Read Nzema Yiz 35 Bible Online

Yiz 35 - Nzema bible

Yiz 35

¹Ɛdɛnkɛma dendɛle hilele me.

²Ɔse, “Sonla ra, kakyi ɛ nye wɔ Yidɔm maanle ne anwo na ka Nyamenle nrɛlaleɛ ne mɔɔ tia ye la.

³Ka kile ye kɛ, Awulae Nyamenle ne se: Nea, bɛmɛ Yidɔm awoka, meyɛ bɛ kpɔvolɛ! Mebadenrɛ me sa meatia bɛ, na meamaa bɛadɔ mgbane.

⁴Mebamaa bɛ azuamgbole ne mɔ ayɛ azuadu, na bɛ azɛlɛ ne adɔ mgbane, na bɛanwu kɛ medame a mele Ɛdɛnkɛma a.

⁵“Kɛmɔ ɛnee bɛle Yizilayɛma kpɔvolɛ kpalɛ kpalɛ, na bɛyele bɛ bɛmanle bɛhunle bɛ wɔ bɛ anwubɛnyunlu mekɛ nu, wɔ mekɛ mɔɔ bɛtea bɛ ndeanlɛ mɔɔ li amozi la ati,

⁶suzuamgba ala mɔɔ medame a mele tease Awulae Nyamenle la, mebaha bɛ mogya meagua, na mogya adu bɛ mgbaliko, ɔboalekɛ bɛdi fɔlɛ kɛ bɛha mogya bɛgua, yemɔti mogya badu bɛ mgbaliko.

⁷Mebamaa Yidɔm maanle ne adɔ mgbane mɔɔ awie ɛnrɛdɛnla nu a; yɛɛ mebahu menli mɔɔ ba nu kɔ la amuala.

⁸Bɛ awoka mgbole ne mɔ azo bayɛ avunli ngome, na dɔɔnwo noko adɔ dadeɛ nloa agua bɛ awoka ngyikyi ne mɔ azo, mbɔnza ne mɔ anu, nee bɛ awoka ne mɔ avinli ahuma ne mɔ anu.

⁹Mebamaa bɛ maanle ne abɔ bɔkɔɔ, yɛɛ awie ɛnrɛdɛnla bɛ azuamgbole ne mɔ azo. Na akee bɛbanwu kɛ medame a mele Ɛdɛnkɛma a.

¹⁰“Bɛdabɛ, bɛ edwɛkɛ a le kɛ, ‘Maanle nwiɔ ɛhye, Dwuda nee Yizilayɛ bayɛ yɛ ɛdeɛ, na yɛbava yɛayɛ yɛ ɛdeɛ bɔkɔɔ,’ wɔ mekɛ mɔɔ medame Ɛdɛnkɛma mede bɛ avinli la.

¹¹Zɔhane ati, medame Awulae Nyamenle, mese: Suzuamgba ala mɔɔ medame a mele tease Nyamenle ne la, me nee bɛ bali, kɛmɔ bɛ ɛya nee bɛ anyebolo ne mɔɔ bɛvale bɛkpɔle me menli ne la si de la. Akee mebaye me nwo meahile bɛ wɔ bɛ ndɛnebualɛ nu.

¹²Na bɛbanwu kɛ medame Ɛdɛnkɛma, mede aholoba mɔɔ bɛvale bɛbɔle Yizilayɛ maanle ne, na bɛhanle kɛ, ‘Maanle ne mɔ ɛdɔ mgbane, bɛva bɛmaa yɛ kɛ yɛzɛkye bɛ’ la.

¹³Bɛmemanle bɛ nwo zo, bɛhehanle mgbole bɛtietiale me, na bɛhehanle edwɛkɛ dɔɔnwo bɛtietiale me. Mendele.

¹⁴“Medame, Awulae Nyamenle, mese: Mebamaa bɛadɔ mgbane, amaa ewiade kɔsɔɔti anye alie.

¹⁵Kɛ bɛzile bɛ nye liele Yizilayɛma azedɔlɛ nee bɛ mgbane mɔɔ bɛyɛle la anwo la, zɔhane ala yɛɛ mebayɛ bɛdabɛ noko a. Siyɛ awoka ne mɔ azo, Yidɔm maanle ne amuala badɔ mgbane. Na akee bɛanwu kɛ medame a mele Ɛdɛnkɛma a.”