Read Nzema Yiz 36 Bible Online

Yiz 36 - Nzema bible

Yiz 36

¹Ɛdɛnkɛma zele kɛ, “Na wɔmɔ, sonla ra, ka Nyamenle nrɛlaleɛ ne kile Yizilayɛ awoka ne mɔ na se bɛ kɛ, ‘O Yizilayɛ awoka, bɛdie Ɛdɛnkɛma edwɛkɛ ne.’

²Kɛ medame Awulae Nyamenle mese la ɛne: Kɛmɔ kpɔvolɛ ne zelele bɛ na bɛhanle kɛ, ‘Mɔmoane awoka ne mɔ ɛyɛ yɛ ɛdeɛ’ la ati,

³ka Nyamenle nrɛlaleɛ ne na se bɛ kɛ, medame Awulae Nyamenle mese: Ɛnee, kɛmɔ bɛmanle bɛdɔle mgbane, na bɛvi ɛleka ngakyile bɛraholole bɛ nwo zo, maanle maanle ne mɔ hyɛle bɛ vale, bɛ nwo donle, na menli vale bɛ lile ɛfenle la ati,

⁴Yizilayɛ awoka, bɛdie Awulae Nyamenle ne edwɛkɛ. Awulae Nyamenle ne ɛlɛse bɛmɛ awoka mgbole nee ngyikyi, awoka avinli ahuma nee mbɔnza, azɛlɛ ne mɔɔ ɛdɔ mgbane nee azuamgbole mɔɔ ɛyɛ azuadu, mɔɔ ɛdɔ agyie ɛmaa maanle maanle mɔɔ ɛbɔ ɛyia bɛ la kɛ,

⁵‘Medame Awulae Nyamenle, mese: Melɛ ɛya kpole nee anyebolo melɛtendɛ meatia maanle maanle mɔɔ ɛha la, nee Yidɔmma kɔsɔɔti mɔɔ hyɛle me azɛlɛ ne manle bɛ nwo anyelielɛ nu, adubɛnwo nu kɛ bɛfa na bɛave zolɛ ninyɛne bɛali la.’

⁶“Yemɔti ka Nyamenle nrɛlaleɛ ne mɔɔ fane Yizilayɛ azɛlɛ ne anwo la na se awoka mgbole nee ngyikyi, awoka avinli ahuma nee mbɔnza ne mɔ kɛ, medame Awulae Nyamenle mese: Meva ɛya kpole kpalɛ a melɛtendɛ a, ɔboalekɛ bɛnwu amaneɛ wɔ maanle maanle asa anu.

⁷Yemɔti, medame Awulae Nyamenle, mese: Meka, meka kɛ, maanle maanle mɔɔ ɛbɔ ɛyia bɛ la banwu zɔhane amaneɛ ne bie.

⁸Na bɛmɛ Yizilayɛ awoka, mbaka bafifi zolɛ, na bɛazo ma bɛamaa me menli Yizilayɛma, ɔluakɛ ɔnrɛhyɛ biala na bɛazia bɛara sua nu.

⁹Ɔluakɛ, bɛnlea, mele bɛ ɛdeɛ. Mebahakyi me nye bɛ nwo zo, na bɛbazo bɛ ɛya bɛalua.

¹⁰Mebamaa menli dɔɔnwo aradɛnla ɛkɛ, meka Yizilayɛma kɔsɔɔti. Menli badɛnla azuamgbole ne mɔ azo na bɛaziezie ɛleka ne mɔ mɔɔ ɛdɔ mgbane la.

¹¹Mebamaa menli nee nane azo awoka ne mɔ azo; bɛ nwo bazo na bɛawo dɔɔnwo. Mebamaa bɛadɛnla, kɛmɔ alumua ne bɛde la, na meayɛ kpalɛ dɔɔnwo meamaa bɛ, meadɛla mɔɔ mɔmoane menyɛle la. Na akee bɛbanwu kɛ medame a mele Ɛdɛnkɛma a.

