Read Nzema Yiz 45 Bible Online

Yiz 45 - Nzema bible

Yiz 45

¹“Saa ɛkyɛ azɛlɛ ne ɛmaa abusua ekpunli biala nyia ye afoa nu ɛdeɛ a, akee gya azɛlɛ ne bie kpole mɔɔ ye tendenle le kilomita bulu nee nwiɔ nee foa ko na ye tɛtɛlɛ le kilomita bulu la maa Ɛdɛnkɛma; azɛlɛ zɔhane bayɛ azɛlɛ nwuanzanwuanza.

²Pɛ azɛlɛ mɔɔ ye tɛtɛlɛ le mita ɛya nwiɔ abulanlu, na ye tendenle noko zɔhane ala la wɔ azɛlɛ ɛhye avinli maa Ɛzonlenlɛ Sua ne; maa ɛleka wienyi mɔɔ ye tɛtɛlɛ le mita abulanwiɔ nee nnu la ɛla nwolɛ ɛyia.

³Akee kyɛ azɛlɛ ne anu nwiɔ mɔɔ foa ko tendenle le kilomita bulu nee nwiɔ nee foa ko, ye tɛtɛlɛ le kilomita nnu la maa sɛlɛvolɛma ne. Azɛlɛ foa ko ɛhye azo yɛɛ Ɛzonlenlɛ Sua ne bagyinla a; ɔle ɛleka nwuanzanwuanza kpole kpalɛ. Ɛkɛ ne a le maanle ne anu ɛleka nwuanzanwuanza a, yɛɛ ɛkɛ ne a sɛlɛvolɛma mɔɔ sonle Ɛdɛnkɛma wɔ Ɛzonlenlɛ Sua ne anu la badɛnla a. Bɛbasisi bɛ azua wɔ ɛkɛ na bɛazi Ɛzonlenlɛ Sua ne noko wɔ azɛlɛ zɔhane azo.

⁵Livaema a badɛnla azɛlɛ sinli ne mɔɔ ɛha la azo a. Bɛmɛ a bɛbayɛ gyima wɔ Ɛzonlenlɛ Sua ne anu a, yemɔti bɛbasisi bɛ azua, bɛakyekye azuamgbole nee azua ngyikyi wɔ azɛlɛ zɔhane azo na bɛadɛnla zolɛ.

⁶“Eza pɛ azɛlɛ mɔɔ ye tendenle le kilomita bulu nee nwiɔ nee foa ko, na ye tɛtɛlɛ le kilomita nwiɔ nee foa ko la sua azɛlɛ nwuanzanwuanza ne, na kyekye suakpole ko wɔ ɛkɛ maa Yizilayɛma kɔsɔɔti. Yizilayɛnli biala kola batɛnla ɛkɛ.

⁷“Azɛlɛ ne mɔɔ la azɛlɛ nwuanzanwuanza ne nee suakpole ne anyunlu nee ɔ nzi la le belemgbunli ne ɛdeɛ. Azɛlɛ nwuanzanwuanza ne adɔleɛ afoa nu, ɔbɔ ɔ bo wɔ azɛlɛ ne ɛweɛne zo ɔkɔ adɔleɛ, ɔkɔgua ye wɔ Mɛdetɛlenia Nyevile ne anloa. Ye aduduleɛ afoa nu noko bɔ ɔ bo wɔ azɛlɛ ne ɛweɛne zo ɔkɔgua ye maanle ne ɛweɛne zo. Ɛhye kile kɛ azɛlɛ ne tendenle nee azɛlɛ mɔɔ bɛhyɛ bɛmaa Yizilayɛ mbusua ekpunli ekpunli ne mɔ anu ko biala la sɛ.

⁸Azɛlɛ ɛhye bayɛ belemgbunli ne agyadeɛ, amaa me arelemgbunli ne mɔ ansisi me menli ne mɔ bieko, na bɛamaa Yizilayɛma anyia bɛ agyadeɛ ne mɔ, kɛmɔ bɛ mbusua ekpunli ekpunli ne mɔ de la.”

⁹Awulae Nyamenle ne zele me kɛ, “Bɛdabɛ Yizilayɛ arelemgbunli, yeyɛ boɛ! Bɛgyakyi konle nee nzisililɛ, na bɛli pɛlepɛle nee nɔhalɛ. Bɛmmatu me menli ne bɛfi bɛ azɛlɛ ne mɔ azo bieko. Medame, Awulae Nyamenle a mese a.

¹⁰ “Ɔwɔ kɛ bɛ nzuzudeɛ ne mɔ amuala yɛ pɛpɛ:

¹¹“Yifa ne mɔɔ bɛfa bɛsuzu ninyɛne anwo resee la, ɔwɔ kɛ nee ‘baate’ ne mɔ mɔɔ bɛfa bɛsuzu nzule nee nwole la yɛ pɛpɛ. Bɛsuzu a, ɔwɔ kɛ bɛ muala bɛgyinla nzuzuleɛ ‘homɛ’[9] azo. Yemɔti nzuzuleɛ ne bayɛ zɛ: Homɛ ko le yifa bulu anzɛɛ baate bulu.

¹²“Ɔwɔ kɛ bɛ nzuzudeɛ ne mɔ yɛ zɛhae: Gilaa abulanwiɔ le hyikɛle[10] ko. Hyikɛle abulasia le mena ko.

