Read Nzema Yiz 44 Bible Online

Yiz 44 - Nzema bible

Yiz 44

¹Nrenya ne akee vale me rale Ɛzonlenlɛ Sua ne findezo anlenkɛ kpole ne mɔɔ kɔne aduduleɛ la anloa. Ɛnee bɛdo nuhua.

²Na Ɔzele me kɛ, “Anlenkɛ ɛhye, ɔnle kɛ bɛtukue; dahuu ɔwɔ kɛ ɔboa nyinlira nu, yɛɛ ɔnle kɛ awie biala fa nu, ɔluakɛ Ɛdɛnkɛma, Yizilayɛ Nyamenle ne, ɛva nuhua. Yemɔti ɔwɔ kɛ ɔboa nyinlira nu.

³Belemgbunli ne ala a ɔwɔ kɛ kɔtɛnla nu di debie wɔ Ɛdɛnkɛma anyunlu a. Ɔwɔ kɛ ɔfa anlenkɛ kpole ne sua kpandaanwo ne mɔɔ wɔ Ɛzonlenlɛ Sua ne akunlu la anu a ɔkɔ, na eza ɔsia ɔ nzi a.”

⁴Akee nrenya ne vale me luale Ɛzonlenlɛ Sua ne sɔlɔ anlenkɛ kpole ne anu rale sua ne anyunlu. Memanle me nye zo la, menwunle kɛ Ɛdɛnkɛma anyunlunyia ne ɛyi Ɛdɛnkɛma Ɛzonlenlɛ Sua ne tɛkɛɛ. Membutule mutule nu.

⁵Na Ɛdɛnkɛma zele me kɛ, “Sonla ra, fa ɛ nye nea debie kpalɛ, na gyele ɛ nzo tie mɔɔ meka meahile wɔ, mɔɔ fane ngyehyɛlɛ nee mɛla mɔɔ wɔ Ɛdɛnkɛma Ɛzonlenlɛ Sua ye anwo la amuala. Nea nwu menli mɔɔ ɔwɔ kɛ bɛmaa bɛ adenle bɛmaa bɛwolo Ɛzonlenlɛ Sua ne anu nee bɛdabɛ mɔɔ ɔnle kɛ bɛkɔ Ɛleka Nwuanzanwuanza ne la.

⁶“Ka kile Yizilayɛma atuadelɛma kɛ medame, Awulae Nyamenle, mese: O Yizilayɛma, bɛgyakyi bɛ ninyɛndane ne mɔ ɛyɛlɛ.

⁷Bɛgyakyi kɛ bɛkɛmaa nyɛvolɛ mɔɔ ɛsolo na bɛnze Nyamenle la kɛwolo me Ɛleka Nwuanzanwuanza ne bɛkɛhɔgua ɛkɛ ne evinli wɔ mekɛ mɔɔ bɛfa me aleɛ, nane ɛnlome nee mogya ne bɛarɛlɛ me la. Bɛyɛ ɛhye bɛtulu me ngyekyeleɛ ne bɛboka bɛ ninyɛndane bebelebe ne mɔ mɔɔ bɛyɛ la anwo.

⁸Bɛannea me ninyɛne nwuanzanwuanza ne mɔ boɛ, na bɛva nyɛvolɛ kɛ bɛmɛ yɛɛ akee bɛnlea ninyɛne mɔɔ wɔ me Ɛleka Nwuanzanwuanza ne la azo a.

⁹“Yemɔti medame Awulae Nyamenle, mese: Ɛyɛvolɛ biala mɔɔ ɛnze Nyamenle na yesolo, ɛyɛvolɛ biala mɔɔ wɔ Yizilayɛ maanle ne anu la, ɛnle kɛ kɔ me Ɛleka Nwuanzanwuanza ne.”

¹⁰Akee Ɛdɛnkɛma zele me kɛ, “Livaema noko mɔɔ lile awozonlezonlenlɛ nzi, bɛhwenle bɛ nwo bɛvile me nwo, wɔ mekɛ mɔɔ Yizilayɛma minlinle la, mebadea bɛ.

