Read Nzema Yiz 47 Bible Online

Yiz 47 - Nzema bible

Yiz 47

¹ Akee nrenya ne vale me ziale rale Ɛzonlenlɛ Sua ne anlenkɛ kpole ne anwo. Na menwunle kɛ nzule vi anuhɔlɛ ne abo se kɔ aduduleɛ, ɔluakɛ Ɛzonlenlɛ Sua ne anye kɔne aduduleɛ afoa nu. Nzule ne vi Ɛzonlenlɛ Sua ne anuhɔlɛ ne abo, wɔ ye nyiakɛ afoa nu, wɔ azukponle ne nyiakɛ a senze a.

²Akee ɔvale me ɔluale sɔlɔ anlenkɛ kpole ne anu ɔvindele, na ɔlile me nyunlu wɔ alie nwo nehane na yɛrale Ɛzonlenlɛ Sua ne findezo anlenkɛ kpole ne anloa, ɔ nye kɔne aduduleɛ yɛɛ azule ne senze vi ye nyiakɛ afoa nu.

³Nrenya ne zuzule azule ne mita ɛya nnu hɔle ye nyiakɛ, na akee ɔzele me kɛ menwudwu mempɛ; ɔlile me nyunlu, na ɛnee azule ne kuma monla me gyakɛ taboa.

⁴Eza ɔzuzule azule ne mita ɛya nnu bieko, na azule ne lile me gyakɛ kpɔkɛ. Eza ɔzuzule mita ɛya nnu ɔzɔle zolɛ, na azule ne lile me bo.

⁵Ɔzuzule mita ɛya nnu bieko la meangola azule ne wudwu pɛ, ɔluakɛ ɛnee akee azule ne ɛyi; yeyi bonrabonra mɔɔ kyesɛ bɛweɛ na bɛapɛ, bɛngola bɛnwudwu bɛmpɛ.

⁶Na ɔzele me kɛ, “Sonla ra, wɔnwu ɛhye ɔ?” Akee ɔvale me ɔsianenle azule ne anloa na yɛziale yɛ nzi.

⁷Menziale mɔɔ mekɔ la, menwunle kɛ mbaka dɔɔnwo wɔ azule ne anloa foa ko nee foa ko.

⁸Na nrenya ne zele me kɛ, “Azule ɛhye se kɔ aduduleɛ maanzinli ne anu na ɔdwu Dwɔdan Bɔnza, ɔkɔgua Nyevile Wulera ne anu, ɔmaa nzule mɔɔ wɔ zɔhane azule ne anu la yɛ nzukpa.

⁹Saa azule ne se gua Nyevile Wulera ne anu a, ɔbamaa tease abɔdeɛ biala mɔɔ wɔ azule ne anu la anyia ngoane. Na fɛlɛ dɔɔnwo bara azule ne anu, ɔluakɛ azule ɛhye kɔ ɛkɛ, amaa azule ne ayɛ nzukpa. Yemɔti ɛleka biala mɔɔ azule ne se dwu la, ɛkɛ ne debie biala nyia ngoane.

¹⁰Fɛlɛhyelɛma bagyinla nyevile ne anloa; ɔvi Ɛngidae mɔɔ kɔdwu Ɛnɛgeleeyem la bayɛ ɛleka mɔɔ bɛto avonle a. Nuhua fɛlɛ bayɛ ngakyile dɔɔnwo kɛ Mɛdetɛlenia Nyevile ne anu ɛdeɛ ne la.

¹¹Noko ɔ nloa azia ne mɔ anu nzule ɛnrɛyɛ nzukpa. Bɛbaha ɛkɛ na bɛanyia ngyenle bɛavi nu.

¹² Mbaka ngakyile dɔɔnwo bafifi azule ne anloa foa ko nee foa ko mɔɔ bɛ nzoleɛ bayɛ aleɛ bɛdi a. Bɛ nya ɛnrɛnwoso yɛɛ bɛ nzoleɛ ɛnrɛpe. Siane biala bɛbazo ma fofolɛ, ɔboalekɛ bɛ bo nzule ne vi Ɛzonlenlɛ Sua ne anu a senze ba a. Bɛbali bɛ nzoleɛ na bɛava bɛ nya ne bɛayɛ ayile.”

