Read Nzema Dan 5 Bible Online

Dan 5 - Nzema bible

Dan 5

¹Belemgbunli Bɛlehyaza dole ye mgbanyima ne mɔ apenle ko ɛkponle kpole bie na ɔ nee bɛ muala nlonle nza.

²Bɛlehyaza zɔle nza ne bie nleanle la, ɔhanle kɛ bɛhɔsesa ezukoa nvutuke ahɔpo nee dwɛtɛ fufule ahɔpo ne mɔ mɔɔ ɔ ze Nɛbukadenɛza sesale bɛ wɔ Gyɛlusalɛm Ɛzonlenlɛ Sua ne anu la bɛrɛla bɛmaa belemgbunli nee ye maanle mgbanyima, ye mraalɛ nee ye mgbɔnla ne mɔ ɛnlo nu.

³Bɛvale ezukoa nvutuke ahɔpo nee dwɛtɛ fufule ahɔpo ne mɔ mɔɔ bɛsesale bɛ wɔ Gyɛlusalɛm Nyamenle Ɛzonlenlɛ Sua ne anu la bɛrale. Belemgbunli nee ye mgbanyima ne, ye mraalɛ nee ye mgbɔnla ne mɔ vale nlonle bɛ nza ne.

⁴Bɛnlonle nza ne na bɛyeyɛle ezukoa nvutuke, dwɛtɛ fufule, kɔbele, bulalɛ, baka, yɛɛ bolɛ awozonle ne mɔ.

⁵Ɛkɛ ne ala bɛnwunle sonla ɛsalɛ kɛ yevinde na ɔlɛkɛlɛ suakunlu ɛkɛ ne bane ne mɔɔ nee kɛnlaneɛ baka ne anye bɔ zolɛ la anwo. Belemgbunli ne nwunle ɛsalɛ ne mɔɔ ɛlɛkɛlɛ la;

⁶na ɔ nyunlu hunle, ye adwenle zɛkyele, ɔ nwo wozole ye na ɔ gyakɛ bɔle nwolɛ tɛtɛtɛtɛ.

⁷Ɔdeanle nuhua kɛ bɛvɛlɛ silikyevoma, ngonyiayevoma, yɛɛ nwɔlɔrakengavoma bɛmaa bɛrɛla. Na belemgbunli ne hanle hilele Babelɔn nrɛlɛbɛvolɛma ne mɔ kɛ, “Awie biala mɔɔ kɛhola kɛgenga ngɛlɛlera ɛhye na ɔkɛhile me ɔ bo la, bɛbawula ye belemgbunli tɛladeɛ, bɛava ezukoa nvutuke ndweabane bɛado ɔ kɔme, na meayɛ ye maanlebuvo mɔɔ tɔ zolɛ nsa.”

⁸Nrɛlɛbɛvolɛma mɔɔ wɔ belemgbunli ne abo la amuala rale ye ɛvɛlɛlɛ ne, na bɛangola bɛangenga ngɛlɛlera ne bɛangile ɔ bo bɛangile belemgbunli ne.

⁹Akee ɛzulolɛ hanle Belemgbunli Bɛlehyaza na ɔ rɛle bɔle kpole kpalɛ, ɛhye ati ye mgbanyima ne mɔ adwenle zɛkyele.

¹⁰Belemgbunli raalɛ ne dele belemgbunli nee ye mgbanyima ne mɔ ane la, ɔrale ɛkponledolɛ sua ne anu na ɔzele kɛ, “Belemgbunli, nyi kyɛ! Mmamaa ɔyɛ wɔ ɛzulolɛ yɛɛ mmamaa ɛ rɛle bɔ.

¹¹Nrenya bie wɔ wɔ maanle ye anu mɔɔ Nyamenle Nwuanzanwuanza ne Sunsum wɔ ye nu. Ɛ ze Nɛbukadenɛza mekɛ zo, bɛnwunle kɛ ɔlɛ wienyi bie li ɔ nyunlu, ɔlɛ ndelebɛbo, yɛɛ ɔze nrɛlɛbɛ kɛ awozonle ne mɔ ala la. Ɔlua ɛhye ati Nɛbukadenɛza yɛle ye ngonyiayevoma, silikyevoma, adunyipɛvoma, yɛɛ nwɔlɔrakengavoma kpanyinli.

¹²Nrenya ɛhye a le Daneɛle mɔɔ ɛ ze Nɛbukadenɛza donle ye Bɛletihyazaa la. Bɛnwunle kɛ Daneɛle lɛ sunsum, ɔlɛ adwenle, ɔlɛ ndelebɛbo ɔfa ɔkile ɛlalɛ bo, ɔkilehile agyiba nu, na ɔkola ɔye edwɛkɛ ɛsesebɛ biala anloa. Maa bɛhɔvɛlɛ ye na ɔkɛhile wɔ ngɛlɛlera ne mɔɔ wɔ bane ne anwo la abo.”

¹³Bɛhɔvale Daneɛle bɛrale na belemgbunli ne zele ye kɛ, “Wɔmɔ Daneɛle, se ɛle Dwudama mɔɔ egya hyele bɛ rale nlɔnu wɔ ɛke la anu ko?

