Read Nzema Yiz 39 Bible Online

Yiz 39 - Nzema bible

Yiz 39

¹Awulae Nyamenle dendɛle hilele me. Ɔse, “Sonla ra, ka Nyamenle nrɛlaleɛ ne mɔɔ tia Gɔɔgo la na se ye kɛ medame, Awulae Nyamenle, mese: Gɔɔgo, Mihyɛke nee Tubale belemgbunli, mekpo wɔ.

²Mebahakyi ɛ nye na meahwe wɔ me nee wɔ vi sɔlɔ lɔ ara, na meamaa wɔahɔteta Yizilayɛ awoka ne mɔ.

³Akee mebabɔ wɔ ɛda ne mɔɔ ɛlɛ ye ɛ sa bɛne ne anu la meado, na meamaa wɔ ɛda mbaka ne mɔ vi ɛ sa fema ne anu agua aze.

⁴Ɛdawɔ yɛɛ wɔ ɛlɔnema nee maanle maanle mɔɔ li ɛ nzi la amuala badɔ Yizilayɛ awoka ne mɔ azo. Mebava bɛ nwonane meamaa nloma nee nanemgbole ali.

⁵Bɛbadɔ fienemgbole ne anu; medame Awulae Nyamenle a mese a.

⁶Mebamaa senle adɔ agua Meegɔɔgo nee bɛdabɛ mɔɔ bɛde anwondɔlɛ nu wɔ ɛnweanloa la anwo zo, na bɛanwu kɛ medame a mele Ɛdɛnkɛma a.

⁷Mebamaa me duma nwuanzanwuanza ne ala ali wɔ Yizilayɛma anu; menrɛmaa bɛnrɛgua me duma nwuanzanwuanza ne anwo evinli bieko, na maanle maanle ne mɔ anwu kɛ medame a mele Ɛdɛnkɛma, Yizilayɛ Nwuanzanwuanza Ko ne a.”

⁸Awulae Nyamenle ne se, “Kenle ne mɔɔ meha nwolɛ edwɛkɛ la ɛlɛba. Kɛ ɔkɛyɛ biala la, ɔbara.

⁹Na Yizilayɛma mɔɔ dede azuamgbole zo la bahɔ na bɛahɔva bɛ konle ninyɛne, bɛ sa nu enyinlike mgbole nee ngyikyi, ɛda nee ɛda mbaka, yɛɛ atwɛ mɔ bɛayɛ ɛyɛne bɛawuda toonwo ɛvolɛ nsuu.

¹⁰Yemɔti ɔnrɛhyia kɛ bɛkɛhɔ ɛbɔ nu kɛ bɛkakpondɛ ɛyɛne anzɛɛ bɛkapepɛ mbaka wɔ kpɔkɛ nu bɛayɛ ɛyɛne, ɔluakɛ bɛbava konle ninyɛne ne mɔ bɛayɛ ɛyɛne bɛawuda. Bɛbave menli mɔɔ venle bɛ ninyɛne la ninyɛne na bɛasesa menli mɔɔ sesale bɛ ninyɛne hɔle la ninyɛne bɛahɔ.” Awulae Nyamenle a se a.

¹¹Awulae Nyamenle ne se, “Kenle zɔhane mebamaa ɛleka wɔ Yizilayɛ na bɛazie Gɔɔgo zolɛ. Ɛleka ne a le Adendulɛma Bɔnza (Ebalem), mɔɔ la Nyevile Wulera ne aduduleɛ la. Ɔbadua adendulɛma adenle, ɔluakɛ ɛkɛ ne yɛɛ bɛbazie Gɔɔgo nee ye menli ɛwolaa ne mɔɔ li ɔ nzi la a; bɛbavɛlɛ ɛkɛ ne Heemɔngɔɔgo Bɔnza.

¹²Yizilayɛma bava siane nsuu a azie avunli ne mɔ a, amaa bɛadu evinli biala bɛavi azɛlɛ ne azo.

¹³Awie biala mɔɔ wɔ maanle ne anu la baboa yeamaa bɛazie avunli ne mɔ, na kenle mɔɔ mebaye me anyunlunyia ne meahile la, ɛhye bamaa bɛanyia bɛ nyunlu kpole. Medame Awulae Nyamenle a mese a.

¹⁴Bɛbaye menli mɔɔ dahuu baluolua azɛlɛ ne azo azie avunli ne mɔ a, amaa bɛadu evinli biala bɛavi azɛlɛ ne azo. Saa siane nsuu dwu a yɛɛ menli ɛhye mɔ baluolua azɛlɛ ne azo akpondɛ avunli ne mɔ a.

