Read Nzema Dan 3 Bible Online

Dan 3 - Nzema bible

Dan 3

¹Belemgbunli Nɛbukadenɛza manle bɛyɛle ezukoa nvutuke ananze bɛziele Dula azɛlɛ fɛɛnye ne azo wɔ Babelɔn maanle nu. Ananze ne tendenle le mita abulanwiɔ nee nsuu yɛɛ ye tɛtɛlɛ le asɛɛ mita nsa.

²Akee ɔmanle bɛhɔvale maanle ne anu mgbanyima: arelemgbunli, amɛnladoma, mgbanyima mɔɔ tu arane folɛ, gyazoneavolɛma, ndɛnebuavolɛma, edwɛkɛdivolɛma, yɛɛ maanle maanle ne mɔ anu mbɔlɔba mgbanyinli kɛ bɛrɛla bɛmaa bɛvinde ananze ne mɔɔ ɔdaye Nɛbukadenɛza yemaa bɛzie la.

³Yemɔti arelemgbunli, amɛnladoma, maanzinlizoneavolɛma, folɛtuvoma, gyazoneavolɛma, ndɛnebuavolɛma, edwɛkɛdivolɛma, yɛɛ maanle maanle ne mɔ anu mbɔlɔba mgbanyinli rayiale ananze ne mɔɔ belemgbunli ɛmaa bɛzie, mɔɔ bɛfinde ye la anyunlu.

⁴Akee nolobɔvo ne vale ɛnelɛ kpole bie bɔle nolo kɛ, “Maanlema mɔɔ ka aneɛ ngakyile mɔɔ ɛrayia ɛke la,

⁵saa bɛte kɛ bɛlɛbɔ aweɛne ndendenle ne mɔ, getaa ngyikyi nee mgbole, fulutu, ɛweɛne, yɛɛ agole ngakyile biala a, awie biala ɛdu ɛdɔ ɛzonle ezukoa nvutuke ananze ne mɔɔ belemgbunli Nɛbukadenɛza ɛzie la.

⁶Awie biala mɔɔ kɛde, na yeangoto yeanzonle ezukoa nvutuke ananze ne la, bɛhye ye bɛdo sendɔlɔra nu bɛyela ye.”

⁷Yemɔti, mekɛ mɔɔ maanlema mɔɔ ka aneɛ ngakyile mɔɔ rayiale la dele aweɛne ndendenle ne mɔ ane, getaa ngyikyi nee mgbole ne mɔ ane, fulutu nee ɛweɛne yɛɛ agole ngakyile ne mɔ ane la, bɛdule bɛguale bɛzonlenle ezukoa nvutuke ananze ne mɔɔ Nɛbukadenɛza ɛzie la.

⁸Mekɛ ɛhye anu, Babelɔnoma bie mɔ yele bɛ nyunlu kɛ bɛtoɔdoa Dwuuma ne mɔ.

⁹Bɛhanle bɛhilele Belemgbunli Nɛbukadenɛza kɛ, “Belemgbunli, nyi kyɛ!

¹⁰Wɔmɔ belemgbunli, wɔli mɛla kɛ awie biala mɔɔ kɛde aweɛne ndendenle ne, fulutu, getaa ngyikyi nee mgbole, nee ɛweɛne, yɛɛ agole ngakyile ne mɔ ane la ɛdu ɛdɔ ɛzonle ezukoa nvutuke ananze ne mɔɔ wɔzie la.

¹¹Na awie biala mɔɔ kɛde na yeandu yeandɔ yeanzonle ananze ne la bɛhye ye bɛdo sendɔlɔra nu bɛyela ye.

¹²Wɔva Dwuuma bie wɔzie Babelɔn kɛ bɛzie maanle ne. Menli ɛhye mɔ ɛmbu wɔ; bɛnzonle wɔ awozonle ne mɔ yɛɛ bɛnzonle ezukoa nvutuke ananze ne noko mɔɔ wɔzie la. Bɛmɛ a le Hyeedelake, Mihyake, yɛɛ Abɛdenɛgo.”

¹³Belemgbunli ne ahonle futule kpole na ɔzele kɛ bɛva Hyeedelake, Mihyake, yɛɛ Abɛdenɛgo bɛrɛla. Bɛhɔhyele menli ɛhye mɔ bɛrale.

¹⁴Nɛbukadenɛza bizale bɛ kɛ, “Hyeedelake, Mihyake, Abɛdenɛgo, asoo ɔle nɔhalɛ kɛ bɛnzonle me awozonle ne mɔ nee me ezukoa nvutuke ananze ne mɔɔ mezie la?

¹⁵Saa mekɛ biala bɛte aweɛne ndendenle ne, fulutu, getaa ngyikyi nee mgbole, ɛweɛne, yɛɛ agole ngakyile ne mɔ ane na bɛkɛdu bɛkɛgua, bɛkɛzonle ananze ne mɔɔ memaa bɛzie la a, ɛnee bɛ kɔme doa zolɛ. Na saa bɛanli zolɛ a, bɛbavuandi bɛ bɛagua sendɔlɔra nu bɛayela bɛ. Ɛkɛ yɛɛ bɛbahile nyamenle holɛ ko mɔɔ balie bɛ la a.”

¹⁶Hyeedelake, Mihyake, yɛɛ Abɛdenɛgo buale belemgbunli ne kɛ, “O Nana, Nɛbukadenɛza, ɔngyia kɛ yɛkɛbua wɔ edwɛkɛ ɛhye anwo bie.

