Read Nzema Yiz 7 Bible Online

Yiz 7 - Nzema bible

Yiz 7

¹Ɛdɛnkɛma dendɛle hilele me.

²Ɔse, “Wɔmɔ, o sonla ra, mɔɔ medame Awulae Nyamenle melɛ ye meka meahile Yizilayɛma la ɛne: Yewie! Azɛlɛ ye muleɛ nna ne amuala ɛzɛkyelɛ ala ɛne!

³“Yizilayɛma, bɛ awieleɛ ne ala ɛne. Mebakpokpo me ɛya ne meagua bɛ nwo zo, na meabua bɛ ndɛne, kɛmɔ bɛ ndenle ne mɔ mɔɔ bɛlua nu la si de la. Mebadea bɛ wɔ bɛ bɛkyi nyɛleɛ ne mɔ anwo.

⁴Menrɛvavi bie, yɛɛ menrɛze anwunvɔne. Mebadea bɛ, kɛmɔ bɛ ndenle ne mɔ mɔɔ bɛlua nu la si de, na bɛtɛbɔ bɛ amumuyɛ ɛbɛla ne mɔ la, na bɛanwu kɛ medame a mele Ɛdɛnkɛma a.”

⁵Kɛ Awulae Nyamenle ne se la ɛne, “Munzule ɛdoa munzule ɛrɛla bɛ nwo zo!

⁶Bɛnlea, kɛ ɔlɛba ɛ! Yewie! Awieleɛ ne ɛra. Ye kɔsɔɔti gua bɛ nwo zo.

⁷O Yizilayɛ azɛlɛ ye azo amra, munzule ɛbɔ ɛyia bɛ. Mekɛ ne ɛdwu. Bɛ anyezota mekɛ ne ɛbikye; bɛ anyelielɛ wɔ awoka ne mɔ azo ɛwie.

⁸“Ɔnrɛhyɛ biala na meawola me ɛya ne amuala meagua bɛ nwo zo, na meabua bɛ ndɛne, kɛmɔ bɛ ndenle ne mɔ mɔɔ bɛlua nu la si de la. Mebadea bɛ wɔ bɛ bɛkyi nyɛleɛ ne mɔ anwo.

⁹Menrɛvavi bie, yɛɛ menrɛze anwunvɔne. Mebadea bɛ wɔ mekɛ mɔɔ bɛtɛyɛ bɛ bɛkyi ninyɛne ne mɔ la, na akee bɛanwu kɛ medame a mele Ɛdɛnkɛma, mɔɔ mekola meku bɛ a.

¹⁰“Bɛnlea, kenle ne ɛdwu! Bɛnlea, ɔlɛba! Bɛ anwubɛnyunlu mekɛ ɛdwu. Nzisi ɛbɔ ndotolo, adubɛnwo ɛwula nya.

¹¹Basabasayɛlɛ ɛwie nyi ɛhakyi amumuyɛ baka. Bɛ nuhua biala ɛnrɛha. Bɛ anyiabɛnwo nee bɛ anwonyia baminli, yɛɛ biala ɛnrɛnyia ɔ nyunlu.

¹²“Mekɛ ne ɛlɛba; asɛɛ yedwu bɔbɔ. Bɛmmamaa mɔɔ tɔ la anye die, yɛɛ mɔɔ tɔne la mmadi nyane, ɔluakɛ Nyamenle ɛya ne wɔ bɛ kɔsɔɔti bɛ nwo zo.

¹³Ɔluakɛ mɔɔ tɔne la ɛnrɛzia ɛnrɛhɔkpondɛ mɔɔ yedɔne la abo zo, wɔ mekɛ mɔɔ ɔde ngoane nu la. Ɔluakɛ Nyamenle ɛya ne wɔ bɛ muala bɛ nwo zo, yɛɛ bɛ amumuyɛ ne mɔ ati, biala ɛnrɛhola ɛnrɛlie ɔ nwo ngoane.

¹⁴Bɛbɔ aweɛne tendenle ne anu kɛ awie biala ɛboɔboa ɔ nwo; noko awie biala ɛngɔ konle nloa, ɔluakɛ me ɛya ne wɔ bɛ muala bɛ nwo zo.