¹⁵Saa bɛlua azɛlɛ ne azo na bɛkɔto sonla bowule bie a, ɛnee bɛyɛ sɛkɛlɛneɛ bie bɛzie ɛkɛ, na menli mɔɔ sie avunli ne mɔ la arava ahɔzie ye wɔ Heemɔngɔɔgo Bɔnza.

¹⁶(Suakpole bie wɔ ɛkɛ ne afoa nu ala, bɛfɛlɛ ye Hamonaa.) Zɛhae yɛɛ bɛbayɛ bɛadu azɛlɛ ne azo evinli biala a.”

¹⁷ Awulae Nyamenle ne se, “Na wɔmɔ, sonla ra, tendɛ kile nloma ngakyile kɔsɔɔti, nee ɛbɔ nu nane kɔsɔɔti kɛ: Bɛboɔboa bɛ nloa na bɛrɛla, bɛrabɔ azu ne mɔɔ melɛbɔ meamaa bɛ la ɛkponle ne anwo bɛyia. Ɔle azubɔlɛ ɛkponledolɛ kpole kpalɛ wɔ Yizilayɛ awoka ne mɔ azo lɔ, na bɛbali nwonane bɛanlo mogya.

¹⁸Bɛbali katakyiema nwonane na bɛanlo azɛlɛ ye azo arelemgbunli mogya, kɛ asɛɛ bɛle mboane nyinli nee mboane mralɛ, mbɔnkye, nlankɛ nyinli nee Beehyan nlankɛ dɔlera.

¹⁹Bɛbali bɛ ko ayi, na bɛanlo mogya toonwo bɛabo wɔ me azubɔlɛ ɛkponle ne mɔɔ mebado meamaa bɛ la abo.

²⁰Bɛbali mgbɔnwɔ nee menli mɔɔ ka mgbɔnwɔ la nwonane bɛaboka katakyiema nee ɛlɔnema ngakyile dɔɔnwo nwonane. Medame, Awulae Nyamenle a mese a.”

²¹Ɛdɛnkɛma zele kɛ, “Akee mebamaa maanle maanle anwu me anyunlunyia; maanle maanle kɔsɔɔti banwu me ndeanlɛ mɔɔ meva medea bɛ nee tumi mɔɔ meva meyɛ la.

²²Ɔvi kenle ko ne mɔɔ kɔ la, Yizilayɛma banwu kɛ medame a mele Ɛdɛnkɛma bɛ Nyamenle ne a.

²³Na maanle maanle banwu kɛ Yizilayɛma ɛtane ti yɛɛ bɛhyele bɛ bɛhɔle nlɔnu a, yɛɛ kɛmɔ bɛanli nɔhalɛ bɛammaa me la ati yɛɛ menyele bɛ memanle bɛ kpɔvolɛma na mendole me nye ɛbɔ nu memanle bɛ muala bɛdɔle dadeɛ nloa a.

²⁴Mendole me nye ɛbɔ nu na me nee bɛ lile wɔ bɛ mɛladonlɛ ne nee bɛ nwo evinli ne mɔ ati.”

²⁵Awulae Nyamenle ne se, “Na kɛkala mebamaa Gyekɔbo abo zo amra akpazi bieko kɛ bɛ dɛba ne la. Mebanwu Yizilayɛma kɔsɔɔti anwunvɔne, yɛɛ mebanlea me duma nwuanzanwuanza ne boɛ.

²⁶Bɛ rɛle bavi bɛ anyiemgba mɔɔ bɛbɔle, nee ninyɛndane mɔɔ bɛyɛle bɛtiale me la, wɔ mekɛ mɔɔ bɛkɛdɛnla bɛ maanle ne anu anwondɔlɛ nu na awie ɛnwunlonwunla bɛ la.

²⁷Saa meboɔboa bɛ nloa me nee bɛ vi bɛ kpɔvolɛ maanle maanle ne mɔ anu ba a, maanle maanle ne mɔ banwu me nwuanzanwuanzayɛlɛ ne.

²⁸Na akee bɛbanwu kɛ medame a mele Ɛdɛnkɛma bɛ Nyamenle ne a, ɔboalekɛ memanle bɛhyele bɛ bɛhɔle nlɔnu wɔ maanle maanle avinli, na eza meboɔboa bɛ nloa me nee bɛ ɛzia ɛra bɛdabɛ bɛ maanle nu. Menrɛgyakyi bie wɔ maanle maanle ne mɔ bie anu.

²⁹Menrɛye me nye menrɛdo ɛbɔ nu bieko, na mebava me Sunsum ne meawula Yizilayɛma kɔsɔɔti anu. Medame, Awulae Nyamenle a mese a.”