Read Nzema Yiz 40 Bible Online

Yiz 40 - Nzema bible

Yiz 40

¹ Bɛhyele yɛ bɛhɔle nlɔnu la, ye ɛvolɛ abulanwiɔ nee nnu ne mɔlebɛbo siane ne ala anu, kenle bulu ne azo, mɔɔ ɛnee bɛhonle bɛvale suakpole ne la yeli ɛvolɛ bulu nee nna la, kenle ko zɔhane ala, Ɛdɛnkɛma tumi ne rawolole me,

² na ɔvale me wɔ Nyamenle ɛnyelɛzodeɛnwunlɛ nu ɔrale Yizilayɛ azɛlɛ zo. Ɔvale me ɔziele boka tendenle bie, mɔɔ bɛyɛ ninyɛne bie mɔɔ kile kɛ bɛkyekye suakpole wɔ ɛkɛ ne la azo.

³ Ɔ nee me radwule ɛkɛ ne la, ɛnee nrenya bie mɔɔ anwo ta kɛ kɔbele la, lɛ bolɔfodɔ nyɛma nee nzuzulɛ baka ɔ sa nu gyi ɛkɛ; ɔgyi suakpole ne anuhɔlɛ kpole ne anloa.

⁴Na nrenya ne zele me kɛ, “Sonla ra, fa ɛ nye nea debie, fa ɛ nzo tie, na fa wɔ adwenle kɔ mɔɔ mefa meahile wɔ la azo, ɔluakɛ bɛ nee wɔ rale ɛke amaa meava meahile wɔ. Bɔ mɔɔ mefa meahile wɔ la nolo kile Yizilayɛma amuala.”

⁵Mɔɔ menwunle la a le kɛ bɛlie Ɛzonlenlɛ Sua ne anwo bane bɛyia. Nzuzulɛ baka ne mɔɔ nrenya ne lɛ la tendenle le mita nsa. Ɔzuzule bane ne la ɛnee ye ɛzamo le nzuzulɛ baka ne ko, yɛɛ ye anwumahɔlɛ noko le baka ne ko.

⁶Akee ɔhɔle anuhɔlɛ kpole ne mɔɔ wɔ aduduleɛ la anwo. Ɔvole ye kpolike ne na ɔzuzule anlenkɛ ne anloa anu. Ɔdaye noko ɔle mita nsa.

⁷Nwolodo ne, azua nsa a wɔ nu a. Ko biala tɛtɛlɛ nee ye tendenle sɛ. Biala le nzuzulɛ baka ne ko. Bɛ avinli bane ne mɔ ɛzamo le mita nwiɔ nee foa ko. Ɔvi azua ne mɔ anwo a nwolodo ko la ɛkɛ, ye tendenle le mita nsa. Sua kpandaanwo mɔɔ nee Ɛzonlenlɛ Sua ne anye bɔ zolɛ la gyi ɛkɛ.

⁸Ɔzuzule sua kpandaanwo ne anlenkɛ ne la ɔle mita nna;

⁹ye bane ne mɔ ɛzamo le mita ngoko. Sua kpandaanwo ɛhye a le Aduduleɛ Anlenkɛ Kpole ne akunlu anuhɔlɛ ne mɔɔ finde Ɛzonlenlɛ Sua ne anwo a.

¹⁰(Sinzavolɛma azua ne mɔ mɔɔ wɔ nwolodo ne anu la amuala sɛ mgbole, yɛɛ bane mɔɔ wɔ bɛ avinli la amuala ɛzamo sɛ.)

¹¹Akee nrenya ne zuzule anlenkɛ kpole ne nwolodo ne tɛtɛlɛ. Ɔle mita nsia nee foa ko, yɛɛ anuhɔlɛ ne le mita nnu.

¹²Azua nsa ne mɔɔ wɔ nwolodo ne anu la, bɛlie bane mɔɔ ye anwumahɔlɛ le mita foa ko, ye ɛzamo noko le mita foa ko la wɔ ko biala anyunlu. (Azua ne mɔ mgbole sɛ, ko biala tɛtɛlɛ le mita nsa yɛɛ ye tendenle le mita nsa).

