Read Nzema Dan 11 Bible Online

Dan 11 - Nzema bible

Dan 11

¹“Mɔɔ Midianli Dalayɛse lile ebia ne la, ɛvolɛ ne ala anu, mengyinlanle ɔ nzi memanle ye anwosesebɛ.

²Na kɛkala meka nɔhalɛ ne meahile wɔ.” Nyamenle soanvolɛ ne hanle kɛ, “Arelemgbunli nsa bieko badwazo azie Pɛhyea maanle ne. Ko baradɔ zolɛ nna na yemɔ, ɔbanyia ezukoa yeadɛla alumua ɛdeɛ nsa ne. Kɛmɔ ɔbayɛ kpole, yeayɛ sukoavolɛ yeadɛla ɛhendeɛ ne mɔ la ati ɔbaheha ɔ nwo yeatia Gilisi maanle ne.

³“Nzinlii belemgbunli kpole bie ɔdaye ɔbara; ɔbava tumi kpole a yeazie maanle ne a, na yeayɛ debie biala mɔɔ ɔdaye ɔkulo la.

⁴Mekɛ mɔɔ ye tumi ne kɛyɛ kpole kpalɛ la akee ye belemgbunlililɛ ne bagua na ye maanle ne anu ahyɛ nna. Awie mɔ gyɛne mɔɔ ɛmbikye ebia ne fee la a banlea maanzinli ne mɔ azo a, yɛɛ maanle ɛbulɛ ne ɛnrɛdwu ye ɛdeɛ ne, ɔboalekɛ maanle ne anu bagyigya.

⁵“Akee Yigyibiti belemgbunli ne banyia tumi, noko ye safohyenlema ne mɔ ko banyia tumi adɛla ye, yɛɛ ye maanle ne bayɛ maanle kpole.

⁶Mekɛ bahɔ bie la Yigyibiti nee Selea arelemgbunli bayɛ konle nu agɔnwolɛyɛlɛ ngyehyɛlɛ na yeava ɔ ra raalɛ yeamaa Selea belemgbunli ne agya, amaa anzonudwolɛ arala bɛ avinli. Noko ɛhye ɛnrɛhyɛ; belemgbunli ne nee ɔ mra ne mɔ ɛnrɛli agyinla. Bɛbahu raalɛ ne, ye sonvolɛma, ɔ ra ne, yɛɛ ɔ hu.

⁷Ɔnrɛhyɛ biala raalɛ ne anwo sonla barali ebia ne. Ɔbahɔ Selea belemgbunli ne ɛlɔnema ne anwo zo na yeabubu bɛ aranemgbole ne, yeadua bɛ kakɛ yeali bɛ nwo zo konim.

⁸Ɔbazoa bɛ awozonle nee bɛ ananze ne mɔ yɛɛ ninyɛne mɔɔ bɛva ezukoa nvutuke nee dwɛtɛ fufule bɛyɛ la yeazia yeahɔ Yigyibiti. Akee mekɛ dɔɔnwo baze mɔɔ ɔnrɛva konle ɔnrɛdoa Selea belemgbunli bieko a.

⁹Nzinlii Selea belemgbunli bara Yigyibiti belemgbunli anwo zo, noko ɔnrɛnyia gyinlagyakɛ, ɔbazia yeahɔ ye maanle nu.

¹⁰“Selea belemgbunli ne amra baboɔboa ɛlɔnema dɔɔnwo anloa kɛ bɛ nee bɛ kɔ konle. Ɛlɔnema ne anu ekpunli ko baho toonwo ahɔdwu Yigyibiti belemgbunli ne aranemgbole ne anwo.

¹¹Ɛhye bamaa ɛya ahu Yigyibiti belemgbunli ne na yeavinde yearadoa Selea belemgbunli ne ɔ nee ye bɛabɔ ye zo na yeali Selea belemgbunli ne ɛlɔnema pemgbenleamgbe ne anwo zo konim.

¹²Ɔbali fɛlɛko kɛ yeli Selea ɛlɔnema pemgbenleamgbe ne anwo zo konim na yehu menli apenle apenle bulu bulu a, noko ye konimlilɛ ne ɛnrɛhyɛ.

