Read Nzema Yiz 6 Bible Online

Yiz 6 - Nzema bible

Yiz 6

¹Ɛdɛnkɛma dendɛle hilele me.

²Ɔse, “Sonla ra, fa ɛ nye su Yizilayɛ awoka ne mɔ na fa me nrɛlaleɛ kɔmaa bɛ.

³Ka kile bɛ kɛ: Bɛmɛ Yizilayɛ awoka, bɛdie Awulae Nyamenle ne edwɛkɛ ne. Awulae Nyamenle ne se, bɛmɛ awoka mgbole nee ngyikyi, mbɔnza nee ahuma, bɛnlea na medame, ɛhɛe, medame, mebava konle meadoa bɛ, na meazɛkye bɛ ɛleka ne mɔ mɔɔ bɛsonle la.

⁴Mebabubu bɛ azukponle ne mɔ nee bɛ ɛyɛlɛ azukponle ne mɔ kɔsɔɔti, na meava bɛ avunli mearagua bɛ mmonle ne mɔ anyunlu.

⁵Mebava Yizilayɛma avunli meagua bɛ mmonle ne mɔ anyunlu, na meazande bɛ mbowule wɔ bɛ azukponle ne mɔ anwo.

⁶Mebamaa bɛ azuamgbole kɔsɔɔti adɔ mgbane, na meabubu bɛ mmonle nee bɛ azukponle ne mɔ amuala, meazɛkye bɛ ɛyɛlɛ azukponle ne mɔ, na meaminli bɛ sa anloa gyima bo zo.

⁷Bɛbahuhu menli sesakaa wɔ bɛ avinli na bɛanwu kɛ medame a mele Ɛdɛnkɛma a.

⁸“Noko mebamaa bɛ bie mɔ avi ɛsalɛ na bɛade bɛakponde maanle maanle zo, amaa saa bɛte bɛkponde maanle maanle ne mɔ azo a,

⁹bɛdabɛ mɔɔ bɛvi ɛsalɛ la ahakye me wɔ maanle maanle zɔhane mɔ mɔɔ hyele bɛ nuokɛ hɔle la avinli. Mebaha bɛ ahonle ɛtane ne mɔ mɔɔ manle bɛdele me nwo atua la aze na meazi bɛ nye ne mɔ mɔɔ bɛfa bɛkpondɛ awozonle bɛsonle bɛ la; na bɛ nwo bayɛ nyiane kpole wɔ bɛ ngome bɛ nye zo wɔ amumuyɛ nee bɛkyi ninyɛne ne mɔ mɔɔ bɛyɛ la ati.

¹⁰Na bɛbanwu kɛ medame a mele Ɛdɛnkɛma, na edwɛkɛ ne mɔɔ menganle kɛ mebamaa munzule ɛhye ado bɛ la, meanga ye mgbane.”

¹¹Awulae Nyamenle ne se, “Bɔ ɛ sa nu! Si ɛ gyakɛ aze! Ka kɛ, ‘Egya e!’ wɔ Yizilayɛma munzule nyɛleɛ ne mɔ ati. Ɔluakɛ bɛbawuwu wɔ konle nee ewule mɔɔ bazi la anu.

¹²Bɛ nuhua mɔɔ wɔ moa la ewulenzane bahu bɛ, bɛ nuhua mɔɔ wɔ sua nu la badɔ dadeɛ nloa wɔ konle nu; yɛɛ bɛ nuhua mɔɔ baha la, ɛhɔne nee sane bahu bɛ. Ɛhye yɛɛ bɛbava bɛanwu kɛ me ɛyavalɛ ne ɛnlomboɛ si de la a.

¹³Bɛ avunli bayɛ bɛ awozonle ne mɔ avunli, bɛ azukponle ne mɔ azo, awoka mgbole nee ngyikyi ne mɔ azo, bɛ egyane ne mɔ abo, bɛ oku mbaka bubuzuu ne mɔ abo, yɛɛ bɛ ɛleka biala mɔɔ bɛzonlenle la totɔɔ, na bɛanwu kɛ medame a mele Ɛdɛnkɛma a.

¹⁴Mebadenrɛ me sa na meazɛkye bɛ maanle ne. Mebamaa ɛleka biala mɔɔ Yizilayɛma de la adɔ mgbane, ɔvi nyiakɛ fienemgbole ne anloa, yeahɔdwu sɔlɔ lɔ suakpole ne mɔɔ bɛfɛlɛ ye Relebela [1] la azo, na akee bɛanwu kɛ medame a mele Ɛdɛnkɛma a.”