Read Nzema Dan 10 Bible Online

Dan 10 - Nzema bible

Dan 10

¹(Pɛhyea Maanle Maanle Belemgbunli Saelɛse lile ɛvolɛ nsa wɔ ebia zo la, Daneɛle mɔɔ eza bɛfɛlɛ ye Bɛletihyazaa la asa hanle Nyamenle nrɛlaleɛ. Nrɛlaleɛ ne le nɔhalɛ na ɔ bo ɛdelɛ ɛnla aze. Na bɛluale ɛnyelɛzodeɛnwunlɛ zo bɛhilele ye ɔ bo, na ɔdele ɔ bo.)

²Mekɛ zɔhane anu ɛnee medame, Daneɛle, melɛdi nyane dapɛne nsa.

³Aleɛ kpalɛ biala angɔ me kunlu. Meanli nane yɛɛ meanno nwanye. Meamkpokpa toonwo dapɛne nsa ne dwule.

⁴Siane ne mɔɔ lumua la, ye kenle abulanwiɔ nee nna ne azo, ɛnee megyi Azule kpole Taegelese ne anloa.

⁵ Memanle me nye zo, na menwunle nrenya bie mɔɔ wula lenen tɛladeɛ na ɔhye Yufaze ezukoa nvutuke akyeso la.

⁶Ye sonlabaka ne ta kɛ bɛlele ezukoa bolɛ, yɛɛ ɔ nyunlu maanle ne ta kɛ ɛsɛlɛmanye, ɔ nye sɔ kɛ tɛkɛ, yɛɛ ɔ sa nee ɔ gyakɛ anwo ta kɛ kɔbele mɔɔ bɛdu nu la; ɔ ne dielie kɛ menli ɛwolaa bie ane la.

⁷Medame Daneɛle, me ngome ala a menwunle ɛnyelɛzodeɛnwunlɛ ne a. Menli mɔɔ nee me wɔ ɛkɛ ne la annwu ɛhwee. Ɛzulolɛ kpole bie hanle bɛ manle bɛnriandile bɛhɔveale.

⁸Yemɔti ɔhale me ngomekye ala mɔɔ menwunle ɛnyelɛzodeɛnwunlɛ ne la. Me nwo mɔra dule; ɛkɛ ne ala me nyunlu yɛle ɛzulolɛ bie mɔɔ awie mɔɔ ze me la nwunle me a anrɛɛ ɔnrɛnwu me sonla holɛ, na me nwo bɛlɛle me.

⁹Akee mendele ɔ ne, na mendɔle aze mutule nu na me nye zo bulule me.

¹⁰Na ɛsalɛ bie zɔle me manle membutule me sa nee me gyakɛ abonyi zo, na ɛnee me nwo tɛwozo me.

¹¹Na ɔzele me kɛ, “O Daneɛle mɔɔ Nyamenle kulo wɔ a, dwazo gyinla ɛ gyakɛ anu na tie mɔɔ melɛka meahile wɔ la, ɔboalekɛ bɛzoa me ɛ nwo ɛke.” Mɔɔ ɔ nloa wɔ zolɛ ɔlɛka edwɛkɛ ɛhye yeahile me la, mendwazole mengyinlanle; ɛnee me nwo tɛwozo me.

¹²Ɔhanle ɔhilele me kɛ “Daneɛle, mmasulo, ɔluakɛ ɔvi kenle ko ne mɔɔ ɛnyianle adwenle kɛ ɛbɛlɛ ɛ nwo aze wɔamaa Nyamenle, wɔakpondɛ ndelebɛbo la yɛɛ wɔ ɛbizalɛdeɛ ne dwule Nyamenle anyunlu a, na mɔɔ wɔbiza la ati yɛɛ mera a.

¹³ Pɛhyea maanle ne awozinli nu soanvolɛ ne nee me dwudwule toonwo kenle abulanwiɔ nee ko. Nzinlii Nyamenle soanvolɛ mgbanyima ne mɔ ko mɔɔ bɛfɛlɛ ye Maekeɛle la raboale me, yemɔti mengyakyile ye ɛkɛ kɛ ɔ nee Pɛhyea maanle ne awozinli nu soanvolɛ ne ɛgyinla nwolɛ,

¹⁴yɛɛ mera kɛ mebaha mɔɔ kenle bie bazi wɔ menli ne anwo zo la meahile wɔ a. Ɛnyelɛzodeɛnwunlɛ ɛhye kile wɔ mɔɔ kenle bie basisi la.”

¹⁵Ɔhanle edwɛkɛ ɛhye ɔhilele me la, membutule me nye aze, na mendɔle mumule.

¹⁶Na Nyamenle soanvolɛ bie mɔɔ le kɛ sonla la vale ɔ sa hanle me nloa na membukele me nloa mendendɛle. Menganle mengilele ahenle ne mɔɔ gyi me nyunlu ɛkɛ ne la kɛ, “Me menle, ɛnyelɛzodeɛnwunlɛ ɛhye ɛmaa me nwo amuala ɛlɛfofo me, menlɛ anwosesebɛ biala.

¹⁷Kɛ menwɔzi menwɔyɛ na wɔ akɛlɛ, me nee me menle adendɛ ɛ? Menlɛ anwosesebɛ yɛɛ me ɛnwomenle ɛwie.”

¹⁸Eza Nyamenle soanvolɛ ne mɔɔ le kɛ sonla la vale ɔ sa hanle me, na me nwo gyinlanle me.

¹⁹Ɔzele me kɛ, “Ayi, Nyamenle kulo wɔ kpole, mmasulo. Anzonudwolɛ ɛha wɔ. Gyinla ɛ nwo na si ahonle.” Ɔhanle zɔhane la, akee menyianle anwosesebɛ na menganle kɛ, “Me menle, tendɛ, na kɛkala, wɔmaa menyia anwosesebɛ.”

²⁰Ɔbizale me kɛ, “Asoo ɛze deɛ mɔɔ yemɔti mera ɛ nwo ɛke la? Mera mebaha edwɛkɛ mɔɔ bɛhɛlɛ ye wɔ Nɔhalɛ Buluku ne anu la meahile wɔ. Kɛkala ɔwɔ kɛ mesia mekɔ me nee Pɛhyea maanle ne awozinli nu soanvolɛ ne kɔko. Ɛhye anzi Gilisi awozinli nu soanvolɛ ne ɔdaye ɔbadwazo me nwo zo. Menlɛ boavolɛ biala kɛ Yizilayɛ Nyamenle soanvolɛ Maekeɛle ala.