Read Nzema Yiz 41 Bible Online

Yiz 41 - Nzema bible

Yiz 41

¹Eza nrenya ne vale me hɔle sua ne akunlu, Ɛleka Nwuanzanwuanza ne na ɔzuzule anuhɔlɛ ne; ye anwumahɔlɛ le mita nsa,

²yɛɛ ɔ nloa anu tɛtɛlɛ le mita nnu. Ye bane ne mɔ ɛzamo le mita nwiɔ nee foa ko. Akee ɔzuzule sua mumua ne anu, na ye tendenle le mita abulanwiɔ, yɛɛ ye tɛtɛlɛ le mita bulu.

³Akee ɔwolole ɔhɔle sua ne akunlu ekpumgbunli ne anu na ɔzuzule anuhɔlɛ ne mɔɔ kɔ sua ne anu la, ye anwumahɔlɛ le mita ko yɛɛ ye tɛtɛlɛ le mita nsa. Bane mɔɔ wɔ nwolɛ la ɛzamo le mita nsa nee foa ko.

⁴Ɔzuzule ekpumgbunli mumua ne na ye tendenle le mita bulu. Ye tɛtɛlɛ nee ye tendenle sɛ. Na ɔzele me kɛ, “Ɛke a le Nwuanzanwuanza Nu Nwuanzaanwu Ɛleka ne a.”

⁵Akee nrenya ne zuzule Ɛzonlenlɛ Sua ne bane ne; ye ɛzamo le mita nsa. Ekpumgbunli mɔɔ wɔ bane ne anwo la biala tɛtɛlɛ le mita nwiɔ. Ekpumgbunli ne mɔ wɔ Ɛzonlenlɛ Sua ne bane ne anwo toonwo bɛnra yia.

⁶Ekpumgbunli ɛhye mɔ le nzɛzo nsa nsa yɛɛ nzɛzo ko biala le ekpumgbunli abulasa. Ɛzonlenlɛ Sua ne bane ne mɔ lɛ bɛ bati mɔɔ nzɛzo ko biala mbaka kɔgua zolɛ a, amaa mbaka ne mɔ anwolowolo Ɛzonlenlɛ Sua ne bane mumua ne anu.

⁷Ye zɔhane ati ekpumgbunli ne mɔ mɔɔ wɔ anwuma la le mgbole tɛla aze ɛdeɛ ne mɔ. Nzɛzo nsa ne ekpumgbunli ne mɔ le mgbole tɛla nzɛzo nwiɔ ne, yɛɛ nzɛzo nwiɔ ɛdeɛ ne mɔ anu buke tɛla ɔ bo ɛdeɛ ne. Bɛyɛ kpolike adenle wɔ Ɛzonlenlɛ Sua ne foa ko mɔɔ bɛfo zolɛ bɛkɔ ekpumgbunli ne mɔ mɔɔ wɔ anwuma la anu a.

⁸Ekpumgbunli ɛhye mɔ findezo bane ne mɔ ɛzamo le mita nwiɔ nee foa ko. Anlenkɛ ko ala anu yɛɛ bɛdua bɛkɔ sɔlɔ ekpumgbunli ne mɔ anu a, yɛɛ ko noko ala a bɛdua nu bɛkɔ nyiakɛ ekpumgbunli ne mɔ anu a. Eza menwunle kɛ bɛbo bama mɔɔ ye tɛtɛlɛ le mita nwiɔ nee foa ko la wɔ Ɛzonlenlɛ Sua ne anwo bɛyia. Ye anwumahɔlɛ le mita nsa na ɔ nee ekpumgbunli ne mɔ mɔɔ betɛbeta Ɛzonlenlɛ Sua ne anwo la adiabo ne mɔ le sɛsɛ. Bama ne nee azua ne mɔ mɔɔ sɛlɛvolɛma ne wɔ nuhua la avinli, adenle mɔɔ ye tɛtɛlɛ le mita bulu la la ɛkɛ ne toonwo bɛnra yia Ɛzonlenlɛ Sua ne.

¹²Ɛzonlenlɛ Sua ne adɔleɛ, ɛleka wienyi ne abo lɔ, sua ko gyi ɛkɛ; ye tendenle le mita abulanla nee nnu, yɛɛ ye tɛtɛlɛ le mita abulasa nee nnu. Ye bane ne mɔ ɛzamo le mita nwiɔ nee foa ko.