¹¹Bɛ gyima mɔɔ bɛbayɛ wɔ me ɛleka nwuanzanwuanza ne la a le kɛ bɛkɛzinza Ɛzonlenlɛ Sua ne nlenkɛ mgbole ne mɔ; bɛbahu nane mɔɔ menli ne kɛva kɛra kɛ bɛva bɛbɔ azu nee ɛyelalɛ azu la. Bɛbanlea na bɛaboa menli ne.

¹²Kɛmɔ bɛboale menli ne wɔ bɛ mmonle ɛzonlenlɛ nu, na bɛmanle Yizilayɛma dule koti bɛyɛle ɛtane la, medame Awulae Nyamenle, meka, meka kɛ, bɛ munzule doa bɛ.

¹³Bɛnlɛ adenle bɛmbikye me, bɛnzonle me kɛ bɛle sɛlɛvolɛma, yɛɛ bɛnrɛbikye me ninyɛne ne mɔ mɔɔ anwo te nee mɔɔ le nwuanzanwuanza kpalɛ la. Bɛ anyiemgba doa bɛ wɔ bɛ ninyɛndane ne mɔ mɔɔ bɛyɛle la ati.

¹⁴Noko mebava bɛ meamaa bɛazinza Ɛzonlenlɛ Sua ne, bɛayɛ nwolɛ gyima biala nee gyima biala mɔɔ ɔwɔ kɛ bɛyɛ wɔ nu la.”

¹⁵Awulae Nyamenle zele me kɛ, “Livaema sɛlɛvolɛma mɔɔ le Zeedɔko abo zo amra la yɛɛ bara me nyunlu arazonle me a. Bɛmɛ yɛɛ bɛbarazonle me na bɛava nane ɛnlome nee mogya bɛabɔ azu bɛamaa me a, ɔluakɛ bɛmɛ a bɛgyinlanle bɛnleanle me Ɛzonlenlɛ Sua ne azo, bɛlile nɔhalɛ bɛmanle me wɔ mekɛ mɔɔ Yizilayɛma hakyile bɛ nzi zile me la a.

¹⁶Bɛmɛ a bɛbawolo me ɛleka nwuanzanwuanza ne, na bɛahɔ me azukponle ne anwo bɛahɔbɔ azu, na bɛanlea me ɛzonlenlɛ zo wɔ Ɛzonlenlɛ Sua ne anu a.

¹⁷ Saa bɛkawolo Ɛzonlenlɛ Sua ne akunlu alie nwo ɛkɛ ne na bɛdwu ye anlenkɛ kpole ne anu a, bɛbawula lenen adɛladeɛ. Bɛnrɛwula mboane enrinli debie biala wɔ mekɛ mɔɔ bɛlɛsonle wɔ ɔ kunlu alie nwo ɛkɛ ne anlenkɛ kpole ne anloa, anzɛɛ alie ne anwo la.

¹⁸Bɛbabɔ lenen ɛdanlɛ abɔtile na bɛawula lenen ɛdanlɛ ‘nikabuka’; ɔnle kɛ bɛwula debie biala mɔɔ kɛmaa ɛhɛnlɛnra kɛdu bɛ la.

¹⁹ Na saa bɛkɔ menli ne anwo ɛkɛ ne wɔ findezo alie nwo ɛkɛ ne a, bɛbaye adɛladeɛ ne mɔ mɔɔ bɛwulale bɛzonlenle me la bɛagua ekpumgbunli nwuanzanwuanza ne mɔ anu. Bɛbava adɛladeɛ gyɛne bɛawula, amaa bɛanlua bɛ adɛladeɛ ne mɔ azo bɛanva nwuanzanwuanzayɛlɛ bɛangɔmaa menli ne.

