Read Nzema Yiz 46 Bible Online

Yiz 46 - Nzema bible

Yiz 46

¹Awulae Nyamenle ne se, “Ɔwɔ kɛ Ɛzonlenlɛ Sua ne akunlu lɔ alie nwo anlenkɛ kpole ne mɔɔ di kɔ aduduleɛ la boa nyinlira nu wɔ kenle nsia ne mɔɔ bɛfa bɛyɛ gyima la anu. Bɛbuke ye wɔ Ɛnwomenlelielɛ Kenle ne yɛɛ Siane Fofolɛ Ɛvoyia kenle ne.

²Belemgbunli ne bava Ɛzonlenlɛ Sua ne findezo alie nwo ɛkɛ, alua anlenkɛ kpole ne anu aragyinla ye sua kpandaanwo ne anu wɔ Ɛzonlenlɛ Sua ne akunlu lɔ alie ne anwo anlenkɛ felɛmo ne anwo, na yeanlea sɛlɛvolɛma ne wɔ mekɛ mɔɔ bɛlɛbɔ ye ɛyelalɛ nee anzonudwolɛ azu ne mɔ la. Ɔbayɛ ye nzɛlɛlɛ ɛdeɛ ne wɔ anlenkɛ ne anloa ɛkɛ. Ɔwie a, ɔbazia ɔ nzi yeavinde yeahɔ, noko ɔnle kɛ bɛto anlenkɛ ne anu toonwo nɔsolɛ.

³Ɛnwomenlelielɛ Kenle ne nee Siane Fofolɛ Ɛvoyia ne mɔ, menli ne amuala bazonle Ɛdɛnkɛma wɔ anlenkɛ kpole ɛhye anyunlu.

⁴“Ɛyelalɛ azubɔdeɛ mɔɔ ɔwɔ kɛ belemgbunli ne fa wɔ Ɛnwomenlelielɛ Kenle biala la le mboane ndonrandonra nsia yɛɛ boane nyinli ko mɔɔ anwo ɛnlɛ dɛne la,

⁵yɛɛ ma azubɔdeɛ mɔɔ ɔfa yeaboka boane nyinli ne anwo la le litili bulu nee nsuu nee foa ko, yɛɛ dodo biala mɔɔ ɔkɛhola ye fa boka boane ralɛ ko biala anwo la. Ma azubɔdeɛ biala mɔɔ le zɛhae la, ɔwɔ kɛ ɔfa ɔlivi nwole litili nsa ɔboka nwolɛ.

⁶Saa Siane Fofolɛ Ɛvoyia ne dwu a, ɔbava ɛnlankɛ nyinli ko mɔɔ anwo ɛnlɛ dɛne la, mboane ndonrandonra nsia, yɛɛ boane nyinli ko, mɔɔ anwo ɛnlɛ dɛne la;

⁷ɔbava ma azubɔdeɛ mɔɔ ɛsuzu a ɔdwu litili bulu nee nsuu nee foa ko la yeaboka ɛnlankɛ nyinli ko biala anwo, yɛɛ dodo biala mɔɔ ɔdaye ɔkɛhola ye fa la yeaboka boane edonraa ko biala anwo, na yeava nwole litili nsa yeaboka azubɔdeɛ ko biala anwo.

⁸Saa belemgbunli ne ɛlɛkɔ nuhua a, ɔbava anuhɔlɛ ne anu yeahɔ sua kpandaanwo ne anu, ɔlɛfinde noko a, ɛkɛ ne a ɔbava a.

⁹“Saa menli ne ba ɛvoyialilɛ ne mɔ bie kɛ bɛbazonle Ɛdɛnkɛma a, mɔɔ kɛlua sɔlɔ anlenkɛ kpole ne anu kɛwolo la, ɔsia ɔ nzi noko a, ɔwɔ kɛ ɔdua nyiakɛ anlenkɛ kpole ne anu a ɔfinde a, yɛɛ mɔɔ kɛva nyiakɛ anlenkɛ kpole ne anu kɛwolo la, ɔwɔ kɛ ɔdua sɔlɔ anlenkɛ kpole ne anu a ɔfinde a. Ɔnle kɛ awie ko biala dua ɔ bo zo ne mɔɔ ɔvale ɔrale Ɛzonlenlɛ Sua ne anu la finde. Ɔwɔ kɛ bɛdua bɛ nyunlu fɔɔnwo a bɛfinde a.

¹⁰Saa bɛlɛkɔ ɛkɛ ne a, ɔwɔ kɛ belemgbunli ne nee bɛ a kɔ a, yɛɛ saa bɛlɛfinde a, ɔwɔ kɛ belemgbunli ne nee bɛ a finde a.

¹¹Wɔ ɛvoyia ne mɔ ɛlilɛ nu nee ɛlobɔ ne mɔ anloa ma azubɔdeɛ ne mɔ, ɔwɔ kɛ ɔyɛ ɛnlankɛ nyinli ko biala, ma litili bulu nee nsuu nee foa ko, boane nyinli ko biala, ma litili bulu nee nsuu nee foa ko, yɛɛ mboane ndonrandonra ne mɔ, yemɔ ma dodo biala mɔɔ bɛkɛhola ye fa la, yɛɛ ma azubɔdeɛ biala, ɔwɔ kɛ bɛfa nwole litili nsa bɛboka nwolɛ.