¹²Ɛhɛe, mebamaa me menli Yizilayɛma aradɛnla awoka ne mɔ azo na bɛava bɛayɛ bɛ ɛdeɛ, na bɛ mra ɛnrɛhye ɛhɔne bieko.

¹³“Medame, Awulae Nyamenle, mese: Yizilayɛ azɛlɛ, menli ka kɛ, ‘Ɛdi menli, yɛɛ ɛkye maanle ne anu amra ɛhɔne ɛku bɛ.’

¹⁴Yemɔti ɛnrɛhu menli bieko yɛɛ ɛnrɛhye menli ne ɛhɔne bieko ɛnrɛhu bɛ. Medame, Awulae Nyamenle a mese a.

¹⁵Menrɛmaa ɛnrɛde maanle maanle ne mɔ aholoba ɛbɔlɛ ne bieko, ɛ nyunlu ɛnrɛgua aze wɔ maanle maanle ne mɔ anyunlu yɛɛ azɛlɛ ne ɛnrɛdu koti bieko. Medame Awulae Nyamenle a mese a.”

¹⁶Ɛdɛnkɛma dendɛle hilele me.

¹⁷Ɔse, “Sonla ra, mekɛ mɔɔ ɛnee Yizilayɛma de bɛ maanle nu la, bɛvale bɛ ɛbɛlabɔlɛ nee ninyɛndane bɛzɛkyele ye. Wɔ me nye zo a, bɛ nyɛleɛ ne ɛtane le kɛ raalɛ mɔɔ ɛhɔ amozi la.

¹⁸Yemɔti menwolale me ɛya ne menguale bɛ ti zo wɔ mogya ne mɔɔ bɛha bɛgua azɛlɛ ne azo, nee bɛ mmonle ne mɔ mɔɔ bɛva bɛzɛkye azɛlɛ ne la ati.

¹⁹Memkpondenle bɛ wɔ maanle maanle zo na bɛzandele maanle ne mɔ anu. Kɛ bɛ nyɛleɛ ne mɔ nee bɛ subane ne mɔ si de la yɛɛ menluale zolɛ mendeanle bɛ a.

²⁰Noko mɔɔ bɛhɔle maanle ne mɔ anu la, ɛleka biala mɔɔ bɛhɔle la, bɛzɛkyele me duma nwuanzanwuanza ne. Yemɔti menli hanle ye bɛ nwo kɛ, ‘Ɛhye mɔ le Ɛdɛnkɛma ɔdaye ye menli, noko akee ɔwɔ kɛ bɛfi ye azɛlɛ ne azo ala.’

²¹Na me duma nwuanzanwuanza ne mɔɔ Yizilayɛma manle bɛguale nwolɛ evinli wɔ maanle maanle ne mɔ mɔɔ bɛhɔle nu la anu la ɛnee hyia me.

²²“Zɔhane ati, ka kile Yizilayɛma kɛ: Medame, Awulae Nyamenle, mese: Tɛ bɛmɛ Yizilayɛma ati yɛɛ mekeha me nwo a, na me duma nwuanzanwuanza ne mɔɔ bɛzɛkye ye wɔ maanle maanle mɔɔ bɛhɔle nu la ati ɔ.

²³Me duma nwuanzanwuanza kpole ne mɔɔ bɛzɛkye ye wɔ maanle maanle ne mɔ avinli la, mebakpogya ye zo kpole bie, na maanle maanle ne mɔ banwu kɛ medame a mele Ɛdɛnkɛma a. Medame, Awulae Nyamenle a mese a; mebalua bɛdabɛ Yizilayɛma bɛ nwo zo meakpogya me nwuanzanwuanzayɛlɛ ne zo wɔ maanle maanle ne mɔ anye zo.

²⁴Ɔluakɛ mebaye bɛ meavi maanle maanle ne mɔ avinli, meaboɔboa bɛ nloa wɔ maanle ne mɔ mɔɔ bɛwɔ nu la anu, na meava bɛ meara bɛdabɛ bɛ maanle nu.