¹³Akee ɔzuzule anlenkɛ kpole ne, ɔvi sua ko anzi mɔɔ kɔkpula sua ko anzi la, na ɔle mita bulu nee nwiɔ nee foa ko.

¹⁴Sua kpandaanwo ne gyi Ɛzonlenlɛ Sua ne alie nwo ɛkɛ ne. Nrenya ne zuzule la, ye tɛtɛlɛ le mita bulu.

¹⁵Ɔvi anlenkɛ kpole ne findezo bane ne anwo mɔɔ kɔdwu azua nsa ne ati lɔ la le mita abulanwiɔ nee nnu.

¹⁶Adokule mɔɔ bɛ findezo tɛlɛ na bɛ kunlu le fefeɔ la gugua anlenkɛ kpole ne bane ne mɔ anwo. Nwolodo ne anu bane ne mɔ, bɛli mrɛlɛ adwinli bɛgua nwolɛ.

¹⁷Akee ɔvale me ɔrale findezo alie nwo ɛkɛ. Ekpumgbunli abulasa a wɔ findezo bane ne anu a, na bɛva awolɛ bɛbo ɔ nyunlu.

¹⁸Bɛva awolɛ bɛbo alie ne anwo amuala. Alie nwo ɛhye wɔ aze tɛla ɔ kunlu lɔ alie nwo ɛdeɛ ne.

¹⁹Akee ɔzuzule ɔ kunlu lɔ alie nwo anuhɔlɛ ne anloa ɔhɔkpulale findezo alie nwo anuhɔlɛ ne anloa, na ɔnyianle mita abulanlu. Anuhɔlɛ ne mɔɔ wɔ sua ne akunlu lɔ alie ne anwo la wɔ anwuma tɛla findezo ɛdeɛ ne.

²⁰Akee nrenya ne lile me nyunlu na ɔ nee me hɔle Ɛzonlenlɛ Sua ne ɛbɔ nu afoa nu. Alie nwo anlenkɛ kpole ko wɔ ɛkɛ mɔɔ anye di kɔ ɛbɔ nu afoa nu a, na ɔzuzule ye tendenle ne nee ye tɛtɛlɛ.

²¹Ɔzuzule ye foa ko nee ye foa ko ekpumgbunli nsa nsa ne mɔ, ye bane ne mɔ nee ye sua kpandaanwo ne, na bɛle kɛ alumua ɛdeɛ ne ala la. Ye tendenle le mita abulanwiɔ nee nnu, yɛɛ ye tɛtɛlɛ le mita bulu nee nwiɔ nee foa ko.

²²Akee ye nvɛnzɛlɛ ne mɔ, ye sua kpandaanwo ne nee mrɛlɛ mɔɔ bɛze wɔ bane ne mɔ anwo la amuala le kɛ mɔɔ wɔ anlenkɛ kpole ne mɔɔ di kɔ aduduleɛ la anwo la. Ye kpolike ne le nsuu, yɛɛ ye sua kpandaanwo ne wɔ ɔ kunlu lɔ alie nwo lɔ.

²³Findezo alie nwo ɛkɛ ne, anlenkɛ kpole ko wɔ ɛkɛ kɔ Ɛzonlenlɛ Sua ne akunlu alie nwo ɛkɛ, na ɔ nee findezo anlenkɛ kpole ne anye bɔ zolɛ, kɛmɔ aduduleɛ ɛdeɛ ne de la. Nrenya ne zuzule adenle mɔɔ la nlenkɛ mgbole nwiɔ ɛhye avinli la, na ɔle mita abulanlu.

²⁴Eza ɔvale me ɔhɔle sua ne nyiakɛ, anlenkɛ kpole ko wɔ ɛkɛ, na ɔzuzule ye bane ne mɔ nee ye debie biala, na bɛ muala bɛle kɛ alumua ɛdeɛ ne mɔ la.

²⁵Nvɛnzɛlɛ wɔ nwolɛ toonwo yia, yɛɛ ye sua kpandaanwo ne anu le kɛ alumua nlenkɛ mgbole ne mɔ ɛdeɛ ne mɔ ala la. Ye tendenle le mita abulanwiɔ nee nnu, yɛɛ ye tɛtɛlɛ le mita abulanlu.