¹³“Selea belemgbunli ne bazia ahɔboɔboa ɛlɔnema dɔɔnwo kpalɛ mɔɔ tɛla alumua ɛdeɛ ne la anloa, na mekɛ bie dwu a yeava bɛ nee konle ninyɛne yeara.

¹⁴Mekɛ zɔhane mɔ anu menli dɔɔnwo badwazo atia Yigyibiti belemgbunli ne, na ɔlua ɛnyelɛzodeɛnwunlɛ mɔɔ ɛdawɔ Daneɛle wɔ maanlema bie mɔ mɔɔ di mgbonde la banwu ye la ati, bɛbamia bɛ nwo kɛ bɛkile bɛ mrenya, noko bɛnrɛhola gyinla.

¹⁵Akee Selea belemgbunli ne barateta suakpole ne mɔɔ bɛbɔ nwolɛ bane la na yeava sua ne. Yigyibiti ɛlɔnema bagua adu aze; yɛɛ ye menli mɔɔ ze konle nye zo kpalɛ bɔbɔ la ɛnrɛhola gyinla, ɔluakɛ bɛnrɛnyia anwosesebɛ.

¹⁶Selea belemgbunli ne bayɛ mɔɔ ɔdaye ɔkulo la. Awie biala ɛnrɛhola ɔ nyunlu gyinla. Ɔbava azɛlɛ ne mɔɔ bɛva bɛbɔ ɛwɔkɛ la kpokpoti yeayɛ ye ɛdeɛ.

¹⁷“Selea belemgbunli ne babɔ adwenle ava ye ɛlɔnema ne kɔsɔɔti apɛ adenle ahɔ ye kpɔvolɛ ne maanle nu na ɔ nee ye ayɛ anzonudwolɛ ngyehyɛlɛ na bɛali zolɛ. Ɔbava ɔ ra raalɛ yeamaa ye kpɔvolɛ ne agya, amaa yeanyia adenle yeazɛkye ye kpɔvolɛ ne maanle ne, noko ye adwenle ngyehyɛlɛ ne ɛnrɛli munli.

¹⁸Nzinlii ɔbaluolua ɛnweanloa yeateta maanle maanle ɔ nee bɛ aho yeavo bie mɔ dɔɔnwo anwo zo. Na safohyenlema kpanyinli bie vi maanle gyɛne nu baraha ye aze. Nɔhalɛ, ɔbamaa Selea belemgbunli ne ninyɛmunli ne mɔ abu azia ye.

¹⁹Belemgbunli ne bazia ahɔ ye aranemgbole ne anu wɔ ɔdaye ye maanle nu, noko bɛbarali ɔ nwo zo konim wɔ ɛkɛ na ɔnrɛhola ɔ nwo zo ma bieko.

²⁰“Belemgbunli ko noko badwazo ɔ nzi mɔɔ batete adwule wɔ maanle ne anu amuala a, noko ɔnrɛhyɛ biala na bɛahu ye. Bɛnrɛhu ye konle nu anzɛɛ ɛyavalɛ nu.”

²¹Nyamenle soanvolɛ ne hɔle zolɛ hilele nuhua kɛ, “Belemgbunli bieko mɔɔ tɛ awie a bazɔ ɔ sa ava ye azie ebia zo la bavinde azie Selea maanle ne; ɔnrɛhakye bɛ ɔnrɛzie, ɔbalua mɛlɛbɛla adenle zo a yeazie ɔ nwo belemgbunli a.

²²Ɛlɔne biala ɛnrɛhola ɔ nyunlu gyinla, yɛɛ ɔnrɛdo Nyamenle Sɛlɛvolɛ Kpanyinli ne bɔbɔ sɛbe.

²³Maanle mɔɔ ɔbazie la le ekyi bie, noko ɔbava mɛlɛbɛla adenle zo ɔ nee maanle maanle ayɛ ngyehyɛlɛ yeahakyi ɔ nwo belemgbunli kpole.

²⁴Ɔbadwazo maanle maanle mɔɔ gyigyi boɛ la anwo zo arɛlevilɛ nu yeakpokpo bɛ, na yeayɛ ninyɛne mɔɔ kenle bie maanle nu ɔ ze mɔ nee ɔ nlenya mɔ anyɛ bie fee la, na ɔ nee ɔ sa zo ahyɛ ninyɛne mɔɔ bɛwua la bɛali. Ɔbabɔ adwenle yeabɔ ɔ nwo bane mɔɔ kpɔvolɛ ɛngola ɛmbikye ye la, noko ɔnrɛli agyinla.

