Read Nzema Dan 2 Bible Online

Dan 2 - Nzema bible

Dan 2

¹Nɛbukadenɛza lile ɛvolɛ nwiɔ wɔ ebia zo la ɔhanle ɛlalɛ na ɛzulolɛ hanle ye mɔɔ ɛnee ɔda a ɔnla a.

² Zɔhane ati ɔdole ɛsalɛ ɔvɛlɛle ngonyiama, silihyelɛma, adunyipɛlɛma, yɛɛ menli mɔɔ lɛ bɛ nye la, kɛ bɛrahile ye ɛlalɛ ne abo. Bɛ muala bɛrale belemgbunli ɛvɛlɛlɛ ne.

³Ɔzele bɛ kɛ, “Meha ɛlalɛ bie, na ɛlalɛ ne ɛha me ɛzulolɛ, yemɔti meda nwolɛ a ɔnla. Mekpondɛ kɛ mete ɔ bo.”

⁴Bɛbuale belemgbunli ne wɔ Arelam[1] aneɛ nu kɛ, “Nana, nyi kyɛ! Ka wɔ ɛlalɛ ne kile yɛ maa yɛhile ɔ bo.”

⁵Belemgbunli ne zele bɛ kɛ, “Meka nɔhalɛ ne meahile bɛ: Saa bɛangola bɛannwu ɛlalɛ ne bɛanga, bɛangile ɔ bo a, mebamaa bɛatete bɛ bɛahu bɛ, bɛabɔ bɛ awuke ne mɔ tɔɔ.

⁶Na saa bɛnwu ɛlalɛ ne bɛka na bɛkile ɔ bo a, mebahyɛ bɛ ninyɛne na meawula bɛ anyunlunyia. Zɔhane ati bɛha ɛlalɛ ne bɛhile me na bɛhile me ɔ bo.”

⁷Menli ne mɔ eza buale belemgbunli kɛ, “Nana, ka wɔ ɛlalɛ ne kile yɛ, na yɛkɛhile ɔ bo.”

⁸Belemgbunli ne buale bɛ kɛ, “Menwu adwenle mɔɔ bɛbɔ la. Bɛkpondɛ mekɛ, kɛmɔ bɛnwu kɛ me nye ɛbolo la ati, ɔboalekɛ bɛze kɛ mɔɔ meha la, ɔdaye ne ala ɛne;

⁹saa bɛannwu me ɛlalɛ ne bɛanga, bɛangile ɔ bo a, ɛza ko ala a mebava meahwi bɛ a. Bɛyɛ ko kɛ bɛbɔ adalɛ bɛahwenlehwenle bɛ bo aze bɛava bɛazɛkye mekɛ. Bɛha ɛlalɛ ne bɛhile me bɛmaa menwu kɛ bɛkɛhola ɔ bo kile.”

¹⁰Menli ne mɔ hanle hilele belemgbunli kɛ, “Awie ko ɛnle aleɛabo mɔɔ kɛhola debie mɔɔ belemgbunli ɛbiza la yɛ a, yɛɛ belemgbunli kpole biala ɛnle ɛkɛ mɔɔ ɛmaa ngonyiama, silihyelɛma, yɛɛ adunyipɛlɛma ɛyɛ debie zɛhae bie ɛlɛ a.

¹¹Mɔɔ Nana ɛbiza la, sonla ɛnrɛhola ɛnrɛyɛ, kyesɛ awozonle ne mɔ mɔɔ ɛnle nwonane la na ahola ye yɛ.”

¹²Edwɛkɛ ɛhye manle belemgbunli ahonle futule kpole, yemɔti ɔmanle bɛbɔle nolo kɛ bɛhu nrɛlɛbɛvolɛma ne mɔɔ wɔ Babelɔn maanle nu la amuala.

¹³Nolo ne dwule maanle ne anu ɛleka biala kɛ bɛhu menli zɔhane mɔ kɔsɔɔti, na bɛkpondɛle Daneɛle nee ɔ gɔnwo mɔ abo zo kɛ bɛku bɛ.

