Read Nzema Dan 12 Bible Online

Dan 12 - Nzema bible

Dan 12

¹ Nyamenle soanvolɛ ne mɔɔ wula Lenen tɛladeɛ ne la hanle kɛ, “Mekɛ zɔhane Nyamenle soanvolɛ Maekeɛle mɔɔ nea wɔ menli ne mɔ anwo zo la badwazo. Mekɛ zɔhane amaneɛnwunlɛ mɔɔ bie ɛtɛsile ɛlɛ la basisi, noko bɛbalie wɔ menli ne mɔ anu biala mɔɔ bɛkɛnwu kɛ bɛhɛlɛ ye duma wɔ Nyamenle buluku ne anu la ngoane.

² Menli mɔɔ ɛwu la anu dɔɔnwo badwazo ara ngoane nu; bie mɔ banyia ngoane mɔɔ ɛnlɛ awieleɛ, bie mɔ dɔɔnwo noko babɔ anyiemgba mɔɔ ɛnlɛ awieleɛ.

³Nrɛlɛbɛvolɛma mɔɔ wɔ nu la bada kɛ sɛnzɛne, yɛɛ bɛdabɛ mɔɔ bɛhilehile menli kpalɛyɛlɛ adenle la bada kɛ nwɔlɔra la wɔ mekɛ mɔɔ ɛnlɛ awieleɛ.

⁴ “Na wɔmɔ, Daneɛle, to buluku ne anu na sɔ ɔ nloa, yɛɛ mɔɔ wɔde la maa ɔha ɛ ti anu, kɔkpula awieleɛ mekɛ ne. Menli banriandi ahɔ ara, na ndelebɛbo bayɛ kpole.”

⁵Akee medame Daneɛle mendole me nye, na menwunle menli nwiɔ kɛ bɛgyigyi azule ne anloa, ko gyi azule ne foa ko yɛɛ ko ne ɔdaye ɔgyi ɔ nzi lɔ.

⁶Na membizale Nyamenle soanvolɛ ne mɔɔ wula lenen tɛladeɛ ne gyi azule ne azo la kɛ, “Kenlenzu a nwanwane ninyɛne ɛhye mɔ kɔsɔɔti kɛyɛ zɔhane a?”

⁷ Nyamenle soanvolɛ ne kpogyale ɔ sa amu nwiɔ zo anwomanyunlu; na mendele kɛ ɔlɛfa Tease Nyamenle ne yeaha ndane kɛ, “Saa ɛvolɛ nsa siane nsia ne dwu, na bɛwie Nyamenle menli ne kpɔdekpɔde yɛ a, ɛhye mɔ amuala bayɛ zɔhane.”

⁸Mendele edwɛkɛ ɛhye, na meande ɔ bo. Yemɔti membizale kɛ, “O me menle, kɛ ɛhye mɔ bazi awie ye ɛ?”

⁹Ɔbuale me kɛ, “Daneɛle, suzu ɛ nwo na bɛzɔ edwɛkɛ ne anloa, ɔnle kɛ bɛbɔ zolɛ kɔkpula awieleɛ mekɛ ne.

¹⁰ Menli dɔɔnwo bahakyi bɛ subane nee bɛ nyɛleɛ, ade bɛ nwo saanwu na bɛayɛ menli fofolɛ. Na amumuyɛma ɛdeɛ, bɛbahɔ zolɛ bɛayɛ ninyɛndane; bɛ biala ɛnrɛde ɔ bo. Nrɛlɛbɛvolɛma mɔɔ wɔ nu la ala a bade ɔ bo a.

¹¹ “Ɔvi mekɛ mɔɔ bɛbava bɛagyakyi dahuu azubɔlɛ nee ɛyelalɛ azubɔdeɛ ne ɛvalɛ na bɛava ‘Munzudeɛ ne mɔɔ bɔ Maanle’ la bɛazie Ɛzonlenlɛ Sua ne anu la bayɛ kenle ngoko apenle ko ɛya nwiɔ abulahɔnla.

¹²“Nyilalɛ ɛha sonla ne mɔɔ kɛhendɛ toonwo ɔkɛhɔdwu kenle apenle ko ɛya nsa abulasa nee nnu ne awieleɛ la!

¹³“Na wɔmɔ, Daneɛle, di nɔhalɛ kɔ awieleɛ. Ɛbawu, na awieleɛ mekɛ ne dwu a, ɛbagyinla ɛleka mɔɔ bɛhyehyɛ bɛmaa wɔ la.”