¹⁴Mede kɛ Nyamenle Nwuanzanwuanza ne Sunsum wɔ wɔ nu, yɛɛ ɛlɛ wienyi bie li ɛ nyunlu, ɛlɛ ndelebɛbo, yɛɛ ɛze nrɛlɛbɛ kpole kpalɛ.

¹⁵Bɛva ngonyiayevoma nee nrɛlɛbɛvolɛma bɛra kɛ bɛgenga ngɛlɛlera ɛhye na bɛhile me ɔ bo, na bɛangola ɔ bo kile.

¹⁶Na mede kɛ ɛkola ɛkile debie bo yɛɛ ɛkola ɛgyinla edwɛkɛ ɛsesebɛ nloa. Saa ɛkola ngɛlɛlera ne kenga ɛkile ɔ bo ɛkile me a, bɛbawula wɔ belemgbunli tɛladeɛ, bɛava ezukoa nvutuke ndweabane bɛado ɛ kɔme, na wɔayɛ maanlebuvo mɔɔ tɔ zolɛ nsa la.”

¹⁷Daneɛle buale belemgbunli ne kɛ, “Nana, maa wɔ ahyɛlɛdeɛ ne ɛwoa ɛkɛ; saa ɛkulo noko a fa kyɛ awie na mame, mekenga ngɛlɛlera ne meahile ɔ bo meahile wɔ.

¹⁸“Nana, Anwuma Anwuma Nyamenle ne yɛle ɛ ze Nɛbukadenɛza belemgbunli kpole na ɔnyianle ɔ nyunlu.

¹⁹Ɔlua kpole mɔɔ Nyamenle yɛle ye la ati menli nee maanle maanle kɔsɔɔti mɔɔ ka aneɛ ngakyile la dwu ɔ nyunlu a, bɛsulo na bɛ nwo wozo bɛ. Saa ɔse kɛ bɛhu awie a, bɛku ye, yɛɛ saa ɔse kɛ bɛdwula awie a, bɛdwula ye. Ɔkola ɔmaa awie gyinlabelɛ; ɔkola ɔka awie aze.

²⁰Ɔ ti anu yɛle ye fɛ manle ɔmemanle ɔ nwo zo, ɔyɛle anzosesebɛ, yemɔti bɛliele ye belemgbunlililɛ ne wɔ ɔ sa nu na bɛyele ye anyunlunyia ne.

²¹Bɛvoanle ye bɛvile menli avinli, ye adwenle yɛle kɛ nane adwenle na ɔ nee nanemgbole hɔdɛnlanle. Ɔlile ndile kɛ ɛnlankɛ nyinli la, ɛbɔlɛ dɔle loale ye hɔdwule kɛ ɔnwunle kɛ Anwuma Anwuma Nyamenle ne a sie ewiade a, yɛɛ ɔfa ɔmaa sonla mɔɔ ɔkulo ye la nea zolɛ.

²²“Wɔmɔ Bɛlehyaza, Nɛbukadenɛza akunlu ralɛ nrenya a le wɔ, yɛɛ ɛze ɛhye mɔ amuala ɛsie, noko wɔanga ɛ nwo aze

²³na wɔhakyi ɛ nzi wɔzi Anwuma Nyamenle ne. Bɛva ahɔpo ne mɔ mɔɔ wɔ Ɛdɛnkɛma Ɛzonlenlɛ Sua ne anu la bɛrɛlɛ wɔ na ɛ nee wɔ mgbanyima, wɔ mraalɛ, yɛɛ wɔ mgbɔnla ne mɔ ɛnlo nu. Wɔye dwɛtɛ fufule, ezukoa nvutuke, kɔbele, bulalɛ, baka, yɛɛ bolɛ awozonle ne mɔ mɔɔ ɛnnwu debie, ɛnde edwɛkɛ, ɛnze ɛhwee la ayɛlɛ wɔgyakyi Nyamenle ne mɔɔ wɔ ngoane nee wɔ ndenle kɔsɔɔti wɔ ɔ sa nu la.

²⁴Yemɔti a yezoa ɛsalɛ ne yemaa yerahɛlɛ ngɛlɛlera ɛhye la.

²⁵“Debie mɔɔ bɛhɛlɛle la a le, ‘MINI, MINI, TIKƐLE U PASEN.’

²⁶Edwɛkɛ ne abo a le ɛhye: MINI, Nyamenle ɛbu wɔ belemgbunlililɛ mekɛ ne na yezɔ ɔ nloa;

²⁷TIKƐLE, bɛzuzu wɔ wɔ tone nu bɛnwu kɛ ɛndo ɛhwee;

²⁸U PASEN, bɛhyɛ wɔ maanle ne anu bɛmaa Midiama nee Pɛhyeama.”

²⁹ Ɛkɛ ne ala Bɛlehyaza manle ye sonvolɛma wulale Daneɛle belemgbunli tɛladeɛ kɔkɔlɛ, bɛvale ezukoa nvutuke ndweabane bɛdole ɔ kɔme, na bɛbɔle ye nolo kɛ bɛyɛ ye maanlebuvo mɔɔ tɔ zolɛ nsa.

³⁰Kenle ko ne nɔe ne ala bɛhunle Babelonia Belemgbunli Bɛlehyaza

³¹na Midianli Dalayɛse vale ebia ne dɛnlanle zolɛ. Ɛnee yeli ɛvolɛ kɛyɛ abulasia nee nwiɔ.