¹³Awulae Nyamenle ne zele me kɛ, “Azɛlɛ ne mɔɔ ɛbahyɛ wɔamaa Yizilayɛ mbusua ekpunli ekpunli bulu nee nwiɔ ne mɔ kɛ ɔle bɛ agyadeɛ la, bɛ ɛweɛne ne mɔ ɛne. Dwosefi banyia ɛkpɔ nwiɔ.[12]

¹⁴Ɔwɔ kɛ ɛkyɛ azɛlɛ ne pɛpɛ. Membɔle ɛwɔkɛ kɛ menwɔva menwɔmaa bɛ ze mɔ, na azɛlɛ ne bayɛ bɛ agyadeɛ bɔkɔɔ.

¹⁵“Azɛlɛ ne ɛweɛne ɛne: Ye ɛbɔ nu afoa nu ɛweɛne ne tenrɛ kɔ aduduleɛ, ɔvi Mɛdetɛlenia Nyevile ne anloa, ɔlua suakpole Hɛtelɔn ɔfinde Heemate Ademgbole zo ɔdwu suakpole Zidade azo,

¹⁶ɔvi ɛkɛ ɔkɔ azuamgbole Bɛlota nee Sabelaem. (Bɛnwu azuamgbole nwiɔ ɛhye wɔ Dɛmasekɛse nee Heemate arelemgbunli maanle ne mɔ anu.) Ɔtele zo ɛke ɔdwu Tekɔn (wɔ Hɔɔlan belemgbunli maanle nu.)

¹⁷Yemɔti azɛlɛ ne ɛbɔ nu afoa nu ɛweɛne ne balua Mɛdetɛlenia Nyevile ne anloa, ahɔ aduduleɛ, yeahɔdwu Yinɔn, ɛnee Dɛmasekɛse nee Heemate maanzinli ne mɔ wɔ ye anwuma. Ɛhye a le ye ɛbɔ nu afoa nu ɛweɛne ne a.

¹⁸“Aduduleɛ ɛweɛne ne wɔne ɔ ti nyiakɛ afoa nu, ɔvi Yinɔn mɔɔ wɔ Dɛmasekɛse nee Hɔɔlan maanzinli ne mɔ avinli, ɔlua Azule Dwɔdan ne anloa, mɔɔ wɔ Geleade nee Yizilayɛ azɛlɛ ne avinli ɔkɔgua ye Teema mɔɔ wɔ Nyevile Wulera ne anloa la.

¹⁹“Nyiakɛ ɛweɛne ne kɔ nyiakɛ-adɔleɛ afoa nu, ɔvi Teema ɔkɔdwu Keedɛhye mɛtɛlɛmɛtɛlɛ ne mɔ anu, na ɔwɔne ɔ ti adɔleɛ-ɛbɔnu, ɔlua Yigyibiti ɛweɛne zo ɔkɔgua ye Mɛdetɛlenia Nyevile ne anloa.

²⁰“Adɔleɛ ɛweɛne ne a le Mɛdetɛlenia Nyevile ne ɔkɔdwu ɛleka bie mɔɔ nee Heemate Ademgbolezo bɛ nye bɔ zolɛ la. Ɛhye a le adɔleɛ ɛweɛne ne a.

²¹“Kyɛ azɛlɛ ɛhye maa mbusua ekpunli ekpunli ne mɔ.

²²Kyɛ maa bɛ maa ɔyɛ bɛdabɛ nee nyɛvolɛ mɔɔ de bɛ avinli na bɛwo mralɛ bɛgua bɛ avinli la agyadeɛ bɔkɔɔ. Menli zɔhane bayɛ kɛ Yizilayɛma amra mɔɔ bɛwo bɛ la. Bɛ nee bɛ nee Yizilayɛ mbusua ekpunli ekpunli ne mɔ amuala ɛhyɛ azɛlɛ ne ɛva ɛyɛ bɛ agyadeɛ.

²³Ɛyɛvolɛ biala mɔɔ de abusua ekpunli biala avinli la, ɔwɔ kɛ ɔnyia ɔdaye ɔ ti anwo agyadeɛ. Medame, Awulae Nyamenle a, mese a.”