Read Nzema Dan 6 Bible Online

Dan 6 - Nzema bible

Dan 6

¹Dalayɛse vale adwenle kɛ ɔye amɛnladoma ɛya ko abulanwiɔ yeamaa bɛanlea maanzinli ne mɔ azo.

²Akee ɔyele Daneɛle nee menli nwiɔ bie noko kɛ bɛmɛ nsa bɛnlea amɛnladoma ɛya ko abulanwiɔ ne mɔ anwo zo, amaa belemgbunli ne amminli debie.

³Daneɛle yɛle gyima dɛlale mgbanyima mɔɔ ɛha la nee amɛnladoma ne mɔ amuala, ɔboalekɛ sunsum kpalɛ wɔ ye nu. Yemɔti belemgbunli ne yɛle kɛ ɔmaa yeazie maanle ne kɔsɔɔti.

⁴Mgbanyima ne nee amɛnladoma ne mɔ bɔle kpɔkɛ kɛ bɛnea Daneɛle maamulɛ ne anu boɛ bɛakpondɛ nvonleɛ bie bɛatia ye, na bɛannyia ɛzonle biala bɛando Daneɛle anwo zo, ɔboalekɛ ɔdi nɔhalɛ; bɛannwu ɛtane anzɛɛ nvonleɛ wɔ ye maamulɛ nu.

⁵Akee menli ne mɔ hanle kɛ, “Daneɛle ɛhye, saa yeanlua ye Nyamenle ne ɛzonlenlɛ zo yeamkpondɛ debie yɛantia ye a, yɛnrɛnyia ɔ nwo edwɛkɛ ɛtane ɛlɛ.”

⁶Yemɔti mgbanyima ne nee amɛnladoma ne mɔ lile bɛ nloa rale belemgbunli ɛkɛ rahanle hilele ye kɛ, “Belemgbunli Dalayɛse, nyi kyɛ!

⁷Kɛkala, maanle ye anu mgbanyima, amɛnladoma, folɛdulɛma, yɛɛ maanzinli zo neavolɛma amuala ɛlie ɛdo nu kɛ ɔwɔ kɛ ɛdi mɛla, ɛkye ɔ bo kɛ, ‘Awie biala mmaye ɛdɛne maa nyamenle biala anzɛɛ biza sonla biala debie toonwo kenle kɔkɔlɛ abulasa (siane ko) na ɛ ngomekye a bɛva bɛ ti bɛzɔ wɔ a. Awie biala mɔɔ anli mɛla ɛhye azo la, ɔwɔ kɛ bɛfuandi ye bɛto awenade ne mɔ tunli ne anu.’

⁸Nana, di mɛla ne fa ɛ sa wula ɔ bo kile kɛ bɛngakyi ye ɛlɛ, kɛmɔ Midiama, nee Pɛhyeama mɛla ne se la.”

⁹Zɔhane ati Belemgbunli Dalayɛse lile mɛla ne na ɔvale ɔ sa ɔwulale ɔ bo.

¹⁰Daneɛle nwunle kɛ bɛlie mɛla ne bɛdo nu na belemgbunli ɛva ɔ sa ɛwula ɔ bo la, ɔhɔle sua nu, ɔbukebukele ye nvɛnzɛlɛ ne mɔ mɔɔ kɔne Gyɛlusalɛm afoa nu la ɔguale nwolɛ, na kenle ko biala ɔhotole ɔzɛlɛle na ɔyɛle ye Nyamenle ne mo fane nsa, kɛmɔ ɛnee ɔyɛ ye dɛba ne la.

¹¹Daneɛle kpɔvolɛma ne mɔ radɛle ye nwunle kɛ ɔlɛsɛlɛ yeavɛlɛ ye Nyamenle ne.

¹²Yemɔti bɛrale belemgbunli ɛkɛ bɛrabizale ye mɛla ne anwo bie kɛ, “Nana, ɛkɛhakye kɛ wɔli mɛla, wɔhye ɔ bo wɔmaa awie biala siane ko kɛ ɔva ɔ ti ɔzɔ wɔmɔ ala ɔyɛ nzɛlɛlɛ, na awie mɔɔ annea ɛ ngomekye na ɔkɛbiza nyamenle biala anzɛɛ sonla ɛkɛ debie la, bɛvuandi ye bɛdo awenade ne mɔ tunli ne anu?” Belemgbunli ne buale kɛ, “Nɔhalɛ ɔ! Midiama nee Pɛhyeama mɛla ɔ, ɔgyi kpundii, bɛtulu ye a ɔntulu.”

