Read Nzema Yiz 48 Bible Online

Yiz 48 - Nzema bible

Yiz 48

¹Azɛlɛ ne sɔlɔ ɛweɛne ne tenrɛ vi Mɛdetɛlenia Nyevile ne anloa kɔ aduduleɛ afoa nu, ɔkɔ suakpole Hɛtelɔn, ɔlua Heemate Ademgbolezo ɔdwu Yinɔn, ɔkɔkpula ɛweɛne ne mɔɔ la arelemgbunli maanle Dɛmasekɛse nee Heemate avinli la. Ɔwɔ kɛ abusua ekpunli biala nyia azɛlɛ ne bie, ɔvi aduduleɛ ɛweɛne ne azo ɔkɔdwu adɔleɛ, wɔ Mɛdetɛlenia Nyevile ne anloa. Kɛ ɔwɔ kɛ bɛsesa azɛlɛ ne, ɔvi ye sɔlɔ mɔɔ badwu ye nyiakɛ la ɛne. Dan Ahya Nafetalae Manasɛ Yifelaem Wulubɛn Dwuda

⁸Azɛlɛ bieko mɔɔ doa zolɛ la a le azɛlɛ ne mɔɔ bɛboɔboa bɛpɛ bɛzie ɛkɛ ne la. Ɔwɔ kɛ ye tendenle nu mɔɔ vi ye sɔlɔ ba nyiakɛ la yɛ kilomita bulu nee nwiɔ nee foa ko, yɛɛ ye tɛtɛlɛ nu mɔɔ vi aduduleɛ kɔ adɔleɛ la noko yɛ zɔhane ala. Azɛlɛ ɛhye azo yɛɛ Ɛzonlenlɛ Sua ne bagyinla a.

⁹Azɛlɛ ɛhye avinli, ɛbapɛ azɛlɛ mɔɔ ye tendenle le kilomita bulu nee nwiɔ nee foa ko, na ye tɛtɛlɛ le kilomita bulu la wɔazie ɛkɛ wɔamaa Ɛdɛnkɛma.

¹⁰Akee kɛ ɛbahyɛ ɛleka nwuanzanwuanza ne la ɛne: Sɛlɛvolɛma ne banyia azɛlɛ mɔɔ ye tendenle le kilomita bulu nee nwiɔ nee foa ko, mɔɔ vi aduduleɛ kɔ adɔleɛ na ye tɛtɛlɛ le kilomita nnu, ɔvi ye sɔlɔ mɔɔ ba ye nyiakɛ la. Ɔwɔ kɛ azɛlɛ ɛhye avinli yɛɛ Ɛdɛnkɛma Ɛzonlenlɛ Sua ne gyinla a.

¹¹Azɛlɛ ɛhye bayɛ Zeedɔko abo zo amra ne mɔ mɔɔ bɛwula bɛ sɛlɛvolɛ na bɛlile me mɛla zo bɛzonlenle me nɔhalɛ nu, na bɛamkpo me wɔ mekɛ mɔɔ Yizilayɛma dele atua, na Livaema kpole me la.

¹²Azɛlɛ ne bayɛ bɛ ɛdeɛ bɔkɔɔ wɔ azɛlɛ nwuanzanwuanza ne avinli, yeayɛ azɛlɛ nwuanzanwuanza kpalɛ yeazua Livaema azɛlɛ ɛdeɛ ne.

¹³Livaema azɛlɛ ɛdeɛ ne bazua sɛlɛvolɛma ɛdeɛ ne. Ɔdaye ye tendenle bayɛ kilomita bulu nee nwiɔ nee foa ko yɛɛ ye tɛtɛlɛ bayɛ kilomita nnu.

¹⁴Ɔnle kɛ bɛtɔne azɛlɛ ɛhye bie anzɛɛ bɛfa bie bɛbɔ agyinlanu bɛdie debie. Ɔnle kɛ bɛfa bie bɛmaa awie biala, ɔluakɛ ɔle nwuanzanwuanza ɔmaa Ɛdɛnkɛma.

¹⁵Azɛlɛ ne mɔɔ baha, mɔɔ ye tendenle le kilomita bulu nee nwiɔ nee foa ko, na ye tɛtɛlɛ le kilomita nwiɔ nee foa ko la bala ɛkɛ, amaa maanlema akyekye bɛ suakpole ne, bɛabu bɛ namunamu na bɛadidi zolɛ. Suakpole ne bala azɛlɛ ne avinli.

¹⁶Suakpole ɛhye tendenle nee ye tɛtɛlɛ bazɛ. Ye tendenle bayɛ mita apenle nwiɔ, ɛya nwiɔ abulanlu, yɛɛ ye tɛtɛlɛ noko bayɛ zɔhane ala.

¹⁷Azɛlɛ kpole bala suakpole ne anwo toonwo ayia; azɛlɛ ne mɔɔ bala suakpole ne anwo la tɛtɛlɛ bayɛ mita ɛya ko abulanwiɔ nee nnu.

