Read Nzema Yiz 4 Bible Online

Yiz 4 - Nzema bible

Yiz 4

¹Nyamenle zele me kɛ, “Wɔmɔ, sonla ra, fa belekese ko to ɛ nyunlu ɛkɛ, na koɔhoa zolɛ maa ɔgyinla ɛkɛ ɔmaa suakpole Gyɛlusalɛm.

²Akee yɛ debie mɔɔ kile kɛ ɛlɔnema ɛbɛnra ɛyia ye la. Fu kuma wɔ nwolɛ bɛnra yia, kuohua ɛnwea nwolɛ, yɛ azokoɛleɛ na siezie konle ninyɛne bɛnra yia ye.

³Fa kyɛnze tɛtɛlɛ yɛ bane wa ɛdawɔ nee suakpole ne bɛ avinli. Akee yɛ kɛ ɛ nee suakpole ne ɛlɛko. Bɛva suakpole ne aze ala ɛne, na wɔmɔ yɛɛ wɔva suakpole ne aze a. Ɛhye le sɛkɛlɛneɛ maa Yizilayɛma.

⁴“Akee da ɛhyɛne zo wɔ wɔ bɛne zo, na mebava Yizilayɛma amuala ɛtane nwo ndeanlɛ meagua ɛ nwo zo. Ɛbala ɛkɛ ne kenle ɛya nsa abulahɔnla wɔanwu amaneɛ wɔ bɛ ɛtane ne mɔ ati. Wɔ amaneɛnwunlɛ kenle ko biala gyi ɛkɛ maa ɛvolɛ ko biala ndeanlɛ.

⁶Saa ɛwie ɛhye a, ɛbahakyi ɛ nwo wɔala ɛhyɛne zo wɔ wɔ fema zo, na wɔanwu amaneɛ kenle abulanla wɔ Dwudama ati, kenle ko biala le wɔ ɛvolɛ ko amaneɛnwunlɛ.

⁷“Akee maa ɛ nye ɛgyinla Gyɛlusalɛm mɔɔ ɛlɔnema ɛbɛnra ɛyia ye la anwo. Sua botokuma na ka Nyamenle nrɛlaleɛ ne tia ye.

⁸Nea, mebava nyɛma meakyekye wɔ kpalɛ mɔɔ ɛnrɛhola ɛ nwo kakyi kɔkpula mekɛ mɔɔ ɛkɛwie suakpole ne fa la.

⁹“Akee fa hwiiti, baale, aluba akpatala nee alubandenra (somgbotekɛ), yɛɛ atoko; fa bɛ muala gua kyɛnze nu fete yɛ kpanwo. Aleɛ mɔɔ ɛbali, wɔ kenle ɛya nsa abulahɔnla ne anu, wɔ mekɛ mɔɔ ɛla ɛhyɛne zo la ɛne.

¹⁰Kenle ko biala ɛbali aleɛ ko ala, yɛɛ aleɛ ne mɔɔ ɛbali la ɛnlomboɛ ɔwɔ kɛ to tone nu gelamo ɛya nwiɔ abulasa.

¹¹Eza ɛbanlo nzule ekyi bie, kɛyɛ kɔpo nwiɔ kenle ko.

¹²Ɛbava sonla ebinli welera wɔawuda senle wɔadondo wɔ kpanwo ne wɔ bɛ nyunlu ɛkɛ wɔali.”

¹³Na Ɛdɛnkɛma zele kɛ, “Zɛhae adenle zo yɛɛ Yizilayɛma bali bɛ aleɛ mɔɔ nwolɛ ɛnde la, wɔ mekɛ mɔɔ menwɔbɔ bɛ asande menwɔhɔgua maanle gyɛne gyɛne zo la a.”

¹⁴Na membuale kɛ, “Kyɛkyɛ, Awulae Nyamenle! Nɔhalɛ, ɔvi me ngakula nu toonwo mɔɔ yeradwu ɛnɛ la metɛdile debie mɔɔ ɔdaye ɔ ngome yewu anzɛɛ nane kpole bie ɛtete ye nu la, yɛɛ debie nvoanle biala ɛtɛkpulale me nloa na evinli aha me.”

¹⁵Na Nyamenle zele me kɛ, “Ɔle kpalɛ. Ɛnee mebamaa wɔava ɛnlankɛ ebinli na wɔagyakyi sonla ebinli ne, na wɔadondo wɔ kpanwo ne zolɛ.”

¹⁶Na ɔvale ɔzɔle zolɛ kɛ, “Sonla ra, memaa ɛhɔne azi Gyɛlusalɛm. Bɛbava sulosulo bɛazuzu bɛ aleɛ na bɛali na bɛava arɛlebɔlɛ bɛazuzu bɛ nzule na bɛanlo.

¹⁷Mebayɛ ɛhye meamaa bɛ nzule asesa na bɛ aleɛ awie, bɛbava arɛlebɔlɛ bɛanleɛnlea bɛ nyunlu, na bɛ ndeanlɛ ne bamaa bɛanwa.”