Read Nzema Yiz 37 Bible Online

Yiz 37 - Nzema bible

Yiz 37

¹Ɛdɛnkɛma tumi ne rahedale me nwo zo, na ye sunsum ne vale me rale bɔnza ne avinli, na menwunle mbowule dɔɔnwo wɔ bɔnza ne anu.

²Na ɔvale me ɔkpɔsale bɛ avinli, na menwunle kɛ ɛnee bɛzonle kpalɛ a bɛwɔ bɔnza ne anu a, na bɛwe bɛyɛ resee zɛhae.

³Na ɔbizale me kɛ, “Sonla ra, asoo mbowule ɛhye mɔ kola nyia ngoane?” Membuale kɛ, “O Awulae Nyamenle, ɛdawɔ yɛɛ ɛze a.”

⁴Na ɔzele me kɛ, “Ka Nyamenle nrɛlaleɛ ne kile mbowule ɛhye mɔ na se bɛ kɛ, O mbowule welera, bɛdie Ɛdɛnkɛma ane.

⁵Awulae Nyamenle ne ɛlɛka ahile bɛmɛ mbowule kɛ: Mebamaa ɛnwomenle awolo bɛ nu na bɛbanyia ngoane.

⁶Mebamaa bɛanyia ndinli, nwonane ara nwolɛ, nwoma arafɔle nwolɛ, na meava ɛnwomenle meawula bɛ nu na bɛanyia ngoane; na bɛbanwu kɛ medame a mele Ɛdɛnkɛma a.”

⁷Yemɔti menganle Nyamenle nrɛlaleɛ ne, kɛmɔ bɛzele me la. Mɔɔ melɛka Nyamenle nrɛlaleɛ ne la, mendele ɛnelɛ bie kɛ ɔlɛsu kpoladada, na mbowule ne mɔ rasisiale zolɛ.

⁸Me nye gyi bɛ nwo ala la, bɛnyianle ndinli, nwonane rale nwolɛ, na nwoma rafɔlele nwolɛ noko ɛnee ɛnwomenle ɛnle bɛ nu.

⁹Na Nyamenle zele me kɛ, “Ka Nyamenle nrɛlaleɛ ne kile anwoma. Sonla ra, ka Nyamenle nrɛlaleɛ ne na se anwoma ne kɛ, ‘Awulae Nyamenle ne se: O sunsum, ɛvi anwoma nna ne anu bɛla bagu ɛnwomenle gua menli ɛhye mɔ mɔɔ bɛhunle bɛ la nu maa bɛnyia ngoane.’ ”

¹⁰ Yemɔti menganle Nyamenle nrɛlaleɛ ne, kɛmɔ ɔzele me la, na ɛnwomenle rale bɛ nu na bɛnyianle ngoane, bɛdwazole bɛgyinlanle, na ɛnee bɛ nwo zonle kpole kpalɛ.

¹¹Akee Nyamenle zele me kɛ, “Sonla ra, mbowule ɛhye mɔ a le Yizilayɛma amuala. Nea, bɛ edwɛkɛ a le kɛ, ‘Yɛ mbowule ɛwe, yɛnlɛ anyelazo biala; bɛpɛ yɛ bɛgua bɔkɔɔ ala ɛne.’

¹²Zɔhane ati ka Nyamenle nrɛlaleɛ ne na se bɛ kɛ Awulae Nyamenle ne se: O me menli, bɛnlea, mebabukebuke bɛ nla ne mɔ, meadwazo bɛ meavi bɛ nla ne mɔ anu, na me nee bɛ ahɔ sua nu wɔ Yizilayɛ azɛlɛ zo.

¹³Na saa mebukebuke bɛ nla ne mɔ na medwazo bɛ meba ngoane nu a, me menli ne akee banwu kɛ medame a mele Ɛdɛnkɛma a.

¹⁴Mebava me Sunsum ne meawula bɛ nuhua, na bɛanyia ngoane, na meava bɛ meahɔgua bɛdabɛ bɛ azɛlɛ ne azo; na akee bɛanwu kɛ medame Ɛdɛnkɛma a meha a, yɛɛ meyɛ. Medame Ɛdɛnkɛma, kɛ mese la ɛne.”

