Read Nzema Dan 4 Bible Online

Dan 4 - Nzema bible

Dan 4

¹Belemgbunli Nɛbukadenɛza vale nrɛlaleɛ hɔmanle maanle maanle ne mɔ anu amra mɔɔ ka aneɛ ngakyile la kɛ, “Anzonudwolɛ kpole ɛha bɛ!

²Anwuma Anwuma Nyamenle ne ɛyɛ nwanwane ninyɛne, ɛye sɛkɛlɛneɛ ɛhile me, na ɔle kpalɛ kɛ menwɔha menwɔhile bɛ.

³“Ye sɛkɛlɛneɛ ne mɔ le mgbole! Ye nwanwane ninyɛne ne mɔ yɛ ɛzulolɛ! Ye belemgbunlililɛ ɛnlɛ awieleɛ, ye belemgbunlililɛ vi awolɛndoazo dwu awolɛndoazo.

⁴“Ɛnee medame Nɛbukadenɛza, mewɔ me sua nu anzonudwolɛ nu na me nye ɛlie me ɛkpazilɛ nu wɔ me suakunlu ɛkɛ.

⁵Menganle ɛlalɛ bie na mɔɔ mela me ɛkpa ne azo la ɛlalɛ ne gyinlegyinlanle me nye zo, na ɛzulolɛ hanle me.

⁶Yemɔti menlile mɛla kɛ nrɛlɛbɛvolɛma mɔɔ wɔ Babelɔn la amuala ɛrɛla ɛrahile me ɛlalɛ ne abo.

⁷Na ngonyiayevoma, silikyevoma, adunyipɛvoma, yɛɛ nwɔlɔra kengavoma rayiale; menganle me ɛlalɛ ne mengilele bɛ, na bɛangola ɛlalɛ ne abo kile.

⁸Nzinlii Daneɛle mɔɔ Nyamenle Nwuanzanwuanza ne Sunsum ne wɔ ye nu, na menvale me bozonle Bɛletihyazaa duma mendonle ye la rale. Menganle ɛlalɛ ne mengilele ye. Mese:

⁹O Bɛletihyazaa, Nyamenle Nwuanzanwuanza ne Sunsum wɔ wɔ nu. Wɔmɔ, ɛle ngonyiama amuala kpanyinli, yɛɛ fealera nu debie biala ɛmbo ɛ nwo zo. Ɛlalɛ mɔɔ meha la ɛ, na kile me ɔ bo.

¹⁰“Mewɔ nla nu la, menganle ɛlalɛ menwunle kɛ baka kpole tendenle bie gyi ɛkɛ.

¹¹Baka ne nyinle toonwo ɔyɛle kpole kpalɛ, ɔ ti dwule Nyamenle ne ako abo lɔ mɔɔ aleɛabo amra amuala nwu ye la.

¹²Ye nya le kpukpotoloo yɛɛ ye ma zonle dɔɔnwo mɔɔ debie biala nyia bie di a. Ɛbɔ nu nane bada ye alubo ne anu yɛɛ nloma da ye ngane ne mɔ anu; nane nee menli kpokpoti di ye ma ne bie.

¹³“Me nye gyi ɛhye anwo la, menwunle ye wɔ ɛlalɛ ne anu kɛ Nyamenle soanvolɛ vi anwuma ɛdwu aze.

¹⁴Ɔdeanle nuhua kpole bie kɛ, ‘Bɛdu baka ne bɛdo aze, bɛpepɛ ye ngane ne mɔ, bɛkpolo ye nya ne mɔ na bɛdo ye ma ne mɔ bɛkponde. Bɛmaa nane ne mɔ ɛvi ɔ bo ɛnriandi ɛhɔ na nloma ne mɔ vi ye ngane ne mɔ anu ɛdu.

¹⁵Bɛgyakyi ye dosinli ne nee ye ndinli ne mɔ azɛlɛ ne anwo na bɛva mbulalɛ nee kɔbele bɛnyinyi nwolɛ wɔ ndile ne anu. “ ‘Bɛmaa ɛbɔlɛ ɛdɔ ɛgua nrenya ɛhye anwo zo, na ɔ nee ɛbɔ nu nane nee mbaka ɛva adwenle.