¹⁵“Bɛbayia konle wɔ gua zo, yɛɛ ɛhɔne nee ewulenzane bahu bɛ wɔ sua nu. Mɔɔ ɛnriandi ɛhɔ ɛbɔ nu la bawu dadeɛ nloa, yɛɛ ɛhɔne nee ewulenzane bahu bɛdabɛ mɔɔ bɛwɔ sua zo la.

¹⁶Saa bie mɔ fi ɛsalɛ a, bɛbanriandi bɛahɔ awoka ne mɔ azo lɔ, bɛbayɛ kɛ mbɔnza nu abubule, na bɛazu bɛ ɛtane.

¹⁷Bɛ sa bayɛ kpokpɔdwɔlɔɔ, na bɛ gyakɛ agbɔkɛ abili kɛ atɛ.

¹⁸Bɛbaheda ɛrele, na ɛzulolɛ ava bɛ aze. Bɛ nyunlu bayɛ nyiane nyiane ngome na bɛ ti zo adudu.

¹⁹Bɛbado bɛ dwɛtɛ fufule bɛagua mgbata zo, bɛ ezukoa nvutuke nwo ɛnrɛde, yɛɛ bɛ ezukoa nvutuke nee dwɛtɛ fufule ɛnrɛhola ɛnrɛlie bɛ ɛnrɛvi Ɛdɛnkɛma ɛya ne anu. Bɛnrɛhola bɛ ezukoa ne mɔ di bɛnrɛmaa bɛ ko ɛnrɛyi. Ɔluakɛ yemɔ a ɔle ɛtane mɔɔ manle bɛdule koti a.

²⁰Bɛvale bɛ anwoneɛ ne mɔ bɛdule bɛ nwo, na bɛvale bɛyɛle bɛ munzule ananze ne mɔ bɛbɔle bɛkyi ɛbɛla. Yemɔti mebamaa yeayɛ bɛkyi debie yeamaa bɛ.

²¹“Mebamaa bɛadɔ agye wɔ nyɛvolɛ sa nu, yɛɛ amumuyɛma barave bɛ nwo ninyɛne na bɛagua nwolɛ evinli.

²²Mebado me nye ɛbɔ nu meamaa bɛagua me ɛleka nwuanzanwuanza ne anwo evinli. Nwule bahɔva ɛkɛ ne, bɛagua ɛkɛ ne evinli na bɛayɛ ɛkɛ ne suadu.

²³“Kɛmɔ suakpole ne azo ɛyɛ konle ngome na azɛlɛ ne azo ɛyɛ mogya ngome la,

²⁴mebamaa maanle mɔɔ ati yɛ se kpalɛ la arava bɛ azua ne mɔ. Mebamaa bɛ anwosesebɛ ne mɔɔ bɛfa bɛtu bɛ nwo la aha aze, na evinli aha bɛ ɛleka nwuanzanwuanza ne mɔ.

²⁵Saa abodelɛ ba a, bɛbakpondɛ anzonudwolɛ, noko bɛnrɛnyia bie.

²⁶Munzule badoa munzule, yɛɛ huhuhuhu badoa huhuhuhu; bɛbakpondɛ ɛnyelɛzodeɛnwunlɛ bɛavi Nyamenle kpɔmanvolɛma ɛkɛ, na Nyamenle mɛla ne baminli sɛlɛvolɛma ne mɔ ati anu, yɛɛ bɛnrɛnyia folɛdulɛ bɛnrɛvi mgbanyima ne mɔ ɛkɛ.

²⁷Belemgbunli ne bali nyane, belemgbunli ara nrenya ne arɛle babɔ, na ɛzulolɛ bamaa menli mɔɔ wɔ azɛlɛ ne azo la asa adwɔlɔdwɔlɔ. Mebadua bɛ kakɛ wɔ mɔɔ bɛyɛ la anwo, na adenle mɔɔ bɛluale nu bɛbuale awie mɔ ndɛne la anu yɛɛ mebalua meabua bɛdabɛ noko bɛ ndɛne a. Na bɛbanwu kɛ medame a mele Ɛdɛnkɛma a.”