¹⁴Na Daneɛle hɔbizale Aleɔko, belemgbunli sinzavolɛma kpanyinli ne, mɔɔ bɛva menli ɛhunlɛ ne bɛwula ɔ sa nu la nrɛlɛbɛ zo nee enililɛ nu

¹⁵kɛ, “Duzu ati a belemgbunli ɛli mɛla ɛzulolɛ ɛhye a?” Na Aleɔko yele edwɛkɛ ne dole ɔ nyunlu.

¹⁶Daneɛle hɔzɛlɛle belemgbunli ne kɛ ɔmaa ye mekɛ ɔmaa ɔrahile ye ɛlalɛ ne abo ɔhile ye.

¹⁷Akee Daneɛle hɔle sua nu na ɔhɔbɔle ɔ gɔnwo mɔ, Hananaya, Maehyeeyɛle, yɛɛ Azalaya amaneɛ.

¹⁸Ɔhanle ɔhilele bɛ kɛ bɛzɛlɛ Nyamenle ne mɔɔ wɔ anwuma la anwunvɔnezelɛ wɔ ɛhye anwo na bɛangu bɛ nee Babelɔn nrɛlɛbɛvolɛma ne mɔ.

¹⁹Kenle ko ne nɔe ne Nyamenle luale ɛnyelɛzodeɛnwunlɛ zo yele ɛlalɛ ne hilele Daneɛle na ɔhilele ye ɔ bo. Na Daneɛle yele Nyamenle ayɛlɛ zele kɛ,

²⁰“Bɛye Nyamenle ayɛlɛ dahuu! ɔle nrɛlɛbɛvolɛ, ɔlɛ tumi.

²¹Ɔkakyi mekɛ, ɔkakyi ɛlobɔ; ɔtu arelemgbunli, ɔsie arelemgbunli; ɔmaa nrɛlɛbɛvolɛ nwu nrɛlɛbɛ, na ɔmaa mɔɔ lɛ ndelebɛbo la adwenle;

²²ɔye nwanwane ninyɛne mɔɔ vea la ɔkile; ɔze mɔɔ wɔ awozinli nu, yɛɛ ɔ nee wienyi a de a.

²³O, egya mɔ Nyamenle, meyɛ wɔ mo, na meye wɔ ayɛlɛ, ɔluakɛ wɔmaa me nrɛlɛbɛ, wɔmaa me anwosesebɛ, yɛɛ wɔye mɔɔ yɛbizale la wɔhile me; wɔmaa yɛnwu mɔɔ belemgbunli kpondɛ la.”

²⁴Akee Daneɛle hɔle sinzavolɛma kpanyinli Aleɔko mɔɔ belemgbunli ɛva nrɛlɛbɛvolɛma mɔɔ bɛku bɛ wɔ Babelɔn la ɛhunlɛ ne ɛwula ɔ sa nu la ɛkɛ na ɔhanle ɔhilele ye kɛ, “Mmaku Babelɔn nrɛlɛbɛvolɛma ne; wɔmɔ fa me kɔ belemgbunli anyunlu na mebahile ye ɛlalɛ ne abo.”

²⁵Yemɔti ndɛndɛ ne ala Aleɔko vale Daneɛle hɔle belemgbunli suakunlu ɛkɛ na ɔhanle kɛ, “Dwudama mɔɔ bɛhyele bɛ nuokɛ bɛrale la anu ko se ɔbahola yeahile belemgbunli ɛlalɛ ne abo.”

²⁶Belemgbunli ne bizale Daneɛle mɔɔ eza bɛfɛlɛ ye Bɛletihyazaa la kɛ, “Ɛkɛhola ɛkɛha ɛlalɛ holɛ ko mɔɔ menganle la na ɛkɛhile ɔ bo ɛkɛhile me ɔ?”