¹⁶Bɛmaa ye sonla adwenle kpalɛ ne ɛminli, na ɔnyia nane adwenle toonwo ɛvolɛ nsuu.

¹⁷Nyamenle soanvolɛma ne mɔɔ sinza la anloa edwɛkɛ ɛne. Ɔle kpɔkɛ mɔɔ nwuanzanwuanzama ne ɛbɔ, amaa menli kɔsɔɔti anwu kɛ Anwuma Anwumanli ne lɛ tumi wɔ ewiade belemgbunlililɛ zo, yɛɛ ɔfa ɔmaa awie biala mɔɔ ɔkulo la, ɔnvane nwolɛ kɛ ahenle le koahweabane bɔbɔ.’

¹⁸“Bɛletihyazaa, ɛlalɛ ɛhye a medame Belemgbunli Nɛbukadenɛza menganle a, kile me ɔ bo, ɔboalekɛ Anwuma Nyamenle ne Sunsum wɔ wɔ nu. Nrɛlɛbɛvolɛma mɔɔ wɔ me maanle ye anu la amuala ɛyɛ biala na bɛangola bɛangile ɔ bo.”

¹⁹Akee Daneɛle, mɔɔ eza bɛfɛlɛ ye Bɛletihyazaa la, ahonle dule. Belemgbunli ne zele ye kɛ, “Bɛletihyazaa, mmamaa wɔ ahonle tu ɛlalɛ ne anzɛɛ ɔ bo ɛhilelɛ ne anwo.” Bɛletihyazaa buale kɛ, “Me menle, mesɛlɛ kɛ anrɛɛ ɛlalɛ ne ɛntia wɔ na ɔtia wɔ kpɔvolɛma nee menli mɔɔ kyi wɔ la!

²⁰Nana, baka kpole tendenle ne mɔɔ ɛnwunle kɛ ɔgyi ɛkɛ, yenyi yekpula Nyamenle ne ako abo nehane, mɔɔ bɛnwu ye aleɛabo ɛleka biala, mɔɔ ye nya le kpukpotoloo,

²¹ye ma le dɔɔnwo, na ɛbɔ nu nane bafea ye alubo nu, yɛɛ nloma banwo bɛ sane wɔ ye ngane ne mɔ anu, yɛɛ nane nee menli kɔsɔɔti di ye ma ne bie la, yemɔ a le ɛdawɔ.

²²“Nana, ɛdawɔ a wɔnyi na wɔnyia anwosesebɛ la. Wɔ anwosesebɛ ne kpole ɛkpula anwuma yɛɛ wɔ tumi ɛdende ɛdwu ewiade ɛleka biala.

²³Nana nwunle kɛ Nyamenle soanvolɛ vi anwuma ɛdwu na yearaze kɛ, ‘Bɛbu baka ne, bɛzɛkye ye na bɛgyakyi ye dosinli ne wɔ azɛlɛ ne anwo, na bɛva mbulalɛ nee kɔbele bɛnyinyi nwolɛ wɔ ndile ne anu. Bɛmaa ɛbɔlɛ ɛdɔ ɛgua ɔ nwo zo na ɔ nee ɛbɔ nu nane ɛhɔdɛnla ɛvolɛ nsuu.’

²⁴“Nana, ɛlalɛ ne abo a le kɛ, Anwuma Anwumanli ne kpondɛ kɛ ɛnwu debie mɔɔ bazi ɛ nwo zo la.

²⁵Bɛbavoa wɔ bɛavi menli nu bɛamaa ɛ nee ɛbɔ nu nane ahɔdɛnla; ɛbali ndile kɛ ɛnlankɛ nyinli na ɛbɔlɛ adɔ ɛ nwo zo toonwo ɛvolɛ nsuu. Ɛhye anzi ɛbanwu kɛ Anwuma Anwumanli ne a sie ewiade a, yɛɛ ɔfa ɔmaa awie biala mɔɔ ɔkulo la.

²⁶Ɛdele kɛ Nyamenle soanvolɛ ne hanle kɛ bɛgyakyi baka dosinli ne azɛlɛ ne anwo. Ɛhye kile kɛ saa ɛ nye zo tete wɔ na ɛdie ɛto nu kɛ Nyamenle a sie ewiade a, ɛbazia wɔazie wɔ maanle ne bieko.

