Read Nzema Yiz 9 Bible Online

Yiz 9 - Nzema bible

Yiz 9

¹Akee mendele kɛ Nyamenle deanle nu kɛ, “Bɛdabɛ suakpole ye sinzavolɛma, bɛrɛla ɛke. Biala ɛva ye konle ninyɛne ne mɔ.”

²Na menli nsia vi anwuma lɔ anlenkɛ kpole ne anwo rale, ko biala lɛ ye konle ninyɛne mɔɔ ɔbava yeahu menli ne la ɔ sa nu. Nrenya bie mɔɔ wula lenen tɛladeɛ la nee bɛ a lua a, na ngɛlata kodoku zia ye foa ko. Na bɛwolole Ɛzonlenlɛ Sua ne anu bɛhɔgyinlanle kɔbele azukponle ne anwo.

³Yizilayɛ Nyamenle ne anyunlunyia ne vi tease abɔdeɛ ne mɔ mɔɔ dede Ɛzonlenlɛ Sua ne anu la anu ɛhɔ. Ɔvɛlɛle nrenya ne mɔɔ wula lenen tɛladeɛ ne na ngɛlata kodoku ne zia ye foa ko la.

⁴ Na Ɛdɛnkɛma zele ye kɛ, “Kɔ Gyɛlusalɛm suakpole ne azo amuala na fa sɛkɛlɛneɛ to awie biala mɔɔ ɛlɛdi nyane wɔ munzule ɛbɛla mɔɔ bɛbɔ wɔ zolɛ la anwo la anwoma azo.”

⁵Na mendele kɛ ɔlɛka yeahile menli ɛhendeɛ ne mɔ kɛ, “Bɛli ɔ nzi bɛhɔ suakpole ne azo amuala, bɛhɔhu bɛ. Bɛmmafavi bie, yɛɛ bɛmmase anwunvɔne.

⁶Bɛhu mrenya mgbanyinli, mgbavolɛ nee mbɛlɛra, ngakula nee mraalɛ kɔsɔɔti, noko bɛmmafa bɛ sa bɛka awie biala mɔɔ lɛ nzonlɛ ne wɔ ɔ nwoma azo la. Bɛbɔ ɔ bo wɔ me ɛleka nwuanzanwuanza ne.” Yemɔti bɛbɔle ɔ bo wɔ mgbanyima ne mɔ mɔɔ gyi Ɛzonlenlɛ Sua ne anyunlu la anwo zo.

⁷Na Nyamenle zele bɛ kɛ, “Bɛhɔ! Bɛhɔsesa avunli ne mɔ bɛragua Ɛzonlenlɛ Sua ye anu bɛgua nwolɛ evinli.” Yemɔti bɛhɔle suakpole ne azo na bɛhunle menli ne mɔ.

⁸Mɔɔ bɛlɛku menli ne mɔ na ɔhale me ngome la, mendule mendɔle mutule nu na mendeanle nu kɛ, “O, Awulae Nyamenle! Ɛfa Gyɛlusalɛm anwo ɛya wɔahu Yizilayɛma mɔɔ ɛha la ɔ?”

⁹Na Nyamenle zele me kɛ, “Yizilayɛma nee Dwudama ɛtane ne akee ɛbo zolɛ. Mogya ɛva azɛlɛ ne, yɛɛ nzisi ɛva suakpole ye, ɔluakɛ bɛ edwɛkɛ a le kɛ, ‘Ɛdɛnkɛma arɛle ɛvi maanle ne, yɛɛ ɔnnwu ɛhwee.’

¹⁰Mame medame, menrɛvavi yɛɛ menrɛze anwunvɔne. Mɔɔ bɛyɛ la, memaa yeabɔ bɛ ti tɔ.”

¹¹Na nrenya ne mɔɔ wula lenen tɛladeɛ ne, na ngɛlata kodoku ne zia ye foa ko la rale na ɔrahanle kɛ, “Meyɛ debie biala kɛmɔ ɛzele me la.”