Read Nzema Dan 1 Bible Online

Dan 1 - Nzema bible

Dan 1

¹ Belemgbunli Nɛbukadenɛza mɔɔ vi Babelonia la vale ɛlɔne rabɔle yiale Gyɛlusalɛm wɔ mekɛ mɔɔ ɛnee Dwuda Belemgbunli Gyɛhɔyakem ɛli ɛvolɛ nsa wɔ ebia ne azo la.

² Na Awulae yele Belemgbunli Gyɛhɔyakem manle Nɛbukadenɛza lile ɔ nwo zo konim na ɔsesale Ɛzonlenlɛ Sua ne anu ninyɛne ne mɔ bie ɔhɔle. Ɔvale ninyɛne ne mɔ ɔhɔle Hyaenaa na ɔhɔguale bɛ ye bozonle ne abo.

³Belemgbunli Nɛbukadenɛza akee zele ye sonvolɛ kpanyinli Ahyepinaze kɛ ɔnlea na ɔye Yizilayɛ alehelɛ nee menli titile ne mɔ anu bie mɔ,

⁴mgbavolɛ anwo fɛlɛko mɔɔ anye gyi bɛ ti anwo, bɛze nrɛlɛbɛ, bɛsukoa debie a bɛnvɛ nwolɛ, na bɛ nwo ɛnlɛ dɛne, mɔɔ bɛkola bɛsonle belemgbunli sua nu la, na ɔhile bɛ Babelonia aneɛ ne ɛgengalɛ nee ye ɛhɛlɛlɛ.

⁵Belemgbunli ne hanle kɛ dahuu bɛmaa ndetelɛ menli ɛhye mɔ alehelɛ aleɛ ne nee nza ne mɔɔ bɛdi bɛno ye suakunlu ɛkɛ ne la bie. Bɛtete menli ne ɛvolɛ nsa na akee bɛava bɛ bɛavinde belemgbunli ne anyunlu.

⁶Menli mɔɔ bɛyele bɛ la bie mɔ a le Daneɛle, Hananaya, Maehyeeyɛle, yɛɛ Azalaya mɔɔ bɛ muala bɛvi Dwuda abusua ekpunli ne anu la.

⁷Sonvolɛ kpanyinli ne totonle bɛ aluma fofolɛ: ɔdonle Daneɛle, Bɛletihyazaa; ɔdonle Hananaya, Hyeedelake; ɔdonle Maehyeeyɛle, Mihyake, yɛɛ ɔdonle Azalaya, Abɛdenɛgo.

⁸Na Daneɛle yɛle ye adwenle kɛ ɔnrɛdoa alehelɛ aleɛ ne anzɛɛ nza ne ɔnrɛgua ɔ nwo evinli. Yemɔti ɔnwunle sonvolɛ kpanyinli ne kɛ ɔmaa ye adenle na ɔnrɛli aleɛ ne, yɛɛ ɔnrɛnlo nza ne ɔnrɛgua ɔ nwo evinli.

⁹Nyamenle manle sonvolɛ kpanyinli Ahyepinaze anye zɔle Daneɛle, ɔnwunle ye anwunvɔne, na ɔkponlenle ye edwɛkɛ ne azo.

¹⁰Noko ɛnee sonvolɛ kpanyinli ne sulo belemgbunli ne. Yemɔti ɔhanle ɔhilele Daneɛle kɛ, “Belemgbunli ɛhile aleɛ nee nza mɔɔ bɛva bɛmaa wɔ la. Ɛhye ati saa ɔnwu kɛ wɔmɔ wɔnwa a, me gyakɔ! Me ti ne, tɛ me ɛdeɛ ɔ.”

¹¹Daneɛle hanle hilele neavolɛ ne mɔɔ sonvolɛ kpanyinli ne yele ye kɛ ɔnlea ɔdaye, Hananaya, Maehyeeyɛle, yɛɛ Azalaya bɛ nwo zo la kɛ,

¹²“Sɔ wɔ sonvolɛma nea kenle bulu. Maa bɛmaa yɛ nya nya yɛli na bɛmaa yɛ nzule yɛnlo,

¹³na fa yɛ to menli mɔɔ ɛlɛdi suakunlu aleɛ ne la anwo na nea, na mɔɔ ɛkɛnwu ye la akee wɔayɛ mɔɔ ɛyɛ la.”

¹⁴Sonvolɛ kpanyinli ne kponlenle nzuzulɛ ne azo na ɔzɔle bɛ ɔnleanle kenle bulu.

¹⁵Kenle bulu ne dwule la, ɛnee bɛyɛ mbelane, bɛ nwonane ɛyɛ ngɛnlɛma ɛdɛla mgbavolɛ mɔɔ lile belemgbunli ne aleɛ kpalɛ ne la.

¹⁶Ɔlua ɛhye ati neavolɛ ne ammaa bɛ aleɛ kpalɛ nee nza mɔɔ anrɛɛ ɔwɔ kɛ bɛdi na bɛno la, na ɔmanle bɛ nya nya.

¹⁷Mgbavolɛ nna ɛhye, Nyamenle manle bɛnwunle nwoma na bɛnwunle nrɛlɛbɛ kpole. Nyamenle manle Daneɛle ɛnyelɛzodeɛnwunlɛ nee ɛlalɛ bo ɛhilelɛ adwenle.

¹⁸Ɛvolɛ nsa ne dwule la, Belemgbunli Nɛbukadenɛza manle sonvolɛ kpanyinli ne vale menli ne mɔ rale ɔ nyunlu.

¹⁹Belemgbunli ne bizebizale bɛ edwɛkɛ, na ɔnwunle kɛ mgbavolɛ nna ne, Daneɛle, Hananaya, Maehyeeyɛle, yɛɛ Azalaya ati ɛdi ɛdɛla awie biala.

²⁰Menli nna ne boale belemgbunli ne wɔ edwɛkɛ biala mɔɔ kye adwenle anzɛɛ hyia ndelebɛbo na ɔkɛbiza bɛ la anu kpole kpalɛ dɛlale ngonyiama nee silihyelɛma mɔɔ wɔ maanle ne anu la amuala fane bulu.

²¹Yemɔti Daneɛle dɛnlanle suakunlu ɛkɛ ne toonwo Pɛhyea Maanle Maanle Belemgbunli Saelɛse honle vale Babelonia na ɔnyianle ɛvolɛ ko wɔ ebia ne azo.