¹³Akee bɛhanle bɛhilele belemgbunli ne kɛ, “Daneɛle, mɔɔ le Dwudama mɔɔ bɛhyele bɛ bɛrale nlɔnu wɔ ɛke la anu ko la ɛmbu wɔ, yɛɛ ɔmbu wɔ mɛla ne. Kenle ko biala ɔyɛ nzɛlɛlɛ fane nsa.”

¹⁴Belemgbunli dele edwɛkɛ ne la, ɔgyegyele ye adwenle dɔɔnwo. Ɛbɔ ye nwonlomɔ ne toonwo mɔɔ kɔdwu nɔsolɛ nu la ɛnee ɔlɛkpondɛ adenle yealua nu yealie Daneɛle.

¹⁵Menli ne amuala ziale razele belemgbunli ne kɛ, “Nana, mmamaa ɛ rɛle fi kɛ, Midia nee Pɛhyea maanle nu, saa belemgbunli di mɛla fa ɔ sa wula ɔ bo a bɛntulu ye.”

¹⁶Ɔlua ɛhye ati belemgbunli ne manle bɛhɔvale Daneɛle bɛrale na bɛvuandinle ye bɛdole awenade ne mɔ tunli ne anu. Belemgbunli ne zele Daneɛle kɛ, “Wɔ Nyamenle ne mɔɔ ɛsonle ye dahuu la ɛlie wɔ ngoane!”

¹⁷Bɛvale bolɛ bɛranyinle tunli ne. Akee belemgbunli vale ɔdaye mumua ne ye tumi sɛkɛlɛneɛ ne nee ye mgbanyima ne mɔ tumi sɛkɛlɛneɛ ne mɔ sosɔle bolɛ ne amaa awie angola anyɛ debie biala kɛ ɔdie Daneɛle.

¹⁸Belemgbunli ne ziale hɔle ye suakunlu ɛkɛ. Yeanva debie fee yeanga ɔ nloa, yeanlie ɔ nye, yɛɛ aledwolɛ ne anu, nafelɛ angɔ ɔ nye zo.

¹⁹Aleɛbahye ne, belemgbunli ne dwazole na ɔhanle ɔ nwo ɔhɔle awenade tunli ne anwo.

²⁰Ɔbikyele tunli ne la ɔvale abodelɛ ɔdeanle nuhua kɛ, “Tease Nyamenle ne sonvolɛ Daneɛle! Asoo wɔ Nyamenle ne mɔɔ ɛsonle ye dahuu la ɛhola ɛlie wɔ ɛvi awenade ne mɔ asa anu?”

²¹Daneɛle buale belemgbunli ne kɛ, “Nana, nyi kyɛ!

²²Me Nyamenle ne zoanle ye soanvolɛ manle ɔratotole awenade ne mɔ anloa anu, yemɔti bɛanva bɛ nloa bɛanga me. Ɔluakɛ medi benle wɔ me Nyamenle ne anyunlu yɛɛ medi benle wɔ ɛdawɔ noko ɛ nyunlu. Nana, metɛyɛle ɛtane biala.”

²³Belemgbunli Dalayɛse lile fɛlɛko kpole na ɔzile ɔ gyakɛ aze kɛ bɛye Daneɛle wɔ tunli ne anu. Yemɔti bɛyele Daneɛle wɔ tunli ne anu, ɔ nwo kɔlɔnwo, ɔboalekɛ ɔvale ɔ rɛle ɔwulale ye Nyamenle ne nu.

²⁴Belemgbunli manle bɛhɔhyele menli mɔɔ doanle Daneɛle la bɛrale, na bɛvuandinle bɛ nee bɛ mra nee bɛ mraalɛ bɛguale awenade tunli ne anu. Bɛandwu aze wɔ tunli ne anu bɔbɔ, awenade ne mɔ sosɔle bɛ anwuma tetele bɛ azinli lile.

²⁵Belemgbunli Dalayɛse hɛlɛle hɔmanle maanle maanle nee menli ngakyile mɔɔ bɛ aneɛ le ngakyile la kɛ, “Anzonudwolɛ dɔɔnwo ɛha bɛ!

²⁶Memaa bɛade kɛ meli mɛla kɛ awie biala mɔɔ wɔ me maanle ye anu la ɛzonle na ɔzulo Daneɛle Nyamenle ne. “Ɔluakɛ ɔle Tease Nyamenle, ɔwɔ ɛkɛ ne dahuu; na ɔbali belemgbunli dahuu.

²⁷Ɔdie ngoane, ɔye menli ɔfi munzule nu; ɔyɛ sɛkɛlɛneɛ, ɔyɛ nwanwane gyima wɔ anwuma nee aze. Yelie Daneɛle yevi awenade ne mɔ asa anu.”

²⁸Yemɔti Daneɛle nyianle ɔ nyunlu wɔ Belemgbunli Dalayɛse nee Pɛhyeanli Belemgbunli Saelɛse mekɛ zo.