¹⁵Ɛdɛnkɛma dendɛle hilele me.

¹⁶Ɔse, “Sonla ra, fa baka na kɛlɛ nwolɛ, ‘Dwuda ɛdeɛ ɔ, na Yizilayɛma amuala nee ye le ko;’ eza fa baka ko noko na kɛlɛ nwolɛ, ‘Dwosefi ɛdeɛ ɔ (ɛhye le Yifelaem baka) na Yizilayɛma amuala nee ye le ko.’

¹⁷Akee fa mbaka nwiɔ ne bɔ nwolɛ yɛ bɛ baka ko wɔ ɛ sa nu.

¹⁸Na saa wɔ menli ne biza wɔ kɛ, ‘Ɛnrɛhile yɛ deɛ mɔɔ ɛhye kile la abo?’ a,

¹⁹ka kile bɛ kɛ, Awulae Nyamenle ne se: Bɛnlea, meyɛ kɛ mefa Dwosefi baka ne (mɔɔ Yifelaem lɛ ye ɔ sa nu la) nee Yizilayɛ mbusua ekpunli ekpunli ne mɔ mɔɔ nee ye ɛyɛ ko la, na meava ye nee Dwuda baka ɛdeɛ ne meabɔ bɛ nu meayɛ bɛ baka ko wɔ me sa nu.

²⁰“Mɔɔ akee bɛkɛnwu kɛ ɛlɛ mbaka nwiɔ ne mɔɔ wɔhɛlɛhɛlɛ nwolɛ la ɛ sa nu wɔ bɛ nyunlu ɛkɛ ne la,

²¹se bɛ kɛ, Awulae Nyamenle ne se: Mebahɔva Yizilayɛma mɔɔ wɔ maanle maanle ne mɔ azo la, meaboɔboa bɛ nloa, na me nee bɛ ara bɛdabɛ bɛ maanle nu.

²²Mebayɛ bɛ maanle ko wɔ Yizilayɛ awoka maanle ne anu. Belemgbunli ko ala a bazie bɛ a. Bɛnrɛyɛ maanle nwiɔ bieko yɛɛ bɛnrɛyɛ arelemgbunli maanle nwiɔ.

²³Bɛnrɛzonle mmonle bɛnrɛgua bɛ nwo evinli; bɛnrɛyɛ bɛkyi debie biala, yɛɛ bɛnrɛtietia me mɛla ne mɔ azo. Mebalie bɛ meavi ninyɛne mɔɔ manle bɛyɛle ɛtane la asa anu na meade bɛ nwo. Bɛbayɛ me menli, na medame meayɛ bɛ Nyamenle.

²⁴ Me sonvolɛ Devidi bali bɛ belemgbunli anlea bɛ nwo zo, na bɛ muala bɛanyia mboaneneavolɛ kokye. Bɛbali me ngyehyɛlɛ ne mɔ anzi na bɛanlea bɛali me mɛla ne mɔ azo.

²⁵Bɛbadɛnla azɛlɛ ne mɔɔ bɛ ze mɔ dɛnlanle zolɛ na menvale memanle me sonvolɛ Gyekɔbo la azo. Bɛdabɛ, bɛ mra, yɛɛ bɛ bo zo amra kɔsɔɔti badɛnla ɛkɛ ne dahuu, na me sonvolɛ Devidi ali bɛ belemgbunli dahuu.

²⁶Me nee bɛ bayɛ anzonudwolɛ ngyekyeleɛ; ɔbayɛ me nee bɛ yɛ ngyekyeleɛ mɔɔ bɛntulu ye ɛlɛ a. Mebayila bɛ na meamaa bɛ nwo azo, na meazi me Ɛzonlenlɛ Sua ne bɛ avinli, mɔɔ bɛndu ye bieko ɛlɛ a.

²⁷ Mebadɛnla bɛ avinli, na meayɛ bɛ Nyamenle, na bɛayɛ me menli.

²⁸Na akee maanle maanle ne mɔ banwu kɛ medame Ɛdɛnkɛma a mete Yizilayɛma anwo a, wɔ mekɛ mɔɔ me Ɛleka Nwuanzanwuanza wɔ bɛ avinli dahuu la.”