¹³Akee nrenya ne zuzule Ɛzonlenlɛ Sua mumua ne. Ye tendenle le mita abulanlu; sua ne alie nwo ɛkɛ ne nee bane ne amuala le mita abulanlu.

¹⁴Akee Ɛzonlenlɛ Sua ne aduduleɛ tɛtɛlɛ mɔɔ alie nwo ne nee bane ne mɔ amuala wɔ nu la le mita abulanlu.

¹⁵Akee ɔzuzule sua ne mɔɔ gyi adɔleɛ alie nwo ɛkɛ ne la nee ye bane ne mɔ, na ɔdaye noko ɔle mita abulanlu. Ɛzonlenlɛ Sua ne anuhɔlɛ ekpumgbunli ne, Ɛleka Nwuanzanwuanza ne, yɛɛ Nwuanzanwuanza Nu Nwuanzaanwu Ɛleka ne,

¹⁶bɛva ndaboa bɛzɛ azɛlɛ nwo toonwo yekpula nvɛnzɛlɛ ne mɔ abo. Bɛduodua nvɛnzɛlɛ ne mɔ ɛbonle.

¹⁷Ɛzonlenlɛ Sua ne akunlu bane ne mɔ anwo, toonwo mɔɔ kɔdwu nlenkɛ ne mɔ azo la, bɛva ndaboa mɔɔ

¹⁸bɛli mrɛlɛ nee abɔdeɛ mɔɔ lɛ ndɛbalɛ la adwinli bɛgua zolɛ la bɛzɛ nwolɛ. Mrɛlɛ ne mɔ didi abɔdeɛ ne mɔ mɔɔ lɛ ndɛbalɛ la avinli. Abɔdeɛ ne mɔ mɔɔ lɛ ndɛbalɛ la, ko biala lɛ ɔ nyunlu nwiɔ.

¹⁹Ɔ nyunlu ko mɔɔ zɔho sonla nyunlu la wɔ mrɛlɛ ne mɔ ko anwo. Bɛli zɛhae adwinli bɛgua Ɛzonlenlɛ Sua ne bane ne anwo toonwo yeyia,

²⁰ɔvi aze toonwo ɔdwu nlenkɛ ne mɔ azo.

²¹Ɛleka Nwuanzanwuanza ne anlenkɛ felɛmo mbaka nna ne amuala sɛ. Nwuanzanwuanza Nu Nwuanzaanwu Ɛleka ne anuhɔlɛ ne, debie bie wɔ ɛkɛ ne mɔɔ zɔho

²²baka azukponle a. Ye anwumahɔlɛ le mita ko nee foa ko yɛɛ ye tɛtɛlɛ le mita ko. Bɛvale ndaboa a bɛyɛle ye mgbɛnezo ne mɔ, ɔ bo ne nee ye tɛbanu tɛbanu ne mɔ a. Na nrenya ne zele me kɛ, “Ɛkponle ɛhye a gyi Ɛdɛnkɛma anyunlu a.”

²³Anlenkɛ wɔ Ɛleka Nwuanzanwuanza ne nwolodo ne mɔɔ bɛdua nu bɛkɔ Nwuanzanwuanza Nu Nwuanzaanwu Ɛleka ne anuhɔlɛ ne la; ɛkɛ ne noko, anlenkɛ wɔ ɛkɛ.

²⁴Nlenkɛ nwiɔ ɛhye mɔ biala lɛ ɛbonta.

²⁵Bɛli mrɛlɛ nee abɔdeɛ mɔɔ lɛ ndɛbalɛ la adwinli bɛgua Ɛleka Nwuanzanwuanza ne anlenkɛ ne anwo kɛ mɔɔ bɛli bɛgua Ɛzonlenlɛ Sua ne anu bane ne mɔ anwo la. Akee bɛva ndaboa bɛbo kpɔda wɔ findezo anuhɔlɛ ekpumgbunli ne anyunlu.

²⁶Nvɛnzɛlɛ wɔ ekpumgbunli ne foa ko nee ye foa ko, na bɛli mrɛlɛ adwinli bɛgua ye bane ne mɔ anwo.