²⁷Daneɛle buale ye kɛ, “Nana, nrɛlɛbɛvolɛ, silikyevolɛ, ngonyiayelɛnli, anzɛɛ nwɔlɔra kengavolɛ biala ɛnle ewiade mɔɔ kɛhola kɛyɛ deɛ ne mɔɔ belemgbunli ɛbiza la.

²⁸Yɛlɛ Nyamenle wɔ anwuma mɔɔ sa fealera nu ninyɛne gua zolɛ a, na yemɔ yɛɛ ɛye mɔɔ kenle bie bazi la ɛhile Nana a. Ɛlalɛ ne mɔɔ Nana hanle, nee ɛnyelɛzodeɛnwunlɛ ne mɔ mɔɔ ɛnwunle bɛ wɔ nla nu la, bɛmɛ ɛne:

²⁹“Nana, mɔɔ ɛwɔ nla nu la, ɛhanle ɛlalɛ wɔ mɔɔ kenle bie bazi la anwo; na Nyamenle mɔɔ sa fealera nu ninyɛne gua zolɛ la hilele wɔ ninyɛne mɔɔ basisi la.

³⁰Tɛ kɛ asɛɛ mame meze nrɛlɛbɛ metɛla nrɛlɛbɛvolɛma mɔɔ ɛha la ɔ, na bɛmaa wɔanwu wɔ ɛlalɛ ne abo la ati ɔ.

³¹“Nana, ɛnwunle ananze totohyia anwo ɛzulolɛ bie mɔɔ ta kpole kpalɛ, mɔɔ ɛnea ye a ɔnyɛ boɛ la kɛ ɔgyi ɛ nyunlu ɛkɛ.

³²Ananze ɛhye ati le ezukoa nvutuke, ɔ kɛnra nee ɔ sa ne mɔ le dwɛtɛ fufule, ɔ ko nee ye ɛzɔlɛ le kɔbele,

³³ɔ gyakɛ agbɔma ne mɔ le mbulalɛ, yɛɛ ɔ gyakɛ babonle ne mɔ ko biala foa ko le bulalɛ yɛɛ foa ko le ɛva.

³⁴Mekɛ mɔɔ ɛ nye gyi nwolɛ ɛlɛnea la, ɛnwunle kɛ bolɛ mɔɔ tɛ awie a kpukele la angomekye vi ɛleka bie rafinle ananze ne agyakɛ babonle foa ko bulalɛ, foa ko ɛva ne azo na ɔbubule ye dwɔkɔdwɔkɔ.

³⁵Akee bulalɛ ne, ɛva ne, kɔbele ne, dwɛtɛ fufule ne, yɛɛ ezukoa nvutuke ne mɔ kɔsɔɔti bubule na bɛdinle bɛyɛle motomoto kɛ munlutu; na anwoma ne bɔle ye hɔle mɔɔ bɛnnwu ɔ bo zo a. Bolɛ ne mɔɔ rabubule ananze ne la nyinle mindomindo kɛ boka la na ɔhedale azɛlɛ ye azo.

³⁶“Ɛlalɛ ne mɔɔ Nana hanle la ɛne, na akee mekile ɔ bo.

³⁷Wɔmɔ a ɛle arelemgbunli nu belemgbunli a, yɛɛ Nyamenle ne mɔɔ wɔ anwuma la ɛyɛ wɔ maanle maanle belemgbunli, yemaa wɔ tumi, anwosesebɛ, yɛɛ anyunlunyia.

³⁸Ɛ sa nu yɛɛ yeva menli kɔsɔɔti mɔɔ wɔ azɛlɛ ye azo, nane, yɛɛ nloma yewula a, kɛ ɛzie bɛ. Nana, wɔmɔ a ɛle ezukoa nvutuke etile ne a.

³⁹Ɔvi ɛ nwo zo, belemgbunli bieko badwazo, ye tumi ne ɛnrɛdwu wɔ ɛdeɛ ne. Belemgbunli mɔɔ tɔ zolɛ nsa la bara, na yemɔ a le kɔbele ne, na ɔdaye noko ɔbazie maanle maanle kɔsɔɔti.

