Read Nzema Yiz 38 Bible Online

Yiz 38 - Nzema bible

Yiz 38

¹Ɛdɛnkɛma dendɛle hilele me.

² Ɔse, “Sonla ra, kakyi ɛ nye wɔ Meegɔɔgo azɛlɛ zo, wɔ Gɔɔgo mɔɔ sie Mihyɛke nee Tubale la,

³na ka Nyamenle nrɛlaleɛ ne mɔɔ tia ye la kɛ Awulae Nyamenle ne se: Gɔɔgo, Mihyɛke nee Tubale belemgbunli, nea, mekpo wɔ.

⁴Mebabɔ wɔ nzɛla na meava koba meabɔ wɔ awudwɔlɛ meava wɔ meara, ɛdawɔ nee wɔ ɛlɔnema amuala, wɔ mgbɔnwɔ nee menli mɔɔ ka mgbɔnwɔ, mɔɔ bɛ muala bɛwulowula konle adɛladeɛ, bɛ nwo zonle kpalɛ na bɛdedɛ bɛ sa nu enyinlike, bɛkola dadeɛ to;

⁵bie mɔ mɔɔ vi Pɛhyea, Sudan, yɛɛ Lebeya, na bɛdedɛ bɛ sa nu enyinlike, bɛzozo mbulalɛ ahyɛlɛ la boka bɛ;

⁶Goma nee ye ɛlɔnema, Bɛte Togama nee ye menli dɔɔnwo mɔɔ li ɔ nzi mɔɔ bɛvi sɔlɔ nehane la amuala.

⁷Bɛboɔboa bɛ nwo na bɛla bɛ nwo zo, ɛdawɔ, wɔ ɛlɔnema, yɛɛ maanle maanle mɔɔ ɛhuohua bɛ nloa ɛ nwo ɛkɛ ne la amuala, na yɛ bɛ sinzavolɛ.

⁸Mekɛ dɔɔnwo se a, bɛbaheha bɛ nwo; nzinlii bɛbava konle badoa maanle ne mɔɔ bɛlie ye bɛvi konle nu la. Menli dɔɔnwo mɔɔ bɛboɔboale bɛ nloa bɛ nee bɛ vi maanle maanle zo rale Yizilayɛ awoka maanle ne mɔɔ dɔle mgbane mekɛ dɔɔnwo anu la a wɔ ɛkɛ a; ɛnɛ bɛde ye anwondɔlɛ nu yɛɛ bɛndwenle konle nwo.

⁹Ɛ nee wɔ ɛlɔnema nee maanle maanle mɔɔ li ɛ nzi la bara bɛ nwo zo kɛ ahumu, na wɔayɛ kɛ amungu wɔaheda maanle ne azo.”

¹⁰Awulae Nyamenle ne se, “Mekɛ zɔhane anu, ɛbanyia adwenle dɔɔnwo na wɔabɔ adwenle ɛtane wɔaha kɛ,

¹¹‘Mefa konle meahɔdoa azua ne mɔ mɔɔ bɛtɛdiele nwolɛ bane la. Mekɔ menli ne mɔɔ anzo nu ɛdwo bɛ na bɛde anwondɔlɛ nu, na bɛtɛdiele bɛ azua ne mɔ anwo bane, na bɛnlɛ nlenkɛ mgbole mɔɔ mbulalɛ gua bɛ nzi la anwo zo,

¹²amaa yɛave bɛ ninyɛne, yɛazoa ninyɛne mɔɔ yɛkɛnyia la yɛahɔ, yɛahɔha menli ne mɔɔ ɛyɛ gbudugbudu de azɛlɛ ne mɔɔ dɔle mgbane la azo la senle dwɛɛ. Bɛ nee bɛ vi maanle maanle zo a rale a, na bɛlɛ nlankɛ nee ninyɛne dɔɔnwo, yɛɛ bɛde ewiade ye avinli.’

¹³Hyiba nee Didan nee gualilɛma mɔɔ vi Tahyehye[8] nee ye namunamu la babiza wɔ kɛ, ‘Wɔra kɛ ɛbave ninyɛne ɔ? Wɔboɔboa wɔ ɛlɔnema anloa kɛ ɛbazoa dwɛtɛ fufule nee ezukoa nvutuke, nlankɛ nee ninyɛne wɔahɔ ɔ?’

¹⁴“Yemɔti, sonla ra, ka Nyamenle nrɛlaleɛ ne na se Gɔɔgo kɛ, Awulae Nyamenle ne se: Mekɛ ne anu mɔɔ ɛnee me menli ne de anwondɔlɛ nu la,

¹⁵ɛbaheha ɛ nwo na ɛvi ɛleka mɔɔ ɛde, wɔ sɔlɔ nehane la, wɔava menli ɛwolaa ne mɔɔ li ɛ nzi, mɔɔ biala de ɛkpɔnwɔ zo, na bɛle ɛlɔnema dɔɔnwo anwo ɛzulolɛ la,

¹⁶wɔara me menli Yizilayɛma anwo zo kɛ amungu la wɔaraheda maanle ne azo. Mekɛ ne mɔɔ li amozi la anu, mebamaa wɔara me azɛlɛ ne azo, na saa medua ɛdawɔ Gɔɔgo ɛ nwo zo meye me nwuanzanwuanzayɛlɛ ne mekile a, maanle maanle kɔsɔɔti anwu me.

¹⁷Medame, Awulae Nyamenle, mebiza wɔ kɛ: Wɔmɔ a ɛle sonla ne mɔɔ menluale me sonvolɛ kpɔmanvolɛma anwo zo menganle ɛ nwo edwɛkɛ mɔmoane mɔmoane ne kɛ mebava wɔ meara Yizilayɛma anwo zo la ɔ?”

¹⁸Awulae Nyamenle ne se, “Mekɛ ne anu, mɔɔ Gɔɔgo bara Yizilayɛma maanle ne anu la, mebava ɛya kpole.

¹⁹Ɔluakɛ melɛ anyebolo nee ɛya kpole meka kɛ: Mekɛ ne anu, Yizilayɛ maanle ne anu bakpusu kpole kpalɛ.

²⁰Saa meye me nyunlu a, menli mɔɔ wɔ ewiade la amuala, fɛlɛ mɔɔ wɔ nyevile nu, nloma mɔɔ wɔ anwomanyunlu, nane, yɛɛ debie biala mɔɔ twenle ɔ kɛnra aze la anwo bawozo ye, awoka badwulu agua, yɛɛ bodane boka senze bɔbɔ bagolo agua aze.

²¹Mebamaa ɛzulolɛ kpole kpalɛ aha Gɔɔgo, medame Awulae Nyamenle a mese a. Awie biala bahwe ɔ gɔnwo anwo dadeɛ.

²²Mebava ewulenzane nee mogya ɛhanlɛ a meadea ye a. Mebamaa ezuawolɛ, senle nee sɔlefe adɔ bilididi agua ye nee ye ɛlɔnema nee maanle maanle mɔɔ yehwe bɛ yeli ɔ nzi la anwo zo.

²³Zɛhae yɛɛ mebahile me kpoleyɛlɛ nee me nwuanzanwuanzayɛlɛ na meaye me nwo meahile bɛ wɔ maanle maanle anyunlu a. Na akee bɛanwu kɛ medame a mele Ɛdɛnkɛma a.”