²⁵“Ɔbazi ahonle yeava ɛlɔne kpole yeahɔteta Yigyibiti belemgbunli ne. Yigyibiti belemgbunli ne ɔdaye ɔbava ɛlɔnema mɔɔ ze konle nye zo la dɔɔnwo nee ye ahɔbɔ ye zo, na ɔnrɛhola Selea belemgbunli ne anyunlu gyinla, ɔluakɛ Selea belemgbunli ne babɛlɛbɛla ye yeawie ye yɛ.

²⁶Menli bɔbɔ mɔɔ nee ye di, nee ye no la a bado ye bie nu a. Bɛbahu ye ɛlɔnema ne anu dɔɔnwo na mɔɔ kɛha la agua ɛbɔ nu.

²⁷Arelemgbunli nwiɔ ne badɛnla ɛkponle ko anwo ali adwelie, noko adalɛ ɔ, biala babɔ ye kpɔkɛ ɔ ti anu, yemɔti mɔɔ bɛbaha la biala bayɛ bɛ gye zo amanie, ɔluakɛ mekɛ ne mɔɔ bɛhyehyɛ bɛdo ɛkɛ la ɛtɛdwule.

²⁸Selea belemgbunli ne bava ninyɛne dɔɔnwo ne mɔɔ ɔnyianle bɛ konle nu la azia ahɔ sua nu, yɛɛ ɔbava adwenle kɛ ɔsɛkye Nyamenle menli ne nyamenlezonlenlɛ ne. Ɔbayɛ mɔɔ ɔdaye ɔkulo la na yeazia yeahɔ ye maanle nu.

²⁹“Saa mekɛ ne dwu a ɔbadwazo Yigyibiti anwo zo bieko, na mekɛ ɛhye ɛnrɛyɛ kɛ alumua mekɛ ɛdeɛ ne la.

³⁰Ɔboalekɛ Wulomuma bava meli aradoa ye bɛ nee ye aho. Ye ahonle badu na yeagua ye ɔ nzi. “Ɔbava ɛya kpole yeazia ɔ nzi yeara Nyamenle menli ne nyamenlezonlenlɛ ne ɛzɛkyelɛ. Ɔsia ɔba a, ɔbali menli mɔɔ ɛgyakyi Nyamenle ɛzonlenlɛ la folɛdulɛ zo.

³¹ Ye ɛlɔnema ne bie mɔ bagua Ɛzonlenlɛ Sua ne anwo evinli, bɛazɛkye aranemgbole ne, na bɛadua dahuu azubɔlɛ nee ɛyelalɛ azubɔdeɛ ɛvalɛ. Akee bɛbava ‘Munzudeɛ ne mɔɔ bɔ maanle’ la bɛazie Ɛzonlenlɛ Sua ne anu.

³²Belemgbunli ne babɛlɛbɛla bɛdabɛ mɔɔ bɛgyakyi Nyamenle ɛzonlenlɛ la yeamaa bɛali ɔ nzi, na bɛdabɛ mɔɔ bɛze bɛ Nyamenle ne la bagyinla bɛ gyakɛ anu na bɛaheha bɛ nwo.

³³Bɛdabɛ mɔɔ bɛze nrɛlɛbɛ mɔɔ bɛwɔ Nyamenle menli ne anu la bayɛ toonwo bɛamaa menli dɔɔnwo anyia ndelebɛbo, noko bie mɔ badɔ dadeɛ nloa, bɛbayela bie mɔ, bɛbahye bie mɔ nuokɛ, bɛawua bie mɔ anwo ninyɛne mekɛ dɔɔnwo anu.

³⁴Saa Nyamenle menli ne kpo aze a, moalɛ ekyi bie a bɛbanyia ye a. Menli dɔɔnwo bava mɛlɛbɛla araboka bɛ.

