Read Nzema Yiz 34 Bible Online

Yiz 34 - Nzema bible

Yiz 34

¹Ɛdɛnkɛma dendɛle hilele me.

²Ɔse, “Sonla ra, ka Nyamenle nrɛlaleɛ ne kile Yizilayɛ mboaneneavolɛma ne. Ka Nyamenle nrɛlaleɛ ne kile bɛ kɛ, kɛ medame Awulae Nyamenle mese la ɛne: Bɛmɛ Yizilayɛ mboaneneavolɛma mɔɔ yɛne bɛdabɛ bɛ ngome bɛ nwo a, bɛwie! Asoo mboaneneavolɛ fa mboane kɔ adidi a, tɛ yemɔ yɛɛ ɔnea mboane ne mɔ ɔmaa bɛdidi a?

³Na bɛmɛ, bɛku mɔɔ ɛlɔ la bɛdi, bɛpepɛ bɛ nwo enrinli bɛnwo ndanlɛ bɛkeda; noko bɛmmaa mboane ne mɔ aleɛ.

⁴Bɛannea mɔɔ anwo ɛbɛlɛ ye la, bɛanyɛ mɔɔ ɛnde kpɔkɛ la ayile, mɔɔ ɛboda la, bɛambɔ ye bɔlɛ, mɔɔ vonle adenle la, bɛanva ye bɛamba, bɛamkpondɛ mɔɔ ɛminli la, na bɛvale atisesebɛ nee amumuyɛ a bɛnleanle bɛ a.

⁵ Yemɔti bɛbɔle asande, ɔboalekɛ ɛnee bɛnlɛ mɔɔ nea bɛ a; na bɛyɛle aleɛ bɛmanle ɛbɔ nu nanemgbole.

⁶Me mboane ne mɔ bɔle asande, bɛluoluale awoka mgbole nee ngyikyi ne mɔ azo; me mboane ne mɔ bɔle asande wɔ azɛlɛ ye azo amuala, na bɛannyia awie amkpondɛ bɛ anzɛɛ amkpo bɛ bo zo.

⁷“Zɔhane ati, bɛmɛ mboaneneavolɛma, bɛdie mɔɔ medame Ɛdɛnkɛma melɛka meahile bɛ la:

⁸Suzuamgba ala mɔɔ medame Awulae Nyamenle mede aze la, kɛmɔ me mboane ne ɛdɔ agyie, na bɛyɛ aleɛ bɛmaa ɛbɔ nu nanemgbole, na bɛnlɛ mboaneneavolɛ biala, kɛmɔ me mboaneneavolɛma ne amkpo me mboane ne mɔ abo zo, na mboaneneavolɛma ne ɛli bɛdabɛ bɛ ngome bɛ nwo adane, na bɛanyɛne me mboane ne la,

⁹bɛmɛ mboaneneavolɛma, bɛdie Ɛdɛnkɛma edwɛkɛ ne:

¹⁰Kɛ medame, Awulae Nyamenle mese la ɛne: Bɛnlea, mekpo mboaneneavolɛma ne, na mebabiza bɛ mealie me mboane ne mɔ, na meamaa bɛagyakyi me mboane ne ɛyɛnelɛ. Bɛnrɛli bɛ ngome bɛ nwo adane bieko. Mebalie me mboane ne meavi bɛ nloa anu, amaa yeanyɛ aleɛ yeammaa bɛ.

¹¹“Ɔluakɛ kɛ medame Awulae Nyamenle mese la ɛne: Bɛnlea, medame, medame mumua ne mebakpondɛ me mboane ne toonwo meahɔnwu bɛ.

¹²Kɛmɔ mboaneneavolɛ mɔɔ ye mboane mɔɔ ɛbɔ asande la si kpondɛ ye mboane ne mɔ la, zɔhane ala yɛɛ mebakpondɛ me mboane ne mɔ a. Mebalie bɛ meavi ɛleka mɔɔ bɛzande bɛ bɛhɔgua la wɔ amungu nee awozinli kenle ne.

¹³Mebaye bɛ meavi maanle maanle ne mɔ anu; mebaboɔboa bɛ nloa meavi maanle maanle ne mɔ anu, na meava bɛ meara bɛdabɛ bɛ maanle nu. Mebayɛne bɛ wɔ Yizilayɛ awoka ne mɔ azo, azudenle ne mɔ anloa, nee maanle ne anu ɛleka biala mɔɔ sonla tɛnla a ɔyɛ boɛ la.

¹⁴Mebamaa bɛ adidileka kpalɛ, wɔ Yizilayɛ awoka ne mɔ azo. Ɛkɛ ne yɛɛ bɛbadɛnla azɛlɛ kpalɛ mɔɔ aleɛ wɔ zolɛ la azo, na bɛadidi Yizilayɛ awoka ne mɔ azo adidileka kpalɛ ne a.

