Read Nzema Yiz 5 Bible Online

Yiz 5 - Nzema bible

Yiz 5

¹Ɛdɛnkɛma zele me kɛ, “Na wɔmɔ, o sonla ra, fa dadeɛ mɔɔ yɛ nla kpalɛ la kakyi dadeɛ dɛma, na fa kpa ɛ ti enrinli nee ɛ kɛsa amuala. Suzu enrinli ne mɔɔ ɛkɛkpa la wɔ tone zo na akee kyɛ nu nsa.

²Gua ko senle nu yela ye wɔ suakpole ne avinli, wɔ mekɛ mɔɔ ɛkɛva suakpole ne ɛkɛwie la; fa ko pepɛ nu ngyikyi ngyikyi kponde suakpole ne anwo yia, na kponde ko ne mɔɔ ɛha la anwoma ne anu, na medame, akee mebava me dadeɛ ne meazi mealɔ bɛ nu.

³Fa ɛkpɔ ɛhye mɔ biala anu ekyi kyekye ye wɔ wɔ tɛladeɛ ne anloa.

⁴Ɛbava ɛhye wɔagua senle nu wɔamaa yeazɔ. Ɛbanwu kɛ senle vi nuhua bazɔ ahɔ Yizilayɛ maanle ne anu amuala.”

⁵Kɛ Awulae Nyamenle ne se la ɛne: “Gyɛlusalɛm ɛne. Meva ye mezie ewiade avinli, memaa maanle maanle ɛbɔ ɛyia ye.

⁶Noko yede atua amumuyɛ nu ala kɛ ɔnrɛli me mɛla ne mɔ nee me ngyehyɛlɛ zo, bɔbɔ yedɛla maanle maanle mɔɔ ɛbɔ ɛyia ye la amuala.

⁷Yemɔti kɛ medame, Awulae Nyamenle, mese la ɛne: Suzuamgba ala mɔɔ ɛ nzo yɛ se tɛla maanle maanle mɔɔ ɛbɔ ɛyia wɔ, na wɔanli me ngyehyɛlɛ nee me mɛla ne mɔ azo, na wɔva ɛ nwo wɔtolo maanle maanle zɔhane mɔ la,

⁸medame Awulae Nyamenle, kɛ mese la ɛne: Nea, medame, ɛhɛe, medame mumua ne, meyɛ wɔ kpɔvolɛ. Mebadea wɔ meamaa maanle maanle kɔsɔɔti anwu ye.

⁹Ɔlua bɛ bɛkyi ninyɛne ne mɔ ati, mɔɔ mebava meahile bɛ la, metɛfale bie metɛkilele awie ɛlɛ, yɛɛ menrɛyɛ ye bieko ɛlɛ.

¹⁰ Ye zɔhane ati, selɛma bahu bɛ mra mrenya ali na mralɛ mrenya ahu bɛ ze mɔ ali. Mebadea bɛ kpalɛ, na bɛ nuhua mɔɔ kɛha la, mebabɔ bɛ asande meahɔgua ɛleka muala.

¹¹“Zɔhane ati medame tease Awulae Nyamenle, mese, suzuamgba ala mɔɔ bɛva bɛ ninyɛmunli nee bɛ bɛkyi ninyɛne ne mɔ bɛgua me ɛleka nwuanzanwuanza ne evinli la, mebabɔ bɛ bo zo. Menrɛvavi bie yɛɛ menrɛze anwunvɔne.

¹²Ɛhɔne nee ewulenzane bahyɛ bɛ nuhua nsa ahu ko; nwiɔ ne mɔɔ baha la, ko bawu konle nu; na meabɔ ko ne mɔɔ baha la asande na meava konle meazi bɛ zo.

¹³“Zɛhae yɛɛ bɛbanwu me ɛyavalɛ ne a; mebakpokpo ye kɔsɔɔti meagua bɛ ti zo na me kunlu adwo, na bɛanwu kɛ medame Ɛdɛnkɛma, meva ɛya kpole a melɛtendɛ meahile bɛ a.

¹⁴Eza mebayɛ suakpole Gyɛlusalɛm suadu mɔɔ maanle maanle mɔɔ ɛbɔ ɛyia ye nee bɛdabɛ mɔɔ bɛse ɛke la, biala nwu ye a ɔsi ye amgbu a.

¹⁵“Saa me ɛya ne fo me na me sa sɔ wɔ nu kɛ metea wɔ a, maanle maanle mɔɔ ɛbɔ ɛyia wɔ la bazi wɔ amgbu, na yeayɛ kɔkɔbɔlɛ yeamaa bɛ. Medame Ɛdɛnkɛma a mese a!

¹⁶Mebamaa sane nee ɛhɔne ara bɛ nwo zo na bɛade ye nyane kɛ ɛda mɔɔ ɛlɛwowɔ bɛ azɛkye bɛ la.

¹⁷ Mebamaa ɛhɔne nee nanemgbole arahu bɛ mra, na meamaa ewulenzane, konle nee kpolera adɔ bɛ avinli ahu bɛ. Medame, Ɛdɛnkɛma a mese a!”