²⁵Mebakponde nzule mɔɔ anye te la bɛ nwo, na bɛ nwo bade avi bɛ ɛtane biala nee bɛ mmonle mɔɔ bɛzonlenle la anwo.

²⁶ Mebamaa bɛ ahonle fofolɛ, meava sunsum fofolɛ meawula bɛ nuhua, na meaye bolɛ ahonle ne mɔɔ wɔ bɛ nu la na meamaa bɛ ahonle bɛlɛvolɛ.

²⁷Mebava me sunsum ne meawula bɛ nuhua, na meamaa bɛali me mɛla ne mɔ azo, na bɛanlea boɛ bɛali me ngyehyɛlɛ ne mɔ azo.

²⁸Bɛbadɛnla azɛlɛ ne mɔɔ menvale memanle bɛ ze mɔ la azo, bɛbayɛ me menli na meayɛ bɛ Nyamenle.

²⁹Mebaye bɛ meavi ninyɛndane biala anwo, na meamaa bɛanyia abɛlɛ dɔɔnwo; menrɛmaa ɛhɔne ɛnrɛhu bɛ.

³⁰Mebamaa bɛ mbaka azo dɔɔnwo na bɛ ɛya nu aleɛ ahye, amaa ɛhɔne angu bɛ angua bɛ nyunlu aze bieko wɔ maanle maanle ne mɔ anyunlu.

³¹Na akee bɛbahakye bɛ ninyɛndane nee bɛ nyɛleɛ ɛtane ɛtane ne mɔ mɔɔ bɛyɛle la, na bɛavu bɛ nwo kɛ bɛyɛle amumuyɛ nee bɛkyi ninyɛne zɔhane mɔ a.

³²Tɛ bɛmɛ Yizilayɛma ati yɛɛ mekeha me nwo a, medame Awulae Nyamenle a mese a. Bɛmaa ɔla bɛ ti anu. O Yizilayɛma, bɛmaa bɛ nyɛleɛ ɛyɛ bɛ nyiane ɛmaa bɛ ti ɛzi aze.”

³³Awulae Nyamenle ne se, “Kenle mɔɔ mebanlua bɛ wɔ bɛ amumuyɛ ne mɔ ati la, mebamaa bɛahɔdɛnla bɛ azuamgbole ne mɔ azo, na bɛakyekye bɛ azua mɔɔ ɛyɛ azuadu la.

³⁴Bɛbazo ɛya wɔ azɛlɛ ne mɔɔ dɔle mgbane la azo, wɔ menli mɔɔ zenle azɛlɛ ne azo la anye zo.

³⁵Na bɛbaha kɛ, ‘Azɛlɛ ɛhye mɔɔ dɔle mgbane la azo ɛyɛ gbudugbudu kɛ Yidɛn Tola ne la, na azuamgbole mɔɔ yɛle azuadu la kɛkala azo ɛyɛ gbudugbudu, na bɛlie nwolɛ bane.’

³⁶Na akee maanle maanle mɔɔ ɛbɔ ɛyia bɛ la banwu kɛ, medame Ɛdɛnkɛma a mekyekye azua ne mɔ na memaa ɛleka mɔɔ dɔle mgbane la ɛfifi a. Medame Ɛdɛnkɛma a mese a, yɛɛ mebayɛ noko.”

³⁷Awulae Nyamenle ne se, “Eza mebamaa Yizilayɛma abiza me bɛamaa meayɛ ɛhye meamaa bɛ. Mebamaa bɛ nwo azo kɛ mboane ekpunli.

³⁸Mebamaa bɛ azuamgbole mɔɔ yɛle azuadu la azo ayɛ menli gbudugbudu, kɛmɔ azubɔlɛ mekɛ dwu a Gyɛlusalɛm yɛ mboane ngome la. Na akee bɛanwu kɛ medame a mele Ɛdɛnkɛma a.”