Read Nzema Yiz 8 Bible Online

Yiz 8 - Nzema bible

Yiz 8

¹Bɛ nee yɛ hɔle nlɔnu la, ye ɛvolɛ nsia, siane nsia ne anu, ye kenle nnu ne azo, ɛnee me nee Dwuda mgbanyima ne mɔ wɔ sua nu ɛkɛ ne, na Awulae Nyamenle ne tumi ne rawolole me.

² Memkpogyale me ti zo, na menwunle debie bie mɔɔ le kɛ sonla anwo ɛzulolɛ bie la kɛ ɔgyi ɛkɛ. Ɔvi ɔ nze zo mɔɔ pe ye aze la le senle, yɛɛ ɔvi ɔ nze zo mɔɔ kɔ ye anwuma la ta kɛ kɔbele mɔɔ bɛhwi nwolɛ la.

³Ɔdenrɛle debie bie mɔɔ le kɛ ɛsalɛ la ɔzɔle me ti enrinli; na Nyamenle Sunsum ne manle me zo anwomanyunlu na ɔvale me wɔ ɛnyelɛzodeɛnwunlɛ nu ɔrale Gyɛlusalɛm, wɔ Ɛzonlenlɛ Sua ne akunlu anlenkɛ ne mɔɔ di kɔ ɛbɔ nu la anloa, ɛleka mɔɔ bɛzie amonle bie, mɔɔ ka Nyamenle ɛya la.

⁴ Ɛkɛ ne, menwunle wienyi kpole ne mɔɔ kile kɛ Yizilayɛ Nyamenle ne wɔ ɛkɛ ne la bieko, kɛmɔ menwunle ye wɔ azɛlɛ wienyi ne azo la.

⁵Na Nyamenle zele me kɛ, “Sonla ra, maa ɛ nye zo nea ɛbɔ nu afoa nu.” Na nea, menwunle kɛ amonle ne gyi azukponle ne tɛbanu wɔ ɛbɔ nu afoa nu.

⁶Na ɔzele me kɛ, “Sonla ra, wɔnwu mɔɔ bɛlɛyɛ la, bɛkyi ɛbɛla mɔɔ Yizilayɛma ɛlɛbɔ adu me wɔ me ɛleka nwuanzanwuanza ne la ɔ? Na ɛbanwu bɛkyi ninyɛne mgbole kpalɛ bɔbɔ mɔɔ tɛla ɛhye mɔ la.”

⁷Akee Nyamenle vale me vindele hɔle findezo alie nwo anuhɔlɛ ne, na meneanle la ɛnee tokule bie wɔ bane ne anu.

⁸Na ɔzele me kɛ, “Sonla ra, fu bane ne anu.” Menvunle bane ne anu la menwunle kɛ anlenkɛ wɔ ɛkɛ.

⁹Na ɔzele me kɛ, “Wolo kɔ nuhua na kɔnlea ninyɛndane mɔɔ bɛlɛyɛ ye ɛke la.”

¹⁰Yemɔti menwolole mengɔle nu mengɔneanle. Na menwunle kɛ bɛdolɔdolɔ ninyɛne mɔɔ twenle bɛ kɛnra aze, nane anwo ɛzulolɛ ɛzulolɛ nee Yizilayɛma mmonle ne mɔ kɔsɔɔti wɔ bane ne anwo.

¹¹Yizilayɛ mgbanyima abulasuu gyigyi ɛkɛ ne, na Hyeefan ara Gyeeyazanaya boka bɛ. Ko biala lɛ ɛyɛlɛ siase ɔ sa nu, na ɛyɛlɛ ne esike ne ɛlɛkpu ahɔ anwuma.

¹²Na Nyamenle bizale me kɛ, “Sonla ra, wɔnwu mɔɔ Yizilayɛ mgbanyima ɛlɛyɛ ye feabo la ɔ? Sonla ko biala nee ye ekpumgbunli mɔɔ ɔsonle ye nvoninli wɔ nu la. Ɔluakɛ bɛse, ‘Ɛdɛnkɛma ɛnnwu yɛ, Ɛdɛnkɛma arɛle ɛvi maanle ne.’ ”

¹³Eza ɔzele me kɛ, “Ɛbanwu bɛkyi ninyɛne mgbole kpalɛ mɔɔ bɛlɛyɛ mɔɔ tɛla ɛhye mɔ la.”

¹⁴Akee ɔvale me ɔrale Ɛdɛnkɛma Ɛzonlenlɛ Sua ne anlenkɛ ne mɔɔ di kɔ ɛbɔ nu afoa nu la anwo, na menwunle kɛ mraalɛ bie gua ɛkɛ ɛlɛsu Tamɛze.

¹⁵Na ɔzele me kɛ, “Sonla ra, asoo wɔnwu ɛhye. Ɛbanwu bɛkyi ninyɛne mgbole mɔɔ tɛla ɛhye mɔ la.”

¹⁶Akee ɔvale me ɔhɔle Ɛzonlenlɛ Sua ne alie ne mɔɔ wɔ ɔ kunlu lɔ la anwo. Na menwunle kɛ menli abulanwiɔ nee nnu gyigyi Ɛzonlenlɛ Sua ne anlenkɛ ne anyunlu wɔ azukponle ne nee alie nwo nwolodo ne avinli, bɛhakyi bɛ nzi bɛzi Ɛdɛnkɛma Ɛzonlenlɛ Sua ne, bɛ nye kɔ aduduleɛ na bɛlɛsonle sɛnzɛne ne.

¹⁷Na Nyamenle zele me kɛ, “Sonla ra, wɔnwu ɛhye ɔ? Asoo ɔle kpalɛ kɛ Dwudama kɛbɔ munzule kpole ɛhye mɔɔ bɛbɔ ye ɛke la, na bɛkɛva kɔdiawu ɛbɛla bɛkɛkponde azɛlɛ ne azo amuala, na bɛkɛha me ɛya ɔ? Nea, bɛdabɛ bɛva baka bɛzinla bɛ bonyi.

¹⁸Yemɔti mebava ɛya me nee bɛ ali. Menrɛvavi bie yɛɛ menrɛze anwunvɔne, bɛbazu ɛzunlɛ kpole bɔbɔ bɛavɛlɛ me, noko menrɛde bɛ ne.”