¹⁵Medame mumua ne mebayɛ me mboane ne neavolɛ na meamaa bɛala bɛalie bɛ ɛnwomenle. Medame, Awulae Nyamenle a mese a.

¹⁶“Mebakpondɛ mɔɔ ɛminli la, na me nee mɔɔ agyakɛ ɛvo adenle la azia ara sua nu; mebabɔ mɔɔ ɛbubu la bɔlɛ, meamaa mɔɔ anwo ɛbɛlɛ ye la anyia anwosesebɛ, na mɔɔ ɛhye nee mɔɔ lɛ anwosesebɛ la, mebavede me nye meanlea bɛ boɛ. Mebamaa biala aleɛ, kɛmɔ ɔfɛta la.

¹⁷“Na bɛmɛ, me mboane ekpunli, medame Awulae Nyamenle mese: Bɛnlea, mebabua bɛ ndɛne na meaye kpalɛ ne meavi ɛtane ne mɔ avinli; meaye mbɔnkye ne mɔ meavi mboane ne avinli.

¹⁸Bɛdi ndile kpalɛ ne bɛwie a, ɔnle kɛ bɛtietia mɔɔ kɛha la azo; na bɛno nzule kpalɛ anye komikomi bɛwie a, bɛatietia nu bɛakpoto ye.

¹⁹Ɛnee bɛkpondɛ bɛaze kɛ me mboane ne ɛli mɔɔ bɛmɛ bɛtietia zolɛ la, na bɛnlo nzule ne mɔɔ bɛkpoto ye la ɔ?

²⁰“Yemɔti, medame Awulae Nyamenle, meka meahile bɛ kɛ: Bɛnlea kɛ akee medame, medame mumua ne, mebabua mboane kyenlera ne mɔ nee mboane nwanlera ne mɔ ndɛne.

²¹Kɛmɔ bɛfa bɛ nvenle nee bɛ bati bɛsuhuzuhu mboane nwanlera ne mɔ, na bɛfa bɛ mɛne bɛwowɔ bɛ bɛmaa bɛbɔ asande bɛkɔ maanle zo la ati,

²²mebalie me mboane ekpunli ne ati. Bɛnrɛdɔ agyie bieko; na mebabua bɛ ndɛne meaye mboane kpalɛ ne meavi ɛtane ne avinli.

²³Mebamaa bɛ mboaneneavolɛ ko, me akɛlɛ Devidi, na yeayɛne bɛ. Ɔbayɛne bɛ na yeayɛ bɛ neavolɛ.

²⁴Na medame, Ɛdɛnkɛma, mebayɛ bɛ Nyamenle, na me akɛlɛ Devidi ali bɛ belemgbunli, medame Ɛdɛnkɛma a mese a.

²⁵Me nee bɛ bayɛ anzonudwolɛ ngyekyeleɛ na meavoa nanemgbole ne mɔ meavi azɛlɛ ne azo, amaa bɛadɛnla fienemgbole ne anu anwondɔlɛ nu na bɛala kpɔkɛ nu mbaka ne mɔ abo bɛalafe.

²⁶“Mebayila bɛ na meayila ɛleka ne mɔ mɔɔ ɛbɔ ɛyia me boka nwuanzanwuanza ne la amuala. Mebamaa ezule anyenye wɔ bɛ ɛlobɔ ne mɔ anloa ayɛ nyilalɛ amaa bɛ.

²⁷Ɛbɔ nu mbaka bazo ma amaa bɛ, na azɛlɛ ne amaa bɛ aleɛ ahye, na bɛ nwo adɔ bɛ wɔ bɛ maanle ne anu. Saa meye bɛ kɔme kpomgbolo, na medie bɛ mefi menli mɔɔ ɛva bɛ ɛyɛ bɛ ahanra la asa anu a, bɛbanwu kɛ medame a mele Ɛdɛnkɛma a.

²⁸Bɛnrɛdɔ agyie bɛnrɛmaa maanle maanle, yɛɛ azɛlɛ ne azo nanemgbole biala ɛnrɛhye bie ɛnrɛli. Bɛ nwo badɔ bɛ, yɛɛ awie biala ɛnrɛhola ɛnrɛmaa bɛ ahonle ɛnrɛdu.

²⁹Mebamaa bɛ egyinli ne mɔ ahye, amaa ɛhɔne angu bɛ bieko wɔ azɛlɛ ne azo, na maanle maanle ne mɔ angolo bɛ nwo bieko.

³⁰Bɛbanwu kɛ medame, Ɛdɛnkɛma bɛ Nyamenle ne, me nee bɛ lua, na bɛdabɛ Yizilayɛma amuala, bɛle me menli. Medame Awulae Nyamenle a mese a.

³¹“Bɛle me mboane, me adidileka mboane, yɛɛ mele bɛ Nyamenle. Medame, Awulae Nyamenle a mese a.”