Read Nzema Yiz 43 Bible Online

Yiz 43 - Nzema bible

Yiz 43

¹Nzinlii nrenya ne vale me rale aduduleɛ anlenkɛ kpole ne anloa.

² Na nea, Yizilayɛ Nyamenle ne anyunlunyia vi aduduleɛ rale. Ye ɛralɛ ne anu alɛra le kɛ azule dɔɔnwo mɔɔ ɛlɛse la ane, ye anyunlunyia ne manle azɛlɛ ye azo dale wienyi.

³Na ɛnyelɛzodeɛnwunlɛ ne mɔɔ menwunle ye la ɛnee le kɛ mɔɔ menwunle ye wɔ mekɛ mɔɔ ɔrazɛkyele suakpole ne la. Eza ɔle kɛ mɔɔ menwunle ye wɔ Azule Kibaa ne anloa la. Na membutule mutule nu.

⁴Ɛdɛnkɛma anyunlunyia ne luale aduduleɛ anlenkɛ kpole ne anu wolole Ɛzonlenlɛ Sua ne anu.

⁵Ɛdɛnkɛma Sunsum ne kpogyale me zo, na ɔ nee me hɔle Ɛzonlenlɛ Sua ne akunlu lɔ alie ne anwo, na menwunle kɛ Ɛdɛnkɛma anyunlunyia ne ɛyi Ɛzonlenlɛ Sua ne tɛkɛɛ.

⁶Mekɛ mɔɔ ɛnee nrenya ne gyi me nwo ɛkɛ ne ala la, mendele kɛ ɛnelɛ bie vi Ɛzonlenlɛ Sua ne anu ɛlɛtendɛ ahile me.

⁷Ɔse, “Sonla ra, me belemgbunli ebia ne nee ɛleka mɔɔ mefa me gyakɛ mesiezie la ɛne. Mebadɛnla Yizilayɛma avinli dahuu. Yizilayɛma ɛnrɛzɛkye me duma nwuanzanwuanza ne bieko. Bɛdabɛ Yizilayɛma o, anzɛɛ bɛ arelemgbunli o, bɛ biala ɛnrɛva bɛ tuutuulilɛ nee bɛ arelemgbunli avunli ɛnrɛgua me duma nwuanzanwuanza ne anwo evinli.

⁸Bɛnrɛhye belemgbunli awuke bɛnrɛzua me Ɛzonlenlɛ Sua ne, yɛɛ bɛnrɛlie bane bɛnrɛgya me Ɛzonlenlɛ Sua ne nee bɛ belemgbunli suakunlu ɛweɛne, mɔɔ anlenkɛ ala a bɛdua nu bɛfinde ko anu a. Bɛvale bɛ ninyɛndane bɛzɛkyele me duma nwuanzanwuanza ne, yemɔti menvale ɛya menzɛkyele bɛ.

⁹Kɛkala maa bɛvuandi bɛ mmonle ne mɔ bɛgua na bɛzie bɛ arelemgbunli ne mɔ avunli wɔ moa moa mɔɔ bɛmbikye me la, na me nee bɛ badɛnla dahuu.”

¹⁰Ɛdɛnkɛma zele me kɛ, “Na wɔmɔ, sonla ra, ka kɛ Ɛzonlenlɛ Sua ne si de, ye kpole nee kɛ bɛzi bɛhyehyɛ ye la, amaa bɛ anyiemgba abɔ bɛ ti.

¹¹Na saa mɔɔ bɛyɛ la maa nyiane tɔ bɛ nye zo a, akee kile bɛ kɛ Ɛzonlenlɛ Sua ne si de nee kɛ bɛzile bɛhyehyɛle ye, ye anuhɔlɛ ne mɔ nee ye nlenkɛ mgbole ne mɔ, yɛɛ kɛ sua mumua ne kpole si de la. Akee maa bɛnwu nwolɛ mɛla nee ngyehyɛlɛ ne mɔ amuala. Kɛlɛ ɛhye wɔ bɛ nyunlu ɛkɛ, amaa bɛanwu ye mɛla ne nee ngyehyɛlɛ ne mɔ na bɛali zolɛ.

¹²Ɛzonlenlɛ Sua ne anwo mɛla ɛ: Ɔwɔ kɛ boka ne azo ɛleka biala te saanwu, yɛ nwuanzanwuanza.”

¹³ Kɛ azukponle ne kpole si de la ɛne, bɛva nzuzuleɛ ne mɔɔ bɛvale bɛzuzule Ɛzonlenlɛ Sua ne la bɛzuzu: ɔwɔ kɛ ɔ bo ne anwumahɔlɛ yɛ waa nsa (mita foa ko, ye tɛtɛlɛ noko zɔhane ala,) yɛɛ ɔ nloa kɛba ne ɔwɔ kɛ yɛ waa ko nee ekyi. Akee azukponle ne anwumahɔlɛ ɛne:

¹⁴ɔwɔ kɛ ɔvi ɔ bo azɛlɛ nwo mɔɔ dwu ɔ bo kɛba ne anwo la yɛ mita ko. Mɔɔ doa zolɛ la, ɔwɔ kɛ ɔbo alumua ɛdeɛ ne azo waa nsa toonwo ɔbɛnra ɔyia, yɛɛ ɔwɔ kɛ ye anwumahɔlɛ yɛ mita nwiɔ. Mɔɔ tɔ zolɛ nsa la, ɔdaye ɔwɔ kɛ ɔbo avinli ɛdeɛ ne azo waa nsa toonwo ɔbɛnra ɔyia.