²⁰ “Ɔnle kɛ sɛlɛvolɛ biala kpa ɔ ti yɛɛ ɔnle kɛ ɔmaa ɔ ti enrinli ne nyi yɛ ndendenle; bɛbafefa bɛ ti enrinli ne azo ala.

²¹ Ɔnle kɛ sɛlɛvolɛ biala no nza na yeahɔwolo Ɛzonlenlɛ Sua ne akunlu lɔ.

²² Ɔnle kɛ sɛlɛvolɛ gya kunlanvolɛ anzɛɛ raalɛ mɔɔ ɛbɔ ewole la. Ɔwɔ kɛ sɛlɛvolɛ biala gya raalɛ mɔɔ ɛnze nrenya fee na ɔle Yizilayɛnli la anzɛɛ kunlanvolɛ raalɛ mɔɔ ɛnee ɔ hu le sɛlɛvolɛ la.

²³ “Ɔwɔ kɛ bɛkilehile me menli ne ngakyile mɔɔ wɔ debie mɔɔ le nwuanzanwuanza nee debie mɔɔ ɛnle nwuanzanwuanza la anu, na bɛkilehile bɛ bɛmaa bɛnwu debie mɔɔ anwo te nee debie mɔɔ anwo ɛnde la.

²⁴Saa kpolera si a, sɛlɛvolɛma ne bayɛ ndɛnebuavolɛma na bɛabua edwɛkɛ ne, kɛmɔ me mɛla ne se la. Bɛbali me mɛla nee me ngyehyɛlɛ ne mɔ azo, na bɛazie me ɛvoyia ne mɔ nee me Ɛnwomenlelielɛ Kenle ne mɔ nwuanzanwuanza.

²⁵ “Sɛlɛvolɛ biala ɛngɔ funli nwo ɔmmaa evinli ɛnga ye; noko akee saa ɔ ze anzɛɛ ɔ nli, ɔ ra nrenya anzɛɛ ɔ ra raalɛ, ɔ diema nrenya anzɛɛ ɔ diema raalɛ mɔɔ ɛtɛkɔle agyalɛ la wu a, ɔkola ɔmaa evinli ka ye.

²⁶Saa evinli ka ye a, ɔwɔ kɛ ɔnyia kenle nsuu na ɔ nwo evinli ne adu.

²⁷Saa ɔtu evinli ne ɔwie, na kenle mɔɔ ɔlɛkɔ Ɛleka Nwuanzanwuanza ne wɔ Ɛzonlenlɛ Sua ne akunlu lɔ yeahɔzonle la, ɔwɔ kɛ ɔfa ɛtane azubɔdeɛ ɔbɔ azu. Medame, Awulae Nyamenle a mese a.

²⁸ “Sɛlɛvolɛ ne ɛnlɛ agyadeɛ biala, medame a mele bɛ agyadeɛ a. Ɔnle kɛ bɛnyia agyadeɛ wɔ Yizilayɛ.

²⁹ Bɛbali ma azubɔdeɛ, ɛtane azubɔdeɛ, nee abozozielɛ azubɔdeɛ ne mɔ; debie biala noko mɔɔ bɛdu bɛmaa Nyamenle wɔ Yizilayɛ maanle ne anu la le bɛ ɛdeɛ.

³⁰Ma ngakyile mɔɔ bɛkɛlumua bɛkɛde anzɛɛ bɛkɛbu, yɛɛ menli ne azubɔdeɛ ngakyile ne mɔ amuala le sɛlɛvolɛma ne ɛdeɛ. Eza ɔwɔ kɛ bɛfa bɛ mɛtɛkɛ mɔɔ lumua la bɛbɛlɛ sɛlɛvolɛma ne, amaa nyilalɛ aha bɛ awuke ne mɔ.

³¹ Ɔnle kɛ sɛlɛvolɛma ne di debie biala, nane o, anloma o, mɔɔ ɔdaye ɔ ngome ɔkɛwu anzɛɛ bɛkɛtete ye nu bɛkɛhu ye la.