⁴⁰Akee belemgbunli mɔɔ tɔ zolɛ nna, mɔɔ yɛ se kɛ bulalɛ la bara. Kɛmɔ bulalɛ de la, ɔbabubu ninyɛne muala anu, ɔboalekɛ bulalɛ bubu ninyɛne nu dwɔkɔdwɔkɔ.

⁴¹Na kɛmɔ ɛnwunle kɛ ananze ne agyakɛ babonle ne nee mrɛlɛsɛka ne mɔ foa ko le ɛva na foa ko le bulalɛ la, zɔhane ala yɛɛ maanle zɔhane bayɛ se noko eza nuhua bahyɛ nwiɔ a.

⁴²Eza kɛmɔ egyakɛ mrɛlɛsɛka ne foa ko le ɛva, foa ko le bulalɛ la, zɔhane ala yɛɛ maanle ne foa ko bayɛ se na foa ko ado a.

⁴³Ɛnwunle kɛ bulalɛ ne nee ɛva ne ɛli afonla; ɛhye kile kɛ maanle ne anu amra balua agyalɛ zo ali ngamɔnu, noko ɔnrɛyɛ boɛ, ɔluakɛ bulalɛ nee ɛva ɛngola ɛnfonla.

⁴⁴Mekɛ mɔɔ maanle maanle ɛhye mɔ wɔ zolɛ la Nyamenle bamaa maanle ko avinde, na ɔbahomo maanle zɔhane mɔ anwo zo yeamaa bɛagolo. Maanle ɛhye badɛnla ɛkɛ ne dahuu, awie ɛnrɛhola ɛnrɛzɛkye ye kenle bie maanle nu, yɛɛ awie mɔ gyɛne ɛnrɛhola ɛnrɛlie maanle ne ɛnrɛbu,

⁴⁵kɛmɔ ɛnwunle bolɛ ne mɔɔ awie ɛnlɛ nu mɔɔ vi boka bie azo radinle bulalɛ ne, kɔbele ne, ɛva ne, dwɛtɛ fufule ne, yɛɛ ezukoa nvutuke ne la. Nana, Nyamenle bedevinli yɛɛ ɛha wɔ ɛlalɛ ɛhye a. Ɛlalɛ ne ala a meha mehile wɔ la, yɛɛ ɔ bo kɔsɔɔ a mehile la. Ɔnrɛkpa nwolɛ.”

⁴⁶Belemgbunli Nɛbukadenɛza butule Daneɛle anyunlu mutule nu yɛle ye mo, na ɔzele kɛ bɛva azubɔdeɛ nee ɛyɛlɛ bɛbɔ azu bɛmaa Daneɛle.

⁴⁷Belemgbunli ne hanle hilele Daneɛle kɛ, “Nɔhalɛ, wɔ Nyamenle ne le nyamenle kɔsɔɔti bɛ Nyamenle, yɛɛ ɔle arelemgbunli kɔsɔɔti bɛ Awulae. Ɔle Nyamenle mɔɔ sa fealera nu ninyɛne gua zolɛ a. Ɔboalekɛ wɔhola wɔla me fealera nu edwɛkɛ ɛhye ali.”

⁴⁸Akee Belemgbunli Nɛbukadenɛza lile Daneɛle eni kpole kpalɛ na ɔmanle ye gyinlabelɛ kpole, ɔhyɛle ye ninyɛne mgbole. Ɔyɛle Daneɛle Babelɔn maanle ne amɛnlado na ɔyɛle ye nrɛlɛbɛvolɛma mɔɔ wɔ Babelɔn la kɔsɔɔti kpanyinli.

⁴⁹Na Daneɛle zɛlɛle belemgbunli ne manle ɔvale Babelɔn maanle ne anwo amaamuo biala ɔwulale Hyeedelake, Mihyɛke, yɛɛ Abɛdenɛgo asa anu kɛ bɛnlea zolɛ; na yemɔ Daneɛle, ɔhale belemgbunli suakunlu ɛkɛ.