¹⁷Saa ɔba ye zɔhane a, Nyamenle ne mɔɔ yɛsonle ye la kola die yɛ fi sendɔlɔra ne anu, yɛɛ ɔbalie yɛ yeavi ɛ sa nu.

¹⁸Saa yeanlie yɛ bɔbɔ a yɛka ye wienyi kɛ yɛnrɛzonle wɔ awozonle ne mɔ, yɛɛ yɛnrɛdu yɛnrɛgua wɔ ezukoa nvutuke ananze ne mɔɔ wɔzie la anyunlu.”

¹⁹Nɛbukadenɛza vale ɛya kpole, ɔmunlanle kpole kpalɛ wɔ Hyeedelake, Mihyake, yɛɛ Abɛdenɛgo edwɛkɛ ne ati. Ɔmanle bɛhuanle sendɔlɔra kpole kpalɛ mɔɔ ye ɛzɔlɛ ne kpole tɛla dɛba ɛdeɛ ne mɔ fane nsuu la.

²⁰Akee ɔyele ye ɛlɔnema ne anu menli kekahilii ne bie mɔ kɛ bɛkyekye Hyeedelake, Mihyake, yɛɛ Abɛdenɛgo na bɛvuandi bɛ bɛgua sendɔlɔra ne anu bɛyela bɛ.

²¹Zɔhane ati bɛkyekyele menli ɛhye mɔ boka bɛ adɛladeɛ mɔɔ bɛwulowula nee bɛ ahyɛlɛ mɔɔ bɛzozo la na bɛvuandinle bɛ bɛguale sendɔlɔra ne anu.

²²Belemgbunli mɛla ne anu mianle, yemɔti sendɔlɔra ne dɔlɔle kpole kpalɛ manle ye wuluwulu ne dwele vuale mrenya mɔɔ lɛ Hyeedelake, Mihyake, yɛɛ Abɛdenɛgo kagua nu la na ɔhunle bɛ.

²³Na bɛguale Hyeedelake, Mihyake, yɛɛ Abɛdenɛgo sendɔlɔra kpole ne anu.

²⁴Arɛlevilɛ nu, Nɛbukadenɛza dwazole na azibɛnwo nu ɔbizale ye mgbanyima ne mɔ kɛ, “Ayi mɔ, na tɛ menli nsa a yɛkyekyele bɛ yɛvuandinle bɛ yɛguale senle ne anu a?” Bɛbuale ye kɛ, “Nana, ɔle nɔhalɛ; yɛkyekyele menli nsa.”

²⁵Na ɔzele kɛ, “Noko menwu menli nna mɔɔ bɛtɛkyekyele bɛ la kɛ bɛluolua senle ne anu. Bɛ nwo kɔlɔnwo. Ko ne mɔɔ tɔ zolɛ nna la zɔho bozonle ralɛ nrenya.”

²⁶Belemgbunli Nɛbukadenɛza dudule agyakɛ bikyele sendɔlɔra ne na ɔzele kɛ, “Hyeedelake, Mihyake, Abɛdenɛgo, Anwuma Anwuma Nyamenle sonvolɛma, bɛvinde bɛrɛla!” Yemɔti Hyeedelake, Mihyake, yɛɛ Abɛdenɛgo vi sendɔlɔra ne anu vindele rale.

²⁷Maanle maanle ne mɔ anu arelemgbunli, amɛnladoma, yɛɛ belemgbunli folɛtuvolɛma mɔɔ rayiale ɛkɛ la lile daselɛ kɛ menli nsa ne anwo ɛleka biala ambu ɛbonle; bɛ ti enrinli bɔbɔ, senle anga ye na yeayɛ bɛ adɛladeɛ, yɛɛ bɛ nwo ambɔnle sisikpunlike bɔbɔ.

²⁸Belemgbunli Nɛbukadenɛza zele kɛ, “Ayɛlɛyelɛ ɛha Hyeedelake, Mihyake, yɛɛ Abɛdenɛgo Nyamenle ne. Ye sonvolɛma ne dule bɛ gye kɛ bɛnrɛli me mɛla ne azo, yɛɛ bɛnrɛdu bɛnrɛgua bɛnrɛzonle nyamenle biala kɛ bɛ Nyamenle ɛdeɛ ne ala. Bɛliele bɛ Nyamenle ne bɛlile na bɛvale bɛ nwonane bɛdole nzeleba, na amgba Nyamenle ɛzoa ye soanvolɛ yemaa yeralie bɛ.

²⁹“Yemɔti medi mɛla kɛ maanle anzɛɛ menli biala anzɛɛ aneɛ biala mɔɔ kɛdendɛ ɛtane kɛtia Hyeedelake, Mihyake, yɛɛ Abɛdenɛgo Nyamenle ne la, bɛdudu bɛ abɛsa abɛsa na bɛyela bɛ azua ne mɔ. Ɔluakɛ nyamenle biala ɛnle ɛkɛ mɔɔ kola die ngoane kɛ bɛ Nyamenle ɛdeɛ ne la.”

³⁰Na ɔmanle mgbavolɛ nsa ne, Hyeedelake, Mihyake, yɛɛ Abɛdenɛgo dibilɛ kpole wɔ Babelɔn maanzinli ne anu.