛhye ba a, na ɔbara noko, yɛɛ bɛkɛnwu kɛ Nyamenle kpɔmanvolɛ a ɛnee de bɛ avinli a.”