¹⁵Kɛba ɛhye mɔɔ tɔ zolɛ nsa la azo yɛɛ bɛbayela azubɔdeɛ ne mɔ a. Ye anwumahɔlɛ ɔwɔ kɛ yɛ mita nwiɔ. Ye mgbɛnezo kpokpɔkoo nna ne mɔ ɔwɔ kɛ kɔ anwuma tɛla azukponle ne azo ne.

¹⁶Ɔwɔ kɛ azukponle ne tendenle nee ye tɛtɛlɛ sɛ; ye tendenle ɛyɛ mita nsia yɛɛ ye tɛtɛlɛ noko zɔhane ala.

¹⁷Avinli kɛba ne noko tendenle nee ye tɛtɛlɛ sɛ; ko biala le mita nsuu, na bɛdo ɔ nloa kɛba mɔɔ ye tɛtɛlɛ le waa ko nee ekyi la bɛyia. (Ɔ bo aze kɛba ne anu tɛtɛlɛ le waa nsa.) Kpolike mɔɔ bɛfo zolɛ bɛkɔ azukponle ne azo la wɔ ye aduduleɛ afoa nu.

¹⁸Ɛdɛnkɛma zele me kɛ, “Sonla ra, tie mɔɔ medame Awulae Nyamenle, meka meahile wɔ la. Ngyehyɛlɛ mɔɔ wɔ azukponle ne anwo la ɛne: Kenle mɔɔ bɛkɛwie ye si kɛ akee bɛbɔ ɛyelalɛ azu wɔ zolɛ, na bɛado mogya bɛagua nwolɛ la,

¹⁹bɛva ɛnlankɛ nyinli ko bɛmaa Livaema mɔɔ le Zeedɔko abo zo amra, mɔɔ bɛmɛ a bɛba me nyunlu la, bɛmaa bɛva bɛyɛ ɛtane azubɔdeɛ.

²⁰Bɛbava ye mogya ne bie bɛapepe azukponle ne abati kpokpɔkoo nna ne mɔ azo, ye kɛba ne ayia nna ne azo nee ɔ nloa kɛba ne azo amuala. Bɛyɛ ɛhye bɛmaa azukponle ne anwo ɛde, na bɛyɛ mgbɔdalɛ nzɛlɛlɛ bɛdu azukponle ne bɛmaa me.

²¹Akee bɛbava ɛnlankɛ nyinli mɔɔ bɛfa bɛayɛ ɛtane azubɔdeɛ ne la bɛado ɛleka mɔɔ bɛkɛhile wɔ Ɛzonlenlɛ Sua ne anzi lɔ, ɛleka mɔɔ ɛmbikye Ɛleka Nwuanzanwuanza ne la na bɛayela ye.

²²Ye alehyenlɛ nu bɛva abɔnkye mɔɔ ɔ nwo ɛnlɛ dɛne la bɛyɛ ɛtane azubɔdeɛ, bɛva bɛde azukponle ne anwo, kɛmɔ bɛvale ɛnlankɛ nyinli ne bɛyɛle la.

²³Saa bɛwie ɛhye mɔ yɛ a, akee bɛva ɛnlankɛ nyinli nee boane nyinli mɔɔ biala anwo ɛnlɛ dɛne la bɛbɔ azu.

²⁴Bɛva bɛ bɛrɛla Ɛdɛnkɛma anyunlu na sɛlɛvolɛma ne ɛkponde ngyenle bɛ nwo zo na bɛva bɛbɔ ɛyelalɛ azu bɛmaa Ɛdɛnkɛma.

²⁵Bɛbava abɔnkye bɛabɔ ɛtane azu kenle ko biala toonwo kenle nsuu. Eza ɔwɔ kɛ bɛfa boane nyinli nee ɛnlankɛ nyinli bɛbɔ azu.

²⁶Bɛva kenle nsuu ɛhye bɛyɛ mgbɔdalɛ nzɛlɛlɛ na bɛde azukponle ne anwo, bɛdu bɛmaa me.

²⁷ Saa kenle nsuu ne wie a, ɔvi ye kenle mɔtwɛ ne azo mɔɔ kɔ la, sɛlɛvolɛma ne akee babɔ menli ne ɛyelalɛ azu nee anzonudwolɛ azu ne mɔ. Na mebalie bɛ meado nu. Medame, Awulae Nyamenle a mese a.”