¹²“Saa belemgbunli ɛlɛfa azubɔdeɛ mɔɔ ɔdaye yekpɔla ɔ kunlu yeva la arɛlɛ Ɛdɛnkɛma, saa ɛyelalɛ azubɔdeɛ o, saa anzonudwolɛ azubɔdeɛ o, ɔwɔ kɛ bɛbuke aduduleɛ anlenkɛ kpole ne bɛmaa ye. Ɔbava ye ɛyelalɛ azubɔdeɛ ne anzɛɛ ye anzonudwolɛ azubɔdeɛ ne yeamaa, kɛmɔ ɔyɛ ye wɔ Ɛnwomenlelielɛ Kenle ne la. Ɔwie a akee yeavinde na bɛado anlenkɛ kpole ne anu.”

¹³Ɛdɛnkɛma zele kɛ, “Nwonlomɔ biala belemgbunli ne bava boane edonraa ko yeamaa bɛayela ye bɛabɔ azu bɛamaa Ɛdɛnkɛma.

¹⁴Ɔwɔ kɛ ɔfa ma azubɔdeɛ ɔboka nwolɛ, ɛsuzu a ɔwɔ kɛ ɔto kilo nwiɔ. Eza ɔwɔ kɛ ɔfa nwole litili ko ɔmaa bɛfete esamo ne kɛ ma azubɔdeɛ bɛmaa Ɛdɛnkɛma. Ɛhye le mɛla mɔɔ bɛngakyi ye ɛlɛ wɔ ɛyelalɛ azubɔdeɛ nwo a.

¹⁵Ɔwɔ kɛ bɛfa boane ne, ɛdɔkɛ azubɔdeɛ ne, nee nwole ne bɛbɔ azu bɛmaa Ɛdɛnkɛma.”

¹⁶Awulae Nyamenle ne se, “Saa belemgbunli fa ye agyadeɛ bie kyɛ ɔ mra mrenya ne mɔ bie a, ɔle ralɛ nrenya ne ɛdeɛ, ɔle ye agyadeɛ.

¹⁷ Na saa ɔfa ye agyadeɛ bie ɔmaa ye sonvolɛma ne mɔ bie a, agyadeɛ ne le ye ɛdeɛ kɔkpula Fanwodi Ɛvoyia[11] ne kolaa na belemgbunli ne azia alie ye agyadeɛ ne. Mralɛ mrenya ne mɔ ala yɛɛ ahyɛlɛdeɛ mɔɔ vi belemgbunli ne agyadeɛ nu la le bɛ ɛdeɛ bɔkɔɔ a.

¹⁸Ɔnle kɛ belemgbunli ne fa maanlema agyadeɛ maa ɔ mra mrenya, na ɔdie agyadeɛ ne ɔfi maanlema asa anu bɔkɔɔ. Ɔmaa ɔ mra mrenya agyadeɛ a, ɔwɔ kɛ ɔfi ɔdaye ɔ ti anwo ye agyadeɛ nu, amaa yeamba ye kɛ yeza me menli ne bie yelie ye agyadeɛ.”

¹⁹Akee nrenya ne vale me luale anuhɔlɛ ne mɔɔ wɔ anlenkɛ kpole ne foa ko la anu, na yɛhɔle sɛlɛvolɛma ekpumgbunli nwuanzanwuanza ne mɔ mɔɔ solo sɔlɔ afoa nu, la anwo. Menwunle ɛleka bie wɔ azua zɔhane mɔ adɔleɛ kpalɛ kpalɛ,

²⁰na ɔzele me kɛ, “Ɛke a sɛlɛvolɛma ne bado ɛtane azubɔdeɛ ne nee abozozielɛ azubɔdeɛ ne mɔ a; ɛke a bɛbado ma azubɔdeɛ ne mɔ a, amaa bɛanva bɛanvinde Ɛzonlenlɛ Sua ne findezo alie nwo ɛkɛ, na bɛava nwuanzanwuanzayɛlɛ bɛaha menli ne.”

²¹Akee nrenya ne vale me rale findezo alie nwo ɛkɛ na ɔvale me ɔhɔle ye muleɛ nna ne mɔ azo. Muleɛ ko biala azo bɛhyehyɛ ɛleka mɔɔ ye tendenle le mita abulanwiɔ na ye tɛtɛlɛ le mita bulu nee nnu la wɔ ɛkɛ. Bɛ muala bɛsɛ mgbole.

²³Bɛlie ko biala anwo bane na bɛsisi mokyea wɔ nuhua toonwo yeyia.

²⁴Na ɔzele me kɛ, “Ɛhye mɔ a le egyaade ne mɔ mɔɔ bɛdabɛ mɔɔ bɛyɛ gyima wɔ Ɛzonlenlɛ Sua ne anu la bado menli ne azubɔdeɛ ne mɔ a.”