³⁵Bɛdabɛ mɔɔ bɛze nrɛlɛbɛ la bie mɔ badu koti, amaa bɛahakyi bɛ subane nee bɛ nyɛleɛ na bɛ nwo ade saanwu ahɔkpula kɛ mekɛ ne kɛdwu la, ɔluakɛ mekɛ ne mɔɔ Nyamenle ɛhyehyɛ ɛdo ɛkɛ ne la ɛtɛdwule.

³⁶ “Selea belemgbunli ne bayɛ debie biala mɔɔ ɔdaye ɔkulo la; ɔbamemaa ɔ nwo zo yeayɛ ɔ nwo kpole yeadɛla nyamenle biala, na yeaheha azibɛnwo edwɛkɛ yeatia nyamenle ne mɔ Nyamenle ne. Ɔbayɛ ɛhye yeahɔdwu mekɛ mɔɔ Nyamenle kɛhwe ɔ nzo la, ɔluakɛ ɔwɔ kɛ mɔɔ Nyamenle ɛhyehyɛ ɛdo ɛkɛ la yɛ zɔhane.

³⁷Belemgbunli ne bakpo nyamenle ne mɔ mɔɔ ɔ nlenya mɔ zonlenle la, yɛɛ nyamenle ne mɔɔ mraalɛ anye die nwolɛ la. Ɔbakpo nyamenle biala, ɔluakɛ ɔbamemaa ɔ nwo zo yeadɛla nyamenle kɔsɔɔti.

³⁸Ɔbazonle aranemgbole nyamenle ɛdeɛ ne yeagyakyi ɛhye mɔ. Ɔbazonle nyamenle mɔɔ ɔ nlenya mɔ ɛnze ye la; ɔbava ezukoa nvutuke nee dwɛtɛ fufule, awolɛ mɔɔ sonle bolɛ nee ahyɛlɛ ninyɛne mɔɔ bɛ awolɛ yɛ se la yeazonle ye.

³⁹Zɔhane ala a ɔbava yeayɛ maanle zo nyamenle mɔɔ kɛzɔ ɔ nye la wɔ aranemgbole ne mɔ anu a. Bɛdabɛ mɔɔ bɛkɛlie ye bɛkɛdo nu kɛ ɔle bɛ belemgbunli la, ɔbali bɛ eni kpole kpalɛ, ɔbamaa bɛ gyinlabelɛ na yeamaa bɛ azɛlɛ kɛ bɛ ahyɛlɛdeɛ ɔ.

⁴⁰“Ɔka ekyii na mekɛ mɔɔ Nyamenle ɛhile la adwu a, Yigyibiti belemgbunli ne bava konle ahɔdoa Selea belemgbunli ne. Selea belemgbunli ne bava ye anwosesebɛ muala, ye konle ehwili ne mɔ, ye mgbɔnwɔ nee ye meli dɔɔnwo ne ara ɔ nwo zo kɛ ahumuakyima. Ɔbahɔ maanle dɔɔnwo anwo zo na yeali bɛ nwo zo konim.

⁴¹Ɔbahɔvo azɛlɛ ne mɔɔ Nyamenle ɛva ɛbɔ ɛwɔkɛ la azo. Menli apenle apenle badɔ, noko bɛbalie Yidɔmma nee Mowabema nee Amɔn maanle mumua ne bɛavi ɔ sa nu.

⁴²Ɔbaho yeava maanle dɔɔnwo, na Yigyibiti ɛnrɛvi nu.

⁴³Yigyibiti anwonyia kpokpoti: ezukoa nvutuke, dwɛtɛ fufule, yɛɛ debie biala mɔɔ sonle bolɛ la bapɛ ali ye ɛkɛ. Ɔbaho yeava Lebea nee Sudan.

⁴⁴Noko nrɛlaleɛ mɔɔ ɔbade yeavi aduduleɛ nee sɔlɔ la bamaa ye ahonle adu na yeava ɛya kpole yeahɔ bɛ nwo zo yeahɔzɛkye menli dɔɔnwo.

⁴⁵Ɔbazi ye arelemgbunli ndanlɛ azua ne mɔ wɔ nyevile ne nee boka ne mɔɔ Ɛzonlenlɛ Sua ne gyi zolɛ la avinli, noko ɔbawu; ɔnrɛnyia awie ɛnrɛboa ye.”