¹⁸Azɛlɛ ne mɔɔ baha azɛlɛ nwuanzanwuanza ne azo la bayɛ azɛlɛ mɔɔ menli mɔɔ wɔ suakpole ne azo la didi zolɛ a. Suakpole ne aduduleɛ afoa nu azɛlɛ ne tendenle le kilomita nnu yɛɛ ye tɛtɛlɛ le kilomita nwiɔ nee foa ko. Ye adɔleɛ nu noko azɛlɛ ne kpole le kɛ aduduleɛ ɛdeɛ ne la.

¹⁹Awie biala mɔɔ wɔ Yizilayɛ abusua ekpunli biala anu na ɔwɔ suakpole ne azo la kola so zolɛ ɛya.

²⁰Azɛlɛ ne mɔɔ ɛbaboɔboa wɔapɛ wɔado ɛkɛ ne la, ɔwɔ kɛ ye tendenle yɛ kilomita bulu nee nwiɔ nee foa ko, yɛɛ ye tɛtɛlɛ noko yɛ zɔhane ala. Azɛlɛ ɛhye le nwuanzanwuanza, yɛɛ zolɛ a bɛbakyekye suakpole ne a.

²¹Azɛlɛ mɔɔ kɛha aduduleɛ nee adɔleɛ wɔ azɛlɛ ɛhye mɔɔ bɛboɔboa bɛpɛ bɛzie ɛkɛ ne, mɔɔ Ɛdɛnkɛma Ɛzonlenlɛ Sua ne gyi zolɛ, sɛlɛvolɛma nee Livaema azɛlɛ wɔ nu, na suakpole ne wɔ zolɛ la, le belemgbunli ne ɛdeɛ. Ɔtɛlɛ ɔkɔ adɔleɛ ɔkɔgua Mɛdetɛlenia Nyevile ne anloa, ye aduduleɛ kpula aduduleɛ ɛweɛne ne, ye sɔlɔ, ɔ nee Dwuda a bɔ ɛweɛne a, yɛɛ ɔ nee Bɛngyaman a bɔ ɛweɛne wɔ nyiakɛ a.

²³Mbusua ekpunli ekpunli mɔɔ ɛha la banyia bɛ azɛlɛ ɛdeɛ wɔ azɛlɛ nwuanzanwuanza ne nyiakɛ. Ko biala ɛdeɛ tenrɛ vi aduduleɛ ɛweɛne ne anloa kɔ adɔleɛ kɔgua Mɛdetɛlenia Nyevile ne anloa. Kɛ ɔwɔ kɛ bɛsesa azɛlɛ ne, ɔvi sɔlɔ mɔɔ ba nyiakɛ la ɛne: Bɛngyaman Semɛyɔn Yesakaa Zɛbulɛn Gaade

²⁸Gaade abusua ekpunli ne azɛlɛ ne nyiakɛ ɛweɛne ne wɔ nyiakɛ-adɔleɛ, ɔvi Teema ɔdwu Keedɛhye mɛtɛlɛmɛtɛlɛ ne anloa, na ɔtenrɛ ɔ nwo sɔlɔ-adɔleɛ, ɔlua Yigyibiti ɛweɛne zo ɔkɔgua ye Mɛdetɛlenia Nyevile ne anloa.

²⁹Awulae Nyamenle ne se, “Adenle mɔɔ ɔwɔ kɛ bɛdua nu bɛkyɛ azɛlɛ ne bɛmaa Yizilayɛ mbusua ekpunli ekpunli ne mɔ fa yɛ bɛ ɛdeɛ la ɛne.”

³⁰ Suakpole Gyɛlusalɛm lɛ nlenkɛ mgbole bulu nee nwiɔ. Suakpole ne bane nna ne mɔɔ bɛnra yia ye la ko biala tendenle le mita apenle nwiɔ, ɛya nwiɔ abulanlu, yɛɛ ko biala lɛ nlenkɛ mgbole nsa. Bɛva nlenkɛ ne mɔ bɛtoto Yizilayɛ mbusua ekpunli ekpunli ne mɔ. Nlenkɛ mgbole mɔɔ wɔ sɔlɔ la, bɛfɛlɛ bɛ Wulubɛn, Dwuda, yɛɛ Livae; mɔɔ wɔ aduduleɛ la, bɛfɛlɛ bɛ Dwosefi, Bɛngyaman, yɛɛ Dan. Nyiakɛ nlenkɛ ɛdeɛ ne mɔ, bɛfɛlɛ bɛ Semɛyɔn, Yesakaa, yɛɛ Zɛbulɛn, yɛɛ adɔleɛ ɛdeɛ ne mɔ a le Gaade, Ahya, yɛɛ Nafetalae.

³⁵Bane nna ne mɔɔ bɛnra suakpole ne yia la amuala tendenle le mita apenle ngɔnla. Suakpole ne duma, ɔvi ɛnɛ mɔɔ kɔ la a le “Ɛdɛnkɛma Wɔ Ɛke.”[13]