²⁶Ɔlɛ kpolike nsuu, yɛɛ ye sua kpandaanwo ne wɔ ɔ kunlu lɔ alie nwo ɛkɛ. Bɛli mrɛlɛ adwinli bɛgua ye bane ne mɔ anwo.

²⁷Anlenkɛ kpole ko mɔɔ kɔ sua ne akunlu lɔ alie nwo ɛkɛ ne la nee ɛhye anye bɔ zolɛ. Nrenya ne zuzule adenle mɔɔ la bɛ avinli la ɔnyianle mita abulanlu.

²⁸Akee nrenya ne nee me rale Ɛzonlenlɛ Sua ne akunlu alie nwo ɛkɛ. Yɛvale nyiakɛ anlenkɛ kpole ne anu, na ɔzuzule anlenkɛ kpole ne. Ye kpole le kɛ nlenkɛ ɛhendeɛ ne mɔ la.

²⁹Ye bane ne mɔ mgbole nee bɛ ɛzamo nee nuhua ekpumgbunli ne mɔ le kɛ nlenkɛ ɛhendeɛ ne mɔ la. Nvɛnzɛlɛ wɔ nwolɛ nee ye sua kpandaanwo ne anwo yia. Ye tendenle le mita abulanwiɔ nee nnu, yɛɛ ye tɛtɛlɛ le mita bulu nee nwiɔ nee foa ko.

³⁰

³¹Ye sua kpandaanwo ne anye wɔ findezo alie nwo ɛkɛ, yɛɛ bɛli mrɛlɛ adwinli bɛgua ye bane ne mɔ anwo. Ɔlɛ kpolike mɔtwɛ.

³²Nrenya ne eza vale me hɔle Aduduleɛ Anlenkɛ Kpole ne anwo wɔ sua ne akunlu lɔ alie ne anwo na ɔzuzule. Ye tendenle nee ye tɛtɛlɛ le kɛ ɛhendeɛ ne mɔ la.

³³Ye nwolodo ne foa ko azua ne mɔ le kɛ nlenkɛ mgbole ɛhendeɛ ne mɔ ɛdeɛ ne la. Nvɛnzɛlɛ wɔ nwolɛ nee ye sua kpandaanwo ne anwo yia. Ye tendenle le mita abulanwiɔ nee nnu, yɛɛ ye tɛtɛlɛ le mita bulu nee nwiɔ nee foa ko.

³⁴Ye sua kpandaanwo ne anye wɔ findezo alie nwo ɛkɛ, yɛɛ bɛli mrɛlɛ adwinli bɛgua ye bane ne mɔ anwo, ɔlɛ kpolike mɔtwɛ.

³⁵Akee nrenya ne vale me hɔle sua ne sɔlɔ anlenkɛ kpole ne anwo. Ɔzuzule, na ɔ nee ɛhendeɛ ne mɔ sɛ mgbole.

³⁶Ye nwolodo ne anu azua ne mɔ amuala le kɛ ɛhendeɛ ne mɔ ɛdeɛ ne la. Nvɛnzɛlɛ wɔ nwolɛ yia. Ye tendenle le mita abulanwiɔ nee nnu, yɛɛ ye tɛtɛlɛ le mita bulu nee nwiɔ nee foa ko.

³⁷Ye sua kpandaanwo ne anye wɔ findezo alie ne anwo, yɛɛ bɛli mrɛlɛ adwinli bɛgua ye bane ne mɔ anwo. Ye kpolike ne le mɔtwɛ.

³⁸Ekpumgbunli bie beta sɔlɔ anlenkɛ kpole ne sua kpandaanwo ne anwo. Ɛkɛ ne a bɛnrinzi ɛyelalɛ azubɔdeɛ ne mɔ anwo a.

³⁹Anlenkɛ kpole ne sua kpandaanwo ne anu, ɛkponle nna gyigyi ɛkɛ, nwiɔ wɔ ye tɛbanu yɛɛ nwiɔ noko wɔ ye tɛbanu. Ɛkponle ɛhye mɔ azo a bɛku ɛyelalɛ azubɔdeɛ, ɛtane azubɔdeɛ, nee abozozielɛ azubɔdeɛ ne mɔ a.

