Read Nzema Yiz 42 Bible Online

Yiz 42 - Nzema bible

Yiz 42

¹Akee nrenya ne vale me hɔle Ɛzonlenlɛ Sua ne findezo alie nwo ɛkɛ ne na ɔlile me nyunlu yɛhɔle sua bie mɔɔ gyi Ɛzonlenlɛ Sua ne ɛbɔ nu afoa nu la anwo. Sua ɛhye nee ko bie mɔɔ gyi Ɛzonlenlɛ Sua ne adɔleɛ afoa nu la avinli anwa biala.

²Sua ne mɔɔ wɔ ɛbɔ nu afoa nu la tendenle le mita abulanlu yɛɛ ye tɛtɛlɛ le mita abulanwiɔ nee nnu.

³Sua ɛhye anyunlu ko kɔne ɛleka wienyi ne mɔɔ le mita bulu, mɔɔ la Ɛzonlenlɛ Sua ne anwo la, yɛɛ ɔ nyunlu ko ne noko kɔne bama ne mɔɔ bɛbo wɔ findezo alie nwo ɛkɛ ne la anwo. Ɔle sua nzɛzo nsa.

⁴Sua ne nlenkɛ ne mɔ anye kɔne ɛbɔ nu afoa nu yɛɛ adenle la ɔ nyunlu; ye tendenle le mita abulanlu yɛɛ ye tɛtɛlɛ le mita nnu.

⁵Anwuma ekpumgbunli ne mɔ le ngyikyi, ɔluakɛ zolɛ abenlana ɛdeɛ ne anu buke tɛla avinli nee aze ɛdeɛ ne mɔ.

⁶Sua ne le nzɛzo nsa, noko ɔnlɛ mpila, kɛmɔ findezo alie nwo sua ne lɛ ye la; yemɔti mɔɔ sua ne ɛlɛkɔ anwuma la ɛnee ye ɛzamo ne ɛlɛyɛ ekyi.

⁷Sua ne aze bane ne mɔ ɛzamo le mita abulanwiɔ nee nnu, asɛɛ sua ne tendenle nu foa ko, yɛɛ ekpumgbunli ne mɔ wɔ mita abulanwiɔ nee nnu ne mɔɔ ɛha la anu. Anwuma nzɛzo ne ekpumgbunli ne mɔ fa sua ne tendenle nu amuala.

⁹Ekpumgbunli ɛhye mɔ abo, mɔɔ kɔne aduduleɛ la, adenle la ɛkɛ ne kɔ findezo alie nwo ɛkɛ ne,

¹⁰ɛleka mɔɔ Ɛzonlenlɛ Sua ne alie nwo bane ne bɔ ɔ bo la. Sua ko noko mɔɔ le kɛ ko ne mɔɔ gyi Ɛzonlenlɛ Sua ne adɔleɛ la gyi Ɛzonlenlɛ Sua ne nyiakɛ; ɔ nee adɔleɛ sua ne avinli anwa fee.

¹¹Adenle la sua ne ekpumgbunli ne mɔ anyunlu kɛ sua ɛhendeɛ ne mɔɔ wɔ ɛbɔ nu afoa nu la. Ye kpole, ye tendenle, ye tɛtɛlɛ, ye kɛnlɛma, yɛɛ ye ndenle mɔɔ gugua nwolɛ la le kɛ sua ɛhendeɛ ne ala la.

¹²Akee adenle la nyiakɛ ekpumgbunli ne mɔ abo, wɔ aduduleɛ afoa nu ɛleka mɔɔ bane ne wɔ la.

¹³Akee nrenya ne zele me kɛ, “Sua ne mɔɔ gyi ɛbɔ nu afoa nu nee ko ne mɔɔ gyi nyiakɛ la le azua mɔɔ anwo te a. Ɛkɛ ne ekpumgbunli ne mɔ anu yɛɛ sɛlɛvolɛma mɔɔ finde Ɛdɛnkɛma anyunlu la bali bɛ aleɛ nwuanzanwuanza ne mɔ a. Ɛkɛ ne yɛɛ bɛbava aleɛ nwuanzanwuanza ne mɔ mɔɔ le ma azubɔdeɛ, ɛtane azubɔdeɛ, yɛɛ abozozielɛ azubɔlɛ ninyɛne ne mɔ bazie a, ɔluakɛ ɛleka ne le nwuanzanwuanza.

¹⁴Saa sɛlɛvolɛma ne kɔ Ɛleka Nwuanzanwuanza ne kɔsonle a, ɔnle kɛ bɛfa adɛladeɛ mɔɔ bɛwulale bɛhɔzonlenle la bɛkɔ findezo alie nwo ɛkɛ. Ɔwɔ kɛ bɛye bɛgua ekpumgbunli ne mɔ bie anu, ɔboalekɛ adɛladeɛ ne mɔ anwo te. Ɔwɔ kɛ bɛfa adɛladeɛ gyɛne bɛwula kolaa na bɛavinde bɛahɔ ɛleka mɔɔ menli ne mɔ wɔ la.”

¹⁵Mɔɔ nrenya ne wiele Ɛzonlenlɛ Sua ne akunlu ɛleka ne mɔ suzu la, ɔvale me ɔluale aduduleɛ anlenkɛ kpole ne anu ɔvindele, na ɔzuzule Ɛzonlenlɛ Sua ne ɛleka ne kpole.

¹⁶Ɔvale nzuzuleɛ baka ne ɔzuzule aduduleɛ afoa nu, na ɔle mita ɛya nwiɔ abulanlu.

¹⁷Akee ɔhakyile ɔ nwo na ɔzuzule ɛbɔ nu afoa nu, ɔle mita ɛya nwiɔ abulanlu.

¹⁸Eza ɔzuzule nyiakɛ afoa nu, ɔle mita ɛya nwiɔ abulanlu.

¹⁹Akee ɔhakyile ɔ nye adɔleɛ ɔzuzule, na ɔle mita ɛya nwiɔ abulanlu.

²⁰Ɔzuzule Ɛzonlenlɛ Sua ne tɛbanu nna ne amuala; ɔnyianle ye tendenle nu mita ɛya nwiɔ abulanlu yɛɛ ye tɛtɛlɛ nu zɔhane ala. Bane ne mɔɔ wɔ avinli la gya mɔɔ le nwuanzanwuanza nee mɔɔ anwo ɛnde la ɛweɛne.