²⁷Zɔhane ati, Nana, die me folɛ mɔɔ melɛtu wɔ la to nu. Gyakyi ɛtanelilɛ nee ninyɛndane ɛyɛlɛ, na bɔ ɛbɛla tenlene, nwu bɛdabɛ mɔɔ bɛlɛsisi bɛ la anwunvɔne, amaa wɔahɔ zolɛ wɔakpazi.”

²⁸Ninyɛne ɛhye mɔ amuala rale Belemgbunli Nɛbukadenɛza anwo zo.

²⁹Ɛvolɛ ko anzi, kenle ko bie mɔɔ belemgbunli ne lua Babelɔn suakunlu ɛkɛ ne sua ne ati zo la

³⁰ɔhanle kɛ, “Babelɔn a ɛdɛlɛ kpole zɛhae la! Meva medame me tumi kpole ne a mekyekye a. Mekyekye kɛ mefa meayɛ me maanle ne suakpole, amaa menli anwu anyunlunyia mɔɔ wɔ me belemgbunlililɛ nu a.”

³¹Belemgbunli ne anloa ampe yɛɛ ɛnelɛ bie dendɛle vi anwuma kɛ, “Belemgbunli Nɛbukadenɛza, tie ɛ! Bɛlie wɔ belemgbunlililɛ ne ɛ sa nu.

³²Bɛbavoa wɔ bɛavi menli avinli na ɛ nee ɛbɔ nu nane ahɔdɛnla. Bɛbamaa wɔali ndile kɛ ɛnlankɛ nyinli la toonwo ɛvolɛ nsuu, kɔkpula mekɛ mɔɔ ɛkɛnwu kɛ Anwuma Anwumanli ne a sie ewiade a, yɛɛ ɔfa ɔmaa awie biala mɔɔ ɔkulo la.”

³³Ɛkɛ ne ala edwɛkɛ ne yɛle zɔhane wɔ Nɛbukadenɛza anwo zo. Bɛvoanle ye bɛvile menli avinli, ɔlile ndile kɛ ɛnlankɛ nyinli la, ɛbɔlɛ dɔle loale ye toonwo ɔ ti enrinli ndendenle yɛle kɛ kɔleɛ ndɛkɛ na ye bɔweɛlɛ vile yɛle kɛ kpolakɛ asa ati la.

³⁴“Ɛvolɛ nsuu ne dwule la, medame Nɛbukadenɛza, mendole me nye anwomanyunlu, na me nye rale me nwo zo. Menyele Anwuma Anwumanli ne ayɛlɛ na menyeyɛle teasenli ne menlile ye eni kɛ: “Ye belemgbunlililɛ ɛnrɛbɔ aze ɛlɛ, ye belemgbunlililɛ vi awolɛndoazo dwu awolɛndoazo.

³⁵Aleɛabo amra amuala ɛnzɔho ɛhwee ɔ nye zo; ɔyɛ debie biala mɔɔ ɔkulo la wɔ anwuma amra nee aze amra avinli. Awie ɛngola ɛndua ye yɛɛ awie ɛngola ɛmbiza ye kɛ, ‘Duzu a ɛlɛyɛ la?’

³⁶“Mekɛ ne anu ala me adwenle ziale rale sua nu; na me belemgbunlililɛ anyunlunyia ne, me belemgbunli tumi ne nee ye kɛnlɛma ne eza yɛle me ɛdeɛ. Menli mɔɔ tu me folɛ nee me mgbanyima kpondɛle me bo zo, na me belemgbunlililɛ ne lile munli. Eza menyɛle kpole, menyianle me nyunlu bɔbɔ mendɛlale alumua ne.

³⁷“Akee kɛkala, medame Nɛbukadenɛza, mefa ayɛlɛyelɛ, enililɛ mewula Anwuma Belemgbunli ne anyunlunyia. Ɔluakɛ ye gyima kɔsɔɔti le kpalɛ, yɛɛ ye ndenle le fɔɔnwo, na bɛdabɛ mɔɔ bɛmemaa bɛ nwo zo la, ɔkola ɔbɛlɛ bɛ aze.”