⁴⁰Ɛkponle nna noko gyigyi sɔlɔ anlenkɛ kpole ne sua kpandaanwo ne anyunlu. Nwiɔ gyi foa ko yɛɛ nwiɔ noko gyi foa ko.

⁴¹Bɛ muala bɛbɔ nu a ɛnee ɛkponle mɔtwɛ a wɔ sɔlɔ anlenkɛ kpole ne anloa a. Nna wɔ sua kpandaanwo ne anu yɛɛ nna noko gyigyi ɔ nyunlu alie nwo ɛkɛ. Ɛkponle ɛhye mɔ azo a bɛku azubɔdeɛ ne mɔ a.

⁴²Eza awolɛ mɔɔ bɛze la ɛkponle nna wɔ ɛkɛ maa ɛyelalɛ azubɔdeɛ ne mɔ. Ko biala anwumahɔlɛ le mita foa ko yɛɛ zolɛ tɛtɛlɛ nee ye tendenle sɛ, ko biala le waa nna. Ɛkponle ɛhye mɔ azo a bɛfa ɛyelalɛ azubɔdeɛ ne mɔ nee ninyɛne mɔɔ bɛfa bɛku nane azubɔdeɛ ne mɔ nee mɔɔ bɛfa bɛbia bɛ la bɛgua a.

⁴³Ɛkponle ne mɔ anloa nna ne lɛ nzosɔnu, ko biala tendenle le waa ko. Ɛkponle ɛhye mɔ azo a bɛfa nane azubɔdeɛ ne mɔ bɛgua a.

⁴⁴Akee nrenya ne nee me vi findezo alie nwo ɛkɛ hɔle sua ne akunlu lɔ alie ne anwo. Azua ekpumgbunli nwiɔ wɔ ɛkɛ, ko gyi sɔlɔ anlenkɛ kpole ne anwo, ɔ nye kɔne nyiakɛ, yɛɛ ko noko gyi nyiakɛ anlenkɛ kpole ne anwo, ɔ nye kɔne sɔlɔ.

⁴⁵Na ɔzele me kɛ, “Ekpumgbunli ɛhye mɔɔ anye kɔne nyiakɛ la le sɛlɛvolɛma mɔɔ yɛ gyima wɔ Ɛzonlenlɛ Sua ne anu la ɛdeɛ.

⁴⁶Ekpumgbunli ne noko mɔɔ wɔ nyiakɛ na ɔ nye kɔne ɛbɔ nu la le sɛlɛvolɛma mɔɔ yɛ gyima wɔ azukponle ne azo la ɛdeɛ. Sɛlɛvolɛma ɛhye mɔ amuala le Zeedɔko abo zo amra, na bɛmɛ ala a bɛwɔ Livae abusua ekpunli ne anu, mɔɔ ɔwɔ kɛ bɛdi gyima mɔɔ le zɛhae, bɛbikye Ɛdɛnkɛma na bɛsonle ye a.”

⁴⁷Nrenya ne zuzule sua ne akunlu alie ne anwo, na ye tendenle le mita abulanlu yɛɛ ye tɛtɛlɛ le mita abulanlu. Azukponle ne gyi Ɛzonlenlɛ Sua ne anyunlu.

⁴⁸Akee ɔvale me ɔrale Ɛzonlenlɛ Sua ne anuhɔlɛ sua kpandaanwo ne anloa na ɔzuzule, ye tɛtɛlɛ le mita nsuu yɛɛ ye anwumahɔlɛ le mita nwiɔ nee foa ko. Ye bane ne mɔ ɛzamo le mita ko nee foa ko.

⁴⁹Kpolike wɔ ɛkɛ mɔɔ bɛfa zolɛ bɛfo anuhɔlɛ ne a. Anuhɔlɛ ne tɛtɛlɛ le mita bulu yɛɛ ye anwumahɔlɛ le mita nsia. Mpila nwiɔ gyigyi anuhɔlɛ ne, ko gyi ye foa ko, yɛɛ ko noko gyi ye foa ko.