¹³“Akee azubɔdeɛ mɔɔ ɔwɔ kɛ bɛfa bɛba la ɛne: Hwiiti: Wɔ bɛyɔba ne ngyɛnu abulasia, ɛkpɔ ko Baale: Wɔ bɛyɔba ne ngyɛnu abulasia, ɛkpɔ ko. Ɔlivi nwole: ngyɛnu ɛya ko, ɛkpɔ ko (Bɛva baate ne bɛzuzu: Baate bulu le homɛ ko anzɛɛ kɔɔ ko). Mboane: mboane ɛya nwiɔ biala anu boane ko. “Bɛ ma azubɔdeɛ, ɛyelalɛ azubɔdeɛ, nee anzonudwolɛ azubɔdeɛ mɔɔ ɔwɔ kɛ bɛfa bɛba, na bɛyɛ mgbɔdalɛ nzɛlɛlɛ bɛmaa bɛ la ɛne. Kɛ medame, Awulae Nyamenle, mese la ɛne.

¹⁶“Menli mɔɔ wɔ maanle ne anu la amuala bava azubɔdeɛ ɛhye mɔ amaa Yizilayɛ belemgbunli ne.

¹⁷Ɔle belemgbunli ne gyima kɛ ɔwɔ kɛ ɔfa ɛyelalɛ azubɔdeɛ ne mɔ, ma azubɔdeɛ ne mɔ nee nza azubɔdeɛ ne mɔ ɔmaa, wɔ ɛvoyia ne mɔ ɛlilɛ nu. Ɛvoyia ne mɔ a le Siane fofolɛ nee Ɛnwomenlelielɛ Kenle ne mɔ, nee ɛvoyia mɔɔ ɛha mɔɔ Yizilayɛma di la. Ɔwɔ kɛ ɔfa ɛtane azubɔdeɛ ne mɔ, ma azubɔdeɛ ne mɔ, ɛyelalɛ azubɔdeɛ ne mɔ nee anzonudwolɛ azubɔdeɛ ne mɔ ɔmaa na bɛfa bɛyɛ Yizilayɛma ati mgbɔdalɛ nzɛlɛlɛ.”

¹⁸Awulae Nyamenle ne se, “Siane ne mɔɔ lumua la, kenle ne mɔɔ lumua la azo, ɔwɔ kɛ bɛfa ɛnlankɛ nyinli ko mɔɔ anwo ɛnlɛ dɛne la bɛnua Ɛzonlenlɛ Sua ne.

¹⁹Sɛlɛvolɛ ne bava ɛtane azubɔdeɛ mogya ne bie apepe Ɛzonlenlɛ Sua ne nlenkɛ ne mɔ felɛmo ne mɔ anwo, azukponle ne abati kpokpɔkoo ne mɔ azo, yɛɛ Ɛzonlenlɛ Sua ne akunlu alie nwo ɛkɛ ne anuhɔlɛ ne felɛmo ne mɔ anwo.

²⁰Siane ne anu kenle nsuu ne azo, ɔwɔ kɛ bɛyɛ zɔhane ala bɛmaa awie biala mɔɔ ɔlua nvonleɛ zo ɔyɛle ɛtane anzɛɛ ɔ nye ɛnla nwolɛ na ɔyɛle ɛtane la. Ɛhye yɛɛ bɛbayɛ bɛayɛ mgbɔdalɛ nzɛlɛlɛ bɛamaa Ɛzonlenlɛ Sua ne a.

²¹ “Siane ne mɔɔ lumua la, ye kenle bulu nee nna ne azo yɛɛ bɛbali Akpabɛnwo Ɛvoyia ne a. Bɛnrɛli kpanwo mɔɔ mgbɔvonle wɔ nu la toonwo kenle nsuu.

²²Kenle ko zɔhane, belemgbunli ne babɔ ɔdaye nee Yizilayɛma kɔsɔɔti ati ava ɛnlankɛ nyinli edonraa ko ayɛ ɛtane azubɔdeɛ.

²³Kenle nsuu ne amuala mɔɔ ɛnee bɛlɛdi ɛvoyia ne la, belemgbunli ne bava nlankɛ ndonrandonra nsuu, mboane nyinli nsuu mɔɔ biala anwo ɛnlɛ dɛne la yeamaa bɛabɔ ɛyelalɛ azu. Eza kenle ko biala ɔbava abɔnkye nyinli ko yeayɛ ɛtane azubɔdeɛ.

²⁴Ɛnlankɛ ko nee boane ko biala mɔɔ bɛbahu ye la, ɔwɔ kɛ bɛnyia nwolɛ ma azubɔdeɛ mɔɔ ɛsuzu a ɔndwu litili bulu nee nsuu nee foa ko yɛɛ nwole litili nsa.

²⁵ “Siane nsuu ne, ye kenle bulu nee nnu ne azo mɔɔ bɛbɔ Kpɔda Bo Ɛdɛnlanlɛ Ɛvoyia ne ɛlilɛ bo la, ɔdaye noko ɔbayɛ zɔhane ala toonwo kenle nsuu ne adwu. Ɔwɔ kɛ ɔsesa ninyɛne zɔhane ala ɔmaa bɛbɔ ɛtane azu, ɛyelalɛ azu, yɛɛ ma azu ne mɔ, na ɔfa nwolɛ nwole noko ɔboka nwo.”